“Injje Wodee Ha77a”

“Be7⁠ite, injje wodee ha77a. Be7⁠ite, atotettaa gallassai hachcha.” —2 QOR. 6:2.

1. Nuuni issi wodiyan oottana bessiya keehippe koshshiyaabaa akeekana bessiyoy aybissee?

“UBBABAU wodee de7⁠ees; saloppe garssa baggaara oosettiyaabau ubbau a laittai laittai de7⁠ees.” (Era. 3:1) Goyanau, manddaranau, zalˈˈanau woy asaara haasayanau gidin, hara goˈˈiya ubba oosuwau injje wodiyaa akeekiyoogaa goˈˈaa Solomoni xaafiis. Gidikkokka, issi wodiyan nuuni oottana bessiya keehippe koshshiyaabay aybakko akeekana koshshees. Hegaa giyoogee, nuuni kaseyiyoobay deˈana bessees.

2. Yesuusi sabbakiyo wode ba deˈiyo wodiyaa loytti akeekidoogaa waatidi erana danddayiyoo?

² Yesuusi saˈan deˈiyo wode, ba deˈiyo wodiyaanne he wodiyan ay oottana bessiyaakko loyttidi eriis. Kasetidi oottana bessiyaabay aybakko loyttidi hassayiyoogan, he wodee daro layttau naagiiddi takkido, Masiyaara gayttida hiraagati polettiyo wode gidiyoogaa eriis. (1 PHe. 1:11; Ajj. 19:10) I qaalaa gelido Masiyaa gidiyoogaa asau qonccissanau oottiyoobay deˈees. I Kawotettaa tumaa loytti markkattanaunne sinttappe he Kawotettan aara issippe haariyaageeta shiishshana koshshees. Qassi i saˈa gaxaa gakkanaashin sabbakiyaanne asaa erissiyo ashkkara oottiya, Kiristtaane gubaaˈiyau baasuwaa baasana koshshees.—Mar. 1:15.

3. Yesuusi ba deˈiyo wodiyaa eriyoogee ay oottanaadan denttettidee?

³ Yesuusi hegaa akeekidoogee ba Aawaa  sheniyaa mishettidi oottanaadan a keehippe denttettiis. I ba erissiyo ashkkaratuyyo, “Kattai daro; shin cakkiyaageeti guutta; hegaa gishshau, kattaa Godai kattaa cakkiyaageeta yeddana mala, a woossite” yaagiis. (Luq. 10:2; Mil. 4:5, 6) Yesuusi ba erissiyo ashkkaratuppe koyro 12, hegaappe 70 dooridinne kaaletuwaa immidi, “Saluwaa kawotettai matattiis” giya denttettiya kiitaa sabbakanaadan kiittiis. Yesuusa xeelliyaagan Geeshsha Maxaafay, “Ba tammanne naa77⁠u erissiyo ashkkarata azaziyoogaa polido wode, hegaappe denddidi, katamatun tamaarissanaunne yootanau biis” yaagees.—Maa. 10:5-7; 11:1; Luq. 10:1.

4. PHauloosi Yesuus Kiristtoosa milatidoy ayba ogiyaanee?

⁴ Yesuusi mishettiyoogaaninne Xoossau aqiyoogan bana kaalliya ubbatussi polo leemiso. Kiitettida PHauloosi ba mala Kiristtaanetussi, “Taani Kiristtoosadan haniyoogaadan, inttekka tanadan hanite” yaagido wode akeekissidoy hegaa. (1 Qor. 11:1) PHauloosi Kiristtoosa milatidoy ayba ogiyaanee? Ubbaappe aaruwan, mishiraachuwaa sabbakanau bau danddayettida ubbabaa oottiyoogaana. PHauloosi gubaaˈetussi xaafido dabddaabbetun, “minni oottite; azalloppite,” “intte kumetta wozanaappe Godau oottite,” “ubba wode Godaa oosuwaa azallennan oottite,” “intte oottiyo ooso ubbaa . . . Godau oottiyoogaadan, wozanappe oottite” yaagiya qaalati deˈoosona. (Roo. 12:11; 1 Qor. 15:58; Qol. 3:23) PHauloosi Damasqqo efiya ogiyan Godaa Yesuus Kiristtoosaara gayttidoogaanne erissiyo ashkkaraa Hanaaniyaayyo Yesuusi, i “Aihuda gidenna asaa sinttan, kawotu sinttaaninne Israa7⁠eela asaa sinttan, ta sunttaa erissanaunne taassi oottanau doorettida miishsha” giido qaalaa mule dogibeenna; Hanaanee hegaa au yootidoogee qoncce.—Oos. 9:15; Roo. 1:1, 5; Gal. 1:16.

‘Injje Wodiyaa’

5. PHauloosi mishettidi haggaazanaadan denttettiday aybee?

⁵ Oosuwaa maxaafaa nabbabiyo wode, PHauloosi mishettidinne xalan sabbakidoogaa loyttidi akeekoos. (Oos. 13:9, 10; 17:16, 17; 18:5) PHauloosi xoqqu oottidi xeelliyo wodiyan deˈiyoogaa akeekiis. I, “Be7⁠ite, injje wodee ha77a. Be7⁠ite, atotettaa gallassai hachcha” yaagiis. (2 Qor. 6:2) Beni Baabiloonen omoodettidi deˈiyaageetuyyo bantta biitti simmanau injje wodee 537 K.K. (Isi. 49:8, 9) SHin PHauloosi ha sohuwan gaana koyidoy aybee? Xiqisiyaa yuushuwan deˈiya qofay i qoppidobaa akeekanau maaddees.

6, 7. Ha wodiyan deˈiya tiyettida Kiristtaanetussi waatiyo gita maatay imettidee, etaara issippe oottiyaageeti oonee?

⁶ PHauloosi kasetidi ba dabddaabbiyan, baassinne ayyaanan tiyettida hara Kiristtaanetussi imettida gita maataabaa yootiis. (2 Qoronttoosa 5:18-20 nabbaba.) Xoossay eta issi dumma halchuwau, “sigettiyo oosuwaa” polanaadan, “Xoossaara sigettite” giidi asaa woossanaadan xeesidoogaa i yootiis. Hegee asay Xoossaara zaarettidi dabbotiyoogaa woy sigettiyoogaa giyoogaa.

⁷ Edenen denddida makkalaappe simmin, asaa naati ubbay Yihoowappe haakkiis woykko duuxxiis. (Roo. 3:10, 23) Xoossaappe haakkido he hanotay asaa naati ubbay waayettanaadaaninne hayqqanaadan oottiya, ayyaana xuman deˈanaadan oottiis. PHauloosi, “Mereta ubbai issippe hanno gakkanaassi,  maccaasa leessoi oiqqin ooliyoogaadan, sahuwan ooliyoogaa nuuni eroos” yaagidi xaafiis. (Roo. 8:22) SHin Xoossay asay baakko simmanaadan woykko banaara sigettanaadan minttettanau, ubba ‘woossanau’ tangguwaa ekkiis. He wode PHauloosaunne tiyettida hara Kiristtaanetussi imettida oosoy hegaa. He “injje wodee” Yesuusan ammaniyaageetuyyo ‘atotetta gallassa’ gidana danddayees. Tiyettida Kiristtaaneti ubbatinne etaara oottiya, eta lagge gidida “hara dorssatikka” asay he ‘injje wodiyan’ goˈettanaadan shoobbiiddi deˈoosona.—Yoh. 10:16.

8. Sigettanaadan shoobbidoogee maalaaliyaaba gididoy aybissee?

⁸ Edenen denddida makkalan Xoossaara deˈiya dabbotaa duuttidoogan oyshettiyay asaa naata gidishin, asay banaara sigettanaadan Xoossay kasetidi shoobbidoogee maalaaliyaaba. (1 Yoh. 4:10, 19) I ay oottidee? PHauloosi, “Xoossai Kiristtoosa baggaara asa ubbaa banaara sigettees; asa nagaraakka asa bolli qoodenna; qassi asa banaara sigettiyo kiitaakka nuuyyo immiis” yaagiis.—2 Qor. 5:19; Isi. 55:6.

9. PHauloosi Xoossaa maarotettaa akeekidoogaa bessanau ay oottidee?

⁹ Yihooway wozuwaa yarshshuwaa giigissiyoogan, ammanuwaa oosuwan bessiyaageeti bantta nagaraappe maarotaa demmanaadan, zaarettidi aara dabbotanaadaaninne sigettanaadan oottiis. Hegaa bollikka, ubbasan deˈiya asay wodee wurennan aara sigettanaadan minttettana mala bana kalˈˈatiyaageeta kiittiis. (1 Ximootiyoosa 2:3-6 nabbaba.) PHauloosi Xoossaa sheniyaanne ba deˈiyo wodiyaa akeekiyoogan, “sigettiyo oosuwaa” xalalennan minnidi oottiis. Yihooway koyiyoobay laamettibeenna. Asay banaara sigettanaadan i ha wodiyankka shoobbiiddi deˈees. PHauloosi “injje wodee ha77a” qassi “atotettaa gallassai hachcha” giidoogee ha wodiyaukka haniyaaba. Xoossaa Yihooway ay keena maariyaageenne qarettiyaagee!—Kes. 34:6, 7.

‘Halchuwaa Baloppite’

10. “Atotettaa gallassai” beni deˈidanne ha wodiyan deˈiya tiyettida Kiristtaaneti ay oottanaadan denttettidee?

¹⁰ Ha aaro kehatettan goˈettiya koyroogeeti, ‘Kiristtoosaara deˈiyaageeta.’ (2 Qor. 5:17, 18) Etassi “atotettaa gallassai” doommidoy 33 M.Ln, PHenxxaqosxxe gallassaana. He wodeppe doommidi, hegaa mala asati ‘sigettiyo kiitaa’ awaajjiiddi takkidosona. Ayyaanan tiyettida Kiristtaanetuppe attidaageeti ha wodiyan “sigettiyo oosuwaa” oottiiddi deˈoosona. Yohaannisi ajjuutan beˈido oyddu kiitanchati ‘oyddu saˈaa zooziyaara yiya carkkoy saˈan carkkennaadan teqqiyoogaa’ eti akeekoosona. Yaatiyo gishshau, ‘atotettaa gallassaynne injje wodee’ haˈˈikka wuribeenna. (Ajj. 7:1-3) Hegaappe denddidaagan, 20⁠tta xeetu laytta doomettaappe doommidi, tiyettidaageetuppe attidaageeti kumetta saˈan “sigettiyo oosuwaa” mishettidi oottiiddi takkidosona.

11, 12. Tiyettida Kiristtaaneti 20⁠tta xeetu laytta doomettan he wodiyaa akeekidoogaa waati bessidonaa? (Sinttaa 17n deˈiya misiliyaa xeella.)

¹¹ Leemisuwau, Xoossaa Kawotettaabaa Awaajjiya Yihoowa Markkata giya maxaafan qonccidaagaadan, 20⁠tta xeetu layttaa doomettan, “CHarles Tez Rasilinne a laggeti cahaa wodiyan deˈiyoogaanne naxa kessiya tumaa asay erana koshshiyoogaa minttidi ammanidosona.” Eti hegaa polanau ay oottidonaa? He ishati cahaa wodiyan, ‘injje wodiyan’ deˈiyoogaa akeekidi, haymaanoote siraatay polettiyo issisaa asaa shoobbiyoogaa xallay gidees giidi uttiigibookkona. Kiristtaane giyo haymaanootiyaa qeeseti daro wodiyau hegaadan oottiiddi takkidosona. SHin ayyaanan tiyettida he Kiristtaaneti mishiraachuwaa aassanau maaddiya hara ogeta koyiyoogaa doommidosona. Bantta oosuwaa aassanau eti ooratta tekinolojiyaanne harabaakka loˈˈo ogiyan goˈettidosona.

¹² Kawotettaa mishiraachuwaa aassanau, mishettidi haggaaziya he amaridaageetu  citay tirakttiyaa, guutta xuufeta, maxeetetanne maxaafata goˈettiis. Issi issi Geeshsha Maxaafaa timirtteti shaˈan qoodettiya gaazexatun kiyanaadankka oottidosona. Eti bantta biittaaninne alame yuushuwan Geeshsha Maxaafaa timirttee eraadooniyan siyettanaadan oottidosona. Misiliyaa qonccissiya cenggurssay aara issippe siyettiyo, qaaxxiya misiliyaa giigissidi goˈettidosona; cenggurssaa gujjiya, pilmiyaa giigissiyaageeti hegaa mala qaaxxiya misiliyaa he wode medhibookkona. Hegaadan aggennan mishettiyo hanotay ay kaalettidee? “Xoossaara sigettite” giya kiitaa siyidi, hegaa haratussi yootiyaageeti ha wodiyan laappun miiloone heera. Yihoowayyo beni oottida he asati guutta, qassi darin meezee baynnaageeta gidikkonne, mishettiyoogan loˈˈo leemiso gididosona.

13. Nuuni xoqqu oottidi xeellana koshshiya Xoossaa halchoy awugee?

¹³ PHauloosi, “injje wodee ha77a” giidoogaadan ha wodeekka injje wode. Yihoowa aaro kehatettaa akeekida nuuni, sigettiyo kiitaa siyidi ekkiyo injjiyaa demmido gishshau keehippe ufayttoos. Nuuni coo ufayttidi aggiigiyoogaappe PHauloosi, “Xoossaa aaro kehatettaa ekkidi a halchuwaa balenna mala woossoos” yaagidoogaa xoqqu oottidi xeelloos. (2 Qor. 6:1, NW) Xoossaa aaro kehatettaa halchoy ‘Kiristtoosa baggaara asa ubbaa banaara sigettiyoogaa.’—2 Qor. 5:19.

14. Daro biittatun ayba injjee merettiiddi deˈii?

¹⁴ Asaa naatuppe daroti, Seexaanay eta ayfiyaa goozin, haˈˈikka Xoossaappe haakkidi, Xoossaa aaro kehatettaa halchuwaa erokkona. (2 Qor. 4:3, 4; 1 Yoh. 5:19) Gidikkokka, alamiyaa hanotay iiti iiti biyoogaappe denddidaagan, asaa bolli gakkiya iitabaunne tuggau gaasoy Xoossaappe haakkidoogaa gidiyoogaa qonccissiyo wode, daroti loˈˈo zaaruwaa immoosona. Nuuni yootiyo kiitaa daroti siyanau koyenna biittatunkka, daro asay haˈˈi mishiraachuwaa siyidi, Xoossaara sigettanau tangguwaa ekkiiddi deˈees. Yaatin, ha wodee nuuni kaseegaappe aaruwan mishettidi, asaa “Xoossaara sigettite” giidi woossiyo wode gidiyoogaa akeekiyoo?

15. Asay woppaa demmanaagaa yootiyoogaappe, ubbasan deˈiya asay ay eranaadan koyiyoo?

¹⁵ Nu oosoy, asay Xoossaakko simmiyaaba gidikko, i eta gakkiya meto ubban maaddanaagaanne eti woppaa demmanaagaa yootiyoogaa gidenna. Daroti hegaa xallaa koyidi woosa keettaa boosona; qassi woosa keettati he koshshaa kunttoosona. (2 Xim. 4:3, 4) Nu haggaazuwaa halchoy hegaa gidenna. Nuuni sabbakiyo mishiraachoy, Yihooway siiqoy denttettin Kiristtoosa baggaara nagaraa atto gaanau koyiyoogaara gayttidaba. Hegaa gishshau, asay huuphe xekkan Xoossaappe haakkiyoogaa aggidi, aara sigettana danddayees. (Roo. 5:10; 8:32) SHin “injje wodee” wuranau matiiddi deˈees.

“Ayyaanan Dochennaageeta Gidite”

16. PHauloosi xalanaadaaninne mishettidi oottanaadan maaddiday aybee?

¹⁶ Yaatin, nuuni tumu goynuwau mishettiyoogaa waatidi dichananne naagidi deˈana danddayiyoo? Issoti issoti meretan dungguuxa woy darin haasayennaageeta gidana danddayoosona; qassi banttau siyettiyaabaa kessidi yootanau metootana danddayoosona. Gidikkokka, mishettiyoogee siyettiyaabaa woy ufayttidoogaa kessi bessiyoogaa xalla gidenna; woykko issi uraa eeshshaara gayttidaba gidenna. PHauloosi ba mala Kiristtaaneta, “Ayyaanan dochennaageeta gidite” yaagido wode,  mishettiyoogaa waatidi dichananne naagidi deˈana danddayiyaakko yootiis. (Roo. 12:11, NW) PHauloosi sabbakiyo oosuwan xalanaadaaninne genccanaadan Yihoowa ayyaanay keehippe maaddiis. Yesuusi a xeesido wodiyaappe doommidi, wurssettan Roomen qashettidi hayqqana gakkanaassi deˈiya 30⁠ppe dariya layttatun, PHauloosi aggennan mishettidi oottiis. PHauloosi ayyaanaa baggaara baassi koshshiya wolqqaa immida Xoossaa ubbatoo yaynniis. I, “[“Xoossay,” NW] tau immido wolqqan, ubbabaa oottanau taani danddayais” yaagiis. (Pili. 4:13) Nuuni a leemisuwaappe tamaariyaaba gidikko, keehi goˈettoos!

17. Nuuni “ayyaanan dochennaageeta” gidana danddayiyoy ayba ogiyaanee?

¹⁷ ‘Dochennaagaa’ geetettida qaalau sitta birshshettay “penttiyoogaa” giyaagaa. (Kingdem Interliniyer) Jabanan deˈiya haattay penttiiddi takkanaadan koyikko, nuuni tamaa toyssana koshshenna. Hegaadankka, “ayyaanan dochennaageeta” gidanau Xoossaa geeshsha ayyaanaa ubbatoo demmana koshshees. Hegaa demmana danddayiyo ogee, Yihooway nuna ayyaanaaban minttanau giigissidobaa ubbaa goˈettiyoogaa. Hegee nu so asaanne gubaaˈiyaa goynuwaa xoqqu oottidi xeelliyoogaa, giishin ubbatoo buzo xannaˈiyoogaa, so asaara xannaˈiyoogaa, woossiyoogaanne nu mala Kiristtaanetuura shiiqiyoogaa giyoogaa. Hegee nuuni ubbatoo ‘ayyaanan dochennaadan’ oottiya ‘penttoy’ aggennaadan maaddiya “tamaa” demmanaadan oottees.—Oosuwaa 4:20; 18:25 nabbaba.

18. Nu huuphiyaa geppida Kiristtaane gidiyoogaadan ayba halchuwan nu xeelaa wottana koshshii?

¹⁸ Ba huuphiyaa geppida uri ba kumetta xeelaa issi halchuwan wottees; qassi he halchuwaa polanau oottiyoobaa guuttaban aggenna woy hidootaa qanxxenna. Nu huuphiyaa geppida Kiristtaane gidiyoogaadan, nu halchoy, Yesuusi oottidoogaadan Yihooway nuuni oottanaadan koyiyoobaa aybanne oottiyoogaa. (Ibr. 10:7) Ha wodiyan Yihoowa shenee danddayettida keenan daro asay banaara sigettanaadaana. Yaatiyo gishshau, Yesuusanne PHauloosa leemisuwaa kaalliyoogan, ha wodiyan oosettana bessiya, keehippe koshshiya, ubba eesoyiya oosuwaa mishettidi oottiyaageeta gidoos.

Hassayay?

• PHauloosaunne tiyettida hara Kiristtaanetussi imettida ‘sigettiyo oosoy’ aybee?

• Ayyaanan tiyettidaageetuppe attidaageeti ‘injje wodiyaa’ waatidi loytti goˈettidonaa?

• Kiristtaaneti ‘ayyaanan dochennaageeta gidana’ danddayiyoy ayba ogiyaanee?

[Oyshata]

[Sinttaa 14n deʼiya misiliyaa]

PHauloosi Godaa Yesuus Kiristtoosaara gayttidoogaa mule dogibeenna