QOFA 2

Nena Haraatuura Geeddarssoppa

GEESHSHA MAXAAFAY TAMAARISSIYOY AYBEE? “Asai ubbai huuphiyan huuphiyan ba oosuwaa paacco; hegaappe guyyiyan, hara asaagaara giigissennan, ba huuphe ooso xalaalan ceeqettiyoobaa demmana.”—Gal. 6:4.

XUBE GIDIYAABI AYBEE? Issi issitoo nuuyyo deˈiyaabaa keenay baynnaageetuura, qassi darotoo nuuppe minniyaageetuura, duretiyaageetuura woy eran dariyaageetuura nuna geeddarssanau koyana danddayoos. Ayba ogiyankka gido, nuna haraatuura geeddarssiyoogee qohiyaaba. Issi ura goobatettay ayyo deˈiyaabaara woy i oottana danddayiyoobaara gayttidaba giidi balan qoppoos. Asay qanaatanaadaaninne annaacettanaadan denttettanakka danddayoos.—Era. 4:4.

AY OOTTANA DANDDAYAY? Xoossay xeelliyoogaadan nena xeellanau baaxeta. Ne huuphessi loˈˈo xeelay deˈanaadan aagaa mala xeelaa oyqqa. “Asi som77⁠uwaa xeellees; shin GODAI [“Yihooway,” * NW] wozanaa xeellees.” (1 Sam. 16:7) Yihooway nena haratuura geeddarssiyoogan gidennan, ne wozanaa xeelliyoogan, ne qofaa, neeyyo siyettiyaabaanne ne halchuwaa pilggiyoogan ne oonatettaa akeekees. (Ibr. 4:12, 13) Yihooway ne abbiyaa pacaa erees; qassi neeni hegaara moggada deˈanaadan koyees. Neeni nena haratuura geeddarssiyaaba gidikko, otorettiyaagaa woykko ubbatoo neeyyo deˈiyaaban ufayttennaagaa gidaasa. Yaatiyo gishshau, neeni ubbaban qara gidennaagaa ashkketettan ammanada ekka.—Lee. 11:2.

Xoossay nena xoqqu oottidi xeellanaadan neeni ay oottana bessii? Hananabaa yootiya Mikiyaasi Xoossaa ayyaanay denttettin, “Hai asau, GODAI neeyyo lo77⁠obaa odi wottiisttenne. GODAI neeppe koyiyoogee aibee giikko, neeni suurebaa oottanaagaa, aggenna siiquwaa bessanaagaanne ashkketettan ne Xoossaara hemettanaagaa” yaagidi xaafiis. (Mik. 6:8) Neeni ha zoriyaa kaallikko, Xoossay neessi qoppana. (1 PHe. 5:6, 7) Deˈiyaabay gidana gaanaadan oottiya hagaappe aadhiyaabi aybi deˈii?

[Tohossa qofata]

[Sinttaa 5n deʼiya misiliyaa]

Yihooway nu oonatettaa yiggiyoy nu wozanan deˈiyaabaana