Xoossan Nashettiyoogee Merinaa Deˈuwaa Demissees

“Abeet GODAU, tumukka neeni xilluwaa anjjaasa. Neeni gonddallee kammiyoogaadan ne kehatettan a kammaasa.”—MAZ. 5:12.

1, 2. Eelaasi Siraafitan deˈiya amˈˈe maccaasiyo ay oychidee, aybi hananaagaa ammanttiyaabaa iyyo yootidee?

MACCAASIYAANNE i naˈay namisettidosona; Xoossay kiittin hananabaa yootiyaageekka namisettiis. Siraafita biittan deˈiya ha amˈˈe maccaasiyaa quma kattanau mittaa qorishin, haatta ushshanaadaaninne quma mizanaadan hananabaa yootiya Eelaasi o oychiis. Maccaasiyaa ayyo uyiyoobaa immaasu; shin quma kattanau iyyo “otuwan issi kuuchcha xiilleenne xaaruwan qii zaite” xallay deˈees. A hananabaa yootiyaagaayyo immiyo qumi baynnabadan qoppada, hegaa ayyo yootaasu.—1 Kaw. 17:8-12.

² Eelaasi hagaadan giis: “Kasetada ne xiilliyaappe guutta komppuwaa komppada taayyo ekka ya; hegaappe simmada neeyyoonne ne na7aayyo komppa. Aissi giikko, GODAI Israa7eela Xoossai, ‘. . . xiillee otuwaappe wurenna; zaiteekka xaaruwaappe coroshettenna’ yaagees.”—1 Kaw. 17:13, 14.

3. Nuuni kuuyanau bessiya keehippe koshshiya allaallee aybee?

³ Amˈˈe maccaasiyaa baayyo deˈiya qii kattaappe shaakkada immanau woy agganau kuuyiyoogaappe aadhiyaabaa kuuyana koshshiis. A bananne ba naˈaa Yihooway ashshanaagaa ammanettaneeyye, Xoossan nashettiyoogaappenne a dabbo gidiyoogaappe aquwan koshshiyaabaa kaseyanee? Nuunikka hegaadan kuuyana koshshiyaabay deˈees. Nuuni aquwaabaa koyiyoogaappe Yihoowan nashettiyoogaa xoqqu oottidi xeelliyoogaa bessiyoo? Nuuni Xoossan ammanettiyoonne ayyo oottiyo loˈˈo gaasoy deˈees. Nuna i nashshanaadan koyanaunne an nashettanau ekkana danddayiyo tanggoti deˈoosona.

Neeyyo Goynnana Bessees

4. Nuuni Yihoowassi goynnana bessiyoy aybissee?

⁴ Asaa naati a ufayssiya ogiyan goynnanaadan  Yihooway koyiyoogee bessiyaaba. Ayyo oottiya, saluwan deˈiyaageeti issippe, kaallidi deˈiyaagaadan giyoogan hegaa maayidosona: “Nu Godau Xoossau, neeni bonchchuwaa, sabaanne wolqqaa ekkanau bessaasa. Aissi giikko, ubbabaa neeni medhdhadasa; qassi ubbabaikka neeni koyidoogaadan haniisinne de7iis.” (Ajj. 4:11) Yihooway Medhidaagaa gidiyo gishshau, nuuni ayyo goynnana bessees.

5. Xoossaa siiqoy nuuni ayyo oottanaadan denttettana koshshiyoy aybissee?

⁵ Nuuni Yihoowayyo oottanaadan denttettiya hara gaasoy, i nuna siiqido zawi baynna siiquwaa. Geeshsha Maxaafay, “Xoossai asaa ba leemisuwan medhdhiis; i a Xoossaa leemisuwan medhdhiis; i eta attumaasanne maccaasa medhdhiis” yaagees. (Doo. 1:27) Xoossay asaa naati koyidoogaa dooranaadaaninne hegan oyshettanaadan medhiis; hegan qoppidi kuuyana danddayoosona. Yihooway nuussi deˈuwaa immiyoogan asaa naatussi Aawa gidiis. (Luq. 3:38) Issi loˈˈo aawi oottiyoogaadan, ba naati deˈuwan ufayttanaadan koshshiya ubbabaa giigissiis. Saˈay asaa naatussi kattaa mokissanaadaaninne heeraa loyttanaadan i “awaa awaxxissees” qassi “iraa bukissees.”—Maa. 5:45.

6, 7. (a) Addaamee ba zerettaa ubbaa bolli ayba qoho gattidee? (b) Xoossan nashettanau koyiyaageetussi Kiristtoosa yarshshoy ay oottanee?

⁶ Yihooway nagaray kaalettiyo iitabaappekka nuna woziis. Addaamee nagaraa oottiyoogan, ceeriyaa kaaˈanau ba soo asaappe miishshaa wuuqqiya asa mala gidiis. Addaamee Yihoowa bolli makkaliyoogan, ba naatuppe eta hidootay, giishin merinaa ufayssay halanaadan oottiis. Yaatiyo gishshau, asaa naati ubbay sahettoosona, azzanoosonanne wurssettan hayqqoosona. Issi aylliyaa naxa kessanau waaga qanxxana koshshees; qassi he iitabaappe nuna ashshana danddayiya waagaa Yihooway qanxxiis. (Roome 5:21 nabbaba.) Yesuus Kiristtoosi ba Aawaa sheniyaara moggottiyaabaa oottiyoogan, ‘daro asaa wozanau ba shemppuwaa immiis.’ (Maa. 20:28) Xoossan nashettiyaageeti he wozuwaa waagaa kumetta goˈˈaa mata wode demmana.

⁷ Nuna Medhidaagee, Yihooway nuuni ufayssaanne halchoy deˈiyo deˈuwaa demmanaadan ooninne oottiyoobaappe aadhiyaabaa oottiis. An nashettiyoogan, asaa naatu bolli gakkida qohuwaa ubbaa giigissanau i ay oottiyaakko akeekana danddayoos. Yihooway “bana koyiyaageetuyyo woituwaa” immiyoy ayba ogiyaanakko nuuni akeekanaadan oottana.—Ibr. 11:6.

“Ne Asai Eeno Gaana”

8. Isiyaasa hanotaappe Xoossau oottiyoogaa xeelliyaagan ay tamaariyoo?

⁸ Xoossan nashettiyoogee nuuni koyidobaa dooriyo maataa bessiyaagaadan goˈettiyoogaa gujjees. Hegaadan hanidoy, Yihooway ooninne baayyo oottanaadan wolqqanttenna gishshataassa. Xoossay Isiyaasa wode, “Oona kiittoo? Nuuyyo oonee baanai?” yaagidi oychiis. Hananabaa yootiyaagee kuuyiyo maataa goˈettanaadan oottiyoogan Yihooway a bonchiis. Isiyaasi, “Hekko, tana kiitta” giido wode ay keena ufayttidaakko qoppite.—Isi. 6:8.

9, 10. (a) Nuuni ayba xeelan Xoossaayyo oottana koshshii? (b) Yihoowayyo kumetta wozanan oottiyoogee bessiyaaba gididoy aybissee?

⁹ Asaa naati Xoossaayyo oottanau woy oottennan agganau doorana danddayoosona. Nuuni dosidi ayyo oottanaadan Yihooway koyees. (Yaasa 24:15 nabbaba.) Xoossaa bolli lancciiddi ayyo goynniyoogee a ufayssenna; asa ufayssiyoogaa xallaa tumuppe koyidi goynniyaageetun i ufayttenna. (Qol. 3:22) Alamiyaabaa koshshan nu qofay shaahettin, ‘mammottiiddi’ Xoossaayyo oottiyaaba gidikko, hegee nuuni an sabettanaadan oottenna. (Kes. 22:29, NW) Kumetta wozanaappe ayyo oottiyoogee nuna goˈˈiyoogaa Yihooway erees. Israaˈeelati ‘GODAA bantta Xoossaa siiqiyoogan, a qaalaa siyiyoogaaninne aara ohettiyoogan’ deˈuwaa dooranaadan Muusee zoriis.—Zaa. 30:19, 20.

¹⁰ Beni Israaˈeela Kawoy Daawiti, “Neeni ne  morkketuura olettiyo gallassi ne asai eeno gaana. Maallado guuraa xaazaadan ne wodalla asai neekko qeeri geeshsha deretun shiiqana” yaagidi Yihoowayyo yexxiis. (Maz. 110:3) Ha wodiyan daro asay miishshaanne ufayttiyoobaa ba deˈuwan kaseyees. Gidoppe attin, Yihoowa siiqiyaageeti aybippenne kaseyiyoy assi oottiyoogaa. Eti mishettidi mishiraachuwaa sabbakiyoogee eti kaseyiyoobay aybakko qonccissees. Etau hachi hachi koshshiyaabaa Yihooway kunttana danddayiyoogaa bantta kumetta wozanan ammanettoosona.—Maa. 6:33, 34.

Xoossan Nashettanaadan Oottiya Yarshshuwaa

11. Israaˈeeleti Yihoowa ufayssiya yarshshuwaa yarshshiyoogan ayba goˈˈaa demmanau hidootidonaa?

¹¹ Higgiyaa maachau azazettiya Xoossaa asay an nashettanau a ufayssiya yarshshuwaa yarshshidosona. Wogaabaa 19:5y, “Intte issippetettaa yarshshuwaa GODAAYYO yarshshiyo wode, he yarshshoi intte gishshaa ekettanaadan, bessiyaagaadan yarshshite” yaagees. He maxaafan, “Intte galataa yarshshuwaa GODAAYYO shiishshiyo wode, intte yarshshoi ekettanaadan yarshshite” yaagiyaagee deˈees. (Wog. 22:29) Israaˈeeleti Yihoowayyo yarshshiyoosan mehiyaa yarshshuwaa bessiyaagaadan yarshshiyo wode cuwattiya cuway, tumu Xoossaayyo ‘sawuwaa tonggu giyaaba’ mala. (Wog. 1:9, 13) Xoossaa asay shiishshiyo, siiquwaa qonccissiya he yarshshoti a ufayssoosona. (Doo. 8:21) Muuse Higgiyan shiishshiyo he yarshshotun, ha wodiyaukka haniya baaso siraatay deˈees. Yihoowa ufayssiya yarshshota yarshshiyaageeti an nashettoosona. A ufayssiya yarshshoti awugeetee? Deˈuwan naaˈˈu macaraa, giishin nu kandduwaanne nu haasayaa qoppite.

12. ‘Nu asatettaa yarshsho oottidi shiishshiyo’ wode, Xoossay shenetanaadan oottiyaabati aybee?

¹² Kiitettida PHauloosi Roomen deˈiya Kiristtaanetuyyo xaafido dabddaabbiyan, “Intte asatettaa Xoossaa ufaissiya de7onne geeshsha yarshsho oottidi, Xoossau [shiishshite]” yaagiis. (Roo. 12:1) Xoossan nashettanau issi uri ba asatettaa Xoossaa ufayssiya ogiyan oyqqana koshshees. I ba asatettaa sijaaran, jiman, jallissiya xaliyan woykko ushshan mooriyaaba gidikko, he yarshshoy hada. (2 Qor. 7:1) Hegaa bollikka, “shaaramuxiyaagee ba bolli nagaraa” oottiyo gishshau, shori baynna kanddo ubbay Yihooway a yarshshuwan shenetanaadan oottees. (1 Qor. 6:18) Issi uri Xoossaa ufayssanau ba ‘ooso ubban geeshsha gidanau’ bessees.—1 PHe. 1:14-16.

13. Nuuni Yihoowa sabbiyoogee bessiyaaba gididoy aybissee?

¹³ Yihooway ufayttanaadan oottiya hara yarshshoy nu haasayaara gayttidaba. Yihoowa siiqiyaageeti asaa sinttaaninne banttarkka son deˈiyo wode, a ubbatoo sabboosona. (Mazamure 34:1-3 nabbaba.) Mazamure 148-150 nabbabite; yaatidi ha  heezzu mazamureti nuuni Yihoowa aapputoo sabbanaadan minttettiyaakko akeekite. “Suure asati a galatanau” bessiyoogee tuma. (Maz. 33:1) Mishiraachuwaa yootiyoogan Xoossaa sabbiyoogee keehippe koshshiyoogaa nuuyyo leemiso gidiya Yesuus Kiristtoosi minttidi yootiis.—Luq. 4:18, 43, 44.

14, 15. Hooseˈi Israaˈeelati shiishshanaadan minttettido yarshshoy aybee, qassi hegaa Yihooway waatidi xeellidee?

¹⁴ Mishettidi sabbakiyoogan nuuni Yihoowa siiqiyoogaanne an nashettanau koyiyoogaa bessoos. Leemisuwau, hananabaa yootiya Hooseˈi, eeqau goynniyoogan Xoossan nashettennan attida Israaˈeeleta woygidi zoridaakko akeekite. (Hoo. 13:1-3) Hooseˈi etau, “Nu nagara ubbaappe nuna maara; neeni nuna ne kehatettan shiishsha ekka; yaatin nuuni nu inxxarssan nena galatana [“nu menttershshaa mirgguwaa neeyyo yarshshana,” NW]” yaagidi, Yihoowa mintti woossanaadan yootiis.—Hoo. 14:1, 2.

¹⁵ Mirggoy Israaˈeeleti Yihoowayyo yarshshiyo mehe ubbaappe keehi alˈˈo. Yaatiyo gishshau, ‘nu menttershshaa mirggoy’ tumu Xoossaa sabbanau loytti qoppidi, wozanappe haasayiyo qaalaa malaatees. Hegaa mala yarshshuwaa yarshshiyaageeta Yihooway waati xeellidee? I, “Taani . . . ta wozanappe siiqana” yaagiis. (Hoo. 14:4) Hegaa mala sabaa yarshshuwaa yarshshiyaageeta Yihooway atto gees, nashshees, qassi ba dabbo oottees.

16, 17. Xoossaa ammaniyoogee denttettin Issi uri mishiraachuwaa sabbakiyo wode, he galataa Yihooway ayba ogiyan ekkii?

¹⁶ Asaa sinttan Yihoowa sabbiyoogee tumu goynuwan ubbatoo xoqqa sohoy deˈiyooba. Mazamuraawee, “Abeet GODAU, ta doonaappe kiyiya galataa ekka” yaagidi woossidoogee, Xoossaa bonchiyoogaa i xoqqu oottidi xeelliyoogaa bessees. (Maz. 119:108) Ha wodiyan shin? Nu wodiyan deˈiya cora asay ‘GODAA galataa awaajjanaagaanne eta yarshshoy Xoossaa yarshsho sohuwaa shiiqanaagaa’ Isiyaasi kasetidi yootiis. (Isi. 60:6, 7) Miilooniyan qoodettiyaageeti “menttershshai a sunttaayyo immiyo galataa” yarshshuwaa Xoossaayyo shiishshiyoogee, hegee polettidoogaa bessees.—Ibr. 13:15.

¹⁷ Intte shin? Xoossaa ufayssiya yarshshuwaa shiishsheetii? SHiishshana xayikko, laamettana koshshiyaaban laamettuuteetii, qassi asaa sinttan Yihoowa sabbiyoogaa doommuuteetii? Ammanoy denttettin intte sabbakiyoogaa doommiyo wode, intte yarshshoy “korimaa yarshshiyoogaappe aadhdhidi, GODAA ufaissana.” (Mazamure 69:30, 31 nabbaba.) Intte shiishshiyo “sawuwaa tonggu giya” galataa yarshshoy Yihoowakko gakkanaagaanne i inttena nashshanaagaa ammanettite. (Hiz. 20:41) Yaatikko, intte zawi baynna ufayssaa demmana.

‘Yihooway Xilluwaa Anjjees’

18, 19. (a) Ha wodiyan daro asay tumu Xoossau oottiyoogaa ayba ogiyan xeellii? (b) Xoossan nashettennaagee ay kaalettii?

¹⁸ Milkkiyaasa wode issoti issoti, “Xoossaassi oottiyoogee hada. A azazuwaa naagiyoogaaninne Ubbaappe Wolqqaama GODAA sinttan azzaniiddi hemettiyoogan nuuni ai go7ettiyoonii?” giidoogaadan ha wodiyan daroti goosona. (Mil. 3:14) Eti aquwaabaa siiqiyoogan, Xoossaa halchoy polettennabadaaninne a higgee ha wodiyan maaddennabadan xeelloosona. Mishiraachuwaa sabbakiyoogaa eti coo wode wurssiyoobadaaninne asaa yiilloyiyoobadan xeelloosona.

 ¹⁹ Hegaa mala xeelay doommidoy beni Edene gannatiyaana. Hewaana Yihooway immido ufayssiya deˈuwaa xoqqu oottada xeellennaadaaninne An nashettiyoogaa xaasaya xeellanaadan oottiday Seexaanaa. Ha wodiyan, Xoossaa sheniyaa oottiyoogan aynne goˈettennabadan asay ammananaadan oottanau Seexaanay aggennan baaxetees. Gidikkokka, Hewaananne i azinay Xoossan nashettennan attiyoogee hayqo gidiyoogaa beˈidosona. Ha wodiyan eta iita leemisuwaa kaalliyaageetikka, Xoossan nashettennaagee hayqqo gidiyoogaa mata wode akeekana.—Doo. 3:1-7, 17-19.

20, 21. (a) Siraafita biittaa amˈˈe maccaasiyaa ay oottadee, hegan ay anjjo demmadee? (b) Siraafita biittaa amˈˈee leemisuwaa ayba ogiyan, qassi aybissi kaallana koshshii?

²⁰ Addaamanne Hewaano gakkida azzanttiyaabaa, kasetidi nuuni beˈido, Eelaasinne Siraafita amˈˈe maccaasiyaa demmidobaara geeddarssite. Maccaasiyaa baayyo deˈiya kattay guutta gidikkokka, Eelaasi yootido minttettiyaabaa siya simmada, kasetada hananabaa yootiyaagaassi guutta komppuwaa komppada immaasu. Hegaappe simmin, Yihooway Eelaasa baggaara yootidobaa poliis. He taarikee hagaadan gees: “Eelaasi, mishiriyaanne i so asai ubba gallassi qumaa miidosona. Aissi giikko, GODAI Eelaasa baggaara yootido qaalaa naagidi, otuwaappe xiillee wuribeennanne xaaruwaappe zaiteekka coroshettibeenna.”—1 Kaw. 17:15, 16.

²¹ Siraafita biittaa amˈˈiyaa, ha wodiyan deˈiya biilooniyan qoodettiyaageetuppe guutta asaa xallay eeno giidi oottiyoobaa oottaasu. Ashshiya Xoossan a ba kumetta wozanan ammanettaasu; qassi i o maaddiis. Ha taarikeenne Geeshsha Maxaafan deˈiya hara taariketi nuuni Yihoowan ammanettiyoogee ayyo bessiyoogaa qonccissoosona. (Yaasa 21:43-45; 23:14 nabbaba.) Ha wodiyan deˈiya Yihoowa Markkatu deˈoy, i ba nashshiyoogeeta mule aggennaagaa bessiya hara naqaasha.—Maz. 34:6, 7, 17-19. *

22. Nuuni haganaa sugennan, Xoossan nashettanau koyiyoogee eesoyiyaaba gididoy aybissee?

²² Xoossaa pirddaa gallassay “sa7a ubban de7iya asa ubbaa” bolli gakkanau matattiis. (Luq. 21:34, 35) He gallassaappe baqatana danddayettenna. Xoossay sunttido Daannay, “Ta Aawai anjjidoogeetoo, haa yiidi sa7ai merettoosappe hachchi gakkanaashin, intteyyo giigida kawotettaa laattite” yaagiyoogaa siyiyo wode demmiyoobaara laggetana danddayiya duretetti woy aqoy baawa. (Maa. 25:34) Ee, ‘Yihooway xilluwaa anjjana; gonddallee kammiyoogaadan ba kehatettan a kammana.’ (Maz. 5:12) Nuuni Xoossan nashettanau koyana bessennee?

[Tohossa qofaa]

Hassayay?

• Nuuni kumettaa wozanaappe goynniyoogee Yihoowayyo bessiyoy aybissee?

• Ha wodiyan Yihoowa ufayssiya yarshshoti awugeetee?

• “Nu menttershshaa mirgguwaa” giyaagee ay malaatii, nuuni hegaa Yihoowau yarshshana bessiyoy aybissee?

• Nuuni Xoossan nashettanau koyana bessiyoy aybissee?

[Oyshata]

[Sinttaa 17n deʼiya misiliyaa qonccissuwaa]

Xoossay kiittin hananabaa yootiyaagee, issi namisettida hiyyeesa maccaasiyaa kuuyana koshshiyaabaa ay oychidee?

[Sinttaa 19n deʼiya misiliyaa qonccissuwaa]

Nuuni Yihoowa sabbanau yarshshuwaa shiishshiyoogan ayba goˈˈaa demmiyoo?

[Sinttaa 21n deʼiya misiliyaa qonccissuwaa]

Wozanappe Yihoowan ammanettiyoogee inttena mule yeellayenna