Edene—I Asaa Naati Koyro Deˈido Sohoo?

INTTE ataakiltte sohuwan deˈiyaabadan qoppite. He sohuwan qofaa laaliyaabinne wocamay kumido katamaa deˈuwan asay yaanne haanne simerettiyoogan siyettiya cenggurssi baawa. Ha ataakiltte sohoy aaho, qassi yan sarotettay xayanaadan oottiyaabi baawa. Hegaappekka aadhiyaabay, intte azzanekketa; harggiyan woy sahuwan waayettekketa. Intte bessi-bollati intte heeran deˈiyaabaa akeekanau wayssokkona.

Intte koyro dumma dumma meray deˈiyo ciishshaa, hegaappe simmin goggiya haattaa, awaaninne kuwan daro mittaanne maataa beˈiyoogan ufaytteeta. Woppu giida carkkoy carkkidi, sawuwaa tonggu giyaabaa inttekko ehees. Mittaa hayttay qaaxxiyoogaa, zaallaa bollaara goggiya haattaa cenggurssaa, kafuwaa yettaanne shamˈˈi shamˈˈiya guutta meretatu cenggurssaa siyeeta. Intte ha hanotaa qoppiyo wode, hegaa mala sohuwan deˈanau yeemottekketii?

Asaa naati doomettan deˈido sohoy hegaa mala gidiyoogaa saˈa yuushuwan deˈiya asay ammanees. Ayhuda ammanuwaa, Kiristtaane giyo ammanuwaanne Isilaama ammanuwaa kaalliyaageeti, Xoossay Addaamanne Hewaano wottido, Edene gannatiyaabaa daro xeetu layttau tamaaridosona. Geeshsha Maxaafay yootiyoogaadan Addaameenne Hewaana sarotettaaninne ufayssan deˈidosona. Etau doˈaara, eta giddooninne he loˈˈiya sohuwan merinau deˈiyo hidootaa kehatettan immida Xoossaara sarotettay deˈees.—Doo. 2:15-24.

Hinddu ammanuwaa kaalliyaageetuyyo beni wode gannatiyaabaa xeelliyaagan dumma qofay deˈees. Budihistteti ayyaanaabaa gita asttamaaree woykko Budahi denddiyo wodiyan alamee gannate mala gidin ubbabay kumi palahees giidi ammanoosona. Qassi Afirkkan deˈiya dumma dumma ammanoti Addaamenne Hewaani hanotaa milatiya taarikiyaa tamaarisoosona.

Asaa naati kaalliyo daro ammanuwaaninne wogan beni gannatiyaabaa yootiya qofay deˈees. Issi xaafee hagaadan giis: “Asaa naatu taarikiyaa doomettan deˈiya polo hanotay, laˈatettay, sarotettay, ufayssaynne ubbabay kumido, qassi huqqunnay, hirggissiyaabaynne ooshshay baynna gannatiyaabaa dumma dumma wodiyan deˈida daro asay ammanees. . . . Ha ammanoy asaa naati  ubbay he xayida gannatiyaa yeemottanaadaaninne a zaarettidi ehaanau baaxetanaadan oottiis.”

Ha ubba taarikeenne wogay yiidoy issi sohuwaappe gidana danddayii? Asaa naati ubbay hegaadan ammananaadan oottidabay tumuppe deˈidaba gidana danddayii? Edene gannatee beni wode tumuppe deˈidabee, qassi Addaameenne Hewaana deˈida asee?

Siriyaageeti ha qofaa toochoosona. Saynisiyaa eray darido ha wodiyan daro asay hegaa mala qofay hayse yaagees. Hegaa siriyaageetuppe issoti issoti haymaanoote eranchata gidiyoogee garamissiyaaba. Haymaanootiyaa kaalettiya daroti Edene gannatiyaabaa ammanennaadan oottiyaabaa tamaarissoosona. Eti hegaa mala sohoy mule deˈi erennaagaa yootoosona. Gannatiyaabaa yootiya taarikee tuma gidenna, hayse woykko leemiso giidi yootoosona.

Geeshsha Maxaafan leemisuwan odettidabay deˈiyoogee tuma. Yesuusi ba huuphe hara leemiso ubbaappe aadhidi erettiya leemisota yootiis. Gidikkokka, Geeshsha Maxaafay Edene gannatiyaabaa yootiyoy leemisodan gidennan, qonccenne akeekanau metenna taarikedaana. SHin, ha taarikee mule hanibeennaba gidikko, yaatin Geeshsha Maxaafan deˈiya harabaa waatidi ammanana danddayiyoo? Issoti issoti Edene gannatiyaabaa siriyoy aybissakko, qassi eti shiishshiyo gaasoy ammanttiyaabaakkonne ane pilggoos. Yaatidi, ha taarikiyaa nuuni ubbay erana koshshido gaasuwaa beˈana.