Nabbabiyaageetu Oyshaa . . .

Ubba asau Xoossaa eriyoonne siiqiyo injjee deˈii?

▪ Ubbaappe aadhiya azazoy awugaakko oyshettido wode, Yesuusi: “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa” yaagiis. (Maa. 22:37) Gidikkokka, asay Xoossaa siiqanau, kasetidi abaa suure eraa demmana koshshees. (Yoh. 17:3) Ubba asau he eraa demmiyo issi mala injjee deˈanee?

Xoossaabaa eranau maaddiya waannabay Geeshsha Maxaafaa. (2 Xim. 3:16) Daroti metootennan Geeshsha Maxaafaa demmana danddayiyo heeratun deˈoosona. Xoossaabaa suure eraa demmanau Geeshsha Maxaafaa xannaˈanaadan he asati darotoo shoobettennan aggokkona. (Maa. 28:19) Issoota issoota dichiday, eti galla galla xoossaabaa tamaaranaadan injjiyaa medhida, siiqiya Kiristtaane aawaanne aayyiyoo.—Zaa. 6:6, 7; Efi. 6:4.

SHin harati, darin injjetenna hanotan deˈoosona. Issoota issoota dichidaageeti bantta naata siiqenna, bessenna ogiyan oyqqiya aawaanne aayyiyo. (2 Xim. 3:1-5) Hegaa mala hanotan diccidaageeti, Xoossaa saluwan deˈiya siiqiya Aawa oottidi xeellanau metootana danddayoosona. Daroti koshshiyaagaa keenaa tamaaribeenna gishshau, Geeshsha Maxaafaa nabbabanau metootoosona. Harati qassi worddo haymaanootiyaa timirttiyaa tamaaridosona; woykko Geeshsha Maxaafaa timirttiyaa koyenna keettan, heeran woy biittan deˈoosona. (2 Qor. 4:4) Hegaa mala asatu hanotay eti Xoossaabaa tamaarennaadaaninne a siiqennaadan diggii?

Issi issi asaa metoy, Xoossaa siiqiyoogeenne au azazettiyoogee eta metanaadan oottiyoogaa Yesuusi akeekiis. (Maa. 19:23, 24) Gidikkokka, issi issi metoy asau wolqqappe aadhiyaaba milatikkokka, “Xoossau ubbabai danddayettees” yaagidi Yesuusi ba erissiyo ashkkarata akeekissiis.—Maa. 19:25, 26.

Kaallidi deˈiya qofaa akeekite: Xoossaa Yihooway ba Qaalay, Geeshsha Maxaafay ayba maxaafappenne aaruwan ubbasaa gakkanaadan oottiis. Xoossaabaanne a halchuwaabaa yootiyo mishiraachoy “sa7a ubban” odettanaagaa Geeshsha Maxaafay kasetidi yootiis. (Maa. 24:14) Ha wodiyan Yihoowa Markkati 230⁠ppe dariya biittatun he mishiraachuwaa yootoosona; qassi Geeshsha Maxaafan baasettida xuufeta 500 gidiya qaalan giigissoosona. Geeshsha Maxaafaa demmennaageetikka Xoossay medhidobaa akeekiyoogan tumu Xoossaabaa darobaa tamaarana danddayoosona.—Roo. 1:20.

Hegaa bollikka, Xoossaa Qaalay: “GODAI wozanaa ubbaa qorees; qofan de7⁠iya halchchuwaa ubbaakka erees. Neeni a koyikko, i neeyyo beettana” yaagees. (1 Odi. 28:9) Yaatiyo gishshau, ubba asay issi mala injjiyaa demmanaagaa Yihooway qaalaa gelibeennaba gidikkokka, ashkke gidida ubba asau injjee deˈiyoogaa akeekissees. Ubba abaa mule eribeennaageeti, xilloti deˈana ooratta alamiyan hayquwaappe denddidi, he injjiyaa demmanaadan i oottana.—Oos. 24:15.