Alamiyaa Ayyaanaa Gidennan Xoossaa Ayyaanaa Ekkite

“Nuuni Xoossai nuussi immidobaa ubbaa eranau i nuussi yeddido Ayyaanaa ekkidoogaappe attin, sa7aa ayyaanaa ekkibookko.” —1 QOR. 2:12.

1, 2. (a) Tumu Kiristtaaneti olettiyoy ayba ogiyaanee? (b) Woygiya oyshata beˈanee?

TUMU Kiristtaaneti olettiiddi deˈoosona. Nu morkkee wolqqaama, genanchanne darotoo olettidaagaa. Ayyo daro asaa qohida wolqqaama ola miishshay deˈees. SHin, nuussi wolqqi baynnabadan woy nu mule xoonana danddayennabadan qoppana bessenna. (Isi. 41:10) Ay qohuwaakka gidin eqettanau maaddiyaabay nuuyyo deˈees.

² Nuuni olettiyo olay ayyaana ola. Nu morkkee Seexaana Dabloosa gidishin, i nuna qohanau goˈettiyo waanna ola miishshay “sa7aa ayyaanaa.” (1 Qor. 2:12) Nuuni ha qohuwaa eqettanaadan maaddiya waannabay Xoossaa ayyaanaa. Ha olan xoonanaunne ayyaanaaban minnidi deˈanau Xoossay ba ayyaanaa immanaadan woossananne nu deˈuwan ayyaanaa ayfiyaa ayfana bessees. (Gal. 5:22, 23) SHin, alamiyaa ayyaanay aybee, qassi nu bolli qohuwaa gattana danddayiyoy ayba ogiyaanne? Alamiyaa ayyaanay nu bolli qohuwaa gattiiddi deˈiyaakkonne waati erana danddayiyoo? Xoossaa ayyaanaa ekkiyoogaanne alamiyaa ayyaanaa eqettiyoogaa xeelliyaagan Yesuusappe ay tamaariyoo?

Alamiyaa Ayyaanay Keehippe Aakkidoy Aybisee?

3. Alamiyaa ayyaanay aybee?

³ Alamiyaa ayyaanau pulttoy ‘ha saˈaa haariya’ Seexaanaa gidishin, he ayyaanay qassi Xoossaa geeshsha ayyaanaara eqettees. (Yoh. 12:31; 14:30; 1 Yoh. 5:19) He ayyaanay alamiyan aakkidi deˈiya qofa, qassi asay issibaa polanaadan denttettees. Ha denttettiya wolqqay asaa naati Xoossaa sheniyaanne halchuwaa eqettanaadan oottees.

4, 5. Seexaanay denttettiyo ayyaanay keehippe aakkidoy ayba ogiyaanee?

⁴ Seexaanay denttettiyo ayyaanay keehippe aakkidoy ayba ogiyaanee? Koyro, Seexaanay Edene gannatiyan Hewaano balettiis. Xoossaa haaruwaappe kiyikko, i deˈoy giiganaagaa yootidi o ammanttiis. (Doo. 3:13) I bulla worddancha gidiyoogee erettiis! (Yoh. 8:44) Hegaappe simmin, maccaasee baggaara Addaamee Yihoowayyo ammanettennaadan oottiis. Addaamee oottidobaa gaasuwan, asaa naati nagarancha gididosona; hegaappe denddidaagan, azazettennaadan oottiya Seexaanaa ayyaanau eti haarettanau koyoosona.—Efisoona 2:1-3 nabbaba.

 ⁵ Guyyeppe daydantta gidida daro kiitanchatakka Seexaanay balettiis. (Ajj. 12:3, 4) Eti Xoossaa kaddidoy, Nohe wode Bashsha Haattaappe kase. Ha kiitanchati banttau saluwan imettida boncho sohuwaa aggidi yeella xayiyoogan, meretan banttau baynna borssobaa saˈan poliyoogee loˈˈo giidi qoppidosona. (Yih. 6) Ha wodiyan ayyaana alamiyan deˈiya, he daydanttati maaddin, Seexaanay ‘saˈa ubbaa balettiiddi’ dees. (Ajj. 12:9) Asaa naatuppe daroy daydanttatu qohuwaa akeekennaagee azzanttiyaaba.—2 Qor. 4:4.

Alamiyaa Ayyaanay Inttena Sugiiddi Deˈii?

6. Alamiyaa ayyaanay qohana danddayiyoy nuuni waatiyo wode xallaanee?

⁶ Daroti Seexaanaa sugettaa akeekokkona; shin tumu Kiristtaaneti i sugettaa waati gattiyaakko Geeshsha Maxaafaappe tamaaridosona. (2 Qor. 2:11) Nuuni hanotaa injjeyana xayikko alamiyaa ayyaanay nuna qohana danddayenna. Nuuni Xoossaa ayyaanaa kaaletuwaa kaalliyaakkonne woy alamiyaa ayyaanaa kaaletuwaa kaalliyaakkonne eranau maaddiya oyddu oyshata ane pilggoos.

7. Seexaanay nuna Yihoowappe haassanau maliyo issi ogee awugee?

⁷Taani wodiyaa aattiyo hanotay tabaa ay qonccissii? (Yaaqooba 3:14-18 nabbaba.) Nuuni hanttaarabaa dosanaadan oottiyoogan, Seexaanay nuna Xoossaappe haassanau malees. Hanttaarabaa siiqiya ubbaa Yihooway ixxiyoogaa Dabloosi erees. (Maz. 11:5) Hegaa gishshau, nuuni asatettaa amuwaa polanaadan, shori baynna asho gaytotettaunne hanttaarabau denttettiya xuufeta, pilimeta, muuziqaanne elekitrronik geeme giyoobata Seexaanay goˈettanu malees. Nuuni issi baggaara suurebaa dosiyaaba gidikkokka, hara baggaara i denttettiyo iitabaa siiqiyo wode Seexaanay ufayttees.—Maz. 97:10.

8, 9. Wodiyaa aattiyoobaara gayttidaagan nuna ayba oyshata oychana koshshii?

⁸ Hara baggaara, Xoossaa ayyaanay a ekkiyaageeti geeshsha, sarotettaa dosiyaageetanne maarotettay kumidoogeeta gidanaadan oottees. ‘Taani wodiyaa aattanau dooriyoobay tau loˈˈo eeshshay deˈanaadan minttettiyaagee?’ giidi nuna oychana koshshees. Bollappe yiya aadhida eratettay “lo77o milatiya iitatetti bainnaagaa.” Xoossaa ayyaanaa kaaletuwaa kaalliyaageeti bantta shoorotuyyo geeshshatettaanne sarotettaa sabbakiiddi, son banttarkka deˈiyo wode hanttaarabaanne shori baynna asho gaytotettaa bessiyaabaa beˈiyoogan ufayttokkona.

⁹ Yihooway nuuni a xallau goynnanaadan koyees. SHin Seexaanay Yesuusappe koyidoogaadan, nuuni ayyo issitoo xalla gidikkonne goynnanaadan koyees. (Luq. 4:7, 8) ‘Taani wodiyaa aattanau dooriyoobay Xoossaa xallau goynniyoogaa diggennaagee? Ta dooriyoobay alamiyaa ayyaanaa eqettiyoogee tau deexxanaadan oottiyaageeyye woy deexxennaadan oottiyaagee? Taani wodiyaa aattiyoobaa dooriyoogaara gayttidaagan wodeppe laammana koshshiyaabi deˈanee?’ giidi nuna oychana koshshees.

10, 11. (a) Aquwaara gayttidaagan alamiyaa ayyaanay ayba xeelay deˈanaadan denttettii? (b) Xoossaa ayyaanaa kaaletuwan xaafettida Qaalay ayba xeelay deˈanaadan minttettii?

¹⁰Aquwaa xeelliyaagan tau deˈiya xeelay aybee? (Luqaasa 18:24-30 nabbaba.) Alamiyaa ayyaanay yaaretiyoogaanne miishshaa siiqiyoogaa minttettiyoogan ‘ayfiyan xeellidi qaaqqatanaadan’ denttettees. (1 Yoh. 2:16) He ayyaanay daroti duretanau murttanaadan denttettiis. (1 Xim. 6:9, 10) He ayyaanay, daro aquwaa shiishshiyoogee adussa wodiyau woppa deˈuwaa deˈanau maaddiyaabadan nuuni qoppanaadan oottees. (Lee. 18:11) Nuuni Xoossaa siiqiyoogaappe aaruwan miishshaa siiqiyaaba gidikko, Seexaanay xoonees giyoogaa. ‘Taani ta xeelaa wottidoy ishalo duussa daanaunne ufayssa demmanau koyiyoogaanee?’ giidi nuna oychana koshshees.

¹¹ Hegaappe dumma ogiyan, Xoossaa ayyaanaa kaaletuwan xaafettida Qaalay, nuuni miishshaa bessiyaagaadan xeellanaadaaninne nuussinne nu soo asau koshshiyaabaa kunttanau minnidi oottanaadan minttettees. (1 Xim. 5:8) Xoossaa ayyaanaa ekkiyaageeti Yihoowa kehatettaa kaallanaadan he ayyaanay maaddees. Hegaa mala asati ekkiyoogan gidennan immiyoogan erettoosona. Eti banttau deˈiyaabaappe asaa xoqqu oottidi xeelloosona; hegaadan  oottana danddayiyo wode banttabaappe haratuyyo ufayttiiddi immoosona. (Lee. 3:27, 28) Miishsha demmanau oottiyoobaa Xoossau oottiyoogaappe kaseyokkona.

12, 13. Alamiyaa ayyaanaappe dumma hanotan Xoossaa ayyaanay nuna goˈˈiya ogiyan waati maaddana danddayii?

¹²Taani kaalliyo ayyaanay awugaa gidiyoogaa ta eeshshay qonccissii? (Qolasiyaasa 3:8-10, 13 nabbaba.) Alamiyaa ayyaanay asatettaa oosuwaa minttettees. (Gal. 5:19-21) Nuuni kaalliyo ayyaanay awugaakko qoncciyoy, saro wode gidennan, issi Kiristtaane ishay woy michiyaa nuna sheneho giyo, yiilloyiyo woy nuna naaqqiyoogaa mala wodiyaana. Hegaa bollikka, nurkka son deˈiyo wode, nuuni kaaliyo ayyaanay awugaakkonne qonccees. Amarida hanotan nu huuphiyaa qoriyoogaa koshshana danddayees. ‘Aadhida usuppun aginatun ta eeshshay kaseegaappe aaruwan Kiristtoosaagaa malatiiyye woy iita haasayaunne eeshshau simmidanaa?’ giidi inttena oychite.

¹³ Xoossaa ayyaanay “ceega meretaa a oosuwaara [nuuppe] xaissirggidi,” “ooratta meretaa” maayanaadan nuna maaddana danddayees. Hegee nuuni kaseegaappe aaruwan siiqiyaageetanne keha gidanaadan maaddees. Nuuni amassalanau bessiya gaasoy deˈiyaaba milatiyo wodekka gidin, issoy issuwaa coo atto gaanau koyoos. Harati bessennabaa oottiyo wode “ixo hanotettaa, yiilluwaa, hanqquwaa, waasuwaanne cashshaa” milatiyaabatun zaarokko. Hegaadan oottiyoogaappe, wozanappe ‘qarettanau’ baaxetoos.—Efi. 4:31, 32.

14. Alamiyan deˈiya daroti Xoossaa Qaalaa waatidi xeelliyoonaa?

¹⁴Geeshsha Maxaafan deˈiya kandduwaa maaraa taani bonchiyaanaanne siiqiyaanaa? (Leemiso 3:5, 6 nabbaba.) Alamiyaa ayyaanay Xoossaa Qaalaara eqettiyoogan qonccees. He ayyaanaa kaaletuwaa kaalliyaageeti Geeshsha Maxaafan deˈiya, etau mitettenna qofaa kaallanau koyokkona; hegaappe asa wogaanne timirttiyaa kaallanau koyoosona. (2 Xim. 4:3, 4) Issoti issoti Xoossaa Qaalaa muleera aggi bayoosona. Hegaa mala asati bantta xeelan aadhida erancha gididi, Geeshsha Maxaafay goˈˈiyoogaanne likke gidiyoogaa siroosona. Wodiraa laammiyoogaa, attuma asay attuma asaara maccaasay macca asaara asho gaytotettaa poliyoogaanne machiyo yeddiyoogaa xeelliyaagan Geeshsha Maxaafay yootiyo suure maaraa xaasayi xeelloosona. Eti, “Iitaa lo77o lo77uwaa iita” giidi tamaarissoosona. (Isi. 5:20) He ayyaanay nu xeelaa mooridee? Nuna metoy gakkiyo wode, nu qofaa gujjin, asa eran ammanettiyooyye, woy Geeshsha Maxaafaa zoriyaa kaallanau baaxetiyoo?

15. Nu aadhida eratettan ammanettiyoogaappe ay oottana koshshii?

¹⁵ Xoossaa ayyaanay nuuni Geeshsha Maxaafaa bonchanaadan oottees. Mazamuraawiyaagaadan, nuuni Xoossaa qaalaa nu gediyaassi xomppe, qassi nu ogiyaassi pooˈo oottidi xeelloos. (Maz. 119:105) Loˈˈuwaa iitaappe shaakkanau nu aadhida eratettan zemppiyoogaappe,  nuna maaddanaadan Xoossaa Qaalan ammanettoos. Nuuni Geeshsha Maxaafaa bonchana xallaassa gidennan, Xoossaa higgiyaa siiqanaadankka tamaaroos.—Maz. 119:97.

Yesuusa Leemisuwaappe Tamaarite

16. ‘Kiristtoosa qofay’ deˈiyoogeeta gidiyoogee ay gujjii?

¹⁶ Nuuni Xoossaa ayyaanaa ekkanau ‘Kiristtoosa qofaa’ kaallana koshshees. (1 Qor. 2:16) ‘Kiristtoos Yesuusaagaadan issi qofay’ deˈiyoogeeta gidiyoogee i qoppidonne oottido ogiyaa eridi a kaalliyoogaa koyees. (Roo. 15:5; 1 PHe. 2:21) Nuuni hegaadan oottana danddayiyo issi issi ogeta ane beˈoos.

17, 18. (a) Woosaa xeelliyaagan Yesuusappe ay tamaariyoo? (b) Nuuni aggennan ‘woossana’ koshshiyoy aybissee?

¹⁷Xoossaa ayyaanaa demmanau woossite. Paacee gakkanaappe kase, Xoossay ba ayyaanan maaddana mala Yesuusi woossiis. (Luq. 22:40, 41) Xoossay ba ayyaanaa immanaadan nuunikka woossana koshshees. Ammanuwan woossiya ubbau, Yihooway ba ayyaanaa kehatettan coo immees. (Luq. 11:13) Yesuusi hagaadan giis: “Woossite; intte ekkana. Koyite; intte demmana. Kare yiidi xeesite; intteyyo karee dooyettana. Aissi giikko, woossiya ubbai ekkana; koyiya urai demmana; qassi kare yiidi xeesiya urau karee dooyettana.”—Maa. 7:7, 8.

¹⁸ Yihoowa ayyaanay maaddanaadan intte woossiyo wode, a demmanaassi woossiyoogaa agganau eesotoppite. Nuuni ubbatoo woosan gencciyoogaa koshshana danddayees. Issi issitoo, Yihooway baakko woossiyaageetuyyo zaaranaappe kase, eti wozanappe koyidi woossiyoogaanne tumuppe ammanettiyoogaa qonccissanaadan koyees. *

19. Yesuusi ubbatoo ay oottidee, nuuni a leemisuwaa kaallana koshshiyoy aybissee?

¹⁹Ubbaban Yihoowayyo azazettite. Yesuusi ubbatoo ba Aawaa ufayssiyaabaa oottiis. Yesuusi issibaa oottanau koyido ogee, ba Aaway koyiyo ogiyaappe dummatido wodee deˈees. SHin, ba Aawaayyo, “Neeni koyiyoobai hanoppe attin, taani koyiyoobai hanoppo” yaagiis. (Luq. 22:42) ‘Xoossau azazettiyoogee deexxiyo wodiyankka hegaadan oottiyaanaa?’ giidi inttena oychite. Xoossau azazettiyoogee deˈuwan keehi koshshiyaaba. I nuna Medhidaagaa, nu deˈuwaa Pulttuwaanne deˈuwau koshshiyaabaa Immiyaagaa gidiyo gishshau kumetta hanotan azazettoos. (Maz. 95:6, 7) Azazettiyoogee keehippe koshshiyaaba. Azazettana xayikko Xoossan nashettana danddayokko.

20. Yesuusi ba deˈo ubban ay oottidee, nuuni a leemisuwaa kaallana danddayiyoy ayba ogiyaanee?

²⁰Geeshsha Maxaafaa loytti erite. Seexaanay Yesuusa ammanuwaa paaccido wode, Yesuusi Geeshsha Maxaafaappe yootiis. (Luq. 4:1-13) Yesuusi banaara eqettiya, haymaanootiyaa kaalettiyaageeti suurebaa oottennaagaa yootido wode, waannayidi goˈettidoy Xoossaa Qaalaa. (Maa. 15:3-6) Yesuusi ba deˈo ubban Xoossaa higgiyaa tamaariisinne poliis. (Maa. 5:17) Nuunikka ammanuwaa minttiya Xoossaa Qaalaa ubbatoo xannaˈana koyoos. (Pili. 4:8, 9) Nuuppe issoti issoti buzo xinaatiyaunne so asaa xinaatiyau wodiyaa demmanau metootana danddayoos. SHin nuuni wodiyaa koyiyoogaappe harabaappe wodiyaa poxxiyoogaa koshshana danddayees.—Efi. 5:15-17.

21. Xoossaa Qaalaa loytti eranaunne oosuwan peeshshanau nuna maaddana mala ayba giigissuwaa goˈettana danddayiyoo?

²¹ ‘Ammanettida wozannaama ashkkaray’ nuuni saaminttan saaminttan So Asaa Goynuwaa omarssaa goˈettanaadan yootiyoogan,  buzonne so asa xinaatiyau wodiyaa demmanaadan maaddiis. (Maa. 24:45) Ha giigissuwaa loyttidi goˈettiiddi deˈeetii? Kiristtoosa qofaa akeekanau maaddanaadan, intte tobbanau dooridobaa xeelliyaagan Yesuusi tamaarissidobaa, hiillan xinaatiyaa wode qonccissana danddayeetii? Intte xannaˈanau koyiyo allaalliyaa loytti qonccissiyaabaa demmanau Wach Tawer Pabilikeshin Indekisiyaa goˈettana danddayeeta. Leemisuwau, asau immiyo Wochiyo Keelay 2008ppe 2010 gakkanaashin “Yesuusappe Tamaariyoobaa” giya huuphe yohuwan 12 dumma dumma qofaa qonccissiis. Ha huuphe yohota intte xinaatiyau goˈettanau koyana danddayeeta. Beegottite! maxeetiyan 2006ppe doommidi “Woygada Zaaruutii?” giya huuphe yohoy kiyees. He huuphe yohuwan deˈiya oyshay Xoossaa Qaalaa intte loyttidi eranaadan maaddanau giigiis. Intte So Asaa Goynuwaa prograamiyan issi issitoo he huuphe yohuwaa aybissi goˈettekketii?

Alamiyaa Xoonana Danddayoos

22, 23. Nuuni alamiyaa xoonanau ay oottana koshshii?

²² Xoossaa ayyaanaa kaaletuwaa kaallanau, nuuni alamiyaa ayyaanaa eqettana bessees. Ha ayyaanaa eqettiyoogee metennaba gidenna. Hegee baaxe koshshiyaaba gidana danddayees. (Yih. 3) SHin xoonana danddayoos! Yesuusi ba erissiyo ashkkaratuyyo, “Sa7an intte waayettana. SHin minnite; taani sa7aa xoonaas” yaagiis.—Yoh. 16:33.

²³ Alamiyaa ayyaanaa eqettiyaabanne Xoossaa ayyaanaa ekkanau nuuyyo danddayettida ubbaa oottiyaaba gidikko nuunikka xoonana danddayoos. Tumakka, “Xoossai nu bagga gidikko, nuna oonee qohanai?” (Roo. 8:31) Xoossaa ayyaanaa ekkiyoogaaninne Geeshsha Maxaafan qonccidaagaadan a kaaletuwaa kaalliyoogan, woppaa, sarotettaanne ufayssaa, qassi matan yaana ooratta alamiyan merinaa deˈuwaa demmoos.

[Tohossa qofaa]

Hassayay?

• Alamiyaa ayyaanay keehippe aakkidoy aybissee?

• Nuna oychana koshshiya oyddu oyshati awugeetee?

• Xoossaa ayyaanaa ekkiyoogaara gayttidaagan Yesuusappe tamaariyo heezzubati awugeetee?

[Oyshata]

[Sinttaa 10n deʼiya misiliyaa qonccissuwaa]

Issi issi kiitanchati waanidi daydantta gididonaa?

[Sinttaa 12n deʼiya misiliyaa qonccissuwaa]

Seexaanay asaa haaranau alamiyaa ayyaanaa goˈettees; shin nuuni a sugettaa xoonana danddayoos