Giigi Uttite!
Giigi Uttite!
“Inttekka giigi uttite; aissi giikko, taani, Asa Na7ai, intte qoppenna saatiyan yaana.”—MAA. 24:44.
1, 2. (a) Maahee gattiyo qohuwaara geeddarssana danddayiyo, Geeshsha Maxaafaa hiraagan odettida hanotay aybee? (b) Mata wode gakkana qohoy inttena waatidi bochii?
ASAA tiyaatiriyaa bessiyoogan erettida bitanee loohissido Bangladeshe biittaa maahiyaara qohoy a bolli gakkennan kaaˈiyoogan daro layttau asaa ufayssiis. I, “Doˈay inttenan ammanettiyo wode, alamiyan deˈiya imota ubbappe loˈˈiyaaba demmidobadan intteyyo siyettees” yaagiis. SHin Xiqimita 3, 2003n hegaadan ammanettiyoogee attiis. A maahetuppe 172 kilo graame deexxiya bootta maahee gaasoy erettennan a qohiis. He qohoy loohissiyaagee mule qoppibeennaba; qassi i giigettibeenna.
2 Geeshsha Maxaafay issi ‘doˈay’ gattiyo qohuwaabaa kaseti yootiyoogee akeekana koshshiyaaba; qassi nuuni naagettana bessees. (Ajjuutaa 17:15-18 nabbaba.) Ha doˈay qohiyoy oonee? Dabloosa alamee garamissiya hanotan asay qoppennan ba giddon shaahetti bayees. Zoˈo doˈay Kawotettatu Issippetettaa malaatees; qassi “tammu kacee” polotikaa kawotettata ubbaa malatees. Hegeeti shaaramuxa mala gidida, alamiyaa worddo haymaanooteta xaaxa waaxa oyqqida Gita Baabilooni bolli denddidi o xayssana. Hegee hananay awudee? Nuuni gallassaanne saatiyaa erokko. (Maa. 24:36) Hegee nuuni qoppibeenna saatiyan hananaagaanne i bolli qohoy gakkana haniyoogaa eroos. (Maa. 24:44; 1 Qor. 7:29) Hegaa gishshau, he qohoy gakkiyo wodenne Kiristtoosi Pirddiyaagaa gididi yiyo wode, i nuna Ashshiyaagaa gidiyoogeekka qoncciyo gishshau nuuni ayyaanaaban giigi uttiyoogee keehippe koshshiyaaba! (Luq. 21:28) Nuuni hegaadan oottanau, giigi uttidi Xoossay gelido qaalay polettiyoogaa beˈida, Xoossau ammanettida ashkkaratuppe tamaarana danddayoos. Tumuppe polettida ha temokruwaa wozanan wottiyoo?
Noheegaadan Giigi Uttite
3. Xoossaayyo ammanettidi oottiyoogee Noha metanaadan oottida hanotati awugeetee?
3 Nohee ba wode saˈan aakkida iita hanotay deˈishinkka, Xoossay yootidobay polettiyoogaa beˈanau giigi uttiis. Nohee genccana koshshido metuwaa, giishin makkalida kiitanchati ashuwaa maayidi loˈˈiya maccaasaara issippe deˈiyoogaa qoppite! Etau meretan baynna hegaa mala issippetettaappe denddidaagan, bantta gita wolqqaa harata qohanau goˈettiya, asaappe wolqqaama gidida keehippe ‘mino’ naata yelidosona. (Doo. 6:4) He wogga wolqqaama asati biidosaa ubban gattiyo metuwaa qoppite. Hegaa gaasuwan, iitatettay aakkiis; qassi asaa qofaynne eeshshay muleera moorettiis. Yaatiyo gishshau, Ubbabaa Haariya Goday Yihooway he iita alamiyaa xayssanau wodiyaa keeriis.—Doomettaabaa 6:3, 5, 11, 12 nabbaba. *
4, 5. Ha wodiyan deˈiya, Nohe wodiyaagaa mala gidida hanotay aybee?
4 Nu wodiyan deˈiya hanotay Nohe wodeegaara issi mala gidanaagaa Yesuusi kasetidi yootiis. (Maa. 24:37) Leemisuwau, iita ayyaanati kelttiyaa geliyoogaa nuunikka akeekoos. (Ajj. 12:7-9, 12) Ha daydanttati Nohe wode ashuwaa maayidosona. Ha wodiyan eti ashuwaa maayana xayikkokka, yelagata gidin cimatakka balettanau baaxetoosona. Asay akeekana xayikkokka, eti balettiyo asay poliyo shori baynna asho gaytotettaaninne borssoban he iita kiitanchati ufayssaa demmoosona.—Efi. 6:11, 12.
5 Xoossaa Qaalay Dabloosa “shemppo woridaagaa” qassi “hayquwau gaaso gididaagaa” yaagees. (Yoh. 8:44; Ibr. 2:14, NW) Asa coo woranau au wolqqay laafa. Gidikkokka, ha iita ayyaana meretay cimmiyoonne balettiyo qofaa aassees. I asay hara asaa woranau qoppanaadan oottees. Leemisuwau, Amarkkan yelettiya 142 naatuppe issoy asa kushiyan hayqqees. Iita makkalay keehi aakkidoogaara gayttidaagan, Yihooway ha wodiyan hanettiyaabaa Nohe wodeegaappe guutti xeellees giidi qoppeetii? I tangguwaa ekkennee?
6, 7. Noheenne a soo asay bantta ammanuwaanne Xoossau yayyiyoogaa waati bessidonaa?
6 Guyyeppe, Xoossay asa ubbaa xayssanau saˈan bashsha haattaa ehaanau qofaa qachidoogaa Noheyyo yootiis. (Doo. 6:13, 17) Nohee gita saaxiniyaa milatiya markkabiyaa keexxanaadan Yihooway azaziis. Noheenne a soo asay markkabiyaa keexxiyoogaa doommidosona. Eti azazettanaadaaninne Xoossaa pirdday gakkiyo wode giigi uttanaadan maaddidabay aybee?
7 Mino ammanoynne Xoossaa yayyiyoogee, Noheenne a soo asay Xoossay azazidoogaadan oottana mala denttettiis. (Doo. 6:22; Ibr. 11:7) So asaa huuphe gidiyoogaadan, Nohee ayyaanaaban tishsha gididi deˈiis; qassi he wode deˈiya asati oottiyo iitaban shaahettibeenna. (Doo. 6:9) He wode deˈiya asaa eeshshaappenne makkala hanotaappe ba soo asay naagettana koshshiyoogaakka erees. Eti galla galla deˈo xallau bichaarana koshshenna. Eti oottana bessiyo oosuwaa Xoossay immiis; qassi kumetta so asay he oosuwaa kaseyana koshshees.—Doomettaabaa 6:14, 18 nabbaba.
Noheenne A Soo Asay Giigi Uttidosona
8. Nohe soo asay Xoossau aqidaageeta gidiyoogaa bessiyay aybee?
8 Geeshsha Maxaafay loytti yootiyoy ba soo asau huuphe gidida Nohebaa gidikkokka, a keettaayiyaa, a naatinne eta macca asatikka Yihoowau goynniyaageeta. Hananabaa yootiya Hizqqeelikka hegee tuma gidiyoogaa yootiis. Hizqqeeli, Nohee ba wode deˈidaba gidiyaakko, a naati bantta aawaa xillotettan attana danddayennaagaa yootiis. Eti azazettanau woy agganau banttana danddayida gastta asata. Hegaa gishshau, eti Xoossaanne a ogiyaa siiqiyoogaa qonccissidosona. (Hiz. 14:19, 20) Nohe soo asay Nohe azazuwaa kaallidosona, aagaadan ammanidosona, qassi Xoossay immido oosuwaa eti oottennaadan harati xubbanaadan paqqadibookkona.
9. Noheegaa mala ammanuwaa bessiyaageeti ha wodiyan deˈiyoogaa aybippe akeekana danddayiyoo?
9 Ha wodiyan alame yuushuwan ishanttu maabaran deˈiya bantta soo asau huuphe gidiyaageeti, Nohe leemisuwaa kaallanau banttau danddayettida ubbabaa oottiyoogaa beˈiyoogee keehi minttettiyaaba! Eti bantta soo asau qumaa, maayuwaanne keettaa giigissiyoogaanne eti tamaaranaadan oottiyoogaa xallay gidennaagaa akeekoosona. Bantta soo asau ayyaanaaban koshshiyaabaakka kunttana bessees. Hegaadan oottiyoogan, Yihooway mata wode oottanabau eti giigi uttidoogaa bessoosona.
10, 11. (a) Markkabe giddon deˈiyo wode, Noheyyoonne a soo asau aybi siyettiis gaana danddayiyoo? (b) Woygiya oyshaa nuna oychana koshshii?
10 Nohee, a machiyaa, a naatinne eta macca asati 50 gidiya layttau markkabiyaa keexxennan aggokkona. Eti markkabiyaa keexxiyo wode, darotoo a giddo geliiddinne kiyiiddi oottidaba milatees. Eti a shidan meeshidosona, kattaa, mehiyaanne doˈaa a giddo gelissidosona. Ane ha hanotaa qoppite. Wurssettan he gita gallassay gakkiis. Hegee hanidoy naaˈˈantta aginan, 17tta gallassan 2370 K.K. gidishin, eti he wode markkabe giddo gelidosona. Yihooway kariyaa gorddin, iray bukkiyoogaa doommiis. Hegee wolqqaama ira gidenna. Saluwan deˈiya haattaa maskkootee dooyettin, haattay saluwaappe duge soosiis. (Doo. 7:11, 16) Markkabiyaappe kareera deˈiya asay hayqqin, markkabe giddon deˈiya asay attiis. Nohe soo asau aybi siyettideeshshaa? Eti wozanappe Xoossaa galatidoogee erettidaagaa. Eti, ‘Nuuni tumu Xoossaara hemettidonne giigi uttido gishshau ayba anjjettidoo!’ giidi qoppidoogee sirissenna. (Doo. 6:9) Inttekka Armmageedoona olaappe attidi hegaadan intte wozanay ufayssan kumin galatanaagaa qoppeetii?
11 Ubbabaa Danddayiya Xoossay Seexaanaa alamiyaa xayssanau gelido qaalaa polennaadan aybinne teqqana danddayenna. ‘Xoossay gelido qaalaappe qiibabaykka gidin polettennan attennaagaanne i keerido wodiyan a qaalay muleera polettanaagaa wozanappe ammanettiyaanaa?’ giidi inttena oychite. Ammanettiyaaba gidikko, keehi matattida “Xoossaa gallassaa” ubbatoo hassayiyoogan giigi uttite.—2 PHe. 3:12.
Muusee Akeekancha Gididi Deˈiis
12. Muusee ayyaanaaban xeelaa wottennaadan teqqana danddayiyaabi aybee?
12 Ane hara leemisuwaa beˈoos. Asa xeelan, Gibxxe biittan Muusee demmana maatay i keehippe bonchettanaadan oottiyaaba milatees. Paaroona naˈiyaa dichidoogaa gidiyoogaadan, i loˈˈo qumaa miyoogan, loˈˈo maayuwaa maayiyoogan, qassi injje sohuwan deˈiyoogan keehippe bonchonne ufayssa duussa deˈennan aggenna. I xoqqa timirttiyaakka tamaariis. (Oosuwaa 7:20-22 nabbaba.) I darobaa laattiyaagaa gidana danddayees shin.
13. Muusee Xoossay gelido qaalan ba xeelaa wottidi deˈidoy ayba ogiyaanee?
13 Muusa yelidaageeti naatettan a loohissidoogee Gibxxetu pattenna eeqaa goynuwaa i akeekanaadan oottennan aggenna. (Kes. 32:8) Gibxxetu timirtteenne kawo keettan deˈiya ishalo deˈoy Muusee tumu goynuwaa agganaadan oottibeenna. Muusee ba mayzza aawatuyyo Xoossay gelido qaalaa wotti dentti qoppidaba malatees; qassi Xoossay koyiyoobaa oottanaassi giigi uttanau wozanappe koyiis. Qassi Muusee Israaˈeelatuyyo, “GODAI . . . Abrahaama Xoossai, Yisaaqa Xoossai, Yaaqooba Xoossai, i tana inttekko kiittiis” yaagiis.—Kessaabaa 3:15-17 nabbaba.
14. Muuse ammanoynne xalatettay paacettidoy ayba ogiyaanee?
14 Deˈoy baynna Gibxxe biittaa xoossata malaatiya eeqatu ubbaappe dumma gidida hanotan, tumu Xoossaa Yihooway deˈiyoogaa Muuse loytti erees. I, “beettenna Xoossaa be7idabaadan” deˈiis. Xoossaa asay aylletettaappe kiyanaagaa Muuse ammanees; shin hegee awude gidanaakko eribeenna. (Ibr. 11:24, 25, 27) Ibraaweti naxa kiyanaadan i keehippe koyiyoogee, issi Israaˈeela asa gidida aylliyaa qohuwaappe ashshidoogan qoncciis. (Kes. 2:11, 12) SHin he wodee, Yihooway naxa kessiyo wode gidenna gishshau, Muusee haaho biittan betedan deˈana koshshiis. Gibxxen kawo keettan ishalo duussan ufayttiyoogaappe, bazzon deˈiyoogee i metootanaadan oottidoogee sirissenna. Gidikkokka, Xoossay au immiyo ubba kaaletuwaa beegottidi naagiyoogan Muusee giigi uttiis. Yaatiyo gishshau, i Miidiyaame biittan 40 laytta deˈi simmin, a ishantta waayiyaappe shemppissanau Xoossay a goˈettiis. Xoossay azazin Muusee eeno giidi Gibxxe simmiis. Muusee Xoossaa oosuwaa i azazido ogiyan oottanau, Xoossaa kaaletuwaa kaalliyo wodee gakkiis. (Kes. 3:2, 7, 8, 10) “Asaa ubbaappe aadhdhiya ashkke asa” gidida Muusee Gibxxe biidi, Paaroona sinttan eqqanau ammanuwaanne xalatettaa koshshiis. (Qoo. 12:3) I issitoo xalla gidennan, issi boshaappe hara boshay gakkanaashin aapputoo simerettana koshshiyaakko erennan, boshay gakkanaagaa yootanau zaaretti zaaretti Paaroonakko biis.
15. Hidootaa qanxxanaadan oottiyaabay deˈishinkka, Muusee saluwan deˈiya ba Aawaa bonchanau ubbatoo injjiyaa koyanaadan denttettiday aybee?
15 Kaalliya 40ppe dariya layttatun, giishin 1513 K.Kppe biidi, 1473 K.K. gakkanaashin, Muusee hidootaa qanxxanaadan oottiyaabay gakkiis. SHin i Yihoowa bonchiyo injjiyaa koyiis; qassi Israaˈeelatikka hegaadan oottanaadan wozanappe minttettiis. (Zaa. 31:1-8) Aybissi? I ba sunttaappe aattidi Yihoowa sunttaa siiqiyoonne Yihooway ubbabaa haariyo maataa xoqqu oottidi xeelliyo gishshataassa. (Kes. 32:10-13; Qoo. 14:11-16) Xoossay issibaa oottiyo ogee, hara aybippenne aadhida eratetta, likkenne loˈˈo gidiyoogaa ammanettiyoogan, nuunikka hidootaa qanxxanaadan oottiyaabay gakkishinkka, aggennan a haaruwau exatana bessees. (Isi. 55:8-11; Erm. 10:23) Intteyyookka hegaadan siyettii?
Beegotti Naagite!
16, 17. Marqqoosa 13:35-37y qonccissiyo gitabay aybee?
16 “He wodee aude gidanaakko, intte erenna gishshau, naagettite; minnite; Xoossaa woossite.” (Mar. 13:33) Yesuusi ha akeekissuwaa yootidoy, ha iita siraataa wurssettaa malaataa yootiyo wode. Marqqoosi xaafido, Yesuusa gita hiraagaa wurssetta qaalata qoppite: “Minnite; aissi giikko, keettaawai omarssa gidin, woi qamma bilahe gidin, woi kuttoi waassiyo wode gidin, woi maallado guuraara gidin aude yaanaakko, intte erekketa. Intte akeekennan i yiikko, inttena xiskkidaageeta demmenna mala minnite. Taani intteyyo odiyoogaa asa ubbau odais; minnite.”—Mar. 13:35-37.
17 Yesuusa zoree wozanan wottana bessiyaaba. I issi qamman deˈiya oyddu shaahota yootiis. Wurssetta shaahoy uddufun saatiyaappe biidi wonttana gakkanaassi deˈiya wode gidiyo gishshau, hegee beegotti naaganau metiya wode. Gooba olanchati bantta morkketa qohanau hegee keehi loˈˈo wode gidiyoogaa qoppoosona; qassi ‘xiskkidaashin’ eta oyqqanau he injje wodiyaa goˈettoosona. Ha wodiyankka hegaadan, ha alamee ayyaanaaban xiskkuwaa kayriis; nuuni beegottidi deˈanau keehi baaxetana koshshees. Nuuni kasetidi odettida wurssetta wodiyaanne nu atotettaa xeelliyaagan naagettananne minni deˈana koshshiyoogaa sirana bessii?
18. Yihoowa Markka gidiyoogaadan nuuyyo ayba gita maati deˈii?
18 Kasetidi abay qonccido, doˈaa loohissiya bitanee he maahiyaa qohuwan hayqqennan attiis. SHin Geeshsha Maxaafaa hiraagay, worddo haymaanoote gidin attida iita siraataykka mata wode gakkiya bashshaappe attennaagaa sirissenna ogiyan yootees. (Ajj. 18:4-8) Nohenne a soo asaagaadan, Xoossau oottiya ubbay, yelaga gidin cima gidin, Yihoowa gallassau giigi uttanau nuuyyo danddayettidabaa ubbaa oottiyoogee keehippe koshshiyoogaa akeekiyaageeta gidoos. Worddo haymaanootiyaa asttamaareti, Xoossay deˈiyoogaa siriyaageetinne Xoossi baa giyaageeti Medhidaagaa bolli qilliicciyo, Xoossaa bonchenna alamiyan deˈoos. SHin nuuni hegan qohettana bessenna. Qommoora beˈido leemisota nu wozanan wottiyaageetanne Yihooway ‘xoossatu Xoossaa’ qassi “gita Xoossaa; i wolqqaamanne yashshiya Xoossaa” gidiyoogaa yootanaunne a bonchanau injjiyaa ubbatoo beegotti naagiyaageeta gidoos.—Zaa. 10:17.
[Tohossa qofaa]
^ MENT. 3 Doomettaabaa 6:3n, “issi xeetanne laatama” geetettida layttaa xeelliyaagan, Amaaratto Wochiyo Keelaa, Tisaase 15, 2010, sinttaa 30 xeella.
Hassayay?
• Nohee ba so asau ayyaanaaban koshshiyaabaa kunttiyoogaa kaseyana koshshidoy aybissee?
• Nuuni deˈiyo wodee Noheegaara issi mala gididoy ayba dumma ogiyaanee?
• Hidootaa qanxxissiyaabay deˈishinkka, Muusee, Yihooway gelido qaalan ubbatoo ba xeela wottidoy aybissee?
• Intte ayyaanaaban beegotti daanaadan maaddida Geeshsha Maxaafaa hiraagay awugee?
[Oyshata]
[Sinttaa 21n deʼiya misiliyaa qonccissuwaa]
Noheenne a soo asay ubbatoo Yihoowa oosuwan bantta xeelaa wottidosona
[Sinttaa 22n deʼiya misiliyaa qonccissuwaa]
Xoossay gelido ammanttiya qaalay Muusee ubbatoo beegotti deˈanau maaddiis