Xoossaa Ayyaanaa Kaaletuwaa Kaalliya Kawuwaa Baggaara Anjjuwaa Demmite!
Xoossaa Ayyaanaa Kaaletuwaa Kaalliya Kawuwaa Baggaara Anjjuwaa Demmite!
“GODAA Ayyaanai, . . . a bolli shemppana.”—ISI. 11:2.
1. Alamiyaa metuwaa xeelliyaagan issoti issoti banttana aybi qofissiyoogaa yootidonaa?
“POLOTIKAY, issippetettaa deˈoynne heeraa hanotay asau kirqqi giido ha wodiyan, asaa naati hara 100 layttaa waanidi deˈana danddayiyoonaa?” Hegee Isttefen Hokin geetettiya saynttisttee 2006n oychido oysha. Niwu Isttetisman giyo gaazeexan kiyida issi huuphe yohoy hagaadan giis: “Nuuni hiyyeesatettaa xayssibookko, woykko alamiyan sarotettaa ehibookko. Hara baggaara, hegaappe keehi dummatiyaabaa oottidaba milatees. Gidikkokka, hegaadan hanidoy nuuni baaxetibeenna gishshataassa gidenna. Koominizimiyaappe kappitaalizimiyaa gakkanaashin, olaa xayssanau Kawotettatu Waattaa Maabaraappe niyukileere ola miishshata dagayiyoogaa gakkanaashin darobaa oottida. Olaa xayssiyo ogiyaa eroos giidi qoppiyoogan, daro olaa olettida.”
2. Yihooway ubbabaa haariyo ba maataa saˈaa bolli mata wode waatidi qonccissanee?
2 Hegaa mala qofay Yihoowa ashkkarata garamissiyaaba gidenna. Asaa naati banttana banttarkka ayssanaadan merettibeennaagaa Geeshsha Maxaafay yootees. (Erm. 10:23) Ubbaappe bollaara nuna haaranau bessiyay Yihoowa xalaala. Yaatiyo gishshau, nuuyyo maaraa kessanau, nu deˈuwau koshshiya halchuwaa yootanaunne he halchuwau nuna kaalettanau maatay deˈiyoy a. Hegaa bollikka, asaa naati banttana banttarkka ayssanau halchido hada halchuwaa i mata wode xayssana. Hegaadankka, ayyo bessiya, ubbabaa haariyo maataa ixxiyoogan asaa naati nagarau, polotettaa pacaunne ‘ha saˈaa xoossaa,’ Seexaanaa Dabloosau aylletanaadan oottida asaa ubbaa i xayssana.—2 Qor. 4:4.
3. Masiyaa xeelliyaagan Isiyaasi kasetidi ay yootidee?
3 Ooratta alamiyan, Gannatiyan, Mase Kawotettaa baggaara asaa naata Yihoowa siiqo haaroy ayssana. (Dane. 7:13, 14) He Kawotettaa Kawuwaa xeelliyaagan Isiyaasi, “Daawita aawaa Isseya zaree mittaa durumaa mala gidana; durumai aaciyoogaadan, Daawita zaretu giddoppe marai (issi kawoi) kiyana. GODAA Ayyaanai, aadhdhida eratettaanne akeekaa Ayyaanai, zoriyaanne wolqqaa Ayyaanai, eratettaanne GODAAYYO yayyiyo Ayyaanai a bolli shemppana” yaagidi kasetidi yootiis. (Isi. 11:1, 2) Xoossay ba geeshsha ayyaanaa baggaara, ‘Isseya durumaappe aaciyaagee’ Yesuus Kiristtoosi asaa naata haaranaadan sunttidoy ayba ogiyaanee? Ha haaroy ayba anjjota demissanee? Nuuni he anjjota demmanau ay oottana bessii?
Haariyo Gidaa Kunttanaadan Oottiday Xoossaa
4-6. Yesuusi aadhida eranchanne qarettiya Kawo, Qeese Ubbatu Halaqanne Daanna gidanaadan oottiya keehi koshshiya eray awugee?
4 Tumuppe aadhida eranchaanne qarettiya Kawuwaa, Qeese Ubbatu Halaqaanne Daannaa kaaletuwan, Yihooway baayyo haarettiya asaa naati polotettaa demmanaadan koyees. He gita aawatettau ba geeshsha ayyaanaa baggaara gidaa kunttanaadan oottido, Yesuus Kiristtoosa Xoossay dooridoy hegaassa. Xoossay baayyo immido aawatettaa Yesuusi kumetta hanotan polanaadan oottiyaabati aybakko amaridaageeta qoppite.
5Yesuusi ooppenne aaruwan Xoossaa loyttidi erees. Xoossaayyo mexi issi Naˈay ba Aawaa oogaappenne dariya wodiyau erees; ubba daro biiloone layttau erennan aggenna. Yesuusi “beettenna Xoossaa leemiso” geetettanaadan oottidaagaa keena, he wodiyan Yihoowa loyttidi eriis. (Qol. 1:15) Yesuusi ba huuphe, “Tana be7ida urai Aawaakka be7iis” yaagiis.—Yoh. 14:9.
6Yihoowappe kaallidi, asaa naata gujjin ubba meretaa Yesuusi loyttidi erees. Qolasiyaasa 1:16, 17y, “Aissi giikko, ubbabaikka aani merettiis; beettiyaageeti, beettennaageeti, . . . aaninne ayyo [merettidosona]. I ubbabaappe kase de7iis; ubbabaikka aani ba sohuwaa sohuwaa oiqqidi de7ees” yaagees. Ha hanotaa qoppite! Yesuusi Xoossaayyo “waanna oosanchcha” gidiyoogaadan hara meretata ubbaa medhiyo wode aara oottiis. Yaatiyo gishshau, i maalaalissiya asaa naatu guuggiyaa gujjin, kumetta meretaabaa ubbabaa erees. Ee, Kiristtoosi aadhida eratettan leemisettidoogee bessiyaaba!—Lee. 8:12, 22, 30, 31.
7, 8. Xoossaa ayyaanay Yesuusa haggaazuwan waatidi maaddidee?
7Yesuusi Xoossaa geeshsha ayyaanan tiyettiis. Yesuusi, “Taani hiyyeesaassi lo77o mishiraachchuwaa yootanau tiyettido gishshau, Godaa Ayyaanai ta bollan de7ees. Qashettidaageetussi birshshettiyoogaa, qooqetussi xeelliyoogaa yootana mala, qassi qohettidaageeta qohuwaappe kessana mala, dosettida Godaa laittaa yootana mala, tana kiittiis” yaagiis. (Luq. 4:18, 19) Yesuusi Mase gididi saˈan deˈiyo wode polanaadan Xoossay koyiyoobaa gujjin, asa gidanaappe kase tamaaridobaa, geeshsha ayyaanay i xammaqettido wode akeekanaadan oottidaba milatees.—Isiyaasa 42:1; Luqaasa 3:21, 22; Yohaannisa 12:50 nabbaba.
8 Yesuusi geeshsha ayyaanan sunttettido gishshau, qassi asatettaaninne qofan polo gidiyo gishshau, i saˈan deˈida asa ubbaappe aadhiya asa xalla gidennan, ooppenne aadhiya Asttamaare. I yootiyoobaa ezggiya “asai i tamaarissiyoogan garamettiis.” (Maa. 7:28) Yesuusi asaa naatu metuwau waanna gaasuwaabaa, giishin nagaraabaa, polotettaa pacaabaanne Xoossaa erennaagaabaa tamaarissiis. Qassi, i tumuppe asaa wozanan deˈiyaabaa eranaunne hegaadan eta oyqqanau danddayees.—Maa. 9:4; Yoh 1:47.
9. Yesuusi saˈan deˈiyo wode i deˈuwan beˈidoban wotti dentti qoppiyoogee, a haaruwan intte keehippe ammanettanaadan oottiyoy ayba ogiyaanee?
9Yesuusi asa gididi deˈiis. Asa gididi deˈiyo wode ba deˈuwan beˈidobaynne polo gidenna asaa naatuura deˈidoogee Yesuusi Kawo gidanau gidaa kunttanaadan keehi maaddiis. Kiitettida PHauloosi, “Asaa nagarai atto geetettana mala, Xoossaa oosuwan ammanettida maariya qeese ubbatu halaqa gidana mala, ubbaban [Yesuusi] ba ishantta milatanau bessees. Aissi giikko, i ba huuphen paacettido gishshaunne waayettido gishshau, paacettiyaageeta maaddanau danddayees” yaagidi xaafiis. (Ibr. 2:17, 18) Yesuusi ‘paacettido gishshau’ metootiyaageetuyyo qarettana danddayees. Yesuusi qarettiyaagaa gidiyoogee i saˈan haggaazido wode qoncciis. Harggiyaageeti, bollan paci deˈiyoogeeti, huqqunnettidaageeti, ubba naatikka akko shiiqanau yayyibookkona. (Mar. 5:22-24, 38-42; 10:14-16) Yesuusa eeshshay, ashkketinne Xoossaabaa tamaaranau keehi koyiyaageetikka akko shiiqanaadan oottiis. Hara baggaara, otorettiyaageeti, axiraariyaageetinne ‘Xoossaa siiqoy baynnaageeti’ Yesuusa ixxidosonanne aara eqettidosona.—Yoh. 5:40-42; 11:47-53.
10. Yesuusi nuna siiqiyoogaa bessido ubbaappe aadhiya ogee awugee?
10Yesuusi nu gishshau ba shemppuwaa immiis. Yesuusa mala haariyaagee deˈana danddayennaagaa bessiya ubbabaappe aadhiyaabay, i nu gishshau hayqqanau eeno giidoogaa gidennan aggenna. (Mazamure 40:6-10 nabbaba.) Kiristtoosi, “Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa” yaagiis. (Yoh. 15:13) Ee, bantta haariyoogeetuppe demmiyo miishshan darotoo ishalo deˈuwaa deˈiya, polo gidenna asaa naatuugaappe dumma hanotan, Yesuusi ba shemppuwaa asaa naatu gishshau immiis.—Maa. 20:28.
Wozoy Demissiyoobaa Polanaadan Sunttettiis
11. Yesuusi nuna Woziyaagaa gidiyoogaa wozanappe ammanettana danddayiyoy aybissee?
11 Yesuusi Qeese Ubbatu Halaqa gididi ba wozuwaa yarshshuwaa goˈˈaa nuuni demmanaadan oottiyaabaa sintta xeera gididi poliyoogee keehi bessiyaaba! Yesuusi saˈan haggaazido wode, ba SHaˈu Layttaa Haaruwaa wode nuna Woziyaagaa gididi oottanabau xeera beso gidiyaabaa oottiis; nuuni ammanettiyaageeta gidikko hegaa demmana danddayoos. I harggidaageetanne bollan paci deˈiyoogeeta pattiis, hayqqidaageeta denttiis, daro asaa miziis, qassi mereta wolqqatakka azaziis. (Maa. 8:26; 14:14-21; Luq. 7:14, 15) Hegaa bollikka, i hegaa oottidoy ba maataanne wolqqaa asaa bessanau gidennan, ba qaretaanne siiquwaa bessanaassa. Inchirichaappe bana pattanaadan woossida bitaniyau Yesuusi, neeni paxanaadan “taani koyais” yaagiis. (Mar. 1:40, 41) Yesuusi ba SHaˈu Layttaa Haaruwaa wodekka, hegaadan qarettiyoogaa kumetta saˈan bessana.
12. Isiyaasa 11:9y waanidi polettanee?
12 Yesuusi 2,000 gidiya layttaappe kase doommido ayyaanaabaa timirttiyaa, inne aara haariyaageeti he wodekka tamaarissana. Yaatiyoogan Isiyaasa 11:9n, “Abbai haattan kumiyoogaadan, sa7ai GODAA eriyoogan kumana” yaagiyaagee polettana. Addaamee oottanaadan koyro imettidaagaadan, he timirttee saˈaanne a bollan deˈiya zawi baynna meretaa waatidi oyqqanaakko imettana kaaletuwaa gujjanaagee sirissenna. Xoossay koyro halchido, Doomettaabaa 1:28n deˈiya halchoy 1,000 layttaa haaruwaa wurssettan polettana; qassi wozuwaa yarshshoy kumetta ogiyan oosuwan peˈana.
Pirddanaadan Sunttettiis
13. Yesuusi xillotettaa dosiyoogaa waatidi bessidee?
13 “Paxa de7iyaageetu bollaaninne haiqqidaageetu bollan pirddanau [Xoossay] sunttidoogee” Kiristtoosa. (Oos. 10:42) Yaatiyo gishshau, Yesuusi merinau deˈiyaagaa, xillotettaynne ammanettiyoogee i xeessan minttidi gixxido qabatto mala gidiyoogaa eriyoogee minttettiyaaba! (Isi. 11:5) I yaaretiyoogaa, loˈˈo milatiya iita gidiyoogaanne hara iitabaa ixxiyoogaa bessiis; qassi harati waayettiyo wode qarettennaageeta seeriis. (Maa. 23:1-8, 25-28; Mar. 3:5) Hegaa bollikka, Yesuusi “asa wozanan aibi de7iyaakko, i ba huuphen” eriyo gishshau, beettiyaaban cimettennaagaa bessiis.—Yoh. 2:25.
14. Yesuusi xillotettaanne suure pirddaa dosiyoogaa ha wodiyan bessiyoy ayba ogiyaanee, nuna woygiya oyshata oychana koshshii?
14 Asaa naatu taarikiyan hani erenna sabbakiyoonne tamaarissiyo oosuwaa kaalettiyoogan, Yesuusi xillotettaanne suure pirddaa dosiyoogaa bessiiddi deˈees. Ha oosoy Xoossay ufayttiyo ogiyan polettennaadan diggana danddayiya asi woy kawotetti woy iita ayyaani mule baawa. Yaatiyo gishshau, Armmageedoona olaappe simmin, Xoossaa suure pirdday ubbasan kumanaagaa kumetta hanotan ammanettana danddayoos. (Isiyaasa 11:4; Maatiyoosa 16:27 nabbaba.) Inttena hagaadan oychite: ‘Haggaazuwan demmiyo asaa Yesuusaagaadan xeelliyaanaa? Koyiyoogaa keenaa oottanau ta payyatettay woy ta hanotay danddayissennaagaa gidikkokka, tau danddayettida ubbabaa Yihoowayyo immiyaanaa?
15. Xoossaayyo nuuni danddayiyo ubbabaa immanaadan ay akeekiyoogee maaddana danddayii?
15 Sabbakiyo oosoy Xoossaa ooso gidiyoogaa hassayikko, polo wozanaappe Xoossaayyo oottanaadan i nuna maaddees. He oosuwaa oottanaadan azaziday, ba Naˈaa baggaara kaalettiyaynne he oosuwaa oottiyaageetussi ba geeshsha ayyaanaa baggaara wolqqaa immiyay a. Ayyaanaa kaaletuwaa kaalliya a Naˈaaranne Xoossaara issippe oottiyo maataa xoqqu oottidi xeelleetii? Laappun miilooneppe dariya, etappe daroti “tamaaribeenna coo asa” geetettiya asati 236 biittan Kawotettaa kiitaa yootanaadan denttettana danddayiyay Yihoowappe attin haray oonee?—Oos. 4:13.
Kiristtoosa Baggaara Anjjettanau Giigite
16. Doomettaabaa 22:18y Xoossaa anjjuwaabaa ay bessii?
16 Yihooway Abrahaamayyo, “Neeni taayyo azazettido gishshau, ha sa7aa kawotettati ubbai ne zerettaa baggaara anjjettana” yaagiis. (Doo. 22:18) Xoossaayyoonne a Naˈaayyo oottiyoogaa xoqqu oottidi xeelliyaageeti, Mase gidiya Zerettay sinttappe ehaana anjjuwaa ammanettidi naagana danddayiyoogaa hegee bessees. Ha wodiyan he asati he anjjuwaa hassayidi minnidi oottoosona.
17, 18. Yihooway ay qaala gelidoogaa Zaarettido Wogaa 28:2n nabbabiyoo, hegee nuussi keehippe koshshiyoy ayba ogiyaanee?
17 Abrahaama zeretta gidida, Israaˈeela deriyau, issi wode Xoossay, “GODAAYYO, ne Xoossaayyo, neeni azazettikko, hagaappe kaallidi de7iya anjjoi [Higgiyaa maachan odettidaagee] ubbai nebaa gidana” yaagiis. (Zaa. 28:2) Xoossaayyo oottiya, ha wodiyan deˈiyaageetussikka hegaadan geetettana danddayees. Intte Yihoowa anjjuwaa koyiyaaba gidikko, i yootiyoobaa ubbatoo ‘azazettite.’ Yaatikko, a anjjoy ‘inttebaa gidana.’ Gidoppe attin, ‘azazettiyoogee’ ay gujjii?
18 Azazettiyoogee Xoossaa Qaalay yootiyoobaanne Xoossay giigissiyo ayyaana qumaa wozanan wottiyoogaa gujjiyoogee qoncce. (Maa. 24:45) Hegee Xoossaunne a Naˈau azazettiyoogaa giyoogaa. Yesuusi, “Saluwan de7iya ta Aawai giidoogaa oottiya urai saluwaa gelanaappe attin, ‘Ta Godau, ta Godau’ giya ubbai gelenna” yaagiis. (Maa. 7:21) Qassi Xoossaayyo azazettiyoogee, sunttettida cimati, giishin “imota” gidida attuma asati deˈiyo, i essido Kiristtaane gubaaˈiyau eeno giidi haarettiyoogaa giyoogaa.—Efi. 4:8.
19. Nuuni anjjuwaa demmana danddayiyoy ayba ogiyaanee?
19 “Imota” gidida attuma asatu giddon kumetta Kiristtaane gubaaˈiyaa kalˈˈatiya, Bollaara Heemmiyaagaa yameti deˈoosona. (Oos. 15:2, 6) Matattida iita waayiyaa wode nuuni ay mala pirddaa demmanaakko erissiya waannabay, nuuni Kiristtoosa ishata gididaageeta xeelliyo hanotaara gayttidaba. (Maa. 25:34-40) Yaatiyo gishshau, nuuni anjjuwaa demmiyo issi ogee Xoossaa ayyaanan tiyettidaageeta ammanettidi kaafiyoogaa.
20. (a) “Imota” gidida attuma asatu waanna aawatettay aybee? (b) He ishantta xoqqu oottidi xeelliyoogaa waatidi bessana danddayiyoo?
20 “Imota” gidida attuma asatu giddon Macara Biiruwaa Komitetu yameti, bollaara geeddiyaageetinne gubaaˈiyaa cimatikka deˈoosona; hegeeti ubbay geeshsha ayyaanan sunttettidaageeta. (Oos. 20:28) He ishanttu waanna aawatettay ‘ubbay Xoossaa Naˈaa ammaniininne erin beettiya issippetettaakko gakkanaassi, Kiristtoosa polo dichaa keenaa diccidi, gastta asa gidanaashin’ Xoossaa asaa minttiyoogaa. (Efi. 4:13) Nunadan etikka polo asa gidennaagee qoncce. Gidikkokka, nuuni eta siiqo henttaa nashshiyo wodenne azazettiyo wode anjjettanau giigidaageta gidoos.—Ibr. 13:7, 17.
21. Xoossaa Naˈaayyo azazettiyoogee eesoyiyaaba gididoy aybissee?
21 Kiristtoosi mata wode Seexaanaa iita siraataa xayssana. Hegee haniyo wode, kasetidi odettida “zawai bainna daro asaa” Yesuusi ‘deˈo haattaa pulttuwaakko’ kaalettanaadan Xoossay sunttido gishshau, nu deˈoy Yesuusa kushiyaana gidana. (Ajj. 7:9, 16, 17) Hegaa gishshau, Yihoowa ayyaanaa kaaletuwaa kaalliya Kawuwau eeno giidi haarettanaunne a nashshanau nuuyyo danddayettida ubbaa oottiyaageeta gidoos.
Kaalliya Xiqisetuppe Ay Tamaaradii?
[Oyshata]
[Sinttaa 19n deʼiya misiliyaa]
Yesuusi Yaaˈiroosa naˈiyo hayquwaappe denttido wode i qarettiyoogee qoncciis
[Sinttaa 20n deʼiya misiliyaa]
Taarike wode ubban hani erenna sabbakiyo oosuwaa Yesuus Kiristtoosi kaalettiiddi deˈees