Edenebaa Intte Erana Koshshiyo Gaasuwaa

SIRIYAAGEETUPPE amaridaageeti Edene taarikiyaa xeelliyaagan denttiyo waannatiya oyshatuppe issoy, Geeshsha Maxaafay hara sohuwan hegaa kaafenna yaagiyaagaa. Leemisuwau, Haymaanootiyaa Xinaatiyaabaa Profeeseree, Pol Morisi, “Geeshsha Maxaafan Edene taarikiyaabaa qoncciyan yootiyaabi Doomettaabaa maxaafaappe harasan baawa” yaagidi xaafiis. Erancha geetettiyaageetuppe daroti a qofaa maayiyaaba gidikkokka, hegee deˈiya naqaashaara moggottenna.

Geeshsha Maxaafay Edene ataakiltte sohuwaa, Addaama, Hewaanonne shooshshaa xeelliyaagan darobaa yootees. * Keehi daronne aahuwan erettiya balaara geeddarssiyo wode, amarida eranchatu balay he keena. Haymaanootiyaa kaalettiyaageetinne Geeshsha Maxaafaa toochiyaageeti Edene ataakiltte sohuwaa xeelliyaagan Doomettaaban deˈiya qofaa xaasayiyoogan, kumetta Geeshsha Maxaafaa xaasayanau maloosona. Hegaadan oottiyoy ayba ogiyaanee?

Edenen hanidabaa akeekiyoogee kumetta Geeshsha Maxaafaa akeekanau keehippe koshshiyaaba. Leemisuwau, Xoossaa Qaalay asaa naata qofissiyaanne keehippe koshshiya oyshatu zaaruwaa demmanau nuna maaddanaadan giigiis. Darotoo, Geeshsha Maxaafay he oyshatuyyo immiyo zaaroy, Edene ataakiltte sohuwan hanettidabaara gayttiyaaba. Issi issi leemisota qoppite.

● Nuuni cimiyoynne hayqqiyoy aybissee? Addaameenne Hewaana Yihoowayyo azazettidi deˈidaba gidiyaakko merinau deˈana. Eti hayqqiyoy makkaliyoogaa xallaana. Eti makkalido gallassaappe doommidi cimi cimi biidi, wurssettan hayqqidosona. (Doo. 2:16, 17; 3:19) Eti polo asa gidiyoogee attiis; qassi eti bantta naatussi laatissana danddayiyoy polotettaa pacaanne nagaraa xalaala. Yaatiyo gishshau, Geeshsha Maxaafay, “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagees.—Roo. 5:12.

 ● Xoossay iitatettaa coˈˈu giidi xeelliyoy aybissee? Seexaanay Edene ataakiltte sohuwan Xoossaa, ba medhidoogeeta loˈˈobaa diggiya worddancha yaagiis. (Doo. 3:3-5) Yaagiyoogan, Yihooway haariyo ogee suure gidiyoogaa xeelliyaagan oyshaa denttiis. Addaameenne Hewaana Seexaanaa kaallanau dooridosona; yaatiyo gishshau, eti Yihooway haariyo maataa ekkennan ixxidosona; qassi aybi loˈˈokko aybi iitakko asay baayyo kuuyana danddayees yaagiyoogaa malabaa oottidosona. Yihooway ba polo pirddaaninne aadhida eratettan he mootuwau bessiya zaaro immiyo issi oge xallay deˈiyoogaa erees; hegeekka asaa naati bantta koshshaadan banttana ayssana mala wodiyaa immiyoogaa. Hegee kaalettido iitatettay issi gita tumay, giishin asay Xoossaappe shaahettidi bana barkka haarana danddayennaagee wodiyaappe wodiyan qonccanaadan oottiis; he iitatettaappe amaridaagee Seexaanaa sugettan gakkiis.—Erm. 10:23.

● Xoossay saˈau halchidobay aybee? Yihooway Edene gannatiyan, kumetta saˈaa loˈˈotettau leemiso gidiyaabaa giigissiis. Kumetta saˈay loˈˈiyaagaanne moggottidi deˈiyo soho gidanaadan, Addaameenne Hewaana naata yelidi saˈaa kumanaadaaninne saˈaa haaranaadan Yihooway azaziis. (Doo. 1:28) Hegaa gishshau, Xoossay saˈau halchidobay polo gidida, issippetettay deˈiyo Addaamenne Hewaani naati deˈiyo gannate gidanaadaana. Geeshsha Maxaafan dariya baggay Xoossay he koyro halchuwaa polana ogiyaabaa yootees.

● Yesuus Kiristtoosi saˈaa yiidoy aybissee? Edene gannatiyan denddida makkalay Addaame, Hewaaninne eta naatu ubbaa bolli hayquwaa pirddaa kaalettiis; shin Xoossay siiquwan hidootay deˈanaadan oottiis. Xoossay Geeshsha Maxaafan wozuwaa geetettidabaa giigissanau ba Naˈaa saˈaa kiittiis. (Maa. 20:28) Hegau birshshettay aybee? Yesuusi ‘wurssetta Addaama’; Addaamee polibeennabaa i poliis. Yesuusi Yihoowayyo ubbatoo azazettiyoogan polo asa gididi deˈiis. Yaatidi, ba shemppuwaa wozo woy yarshsho oottidi, ammanettida asaa naatu nagaray atto geetettiyo ogiyaa giigissiis; eti wurssettan, Addaameenne Hewaana nagaraa oottanaappe kase Edenen deˈidoogaadan daana. (1 Qor. 15:22, 45; Yoh. 3:16) Hegaa gishshau, Yihooway saˈaa Edene mala gannate oottanau halchido halchoy polettennan attennaagaa Yesuusi boxooxissiis. *

Xoossaa halchoy qoncce; qonccissanau metiya haymaanoote timirtte gidenna. He halchoy tuma. Edene gannatee mehee, doˈaynne asay deˈiyo, saˈan tumuppe deˈidaba gidiyoogaadan, Xoossay sinttappe ehaanau qaalaa gelidobay matan yaana tuma gididaba. Intte sinttappe tumu hegaa demmanee? Hegee daro baggan intte oottiyoobaara gayttidaba. Xoossay ba kessido maaraara moggennaageeta gujjin, danddayettida keenan daro asay sinttappe hegaa demmanaadan koyees.—1 Xim. 2:3, 4.

Yesuusi kaqetti uttido wode, iitabaa oottida issi bitaniyaara haasayiis. He bitanee danobaa oottidaagaa; i baayyo hayqoy bessiyoogaa erees. SHin Yesuusi a minttettanaadaaninne ayyo qaalaa gelanaadan koyiis. Yesuusi, “Neeni tanaara gannatiyan de7ana” yaagiis. (Luq. 23:43) Yesuusi kase danobaa oottida he bitanee hayquwaappe denddidi, Edene mala gannatiyan merinau deˈiyo injjiyaa demmanaadan koyiyaaba gidikko, intte hegaa mala anjjuwaa demmanaadan koyennee? Ee, koyees! A Aawaykka koyees! Intte sinttappe he sohuwan deˈanau koyikko, Edene gannatiyaa giigissida Xoossaabaa tamaaranau intteyyo danddayettidabaa ubbaa oottite.

[Tohossa qofata]

 [Sinttaa 10n deʼiya saaxiniyaa]

GEESHSHA MAXAAFAA QOFAA ISSIPPE GATTIYA HIRAAGAA

“Taani nenanne maccaasiyo, ne zerettaanne i zerettaa morkke kessana; i ne huuphiyaa qoxxana; neenikka a qirbbiyaa dukkana.”—Doo. 3:15.

Hegee Xoossay Edenen yootido, Geeshsha Maxaafan deˈiya koyro hiraagaa. Maccaasiyaa, i zerettay, shooshshaynne a zerettay oona oona malaatiyoonaa? Eti “morkke” gidiyoy ayba ogiyaanee?

SHOOSHSHAA

Seexaanaa Dabloosa.—Ajj. 12:9.

MACCAASIYO

Saluwan deˈiya meretata xaaxi waaxi oyqqida Yihoowa dirijjitiyaa. (Gal. 4:26, 27) Isiyaasi he ‘maccaasiyo’ xeelliyaagan a sinttappe ayyaana dere yelanaagaa kasetidi yootiis.—Isi. 54:1; 66:8.

SHOOSHSHAA ZERETTAA

Seexaanaa sheniyaa poliyaageeta.—Yoh 8:44.

MACCAASEE ZERETTAA

Koyro xekkan, Yihoowa dirijjitiyau saluwaa baggaappe yiida Yesuus Kiristtoosa. Ayyaanan Kiristtoosa ishata gidida, saluwan aara haariyaageetikka he “zerettaa” bagga. Ayyaanan tiyettida he Kiristtaaneti ayyaana dere, “Xoossaa Israaˈeele.”—Gal. 3:16, 29; 6:16, NW; Doo. 22:18.

QIRBBIYAA MASUNTTAA

Hegee kaalettido qohoy guutta wodiyaassa gidikkokka, Masiyaa keehippe seelliyaaba. Yesuusi saˈan deˈiyo wode hayqqanaadan oottiyoogan, Seexaanay ba qofaa poliis. Yesuusi hayquwaappe denddiis.

HUUPHEE QOXETTIYOOGAA

Seexaanay hayqqanaadan oottiyaaba. Yesuusi Seexaanaa merinau xayssana. Hegaa oottanaappe kase gidinkka, Yesuusi Seexaanay Edenen doommido iitatettaa xayssana.—1 Yoh. 3:8; Ajj. 20:10.

Geeshsha Maxaafaa ayfettiya qofay qanttan qonccidaagaa demmanau, Yihoowa Markkati attamissido, Geeshsha Maxaafaa—A Giddon Deˈiya Waanna Qofay Aybee? yaagiya brooshuriyaa xeella.

[Sinttaa 11n deʼiya misiliyaa qonccissuwaa]

Addaameenne Hewaana nagaray kaalettidoban tuggatidosona