Nabbabiyaageetu Oyshaa . . .

Dabloosa Xoossay Medhidee?

▪ Geeshsha Maxaafay ‘ubbabaa medhiday’ Xoossaa giyo gishshau, issoti issoti Dabloosakka medhiday Xoossaa gidana bessees yaagoosona. (Efi. 3:9; Ajj. 4:11) SHin hanotay hegaappe dumma gidiyoogaa Geeshsha Maxaafay qoncciyan yootees.

Wodeppe guyyiyan, Dabloosa gididaagaa Yihooway medhiis. Yaatiyo gishshau, waannatidi Xoossaa eqettiya hagee merettido hanotay, Yihooway Medhidaagaa gidiyoogaa Geeshsha Maxaafay yootiyoogaara moggana bessees. Geeshsha Maxaafay Yihoowabaa, “A oosuwan wotoi baa; a oge ubbaikka suure. Nu Xoossai ammanettiyaagaanne iitatettai bainnaagaa; i tumanchchanne suure” yaagees. (Zaa. 32:3-5) Issi wode, Seexaanay polonne suure, qassi Xoossaa naata gidida kiitanchatuppe issuwaa gidiyoogaa ha qofaappe akeekana danddayoos. Yesuusi Yohaannisa 8:44n (NW) Dabloosi “tuman genccibeenna” yaagiis; hegee i issi wode tumanchanne bali baynnaagaa gidiyoogaa bessees.

Gidikkokka, Yihooway medhido qoppi danddayiya hara meretatudan, guyyeppe Seexaanaa gidida kiitanchaykka loˈˈuwaa woy iitaa dooriyo maataara merettiis. I Xoossaa eqettanau dooriyoogaaninne koyro azinaynne machiyaa ba bagga gidana mala denttettiyoogan, Seexaanaa gidiis; hegee “Eqettiyaagaa” giyoogaa.—Doo. 3:1-5.

He iita ayyaana meretay Dabloosakka gidiis; hegee “Sunttaa Mooriyaagaa” giyoogaa. Seexaanay geemmidi, shooshshay haasayiyaaba milatissiyoogan, Medhidaagee qoncciyan yootido higgiyaa Hewaana azazettenna mala wordduwan cimmiis. Yesuusi Seexaanaa “wordduwaukka aawa” giidoy hegaassa.—Yoh. 8:44.

SHin meretan iitatetti baynna, qassi iitabaa oottanaadan denttettiyaabi a yuushuwan baynna, polo gidida ayyaana meretay waanidi balabaa oottana danddayii? Dabloosi Xoossaa xallau bessiya goynoy baassi gidanaadan amottiis; qassi, asaa naati Yihoowau haarettiyoogaappe baassi haarettanaadan oottana danddayiyoogaa qoppiis. I haariyaagaa gidanau amottiyoogaa aggiyoogaappe ubbatoo hegaa qoppiyoogan, wurssettan hegaadan oottana gakkanaashin he qofan sheekkiis. Hegaa mala hanotay Yaaqooba maxaafan qoncciis: “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees. Hegaappe guyyiyan, amoi shahaaridi, nagaraa yelees.”—Yaaq. 1:14, 15; 1 Xim. 3:6.

Hegaa leemisuwan qonccissanau, ba ooso keettan miishshaara gayttidabaa oottiya, ooninne erana danddayenna ogiyan miishshaa wuuqqiyo injjee deˈiyo uraa qoppite. I he bala qofaa qoppiyoogaa sohuwaara aggiigana danddayees. I yaatiyoogaappe, hegaa waati demmana danddayiyaakko ubbatoo qoppiyaabanne amottiyaaba gidikko, ba qofaa polana danddayees. I ba qoppidobaa oottikko, kayso gidiis giyoogaa. Qassi oottidobaa kashi giikko, worddancha gidees. Hegaara issi mala hanotan, Xoossay medhido he kiitanchay balabaa aggennan qoppiyoogaaninne hegaa poliyoogan, koyidobaa dooridi oottiyo ba maataa ba Aawaayyo azazettennan ixxanaunne makkalanau goˈettiis; hegaappe denddidaagan Seexaanaa Dabloosa gidiis.

Xoossay keerido wodiyan Seexaanaa Dabloosi xayanaagee ufayssiyaaba. (Roo. 16:20) Hegee gakkanaashin, Xoossaa Yihoowayyo goynniyaageeti Seexaanaa qofaa akeekoosona; qassi a cimuwaappe naagettoosona. (2 Qor. 2:11; Efi. 6:11) Hegaa gishshau, intteyyo danddayettidabaa ubban, “xalahe halaqaa teqqite; i intteppe baqatana.”—Yaaq. 4:7.

[Sinttaa 10n deʼiyaagaa]

Xoossaa eqettanau dooriyoogan, polo gidida kiitanchay Seexaanaa gidiis