Woosaa

1 Koshshiyoy Aybissee?

WOOSAA. Woosay eranau keehippe koyanaadan denttettiya qofa; hegaa mala qofati Geeshsha Maxaafan daro gidokkona. Woosaa xeelliyaagan darotoo oychiyo ichashu yohota qoppa; yaatada, Geeshsha Maxaafay immiyo zaarota nunaara pilgga. Ha huuphe yohoti neeni woossanaadan, giishin woosaa doommanaadan woykko kaseegaappe loˈˈo ogiyan woossanaadan maaddanau giigidosona.

ALAME yuushuwan, ubba wogaaninne haymaanootiyan deˈiya asay woossees. Eti banttarkka deˈiyo wode gidin, citankka gidin woossoosona. Eti woosa keettan, beetamaqidasiyan, masggidiyaaninne geeshsha giyo hegaa mala sohuwan woossoosona. Eti gozddaa shuuyidoogaa, misiliyaa, woosaa maxaafaanne hegaa malabaa woosau goˈettana danddayoosona.

Asaa naati saˈan paxa deˈiya mereta ubbaappe dummatiyo issi ogee woossiyoogaa. Nuuni mehiyaaranne doˈaara issi mala gidiyo daro hanotay deˈiyoogee tuma. Etaagaadan nuussi qumay, carkkoynne haattay koshshees. Etaagaadan, yelettoos, deˈoosinne hayqqoos. (Era. 3:19) SHin woossiyay asaa naatu xalaala. Aybissi?

Hegau qoncce zaaroy nuuni woossanau koyiyoogaa. Woosay darotoo asay geeshshabadaaninne merinau deˈiyaabadan xeelliyoobaara gayttiyo ogedan qofettees. Nuuni hegaa malabaa koshshay deˈiyoogeeta gididi merettidoogaa Geeshsha Maxaafay yootees. (Era. 3:11) Yesuus Kiristtoosi issi wode, “Bantta ayyaanan hiyyeesa gididoogaa woykko ayyaanaaban banttau koshshiyaabaa eriyaageeti anjjettidaageeta” yaagiis.—Maa. 5:3.

‘Ayyaanaaban koshshiyaabaa’—Goynuwau gita keettatanne wogo miishshata goˈettiyoogau, qassi daro saatiyau woossiyoogau hegaappe hara ayba gaasoy deˈii? Issi issi asay ayyaanaaban banttau koshshiyaabaa kunttanau banttanan woy hara asan ammanettoosona. Gidoppe attin, asaa naati koshshiyaagaadan maaddana danddayennabadan neeyyo siyettennee? Nuuni keehippe daafurancha, nu baree qantta, qassi nu akeekay guutta. Nuuppe keehi erancha, wolqqaamanne daro wodiyaa deˈiya ura xallay nuussi koshshiyaabaa kunttana danddayees. SHin nuuni woossanaadan denttettiya, ayyaanaaban koshshiyaabati aybee?

Hagaa qoppa: Kaaletuwaa, aadhida eratettaa woykko asi erana danddayennaba milatiya oyshatu zaaruwaa demmanau amotta eray? Siiqiyo asi hayqqin azzanido wode minttettuwaa demmanau, issi unˈˈissiyaabay merettiyo wode kuuyanau kaaletuwaa demmanau, woy ne mooruwan keehippe zilˈˈettiyo wode maarotettaa demmanau koya eray?

Geeshsha Maxaafay yootiyoogaadan, ha ubbabati woossanau koshshiyaabata. Ha allaalliyaa xeelliyaagan Geeshsha Maxaafay keehi ammanttiya maxaafa; qassi Xoossau ammanettida daro attumaasatunne maccaasatu woosay an deˈees. Eti minttettuwaa, kaaletuwaa, maarotettaanne keehippe deexo oyshatuyyo zaaruwaa demmanau woossidosona.—Maz. 23:3; 71:21; Dane. 9:4, 5, 19; Imb. 1:3.

Hegaa mala asatu woosati dumma dumma gidikkonne, eti issi mala gididobay deˈees. Eta ubbau ha alamiyan darotoo baynnabay woykko asay xaasayidi xeelliyooba gidida, Xoossay siyiyo woosau keehippe koshshiyaabay deˈees. Ookko woossana koshshiyaakko eti eridosona.