QOFA 1

Miishshaanne Aquwaa Gidennan, Asaa Siiqa

GEESHSHA MAXAAFAY TAMAARISSIYOY AYBEE? “Miishsha siiqiyoogee iitatetta ubbau pultto.”—1 Xim. 6:10.

XUBE GIDIYAABI AYBEE? SHammiyoobaa erissiyaageeti nuuni nuuyyo deˈiyaaban ufayttennaadan denttettoosona. Nuuni ooratta, kaseegaappe loˈˈonne gita gididabaa shammanau miishshaa demmanau shemppoy baynnan oottanaadan koyoosona. Miishshay cimmiyo gishshau, nuuni sohuwaara a siiqana danddayoos. Gidoppe attin, duretettaa siiqiya uri bau deˈiyaabay gidana geennaagaa Geeshsha Maxaafay yootees. Kawuwaa Solomoni, “Bira dosiya uraassi biri gidi erenna; [duretettaa] siiqiya uraikka miishshaa kalli erenna” yaagidi xaafiis.—Era. 5:10.

AY OOTTANA DANDDAYAY? Yesuusa leemisuwaa kaalla; qassi aquwaappe aattada asaa siiqiyoogaa tamaara. Yesuusi asaa siiqiyo gishshau, bau deˈiya ubbabaa aggi bayanau, ubba ba shemppuwaakka aatti immanau eeno giis. (Yoh. 15:13) I, “Ekkiyaagaappe immiyaagee anjjettidaagaa” yaagiis. (Oos. 20:35) Nu wodiyaanne nuuyyo deˈiyaabaa haratussi immiyoogaa meeze oottikko, etikka nuussi hegaadan oottana. Nuuni immiyoogaa meeze oottikko asay ‘nuuyyo immanaagaa’ Yesuusi yootiis. (Luq. 6:38) Miishshaanne aquwaa yedettiyaageeti metuwaaninne waayiyan banttana qohoosona. (1 Xim. 6:9, 10) Hara baggaara, tumu ufayssay beettiyoy harata siiqiyoogaananne harati nuna siiqiyoogaana.

Sima deˈuwaa deˈanau danddayiyaakkonne aybissi ne hanotaa qorikkii? Neeyyo deˈiyaabaa woykko deˈanaadan koyiyoobaa qoodaa guuttanau danddayay? Hegaadan oottiyaaba gidikko, deˈuwan keehippe koshshiyaabau, giishin asaa maaddanaunne neeyyo deˈiya ubbabaa immida Xoossau oottanau amarida wodiyaanne wolqqaa demmana danddayaasa.—Maa. 6:24; Oos. 17:28.

[Sinttaa 4n deʼiya misiliyaa]

‘Immite; asay intteyyo immana’