Nuuni Suuretettan Hemettana Koshshees!

“SHin tana gidikko, taani suuretettan hemettais.”—MAZ. 26:11.

1, 2. Iyyoobi ba suuretettaa xeelliyaagan woygidee, qassi a xeelliyaagan Iyyooba 31 ay qonccissii?

BENI wode darotoo issibaa asay mazzaniyoy mittaappe merettida meezaanaana. He meezaanan deˈiya zabaayye mala mittay gina gidduwan xishe malaban yaa haa geennaadan kaqettees. He mittau naaˈˈu gaxankka sayne malabi kaqettees. Mazzaniyoobaa issi bagga sayniyan, qassi likkanau goˈettiyo shuchaa hankko bagga sayniyan wottoosona. Xoossaa asay likke meezaanaanne likkiyo suure shuchaa goˈettana koshshees.—Lee. 11:1.

² Seexaanay Iyyooba qohido wode, Xoossau aqida i, “[Yihooway] tana likke meezaanan mazzano; yaatidi taani xillo gidiyoogaa ero” yaagiis. (Iyy. 31:6) Hegaa xeelliyaagan Iyyoobi suuretettaa naagiya ura paaccana danddayiya daro hanotaa yootiis. SHin Iyyooba shemppo 31 qonccissiyoogaadan  Iyyoobi paaciyaa xooni kiyiis. A loˈˈo leemisoy nuunikka hegaadan oottanaadaaninne Mazamuraawee, “SHin tana gidikko, taani suuretettan hemettais” yaagidoogaa nuunikka wozanappe gaanaadan denttettana danddayees.—Maz. 26:11.

3. Guuttaban gidin gitaban Xoossau ammanettiyoogee keehi koshshiyoy aybissee?

³ Iyyoobi keehippe paacettidaba gidikkokka, Xoossau suure gididi deˈiis. Issi issi asay ubba Iyyoobi iita paacee gakkin ba suuretettaa naagidoogee woraabi giyooba gaana danddayees. Nuuni Iyyoobaagaadan tuggatibookko. Gidikkokka, nuuni suuretettaa naagiyaageetanne Xoossay ubbaa haariyo maatau exatiyaageeta gidiyoogan minnanau guuttaban gidin gitaban Xoossau ammanettiyaageeta gidana koshshees.—Luqaasa 16:10 nabbaba.

Kandduwaa Geeshshatettay Keehippe Koshshees

4, 5. Suuretettaa naagidi deˈiyaagaa gidiyoogaadan, Iyyoobi ay mala hanotaappe haakkidee?

⁴ Yihoowa sinttan nu suuretettaa naagidi deˈanau, nuuni Iyyoobaagaadan a kandduwaa maaraa mintti naagana koshshees. I hagaadan giis: “Maccaasa xeellada amottennaadan, taani ta aifiyaara maachchaa maacettaas. . . . Ta wozanai ta shooruwaa maccaasa amottidaba gidikko, woikko taani i penggen zuggada naagidabaa gidikko, ta keettaayyiyaa hara asau gaaccu; qassi hara attuma asati iira zin77⁠ona.”—Iyy. 31:1, 9, 10.

⁵ Iyyoobi Xoossaa sinttan suuretettaa naagidi deˈanau, maccaasaa amo ayfiyan xeellennaadan murttiis. I machida asa gidiyoogaadan, geelaˈiyo lambbechibeenna woy hara asa maccaasaara asho gaytotettaa polanau koyibeenna. Yesuusi Deriyaa Bolla Timirttiyan, suuretettaa naagidi deˈiyaageeti hassayana koshshiyaabaa mintti yootiis; hegeekka asho gaytotettaara gayttidaba.—Maatiyoosa 5:27, 28 nabbaba.

Cimobaa Mule Oottoppa

6, 7. (a) Iyyooba hanotan beˈidoogaadan, Xoossay nu suuretettaa qoranau ay goˈettii? (b) Nuuni cimmiyaageeta gidana bessennay aybissee?

⁶ Xoossay nuna suuretettaa naagidi deˈiyaageetudan xeellana mala koyikko, cimobaa oottokko. (Leemiso 3:31-33 nabbaba.) Iyyoobi, “Taani iitabaa mulekka oottabeikke; asakka cimmanau kajjeelabeikke. Xoossai tana likke meezaanan mazzano; yaatidi taani xillo gidiyoogaa ero” yaagiis. (Iyy. 31:5, 6) Yihooway asaa naata ubbaa “likke meezaanan” mazzanees. Xoossay Iyyoobau oottidoogaadan, nuuni suuretettaa naagidi deˈiyaakkonne eranau polo gidida ba suure pirddaa maaraa goˈettees.

⁷ Nuuni cimmiyaageeta gidikko, Xoossaa sinttan suure gididi deˈana danddayokko. Suuretettaa naagidi deˈiyaageeti “geeman oottiyo yeellayiya ooso ubbaa” aggi bayidosona; “qassi gene oosokka” oottokkona. (2 Qor. 4:1, 2) Nuuni haasayiyooban woy oottiyooban cimmiya asa gididi, nu mala Kiristtaaneti maaduwau Xoossaa woossanaadan oottiyaageeta gidikko shin? Yaatikko, hegee nuuyyo keehi iita! Mazamuraawee, “Ta waayiyaa wode taani GODAA xeesaas; xeesin i taayyo koyiis. Abeet GODAU, worddotiya doonatuppenne cimmiya inxxarssatuppe tana ashsha” yaagidi yexxiis. (Maz. 120:1, 2) Xoossay nuuni tumuppe suuretettaa naagidi deˈanau murttidaakkonne eranau nu “qofaanne wozanaa” qoridi, nu garssa asatettaa  beˈana danddayiyoogaa hassayiyoogee loˈˈo.—Maz. 7:8, 9.

Harata Oyqqiyo Hanotan Leemiso Gida

8. Iyyoobi hara asaa waati oyqqidee?

⁸ Nuuni suuretettaa naagidi deˈanau, suure, bana kawushshiyaagaanne hara asau qoppiyaagaa gidida, Iyyooba mala gidana koshshees. I hagaadan giis: “Taani ta attuma woikko ta macca ashkkarati tana mootin, eta mootuwaa karidabaa gidikko, Xoossai tana pirddiyo wode, taani waananee? Qassi i tana oichchiyo wode, taani woiga zaaranee? Aissi giikko, tana medhdhida Xoossai ta ashkkaratakka i medhdhiis. Nuna ubbaakka nu aayee nu aayee uluwan tilidaagee issi a xalaalaa.”—Iyy. 31:13-15.

9. Ba ashkkarata oyqqiyo ogiyan Iyyoobi ay mala eeshshaa bessidee, qassi hegaa xeelliyaagan nuuni ay oottana koshshii?

⁹ Iyyooba wode, pirddaara gayttidabaa oyqqiyo hanotay keehi muttumurettibeennaba malatees. Pirddi koshshiyoobaa bessiya ogiyan oyqqoosona; qassi aylletikka shilootan eqqoosona. Iyyoobi ba ashkkarata suurenne keha hanotan oyqqiis. Nuuni suuretettaa naagidi deˈanau, hegaa mala eeshshata bessanau koshshees; ubba qassi gubaaˈiyaa cima gidikko, hegaadan oottana koshshees.

Iitabaa Amottiyoogaappe Kehiyaagaa Gida

10, 11. (a) Iyyoobi kehanne maaddiyaagaa gidiyoogaa waatidi erana danddayiyoo? (b) Iyyooba 31:16-25y Geeshsha Maxaafan guyyeppe odettida ayba zoriyaa nuuni hassayanaadan oottii?

¹⁰ Iyyoobi kehiyaagaanne maaddiya asappe attin, yaaretiyaagaanne iitabaa amottiyaagaa gidenna. I hagaadan giis: “Taani . . . am77⁠eta minttettennan agga erikke. Aawai aayyiyaa bainna naati mela aqiyo wode, taani ta qumaa tarkka mabeikke. . . . Maayoi xayin, meegoi woriyo uraa, . . . demmiyo wode, . . . taani mootuwan eta shatimmanaagaa erada, aawi bainna naata naaqqidabaa gidikko, ta qesee kuriyaappe meqqo; ta kusheekka hashiyaappe karetti wodhdho.” Iyyoobi worqqaa, “taani nenan ceeqettais” giidaakko suuretettaa naagidi deˈenna.—Iyy. 31:16-25.

¹¹ Hegaa mala loˈˈo qofay erissiyo ashkkaraa Yaaqoobi, “Xoossaa Aawaa sinttan pokkoi bainna geeshsha ammanoi hagaa; hegee augee giikko, aaya aawi bainna naatanne waayettiya am77⁠eta maaddanaagaanne sa7aa nagaraa qitaappe ba huuphiyaa naaganaagaa” yaagidoogaa nuuni hassayanaadan oottana danddayees. (Yaaq. 1:27) Yesuusi, “Asassi daro miishshai de7⁠ikkokka, a shemppoi he duretettan de7⁠enna gishshau naagettite; duretetta amo ubbaappekka inttena naagite” yaagidoogaakka hassayana danddayoos. Yesuusi hegaappe simmin, “Xoossaa matan dure gidennan” hayqqida, iitabaa amottida bitaniyaa leemisuwaa yootiis. (Luq. 12:15-21) Nuuni suuretettaa naagidi deˈanau, amottiyoogan woy yaaretiyoogan nagaran gelana koshshenna. Yaaretiya uri amottiyoobay he ura Yihoowappe haassiya eeqa gidiyo gishshau, iitabaa amottiyoogee eeqau goynniyoogaa. (Qol. 3:5) Yaaretiyaageeta gidi uttidi, suuretettaa naagiyaageeta gidana danddayokko!

Tumu Goynuwaa Mintta Oyqqa

12, 13. Eeqaappe haakkiyoogan Iyyoobi ayba leemiso gididee?

¹² Suuretettaa naagiyaageeti tumu goynuwaappe wora bookkona. Iyyoobi, “Awaa phoolettaa woikko aginaa lo77⁠otettaa be7ada, ta wozanan geeman eta bonchchabeikke, woikko ta kushiyaa piddi ootta yerada, etau goinnabeikke. Taani hegaa oottidaakko, Xoossaa kaddaas shin. He nagaraikka pirddan qaxxayissiya nagara” giido gishshau, hegaadan oottibeenna.—Iyy. 31:26-28.

¹³ Iyyoobi merettidabau goynnibeenna. Aginaa mala saluwan deˈiya meretata xeelliyoogan a wozanay geeman cimettidaba gidiyaakko, qassi i geelladan eeqa goyno gidida hanotan ba ‘kushiyaa piddi oottidi yeridaba’ gidiyaakko, i Xoossaa kaddida, eeqau goynniyaagaa gidees. (Zaa. 4:15, 19) Xoossaa sinttan suure gididi deˈanau, nuuni eeqa ubbaappe haakkana bessees.—1 Yohaannisa 5:21 nabbaba.

 Haluwaa Kiyiyaagaa Woy Loˈˈo Milatiya Iita Gidoppa

14. Iyyoobi iita asa gidenna gaana danddayiyoy aybissee?

¹⁴ Iyyoobi iita woy meqetti baynna asa gidenna. I, “Ta morkketa gakkida iita qaadan taani ufaittabeikke; eta gakkida metuwankka hombbocabeikke. ‘Ta morkkee xayo’ yaaga qanggada, nagara oottabeikke” yaagido gishshau, hegaa mala eeshshay suuretettaa naagennaagaa bessiyoogaa akeekiis.—Iyy. 31:29, 30.

15. Nuna ixxiya uraa metoy gakkiyo wode ufayttiyoogee bala gididoy aybissee?

¹⁵ Suure asa gidida Iyyoobi, a ixxiya uraa bolli metoy gakkiyo wode mule ufayttibeenna. Guyyeppe xaafettida issi leemisoy, “Ne morkkee kunddiyo wode ufaittoppa; i xubettiyo wodekka, ‘Hashshu!’ gooppa. Neeni ufaittikko, GODAI hegaa be7⁠idi ufaittenna; a hanqqettiyoogaakka aggiigana” yaagidi yootees. (Lee. 24:17, 18) Yihooway nu wozanan deˈiyaaba beˈana danddayiyo gishshau, issi ura metuwan nu wozanan ufayttikko i erees; qassi hegaa malaban i ufayttenna. (Lee. 17:5) Xoossay, “Taani etau haluwaa kessananne kushiyaa zaarana” yaagiyo gishshau, nuuyyookka hegaadan oottana danddayees.—Zaa. 32:35.

16. Nuuni dure gidana xayikkonne imattaa mokkiyaageeta gidana danddayiyoy ayba ogiyaanee?

¹⁶ Iyyoobi imattaa mokkiya asa. (Iyy. 31:31, 32) Nuuni dure gidana xayikkonne, ‘imattaa mokkana’ danddayoos. (Roo. 12:13) “Ooshshai de7⁠iyoosan modhdho ashuwaa maanaappe siiqoi de7⁠iyoosan santtaa miyoogee keha” yaagiyaagaa hassayidi, haratuura guuttabaa maana danddayoos. (Lee. 15:17) Suuretettaa naagiya, nuugaa mala ammanoy deˈiyoogeetuura siiquwan miyo guuttabaykka ufayssiyaagaa gidees; qassi hegee ayyaanaaban nuna maaddanaagee erettidaba.

17. Nuuni gita nagaraa genttanau malana koshshennay aybissee?

¹⁷ Iyyoobi loˈˈo malatiya iita asa gidenna gishshau, i imatuwaa mokkiyoogeeta gidiyoogee ayyaanaaban minttettiyoogee qoncce. I “bantta huuphiyau go77a demmanau harata” sabbiya, koyro xeetu layttan gubaaˈiyaa gelida, Xoossaa ufayssenna asatu mala gidenna. (Yih. 3, 4, 16) Woy i ba nagaraa genttibeenna woykko harati hegaa eriyo wode yeellatennaadan yayyidi, ‘ba nagaraa ba shophan qosibeenna.’ I paaxana koshshiya aybanne ayyo paaxiyo Xoossay bana qoranaadan eeno giis. (Iyy. 31:33-37) Nuuni gita nagara oottiyaaba gidikko, nu sunttay moorettennaadan giidi, hegaa genttanau malana koshshenna. Nuuni suuretettaa naagidi deˈanau baaxetiyoogaa waatidi bessana danddayiyoo? Nu mooruwaa ammanidi, nagaraappe simmiyoogan, ayyaanaaban maaduwaa koyiyoogaaninne hanotaa giigissanau danddayettida ubbabaa oottiyoogan hegaa bessana danddayoos.—Lee. 28:13; Yaaq. 5:13-15.

Metoy Gakkishinkka Suuretettaa Naagiis

18, 19. (a) Iyyoobi oonanne naaqqibeenna gaana danddayiyoy aybissee? (b) Iyyoobi moorobaa oottidaba gidikko, waananau eeno giidee?

¹⁸ Iyyoobi ashkkenne suure asa. Hegaa gishshau i, “Ta goshsha biittai, ‘Tana bonqqa ekkadasa!’ giidi, ta bolli waassidabaa gidikko, ta yafaratikka ta bolli yeekkidabaa gidikko, he biittan mokkidaagaa miishsha qanxxennan coo miidabaa gidikko, woikko he biittaa oottiyaageeta namisan woridaba gidikko, taayyo gisttiyaa gishshaa agunttai, banggaa gishshaakka sharafai he biittan mokko” yaagiis. (Iyy. 31:38-40) Iyyoobi haratu gadiyaa mule baayyo ekkibeenna; qassi oosanchatussi bessiya damoozaa immiis. Nuunikka aagaadan, gitaban gidin guuttaban  Yihoowa sinttan suure gididi deˈana koshshees.

¹⁹ Iyyoobi ba heezzu laggetuyyoonne yelaga Eelihuyyo i kase waani deˈidaakko yootiis. Iyyoobi ba huuphe ‘paramido,’ ba deˈo laytta ubban oottidobau mooto shiishshiya morkkee bana mootanaadan yootiis. Iyyoobi mooridoogau naqaashi deˈikko, qaxxayettanau eeno giis. Yaatiyo gishshau, i ba yohuwaa Xoossaa shilootaa sintti shiishshidi pirddaa naagiis. ‘Iyyooba haasayay hegaadan polettiis.’—Iyy. 31:35, 40.

Suuretettaa Naagada Deˈana Danddayaasa

20, 21. (a) Iyyoobi suuretettaa naagidi deˈana danddayidoy aybissee? (b) Nuuni waatidi Xoossaa kaseegaappe aattidi siiqana danddayiyoo?

²⁰ Iyyoobi Xoossaa siiqido gishshaunne Yihoowaykka a siiqidonne maaddido gishshau, suuretettaa naagidi deˈiis. Iyyoobi, “Neeni taayyo de7⁠uwaanne aggenna ne siiquwaa immadasa; ne naaguwan neeni [Yihoowau] tana paxa wottadasa” yaagiis. (Iyy. 10:12) Hegaa bollikka, Iyyoobi ba mala asau aggenna siiquwaa bessenna uri Ubbaa Danddayiya Xoossau yayyiyoogaa agganaagaa akeekido gishshau, harata siiqiis. (Iyy. 6:14) Suuretettaa naagiyaageeti Xoossaanne bantta shooruwaa siiqoosona.—Maa. 22:37-40.

²¹ Nuuni Xoossaa Qaalaa hachi hachi nabbabiyoogaaninne hegee abaa qonccissiyoobaa wotti denttidi qoppiyoogan Xoossaa siiqana danddayoos. Wozanappe woossiyo woosan Yihoowa sabbananne a loˈˈotettau galatana danddayoos. (Pili. 4:6, 7) Nuuni Yihoowau yexxananne a asaara ubbatoo shiiqiyoogan goˈettana danddayoos. (Ibr. 10:23-25) Yaatikko, nuuni haggaazuwan shaahettiyoodenne “i ashshiyo mishiraachchuwaa” yootiyo wode, Xoossaa kaseegaappe aattidi siiqoos. (Maz. 96:1-3) Hegaadan oottiyoogan, “Taani Xoossaa matan de7⁠iyoogee taayyo lo77⁠o. Taani Ubbaa Haariya GODAA taayyo baqata attiyo soho oottaas” yaagidi yexxida mazamuraawiyaagaadan, suuretettaa naagidi deˈana danddayoos.—Maz. 73:28.

22, 23. Yihooway ubbaa haariyo maatau exatiyaageeta gidiyoogaadan, nuuni oottiyoobay beni wode suuretettaa naagidi deˈidaageetuugaa malatiyoy ayba ogiyaanee?

²² Aadhida daro xeetu layttan, Yihooway suuretettaa naagidi deˈidaageetussi daro oosuwaa immiis. Nohee markkabiyaa keexxiis; qassi ‘xillotettaabaa yootiis.’ (2 PHe. 2:5) Yaasu Israaˈeelata Hidootaa Biittaa kaalettiis; shin ayyo injjetidoy i ‘Higgiyaa Maxaafaa . . . gallassinne qammi’ nabbabido gishshataassanne hegaara moggidi deˈido gishshataassa. (Yaa. 1:7, 8) Koyro xeetu laytta Kiristtaaneti asaa erissiyo ashkkara oottidosonanne Geeshsha Maxaafaa xannaˈanau ubbatoo shiiqidosona.—Maa. 28:19, 20.

²³ Nuuni xillotettaa sabbakiyoogan, erissiyo ashkkara oottiyoogan, Geeshsha Maxaafaa zoriyaa oosuwan peeshshiyoogaaninne gubaaˈe shiiqotuuninne gita shiiqotun nu mala Kiristtaanetuura shiiqiyoogan Yihooway ubbaa haariyo maatau exatoos; qassi suuretettaa naagidi doos. Hegaa mala oosoti nuuni xalanaadan, ayyaanaaban minnanaadaaninne Xoossaa sheniyaa muruta ogiyan oottanaadan maaddoosona. Saluwan deˈiya nu Aawaynne a Naˈay nuna maaddiyo gishshau, hegee keehi metiyaaba gidenna. (Zaa. 30:11-14; 1 Kaw. 8:57) Hegaa bollikka, suuretettan hemettiyaanne Yihoowa Ubbaa Haariya bantta Godaa oottidi bonchiya, ubba ‘ishanttu’ maabaray nuna kaafees.—1 PHe. 2:17.

Woygada Zaaruutii?

• Yihooway kandduwaabau kessido maaraa nuuni waatidi xeellana koshshii?

• Iyyooba eeshshatuppe nena ufayssiyaagee awugee?

• Iyyooba 31:29-37y qonccissiyoogaadan, Iyyoobi ay mala deˈuwaa deˈidee?

• Nuuni Xoossaa sinttan suuretettaa naagidi deˈana danddayiyoy aybissee?

[Oyshata]

[Sinttaa 29n deʼiya misiliyaa]

Iyyoobi Yihoowa sinttan suuretettaa naagidi deˈiis. Nuunikka naagana danddayoos!

[Sinttaa 32n deʼiya misiliyaa]

Nu suuretettaa naagana danddayoos!