Aqo Deˈoy Giiga Xayiyoy Aybissee?

“Parisaaweti paaccanau Yesuusakko yiidi, ‘Issi asi issiban gaasottidi, ba machchiyo yeddanau nu higgee azazii?’ yaagidi a oichchidosona.”—Maa. 19:3.

YESUUSA wode deˈida issoti issoti, ‘Aqo deˈoy laalettennan deˈana danddayettii, qassi hegaadan deˈana koshshii?’ giidi oychidosona. Etayyo Yesuusi hagaadan giis: “Xoossai koiro eta medhdhiiddi, attumaasanne maccaasa oottiis. Hegaa gishshau, ‘Issi asi ba aawaanne ba aayyiyo aggi bayidi, ba machcheera issippe de7ees; eti naa77ai issi asa gidoosona’ yaagiya qaalaa nabbabibeekketii? Hegaa gishshau, eti issi asa gidiyoogaappe attin, naa77u asa gidokkona; hegaa gishshau, Xoossai issippe gattidoogaa asi shaakkoppo.” * (Maa. 19:4-6) Aqo deˈuwan asay shaahettennan deˈanaadan Xoossay koyidoogee qoncce.

Ha wodiyan daro biittan, machiyo yeddiyoogan, xeetaappe 40 kushe gidiya woy hegaappe dariya aqo deˈuwan asay issippe deˈiyoogaa aggidi ‘shaahettees.’ Geeshsha Maxaafay aqo deˈuwaa xeelliyaagan yootiyo zoree ha wodiyan maaddennabee? Aqo deˈoy giiga xayiyoy he giigissoy bala gidido gishshataassee?

Ha leemisuwaa qoppite: Azinanne machcho gidida naaˈˈu keetta asay issi mala kaamiyaa shammidosona. Issi keetta asay bantta kaamiyaa loytti oyqqoosona; qassi akeekan laaggoosona. Yaatiyo gishshau, eta kaamee moorettenna. Hankkooti qassi, bantta kaamiyaa loytti oyqqanau aynne baaxetokkona; qassi akeeki baynna hanotan laaggoosona. He kaamee moorettiis; yaatin aggi bayidosona. Naaˈˈanttoogee moorettanaadan oottidabay aybee—kaamiyan paccidabi deˈiineeyye a godati baliinee? He hanotan daro baggi oyshettiyaageeti he kaamiyaa godata gidiyoogee tuma.

Hegaadankka, daro aqo deˈoy giiga xayiyoogee aqo deˈo giigissuwan paccidabi deˈees giyoogaa gidenna. Miilooniyan qoodettiya aqo deˈoy giiga gididoogee ha giigissuwan paccidabi baynnaagaa bessees. Giiga aqo deˈoy issi uri, keetta asaynne heeraa asay ufayttanaadaaninne woppu gaanaadan oottees. Aqo deˈoy laalettennan deˈanaadan kaamiyaagaadan ubbatoo loytti oyqqana koshshees.

Intte aqo deˈo oyqqoosappe guutta wode woy daro laytta gidin, aqo deˈuwaa loytti oyqqanaunne minttanau Geeshsha Maxaafay zoriyo zoree maaddees. Kaallidi deˈiya sinttatun issi issi leemisoti qonccidosona.

[Tohossa qofaa]