Deˈiyaabay Gidana Gaanau Danddayay?

“Deˈiyaabay gidana giyoogee manqquwaa dureyees; deˈiyaabay gidenna giyoogee duriyaa manqqettees.” —Benjjaamin Frankkilin.

HA LEEMISUWAARA moggiya ogiyan, deˈiyaabay gidana giyoogaa issibadan shammi ekkana danddayennaagaa daroti eridosona. Daro aquwaa demmanau, deˈiyaabaa bolli gujjanau woykko haratu deˈuwaa amottiyoogaa minttettiya alamiyan, deˈiyaabay gidana gi ufayttidi deˈiyoogee danddayettennaba milatiyoogee garamissenna! Kaallidi deˈiyaabatuppe nena qohidabi deˈii?

• SHammiyoobaa erissiyaageeti issibaa gujjada shammikko ufayttaasa giidi bolli bollan odoosona.

• Ooso sohuwan woykko timirtte keettan annaacettiyoogee, neeni harati oottiyoobaa ubbaa oottiyo wode xallan gooba gidays gaada qoppanaadan minttettees.

• Neeni etassi oottiyoobau asay galata xayees.

• Ne laggeti banttau deˈiyaabaa neeni qaaqqatanaadan oottoosona.

• Deˈuwaa xeelliyaagan neeni oychiyo keehi koshshiya oyshatussi zaaro demmakka.

Ha xubbiya ubbabay deˈishinkka, tumuppe ufayttidi deˈana danddayettii? Kiitettida PHauloosi ‘deˈiyaabay gidana’ gaanau maaddiyaabaa yootiis. Issi issi wode deˈoy au palahiis, hara wode qassi pacciis. A laggeti a nashshidosona; shin harati baceessidosona. Gidikkonne, i “awan gidinkka aude gidinkka” bau deˈiyaabay gidana giyoogaa tamaaridoogaa yootiis.—Pili. 4:11, 12.

Bau deˈiyaabay gidana giyoogee, hegau ayba tanggonne ekkibeennaageeti eriyooba gidenna; shin PHauloosi yootidoogaadan, hegee tamaarana danddayiyooba. Deˈiyaabay gidana gaanau maaddiya, Xoossaa Qaalaa, Geeshsha Maxaafan deˈiya ichashu qofata pilgganaadan nena shoobboos.