Yelagatoo—Laggetu Sugettaa Eqettite

“Intte ubbau waati zaaranau bessiyaakko erana mala, intte haasayai . . . ufaissiyaagaa gidanau bessees.”—QOL. 4:6.

1, 2. Haratuppe dummatiyoogaa xeelliyaagan daro yelagatuyyo aybi siyettii, aybissi?

INTTE “laggetu sugettaa” giya qaalaa siyiyoogaa xalla gidennan hegee inttena gakkidoogee sirissenna. Bala gidiyoogaa intte eriyoobaa oottanaadan issi uri issi wode inttena minttettennan aggenna. Hegaa malabay haniyo wode intteyyo aybi siyettii? Layttay 14 gidido Kiristtoferi, “Haratuppe dummatanau koyenna gishshau, issi issitoo taani xaya agganau woykko tanaara tamaariya naatu mala gidanau amottays” yaagiis.

² Intte laggeti intte bolli wolqqaama sugettaa gattiyoonaa? Yaatikko, hegaadan haniyoy aybissee? Hegee eti inttena dosanaadan intte koyiyo gishsha gidana danddayii? Hegaa koyiyoogee ubbatoo bala gidenna. Gasttatikka bantta laggeti banttana dosanaadan koyiyoogee tuma. Yelaga gidin cima gidin ooninne ixettanau koyenna. Gidikkokka, suurebaa oottiyoogee ubbatoo harati inttena sabbanaadan oottennaagee qoncce. Yesuusakka hegaa malabay gakkiis. Gidikkokka, Yesuusi ubbatoo suurebaa oottiis. Issoti issoti a kaallidabanne i erissiyo ashkkara gididaba gidikkokka, harati Xoossaa Naˈaa karidosonanne ‘bonchibookkona.’—Isi. 53:3.

Laggeta Milatanaadan Gakkiya Sugettay Ay Keena Wolqqaamee?

3. Intte laggeti kaalliyo maaraa kaalliyoogee bala gididoy aybissee?

³ Issi issitoo, intte laggeti inttena ixxennaadan  eti kaalliyo maaraa kaallanau paacettana danddayeeta. Hegee bala. Kiristtaaneti “beetan yaanne haanne shocettidi,” naˈa mala gidanau koshshenna. (Efi. 4:14) Harati naatu qofaa sohuwaara laammana danddayoosona. Gidikkokka, yelaga gidida uri issi wode gasttanau deˈees. Yaatiyo gishshau, Yihooway kessido maarati intte goˈˈaassa gidiyoogaa ammanikko, he ammaniyoogaadan deˈanau bessees. (Zaa. 10:12, 13) Hinkkoode intte deˈuwaa suure ogiyan kaalettana danddayekketa. Intte haratu sugettau xoonettiyaaba gidikko, etau kushe miishsha gideeta.—2 PHeexiroosa 2:19 nabbaba.

4, 5. (a) Aarooni asaa sugettan waani xoonettidee, hegaappe ayba timirtte demmana danddayeetii? (b) Laggeti intte bolli sugettaa gattana danddayiyo ogeti awugeetee?

⁴ Issi wode, Muuse ishaa Aarooni laggetu sugettan xoonettiis. Israaˈeeleti i banttassi eeqaa medhanaadan a oychido wode, hegaadan oottiis. Aarooni shugo asa gidenna. Hegaappe kase, Muuseera issippe Gibxxe biittan ooppenne wolqqaama asa gidida, Paaroona sinttan eqqiis. Yaatidi, Aarooni Xoossaa kiitaa xalan ayyo yootiis. SHin Aarooni ba mala Israaˈeelatu sugettau xoonettiis. Laggetu sugettay keehi wolqqaama gidana danddayees! Aarooni Gibxxe kawuwaara eqettiyoogaappe laggetu sugettaa eqettanau metootiis.—Kes. 7:1, 2; 32:1-4.

⁵ Aaroona leemisoy bessiyoogaadan, laggetu sugettay yelagatu xallaa woy iitabaa oottanau koyiyaageetu xalaa gakkiyaaba gidenna. Laggiyaa sugettay, inttena gujjin suurebaa oottanau wozanappe koyiyaageetakka gakkana danddayees. Intte laggeti inttena qohanau woy yashissanau maliyoogan, tuma gidennabaa woy bessennabaa yootiyoogan woy cayiyoogan intte iitabaa oottanaadan wolqqanttanau malana danddayoosona. Ay qommokka gido, laggiyaa sugettay gakkiyoogeenne hegaa eqettiyoogee deexxiyaaba. Hegaa loˈˈo hanotan eqettanau, intte ammaniyooban wozanappe ammanettana koshshees.

Ubbatoo “Inttena Qoridi Pirddite”

6, 7. (a) Intte ammaniyoobaa mintta ammanana koshshiyoy aybissee, hegaa waatidi dichana danddayeetii? (b) Intte ammanuwaa minttanau ayba oyshata inttena oychana danddayeetii?

⁶ Laggetu sugettaa eqettanau, koyruwan intte ammaniyoobaynne intte kaalliyo maaray suure gidiyoogaa mintti ammanana koshshees. (2 Qoronttoosa 13:5 nabbaba.) Geella intte meretan dungguuxa gidikkokka, mintti ammaniyoogee intte xalanaadan maaddana. (2 Xim. 1:7, 8) SHin issi uri xala gidikkokka, i mintti ammanennabaa kaafiyoogee woy oosuwan peeshshiyoogee metana danddayees. Yaatin intte Geeshsha Maxaafaappe tamaaridobay tuma gidiyoogaa eranau aybissi pilggekketii? Baaso timirtte gididabatun doommite.  Leemisuwau, intte Xoossan ammaneeta, qassi harati i deˈiyoogaa ammaniyoy aybissakko yootishin siyideta. Yaatiyo gishshau, ‘Xoossay deˈiyoogaa tana ammanttidabay aybee?’ yaagidi inttena oychite. Hegaa mala oyshaa halchoy, siriyaa medhanaassa gidennan intte ammanuwaa minttanaassa. Hegaadankka, kaallidi deˈiyaagaadan inttena oychite: ‘Geeshsha Maxaafay Xoossaa ayyaanaa kaaletuwan xaafettidoogaa waatada erana danddayiyaanaa?’ (2 Xim. 3:16) ‘Ha wodee “wurssetta gallassa” gidiyoogaa taani ammaniyoy aybissee?’ (2 Xim. 3:1-5) ‘Yihoowa maarati tana goˈˈiyoogaa ta ammananaadan oottiday aybee?’—Isi. 48:17, 18.

⁷ Hegaa zaaruwaa erana danddayennabadan yayyidi, hegaa mala oyshata inttena oychanau guyye gaana danddayeeta. SHin hegee, kaamiyan nadaajee wurennan aggenna gi yayyidi hegaa bessiyaasaa xeellennan aggiyoogaara issi mala. Nadaajee wuridaba gidikko, hegaa akeekidi bessiya tangguwaa ekkana koshshees. Hegaara issi mala hanotan, intte ammanoy shuggidoy aybiinakko akeekidi, hegaa minttiyaabaa oottiyoogee keehippe koshshees.—Oos. 17:11.

8. Bessenna asho gaytotettaappe haakkanaadan imettida Xoossaa higgee aadhida eratetta gidiyoogaa intte waatidi mintti ammanettana danddayiyaakko qonccissite.

⁸ Issi leemisuwaa qoppite. Geeshsha Maxaafay, “SHaaramuxappe baqatite” yaagidi zorees. ‘Taani he zoriyaa kaalliyoogee aadhida eratetta gididoy aybissee’ yaagidi inttena oychite. Intte laggeti hegaa malabaa oottiyo gaasuwaa ubbaa qoppite. SHaaramuxiya uri waanidi “ba bolli nagaraa” oottiyaakko dumma dumma gaasuwaa wotti dentti qoppite. (1 Qor. 6:18) Haˈˈi he gaasuwaa yuushshi qoppidi, hagaappe kaallidi deˈiyaagaadan inttena oychite: ‘Kaallanau ubbaappe aadhiya loˈˈo ogee awugee? SHori baynna asho gaytotettaa poliyoogee tumuppe bessiyaabee?’ Ubba ha allaalliyaa xeelliyaagan aassi qoppidi, ‘Bessenna asho gaytotettaa poliyaakko taayyo aybi siyettanee? yaagidi inttena oychite. Koyro heeran intte laggeta ufayssana danddayeeta; shin guyyeppe intte soo asaara woy Kawotettaa Addaraashan intte mala Kiristtaanetuura gayttiyo wode intteyyo aybi siyettanee? Xoossaakko woossanau maliyo wode intteyyo siyettanabay aybee? Inttenaara tamaariyaageeta ufayssanau giidi, Xoossaa sinttan geeshsha gididi deˈiyoogaa agganau tumuppe eeno guuteetii?

9, 10. Intte ammaniyooban ammanettiyoogee intte laggetuura deˈiyo wode ammanettidi haasayanaadan oottiyoy ayba ogiyaanee?

⁹ Intte panttatetta wodiyan deˈiyaaba gidikko, intte qoppiyo abbee keehippe aakkiyo wodiyan deˈeeta. (Roome 12:1, 2 nabbaba.) Yihoowa Markka gidiyoogee intteyyo woygiyoogaakko wozanappe qoppanau ha wodiyaa goˈettite. Hegaadan wotti dentti qoppiyoogee intte ammaniyooban keehippe ammanettanaadan maaddees. Yaatikko, laggetu sugettay inttena gakkiyo wode, ammanettidi sohuwaara zaaruwaa immana danddayeeta. Issi yelaga Kiristtaane michiyaa, “Taani laggetu sugettaa eqettiyo wode, taani oottiyoobay ubbay harati ta oonatettaa eranaadan oottees. Hegee ‘haymaanootebaa’ xalla gidenna. Hegee ta qofau, ta hoolliyau, ta kandduwaunne ta kumetta deˈuwau baaso gididaba” giidoogaadan intteyyo siyettana.

¹⁰ Ee, intte eriyo suure gididabaa kaafi deˈiyoogee baaxe koshshiyaaba. (Luq. 13:24) Qassi hegee bessiyaabee giidi qoppana danddayeeta. SHin hagaa qoppite: Intte suurebaa oottanau murttidoogan zilˈˈettiyaaba woy yeellatiyaaba gidikko, harati hegaa beˈidi intte bolli gattiyo sugettaa yaa gujjana danddayoosona. Gidikkokka, intte mintti ammaniyoogaa bessiya ogiyan yootikko, intte laggeti gattiyo sugettaa sohuwaara aggibayiyoogan maalaalettana danddayeeta.—Luqaasa 4:12, 13⁠ra gatta xeella.

‘Haasayanaappe Kasetidi Qoppite’

11. Laggetu sugettau giigettiyoogee waati maaddii?

¹¹ Laggetu sugettaa eqettanau keehippe koshshiya hara tanggoy giigettiyoogaa. (Leemiso 15:28 nabbaba.) Giigettiyoogee ayba hanotay gakkana danddayiyaakko kasetidi qoppiyoogaa giyoogaa. Issi issitoo kasetidi qoppiyoogee wolqqaama palamaappe intte  haakkanaadan maaddana danddayees. Leemisuwau, inttenaara tamaariyaageetuppe amaridaageeti sijaaraa uyiiddi yiyaageeta beˈidabadan qoppite. Eti intte sijaaraa uyanaadan shoobbaneeshsha? Metoy gakkana gi qoppidi ay oottana danddayeetii? Leemiso 22:3y, “Cincca asi iitaa be7⁠idi, qosetti aattees” yaagees. Biyo ogiyaa laammiyoogan gakkana danddayiyaabaappe muleera haakkana danddayeeta. Hegaadan oottiyoogee yashsha gidennan aadhida eratetta tanggo.

12. Laggetu sugettay inttena gakkiyo wode zaaruwaa immiyo loˈˈo ogee awugee?

¹² Qommoora qonccidaagaadan issi hanotaappe haakkana danddayennaba gidikko waatuuteetii? Ammanennaagaa bessiya hanotan issi laggee, “Neeni hanno gakkanau asho gaytotettaa pola erikkii?” yaagidi inttena oychidabadan qoppite. Hegau, Qolasiyaasa 4:6n, “Intte ubbau waati zaaranau bessiyaakko erana mala, intte haasayai ubba wode, siyanau kehiyaagaanne ufaissiyaagaa gidanau bessees” yaagiya zoriyaa kaalliyoogee bessiyaaba. Ha xiqisee bessiyoogaadan, hegaa mala oyshau intte immiyo zaaroy hanotan baasettidaba. Geeshsha Maxaafaappe darobaa intte yootanau koshshennan aggana danddayees. Geella qanttan mintti zaariyoogee gidana danddayees. Leemisuwau, asho gaytotettaa pola erikkii giya oyshau, qanttan, “Ee pola erikke” woykko “Hegee tumuppe ta buzo allaalle” gaana danddayeeta.

13. Laggetu cashshau zaaruwaa immanau akeekancha gidiyoogee keehippe koshshiyoy aybissee?

¹³ Darobaa yootiyoogee aynne maaddenna wode, Yesuusi darotoo oyshettidobau qantta zaaruwaa immees. Heeroodisi oychido wode, Yesuusi ayyo aynne zaaribeenna. (Luq. 23:8, 9) Bessenna oyshaa zaarennan coˈˈu giidi aggiyoogee darotoo loˈˈo oge. (Lee. 26:4; Era. 3:1, 7) Hara baggaara, intte kaalliyo maaran, giishin leemisuwau, asho gaytotettaabaa xeelliyaagan issi uri koyro inttena cayidaba gidikkokka, i garamettiyoogaa akeekana danddayeeta. (1 PHe. 4:4) Hegaa mala hanotan, intte kaalliyo Geeshsha Maxaafaa maaraabaa loytti qonccissana danddayeeta. Hegaa malabay merettiyaaba gidikko, yashshan guyye gooppite. “Zaaro immanau ubba wode” giigi uttite.—1 PHe. 3:15.

14. Issi issi hanotan hiillan waatidi zaaridi sugettaa gattana danddayeetii?

¹⁴ Issi issi hanotan inttekka zaaridi sugettaa gattana danddayeeta. Gidikkokka, hegaa hiillan oottana bessees. Leemisuwau, inttenaara tamaariyaageetuppe issoy inttessi sijaaraa immiyaaba gidikko, “Galatays” yaagi simmidi, “Sijaaraa uyiyoogee nena qohiyoogaa eraasa gaada qoppays!” yaagana danddayeeta. Intte waatidi zaaridi sugettaa gattana danddayiyaakko akeekidetii? Intte aybissi sijaaraa uyennaakko qonccissiyoogaappe, intte laggee aybissi uyiyaakko qoppanaadan ootteeta.

15. Sugettaa gattanau maliya laggetu matappe aggidi baana bessiyoy awudee, aybissi?

¹⁵ Intte eqettanau baaxetishinkka laggeti sugettaa gattiyoogaa aggennaba gidikko shin? Hegaa mala hanotan aggidi biyoogee aybippenne loˈˈo. Intte adussa wodiyaa etaara gamˈˈiyo wode, issi issi ogiyan intte kaalliyo maaraa agganaadan oottiya daro injjee  merettees. Yaatiyo gishshau, aggidi bi bayite. Intte xoonettidabadan qoppennan hegaadan oottana danddayeeta. Ubba, he hanotan intte xoonideta. Intte laggetussi kushe miishsha gidibeekketa; qassi Yihoowa wozanaa ufayssideta.—Lee. 27:11.

Goˈˈiya ‘Halchuwaa’ Halchite

16. Kiristtaane giya issotu issotuppe waanidi sugettay gakkana danddayii?

¹⁶ Bessennabaa oottanaadan, Yihoowayyo goynnoos giya hara yelagatuppe issi issitoo sugettay gakkana danddayees. Leemisuwau, hegaa mala yelagay issippe wodiyaa aattanau giigissido sohuwan, hanotaa kaalliya gastta uri baynnaagaa erikko waatuuteetii? Woykko inttenne wodiyaa aattiyo sohuwan beettida harati cammiya ushshaa uyanau bessenna naata gidishin, bana Kiristtaane giya yelagay cammiya ushshaa he sohuwaa ehiikko shin? Geeshsha Maxaafan loohida intte zoriyaa wozanaa kaallana koshshiyo daro hanotati merettana danddayoosona. Layttay 16 gidido issi Kiristtaanee hagaadan giis: “Taaninne ta kaalo michiyaa pokko haasayay kumido pilmiyaa beˈennaadan aggidi kiyida. Nunaara beˈiya issoti issoti yan takkanau qofaa qachidosona. Nuna yelidaageeti nu oottidobau galatidosona. Gidikkokka, nunaara beˈiya harati nuuni eta moorancha milatissido gishshau yiillotidosona.”

17. Issippe wodiyaa aattiyo sohuwan beettiyo wode, Xoossaa maaraa kanttennaadan ayba tanggo ekkana danddayeetii?

¹⁷ Qommoora deˈiya temokiroy bessiyoogaadan, Geeshsha Maxaafan loohida intte zoriyaa wozanaa kaalliyoogee, metiya hanotay inttena gakkanaadan oottana danddayees. SHin intte suure giidi ammaniyoobaa oottiyoogaa aggoppite. Kasetidi giigettite. Issippe wodiyaa aattiyoosaa intte biyaaba gidikko, hanotati intte qoppidoogaadaana gidana xayikko aggidi kiyanau halchite. Issi issi yelagati, koshshiyo wodiyan yiidi banttana he sohuwaappe efaanaadan silkkiyaa dawalanau banttana yelidaageetuura kasetidi haasayoosona. (Maz. 26:4, 5) Hegaa mala “halchchoi” goˈˈees.—Lee. 21:5.

‘Intte Yelagatetta Layttan Ufayttite’

18, 19. (a) Intte ufayttanaadan Yihooway koyiyoogaa ammanettana danddayiyoy aybissee? (b) Bantta laggetu sugettaa eqettiyaageeta xeelliyaagan Xoossaayyo aybi siyettii?

¹⁸ Yihooway intte intte deˈuwan ufayttanaadan oottidi medhiis; qassi intte ufayttanaadan koyees. (Eranchchaa 11:9 nabbaba.) Intte laggetuppe daroti oottiyoobay ‘nagaran guutta wodiyau ufayttiyooba’ xalla gidiyoogaa akeekite. (Ibr. 11:25) Tumu Xoossay intte hegaappe keehi aadhiyaabaa demmanaadan koyees. I intte merinau ufayttanaadan koyees. Yaatiyo gishshau, Xoossaa sinttan iita gidiyoogaa intte eriyoobaa oottanaadan paacee gakkiyo wode, Yihooway intte oottanaadan koyiyoobay ubbatoo wurssettan intte goˈˈaassa gidiyoogaa dogoppite.

¹⁹ Yelaga gidiyoogaadan intte laggetun nashettanau koyiyaaba gidikkokka, daro wodiyaappe guyyiyan etappe daroti ubba intte sunttaakka hassayennan aggana danddayiyoogaa akeekana koshshees. Hegaappe dumma ogiyan, intte laggetu sugettaa eqettiyo wode, Yihooway hegaa erees; qassi inttena woy intte ammanettiyaageeta gididoogaa dogenna. I ‘saluwaa maskkootiyaa dooyidi anjjuwaa intteyyo palahissidi gussana.’ (Mil. 3:10) Hegaa bollikka, intteyyo haˈˈi deˈiya ayba pacaanne kunttanaadan ba geeshsha ayyaanaa kehatettan immees. Ee, laggetuppe gakkiya sugettaa intte eqettanaadan Yihooway maaddana danddayees.

Hassayay?

• Laggetu sugettay wolqqaama gidana danddayiyoy ayba ogiyaanee?

• Mintti ammaniyoogee laggetu sugettaa eqettanau waatidi maaddii?

• Laggetu sugettau waatada giigettana danddayay?

• Neeni ammanettiyaagaa gidiyoogaa Yihooway xoqqu oottidi xeelliyoogaa waatada erana danddayay?

[Oyshata]

[Sinttaa 15n deʼiya misiliyaa]

Aarooni worqqaappe maraa medhanau eeno giidoy aybissee?

[Sinttaa 17n deʼiya misiliyaa]

Kasetada giigetta—ne gaanabaa kasetada kuuya