Paaciyaa Xoonanaunne Hidootaa Qanxxennaadan Wolqqaa Demmiyoogaa

“Geeshsha Ayyaanai intte bolli wodhdhiyo wode, wolqqaa intte ekkana.”—OOS. 1:8.

1, 2. Yesuusi ba erissiyo ashkkarata ayba ogiyan maaddanau qaalaa gelidee, etau hegee koshshiyoy aybissee?

YESUUSI ba erissiyo ashkkarati i azazido ubbabaa bantta wolqqan polana danddayennaagaa erees. Eti sabbakiyo oosoy aaho, eta morkketi wolqqaama, qassi ashoy daafurancha gidiyoogaa qoppiyo wode, asaagaappe dariya wolqqay etau koshshiyoogee qoncce. Yaatiyo gishshau, Yesuusi saluwaa baanaappe kase ba erissiyo ashkkaratuyyo hagaadan giis: “Geeshsha Ayyaanai intte bolli wodhdhiyo wode, wolqqaa intte ekkana; ekkidi Yerusalaameeninne Yihudaa biitta ubban, Samaariyaaninne sa7aa gaxaa gakkanaashinkka taassi markkattiyaageeta gidana.”—Oos. 1:8.

² PHenxxaqosxxe gallassi 33 M.Ln, Yesuus Kiristtoosa kaalliyaageeti bantta timirttiyaa Yerusalaame muleera gattanaadan geeshsha ayyaanan wolqqaa demmido wode, he qaalaa gelidobay polettiyoogaa doommiis. Hegaa ayba yedetinne diggana danddayibeenna. (Oos. 4:20) Nuna gujjin, Yesuusa kaalliya ammanettidaageetuyyo “wodiyaa wurssettai gakkanaassikka ubba wode,” Xoossay immiyo he wolqqay keehippe koshshees.—Maa. 28:20.

3. (a) Geeshsha ayyaanaanne abbiyaa giddon deˈiya dummatettaa qonccissa. (b) Yihooway immiyo wolqqay nuuni ay oottanaadan maaddii?

³ ‘Geeshsha ayyaanay eta bolli wodhdhiyo wode, wolqqaa woykko abbiyaa eti demmanaagaa’ Yesuusi ba erissiyo ashkkaratuyyo qaalaa geliis. ‘Abbiyaanne’ ‘ayyaanaa’ giya qaalatu birshshettay dumma dumma. Xoossaa ayyaanay, a wolqqay, i ba sheniyaa polanau asaassi immiyo woy issibaa bolli wodhanaadan oottiyo wolqqa. SHin abbee, “issibaa oottana danddayiyo” minotetta gaana danddayoos. Hegee issi koshshiyaabaa oottana gakkanaashin issi uran woy issibaa bolli coo uttana danddayees. Hegaa gishshau, geeshsha ayyaanaa, baatiriyaa kunttanau goˈettiyo korinttiyaa wolqqan leemisana danddayettees; shin abbee baatire giddon kumi uttiya wolqqa mala. Yihooway ba ashkkaratuyyo ba geeshsha ayyaanaa baggaara immiyo abbee, nuuni ubbay Kiristtaane gidiyoogan geppidobaa polanau, qassi nunaara eqettiya wolqqata koshshiyo wodiyan teqqanau danddayissees.—Mikiyaasa 3:8; Qolasiyaasa 1:29 nabbaba.

4. Ha huuphe yohuwan ay beˈanee, hegee koshshiyaaba gididoy aybissee?

⁴ Geeshshaa ayyaanaa baggaara nuussi imettiya wolqqay waanidi qonccii? Issi issi hanotan geeshsha ayyaanay waananaadaaninne ay oottanaadan denttettii? Xoossaayyo ammanettidi oottanau koyiyo wode, Seexaanay, a siraatay woykko polo gidenna nu asatettay nu bolli daro metuwaa gattoosona. Nuuni Kiristtaane gididi deˈiyoogan genccanau, aggennan haggaazanaunne Yihoowaara mata dabbo gididi deˈanau hegaa mala metuwaa xooniyoogee keehippe koshshees. Paaciyaa xoonanau, daafurennaadaaninne hidootaa qanxxennaadan nuna geeshsha ayyaanay waati maaddiyaakko ane beˈoos.

Paaciyaa Xoonanau Wolqqaa Demmiyoogaa

5. Nuuni wolqqaa demmanaadan woosay waati maaddii?

⁵ Yesuusi bana kaalliyaageeti, “Nuna iitabaappe ashshanaappe attin, paacen gelissoppa”  giidi woossanaadan tamaarissiis. (Maa. 6:13) Hegaadan woossiya ammanettida ba ashkkarata Yihooway olenna. Hara wode Yesuusi, ‘saluwan deˈiya Aaway bana woossiyaageetussi geeshsha ayyaanaa immanaagaa’ yootiis. (Luq. 11:13) Nuuni suure gididabaa oottanaadan Yihooway ba ayyaanaa immanau qaalaa gelidoogee ayba minttettiyaabee! Hegee, nuuni paacettennaadan Yihooway teqqees giyoogaa gidenna. (1 Qor. 10:13) SHin nuna paacee gakkiyo wodee, kaseegaappe aaruwan mintti woossana koshshiyo wode.—Maa. 26:42.

6. Yesuusi Seexaanaa paaciyau aybippe zaaruwaa immidee?

⁶ Dabloosa paaciyau Yesuusi Geeshsha Maxaafaappe zaaruwaa immiis. “Xoossaa maxaafai, . . . yaagees. Qassikka Xoossaa maxaafai, . . . yaagees. . . . Laa ha Seexaanau haakka; aissi giikko, Xoossaa maxaafai, ‘Godaayyo, ne Xoossaayyo goinna; a xalaalau ootta’ gees” yaagidi Yesuusi zaarido wode, Xoossaa Qaalaa i loytti hassayiyoogee qoncce. Yihoowanne a Qaalaa siiqiyoogee, Seexaanay paaccido paaciyaa eqettanaadan Yesuusa maaddiis. (Maa. 4:1-10) Yesuusi zaari zaari eqettin, Seexaanay aggidi biis.

7. Nuuni paaciyaa eqettanaadan Geeshsha Maxaafay waatidi maaddii?

⁷ Dabloosa paaciyaa eqettanau Yesuusi Geeshsha Maxaafan ammanettidaba gidikko, nuuni aagaappe aaruwaa an ammanettana koshshees! Dabloosa eqettanau nuuni kasetidi, Xoossay kessido maarata eranaunne eta loytti kaallanau murttana koshshees. Daro asay Geeshsha Maxaafaa xannaˈidi, Xoossaa aadhida eratettaanne xillotettaa akeekiisinne xoqqu oottidi xeelliis; hegee eti Geeshsha Maxaafaa maaraadan deˈanaadan denttettiis. ‘Xoossaa qaalau asa wozanan deˈiya koshshaanne qofaa’ shaakkiyo wolqqay deˈiyoogee tuma. (Ibr. 4:12) Issi uri Geeshsha Maxaafaappe darobaa nabbabidi an wotti dentti qoppiyo payduwan, ‘Yihoowa tumaa’ kaseegaappe aaruwan akeekana danddayees. (Dane. 9:13) Hegaadaana gidiyo gishshau, nu pacaa giigissanau maaddiya Geeshsha Maxaafaa xiqisetun wotti dentti qoppana koshshees.

8. Nuuni geeshsha ayyaanaa ayba ogiyan demmana danddayiyoo?

⁸ Yesuusi paaciyaa eqettana danddayidoy, Geeshsha Maxaafaa qofaa eriyoogaa bolli, i ‘geeshsha ayyaanan kumido’ gishshataassa. (Luq. 4:1) Nuuyyo hegaa mala minotettaynne eray deˈanaadan, Yihooway ba ayyaanaa nuussi immanau giigissido giigisso ubbaa loyttidi goˈettiyoogan akko shiiqana koshshees. (Yaaq. 4:7, 8) Hegeetuppe amaridaageeti, Geeshsha Maxaafaa xannaˈiyoogaa, woosaanne nu mala Kiristtaanetuura issippetettaa medhiyoogaa. Ayyaanaabaara gayttida loˈˈoban xeelaa wottidi, hegaa qoppanaadan maaddiya, ayyaanaabaa oosoy daridoogeeta gidiyoogaa goˈˈaakka daroti akeekidosona.

9, 10. (a) Intte heeran meeze gidida paaceti awugeetee? (b) Daafuridabadan intteyyo siyettiyo wodekka wotti dentti qoppiyoogeenne woosay paaciyaa eqettanau waati maaddana danddayii?

⁹ Intte eqettana koshshiyo paacee aybee? Intte aqo lagge gidenna uraa lambbeechanau paacetti ereetii? Intte ekkibeennaba woy gelibeennaba gidikko, ammanenna uray oychiyo wode gelanau woy ekkanau paacetti ereetii? Televizhiiniyaa beˈiyo wode woy Interneettiyaa goˈettiyo wode, Kiristtaaneti qoppennan borssobaa beˈanau paacettana danddayoosona. Hegaa malabay inttena gakkidee; yaatin, ayba tanggo ekkidetii? Issi balay hara balaa waati kaalettana danddayiyaakko, qassi hegee deexo nagaran waati yeggana danddayiyaakko wotti dentti qoppiyoogee eratetta. (Yaaq. 1:14, 15) Intte deexo nagaraa oottikko, Yihooway, gubaaˈeenne intte soo asay ay keena azzananaakko qoppite. Hara baggaara, Xoossay kessido baaso siraataa ammanettidi naagiyoogan loˈˈo zoriya wozanaa demmoos. (Mazamure 119:37; Leemiso 22:3 nabbaba.) Hegaa mala paacee inttena gakkiyo wode awudenne, eqettanaadan minttettuwaa demmana mala woossanau murttite.

¹⁰ Dabloosi gattiyo paaciyaa xeelliyaagan hassayana koshshiyo harabaykka deˈees. Seexaanay Yesuusakko yiidoy, I bazzuwan 40 gallassaa xoomi simmiina. Yesuusa suuretettaa paaccanau ‘injje wodee’ hegaa gidiyoogaa Dabloosi qoppidoogee sirissenna. (Luq. 4:13, NW) Seexaanay  nu suuretettaakka paaccanau injje wodiyaa koyees. Yaatiyo gishshau, nuuni ayyaanaaban minnidi deˈiyoogee keehippe koshshiyaaba. Darotoo Seexaanay issi uri keehi daafuridoogaa woy shuggidoogaa akeekiyo wode qohees. Yaatiyo gishshau, nuuni daafuriyo woy hidootaa qanxxiyo wode ubban, Yihooway nuna maaddanaadaaninne geeshsha ayyaanaa immanaadan awudeegaappenne aaruwan woossanau murttana koshshees.—2 Qor. 12:8-10.

Daafuriyo Wodenne Hidootaa Qanxxiyo Wode Genccanau Geeshsha Ayyaanay Nuna Maaddees

11, 12. (a) Ha wodiyan daroti hidootaa qanxxiyoy aybissee? (b) Hidootaa qanxxiyoogaa eqettanau wolqqaa aybippe demmana danddayiyoo?

¹¹ Nuuni polo asa gidennaagaappe denddidaagan, issi issitoo hidootaa qanxxoos. Nuuni deˈiyo wodee keehippe unˈˈissiyaagaa gidiyo gishshau, ha wodiyan hegaa malabay gakkana danddayees. Hanno gakkanau asaa naati beˈi erenna keehi metiya wodiyan deˈoos. (2 Xim. 3:1-5) Armmageedooni mati mati biyo wode ikkonoomiyan, qofaaninne haraban unˈˈissiyaabay dari dari bees. Hegaa gishshau, issoti issoti bantta soo asau qoppidi, etau koshshiyaabaa kunttiyo aawatettaa polanau kaseegaappe aaruwan metootiyoogee garamissiyaaba gidenna. Eti daafurana, xalalana, wolqqaa wurananne ubba hitana danddayoosona. Intte hanotay hegaa mala gidikko, he hanotan waani genccana danddayeetii?

¹² Yesuusi ba erissiyo ashkkaratuyyo minttettiyaagaa, giishin Xoossaa geeshsha ayyaanaa immanau qaalaa gelidoogaa hassayite. (Yohaannisa 14:16, 17 nabbaba.) Hegee saluwan saˈan deˈiya wolqqa ubbaappe keehi dariya wolqqa. Yihooway he wolqqaa goˈettidi, nuna gakkiya ayba metuwaanne gidin genccanau koshshiya minotettaa “keehi darissi” immana danddayees. (Efi. 3:20) He wolqqan ammanettiyoogan, kiitettida PHauloosi, nuuni ‘ubba baggaara unˈˈettiyaaba’ gidikkokka, ‘ubbaappe aadhiya wolqqaa’ demmanaagaa yootiis. (2 Qor. 4:7, 8) Yihooway unˈˈissiyaabaa ha wodiyan xayssanau qaalaa gelibeenna; shin hegan genccana mala ba ayyaanaa baggaara nuussi wolqqaa immanaagaa qaalaa geliis.—Pili. 4:13.

13. (a) Issi yelagiyaa metiya hanotaa genccanau wolqqaa waata demmadee? (b) Hegaa malabaara gayttidaagan leemiso gidiya uraa ereetii?

¹³ Layttay 19 gidido aqinyee, Isttefani leemisuwaa qoppite. Iyyo layttay 12 gidido wode, guugge giddon suuttay meqqidoogaanne guugge giddon xiiˈee (tumor) kiyidoogaa gaasuwan sahettaasu. He wodeppe doommada, naaˈˈutoo shuhettaasu; raadeeshine giyo akkamo hiillan akkamettaasu; qassi haranttuwaa naaˈˈutoo suuttay meqqin, iyyo haddirssa bagga bollay  loytti qaaxxenna; ayfeekka loytti xeellenna. Isttefana Kiristtaane shiiqotanne haggaazuwaa mala keehi xoqqu oottada xeelliyoobatuyyo ba wolqqaa qoraphana koshshiis. SHin a daro ogiyan genccanaadan Yihoowa ayyaanay maaddidoogaa akeekaasu. Geeshsha Maxaafan baasettida xuufetun kiyiya, hara Kiristtaanetu temokroy a hidootaa qanxxiyo wode o minttettiis. Ishatinne michoti dabddaabbiyaa xaafiyoogan woykko shiiquwaappe kase woy simmin minttettiyaabaa haasayiyoogan o minttettidosona. Koshshay deˈiyo asaykka Isttefana Geeshsha Maxaafaappe tamaarissiyoobaa tamaaranau i soo biyoogan nashshiyoogaa bessidosona. He ubbabau Isttefana Yihoowa keehippe galatausu. A banaara gayttidaagan polettidabadan qoppiyo, Mazamure 41:3 keehippe dosawusu.

14. Nuuni hidootaa qanxxiyo wode oottana bessennabay aybee, aybissi?

¹⁴ Nuuni daafuriyo wode woy unˈˈettiyo wode, metuwaa genccanau ayyaanaabaa oosuwaappe amaridaagaa aggana koshshees giidi mule qoppana bessenna. Nuuni oottana bessenna keehi iitabay hegaa. Aybissi giikko, buzonne so asaa xinaatiyaa xannaˈiyoogaa, haggaazuwan shaahettiyoogaanne shiiquwan beettiyoogaa mala ayyaanaabaa oosoti, zaarettidi nuuyyo wolqqay kumanaadan oottiya geeshsha ayyaanaa demmiyo ogeta. Kiristtaane oosoti ubbatoo shemppo demmanaadan oottiyaageeta. (Maatiyoosa 11:28, 29 nabbaba.) Ishatinne michoti daroti keehi daafuridi shiiquwaa yoosona; shin ayyaanaaban wolqqaa demmidi bantta soo simmoosona.

15. (a) Issi Kiristtaanee ba deˈuwan baaxetennaadan oottanau Yihooway qaalaa gelidee? Geeshsha Maxaafaa qofaa goˈettidi qonccissite. (b) Xoossay nuuyyo ayba qaalaa gelidee, hegee ayba oyshi denddanaadan oottii?

¹⁵ Hegaa giyoogee Kiristtaane gidiyoogan oottiyo oosoy deexxennaba giyoogaa gidenna. Ammanettiya Kiristtaane gidanau baaxetana koshshees. (Maa. 16:24-26; Luq. 13:24) Gidikkokka, daafurida urau Yihooway geeshsha ayyaanaa baggaara wolqqaa immana danddayees. Hananabaa yootiya Isiyaasi, “GODAA ammanettidi naagiyaageeti, bantta wolqqaa ooraxissana. Eti argganttatudan, qefiyan pude kiyana; woxxidi daafurokkona; hemettidikka wolqqaa wurokkona” yaagidi xaafiis. (Isi. 40:29-31) Hegaa gishshau, Kiristtaane oosoy deexxiyaabadan nuuni qoppanaadan oottiya gaasoy aybee? giidi nuna oychana koshshees.

16. Daafurau woy hidootaa qanxxiyoogau gaaso gidana danddayiyaabay deˈennaadan ay oottana danddayiyoo?

¹⁶ Yihoowa Qaalay ‘loˈˈobay woykko keehippe koshshiyaabay aybakko’ nuuni akeekanaadan minttettees. (Pili. 1:10) Annaaciyan haahosaa woxxiyo wottaara Kiristtaanetu deˈuwaa leemisiyoogan, kiitettida PHauloosi ayyaanaa kaaletuwan, “Nuna xubbiya [ubbabaa] . . . diggidi nu sinttan de7iya nuuni woxxana wottaa genccidi woxxoos” yaagiis. (Ibr. 12:1) PHauloosi yootana koyidobay, nuuni daafuranaadan oottiya, koshshenna oosuwaappenne toohuwaappe haakkana bessiyoogaa. Nuuppe issoti issoti darobaa oottanau baaxetana danddayoos. Hegaa gishshau, intte darotoo daafuriyaabanne unˈˈettiyaaba gidikko, oosuwan ay keena wolqqaa wurssiyaakko, ufayttiyoobau ay keena wodiyaa wurssiyaakko, qassi ispporttiyan woy wodiyaa aattiyooban ay keena wodiyaanne wolqqaa goˈettiyaakko qoppiyoogee maaddana danddayees. Yuushshi qoppiyoogeenne nu abbiyaa eriyoogee, nu wolqqaa akeekidi keehi koshshenna oosuwaa darissennaadan nuna ubbaa denttettana bessees.

17. Issoti issoti hidootaa qanxxana danddayiyoy aybissee, shin hegaa xeelliyaagan Yihooway ay boxooxissidi yootidee?

¹⁷ Ha siraataa wurssettay nuuni qoppidoogaadan  eesuwan yibeenna gishshau, nuuppe issoti issoti amarida keenan hidootaa qanxxanakka danddayoos. (Lee. 13:12) Gidikkokka, hegaadan siyettiyo ooninne Imbbaaqooma 2:3n deˈiya qofaappe minttettuwaa demmana danddayees: “Ajjuutan beettidabai ba keerettida wodiyaa naagees. He ajjuutai polettiyo wodee eesuwan gakkana; worddo gididi attenna. Takkiyaabaa milatikkokka naaga; aissi giikko, i tumuppe yaana; gam77enna.” Ha siraataa wurssettay keerettida wodiyan yaanaagaa Yihooway boxooxissidi yootiis!

18. (a) Inttena minttettiya hidootay awugee? (b) Kaalliya huuphe yohuwaappe ayba goˈaa demmanee?

¹⁸ Daafuraynne hidootaa qanxxiyoogee attiyo wodiyaa, qassi deˈuwan deˈiya ubbay ‘yelagatetta wolqqaa’ demmana wodiyaa, ammanettida Yihoowa ashkkarati ubbay yeemottidi naagoosona. (Iyy. 33:25) Wolqqaa demmiyo, ayyaanaabaa oosuwan nuuni shaahettiyo wode, geeshsha ayyaanaa maaduwan garssa asatettan, ha wodiyankka gidin minotettaa demmana danddayoos. (2 Qor. 4:16; Efi. 3:16) Daafuray intte merinaa anjjuwaa demmennaadan oottana mala paqqadoppite. Sohuwaara gidana xayikkonne, Xoossay ehiyo ooratta alamiyan paaciyaa, daafuraa woy hidootaa qanxxiyoogaa gaasuwan gakkiya metuwaa gidin, ubba metoy xayana. Kiristtaaneti yedetan genccanaadan, laggeti gattiyo qohiya sugettaa eqettanaadaaninne hara daro metuwan genccanaadan geeshsha ayyaanaappe wolqqaa waatidi demmanaakko kaalliya huuphe yohuwan beˈana.

Woygada Zaaruutii?

• Geeshsha Maxaafaa nabbabiyoogan ayba ogiyan wolqqaa demmiyoo?

• Woossiyoogaaninne wotti dentti qoppiyoogan ayba ogiyan wolqqaa demmiyoo?

• Hidootaa qanxxanaadan gaaso gidana danddayiyaabay deˈennaadan ay oottana danddayeetii?

[Oyshata]

[Sinttaa 26n deʼiya misiliyaa qonccissuwaa]

Kiristtaane shiiqotuppe ayyaanaaban wolqqaa demmoos