Ayyaana Alamiyaabaa Ajjuutata

NEENI pude saluwaa xeelaa tolikkokka, ayyaana alamiyan deˈiya oonanne beˈakka. Ezggiyaakkokka, ooninne haasayishin siyakka. Gidoppe attin, ayyaanati deˈiyoogaa ammanettana danddayaasa. Eti keehi eranchanne wolqqaama; qassi etau eta huuphen huuphen sunttaynne eeshshay deˈees. Etappe issoti issoti nuna maaddoosona, harati qassi qohanau koyoosona. Ubbaykka nubaa erana koyoosona.

Tumu Xoossay ba huuphen ayyaana. (Yoh. 4:24) Keehi daro worddo xoossatuppe dummayiya sunttay ayyo deˈees. A sunttay Yihoowa. (Maz. 83:18) Mazamuraawee hagaadan giis: “Aissi giikko, GODAI [“Yihooway,” NW] gita; aaro galatai ayyo bessees. Xoossatu ubbaappe aadhdhidi i yayettanau bessees. Hara asaa xoossati ubbai eeqata; shin GODAI [“Yihooway,” NW] salota medhdhida Xoossaa. Bonchchonne anggai a yuushuwan de7ees; minotettainne puulai a Beeta Maqidasiyan de7ees.”—Maz. 96:4-6.

Tumu Xoossaara Gayttida Ajjuutaa

Geeshsha Maxaafay: “Xoossaa be7ida asi mulekka baawa” yaagees. (Yoh. 1:18) Yelettoosappe qooqe gidida uri mera akeekennaagaadan, nuunikka a puulaanne a anggaa akeekana danddayokko. SHin loˈˈo asttamaaree ba tamaareti eriyoobaa goˈettidi, issi kirqqabaa qonccissiyoogaadan, Xoossay nuuni beˈana danddayiyoobata goˈettidi, beˈana danddayennabata ba Qaalaa, Geeshsha Maxaafaa baggaara qonccissees. Beni wode deˈida ammanettidaageeti ayyaanay denttettin beˈido ajjuutan, Yihooway saluwaa shilootaa, qassi yan deˈiyaageetuura nuuyyo deˈiya gaytotettaa nuuni akeekanaadan maaddees.

Leemisuwau, hananabaa yootiya Hizqqeeli beˈido issi ajjuutan Yihoowa bonchoy taman, phooliyaaban, sampperiyaa giyo inqquwaaninne zuullan leemisettiis. Kiitettida Yohaannisi hara ajjuutan, Yihooway ba araatan uttidaagaa beˈidi, Xoossaa “merai burccukko milatiya al77o shuchchaadaaninne zo7o al77o shuchchaadan” phooliyoogaa, qassi a “kawotaa araataayyo ubba baggaara mitta haitta milatiya zuullai yuuyi aadhdhidi” deˈiyoogaa yootiis. Hegaadan qonccissiyoogee, Yihooway deˈiyoosay aybippenne aaruwan loˈˈiyaagaa, ufayssiyaagaanne woppissiyaagaa gidiyoogaa nuna akeekissees.—Ajj. 4:2, 3; Hiz. 1:26-28.

Hananabaa yootiya Daaneelikka Yihoowa ajjuutan beˈiis; he ajjuutan i, “daro miilooneti [kiitanchati] a sinttan” eqqidaageeta beˈiis. (Dane. 7:10) Hegaa beˈiyoogee ayba maalaaliyaabee! Issi kiitanchaa ajjuutaaninne beˈiyoogee  maalaaliyaaba, shin miilooniyan qoodettiya, polo mereta gidida kiitanchata ane qoppa!

Geeshsha Maxaafay 400 gidiya sohuwan kiitanchatubaa yootees; eta maataa qonccissiya sunttatuppe suraafeelanne kiruube giyoogeeti deˈoosona. “Kiitanchaa” geetettidi birshshettida Giriikenne Ibraysxxe qaalatu birshshettay “kiitettiyaagaa” giyoogaa. Hegaa gishshau, kiitanchati issoy issuwaara haasayana danddayoosona, qassi beni wode asaara haasayidosona. Kiitanchati beni saˈan deˈida asata gidokkona. Yihooway ha ayyaana meretata asa medhanaappe daro wodiyaa kasetidi medhiis.—Iyy. 38:4-7.

Daaneela ajjuutan cora kiitanchati issi dummabaa beˈanau shiiqidosona. Hegaappe simmin, “asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo” imettanaadan, “asa na7a milatiyaagee” Yihoowa araataakko shiiqiyoogaa Daaneeli beˈiis. (Dane. 7:13, 14) “Asa na7a” geetettidaagau ayyaana alamiyan xoqqa sohoy deˈees; i saˈa ubbaa haaranaadan sunttettida, hayquwaappe denddida Yesuus Kiristtoosa. A haaroy mata wode asa kawotettata ubbaa sohuwan eqqidi, harggiyaa, azzanuwaa, huqqunnaa, hiyyeesatettaa, ubba hayquwaakka xayssana.—Dane. 2:44.

Asaa naatussi loˈˈobaa amottiya ammanettida kiitanchati Yesuusi kawotidoogan keehi ufayttidoogau siree baawa. Gidikkokka, ayyaana meretatu ubbaassi hegaadan siyettibeennaagee azzanttiyaaba.

Xoossaanne Asaa Morkketa

Asaa naatu taarikiyaa doomettan, issi kiitanchay harati baayyo goynnanaadan amottidi,  Yihoowa bolli makkalidi Seexaana gidiis; hegaa birshshettay “eqettiyaagaa” giyoogaa. Iitatettan kumida Seexaanay, ooppenne aaruwan siiqiyaagaa gidida Yihoowaara keehi eqettiis. Hara kiitanchatikka Seexaanaara makkalidosona. Geeshsha Maxaafay eta daydanttata yaagees. Daydanttatikka Seexaanaadan asaa naatussi iita morkke gididosona. Saˈan deˈiya tuggaappe dariya baggau, pirdda pacau, harggiyau, hiyyeesatettaunne olau gaasoy eta.

Kiristtaane giyo woosa keettatuppe daroti Seexaanaabaa beniigaadan yootennaba gidikkokka, Iyyooba maxaafay ha makkalancha kiitanchaa oonatettaanne a koshshaa loytti akeekanaadan maaddees. Hagaadan gees: “Issi gallassi kiitanchchati GODAA sinttan beettanau yiidosona; Seexaanaikka qassi etaara yiis.” Hegaappe simmin deˈiya haasayan Seexaanay Iyyoobi Xoossaayyo oottiyoy i ayyo immiyoobaa gaasuwaana giidi iita mooto mootiis. Seexaanay ba mootuwaa boxooxissanau, Iyyooba mehiyaanne a naata ubbaa woriyoogan a bolli wolqqaama waayiyaa gattiis. Hegaappe simmin, Iyyooba bollaa ubbaa iita masunttan shociis. Seexaanay gattido he ubba qohuwan a halchoy polettibeenna.—Iyy. 1:6-19; 2:7.

Yihooway Seexaanaa hagaa keena adussa wodiyau danddayido loˈˈo gaasoy deˈees; shin merinau danddayenna. Mata wode Seexaanay xayana. Hegau koyro tanggoy doommiis; ayyaana alamiyan polettiya keehi koshshiya he hanotay Ajjuutaa maxaafan qoncciis; hegee baynnaakko nu he allaalliyaa mule erana danddayokko. Hagaadan gees: “Hegaappe guyyiyan, saluwan olai denddiis. Mikaa7eeli ba kiitanchchatuura issippe miimminttiyaara olettiis; miimmintteekka ba kiitanchchatuura gididi, zaarettidi olettiis. SHin miimminttee xoonettiis. Xoonettin miimminttiyaassinne a kiitanchchatussi saluwan sohoi xayiis. Gita miimminttee, xalahe halaqaa woikko Seexaanaa giyoogee, beni shooshshai, sa7a ubbaa balettiyaagee olettiis; i ba kiitanchchatuura issippe duge sa7au olettiis.”—Ajj. 12:7-9.

Seexaanay ‘saˈa ubbaa balettiyaagaa’ geetettidoogaa akeeka. I asaa Yihoowappenne a Qaalaappe haassanau haymaanootiyaara gayttida wordduwaa aassiyoogan balettees. Hegaa mala wordduwaappe issoy, hayqqiyo wode ubba asay ayyaanaa alamiyau bees giyoogaa. He qofay dumma dumma ogiyan qonccees. Leemisuwau, Afirkkaaninne Isiyan deˈiya daroti asay hayqqiyo wode, mayzzati deˈiyo ayyaana alamiyau bees giidi ammanoosona. Nagaraappe geeyiyoosaabaanne siˈooliyaabaa tamaarissiyoobaykka asi hayqqi simmidi deˈees giyo qofaara gayttidaagaa.

Hayquwaappe Simmin Saluwan Deˈoy Deˈii?

SHin alame yuushuwan deˈiya, miilooniyan qoodettiyaageeti ammaniyo, loˈˈo asay ubbay saluwaa bees giyoogaabaa woygana danddayettii? Issi issi loˈˈo asati saluwaa biyoogee tuma, shin biilooniyan qoodettiya hayqqidaageetuppe eta qooday guutta. Geeshsha Maxaafay “sa7aappe wozettida” 144,000 asati, “qeeseta” gidanaagaanne ‘saˈan haaranaagaa’ qonccissees. (Ajj. 5:9, 10; 14:1, 3) Eti asa Naˈaa, Yesuus Kiristtoosaara, saluwaa haaruwaa, Xoossaa Kawotettaa ayssiyaageeta gidana. He haaroy Seexaanaanne daydanttata xayssana, qassi saˈaa gannate oottana. Hayqqidaageetuppe daroti sinttappe denddidi, he gannate saˈan merinau deˈanau hidootana danddayoosona.—Luq. 23:43.

Yaatiyo gishshau, xaaxi waaxiyoode, ayyaana alamiyan daroti deˈoosona. Deˈon deˈiya ubbaa Medhidaagee, Xoossaa Yihooway eta ubbaappe bolla. Daro miiloone kiitanchati ammanettidi ayyo oottoosona. Seexaanaa kaaletuwan hara kiitanchati Yihoowa bolli makkalidosona, qassi asaa naata balettoosona. Hegaa bollan, asaa naatuppe amaridaageeti saluwan dumma aawatettaa oyqqanau saˈaappe ‘wozettidosona’ woykko doorettidosona. Hegaa qofan wottidi, ayyaana alamiyan deˈiyaageetuppe oona haasayissana danddayiyaakko, qassi ayba ogiyan haasayana koshshiyaakko ane haˈˈi beˈoos.