Keehippe Koshshiya Hiraagaa

“Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana.”—MAA. 24:14.

HA XIQISSEE keehippe koshshiyoogaa eranchati maayoosona. Alame yuushuwan oosettiya oosuwaabaa yootiyo gishshau hegee keehippe koshshiyaaba. Yesuusi ‘wurssettaa’ giido hanotaappe kasetidi sabbakettana bessiya, Kiristtaaneti oottana koshshiyo keehippe xoqqu oottidi xeelliyoonne aahuwan polettiya oosuwaa qonccissiyo gishshau, he xiqisee keehi koshshiyaaba.

Hananabaa kasetidi qonccissiya he xiqisee ha wodiyan polettiiddi dees. Kawotettaa mishiraachoy shoobiyaanne akeekissuwaa oyqqido gishshau, hegee nenakka gujjees. Hegee neeni Xoossaa Kawotettaa ekkiyoogaappe woy aara eqettiyoogaappe issuwaa dooranaadan oottees. Neeni dooriyo dooroy ne deˈuwaara gayttidaba.

Xiqisiyaa yuushuwan deˈiya qofaa akeeka. Yesuusi kaqettanaappe amarida gallassaa kasetidi, erissiyo ashkkarati akko yiidi sinttanaa wodiyaabaa oychidosona. Yesuusi ubbatoo tamaarissiyo Xoossaa Kawotettay awude eqqanaakko eranau keehi koyidosona. Eti ‘wodiyaa wurssettaabaakka’ eranau koyidosona.—Maa. 24:3.

Yesuusi he oyshaa zaariiddi, wolqqaama olay, koshay, wurssiya harggeenne biittaa qaattay denddanaagaa yootiis. I makkalay daranaagaa, worddo haymaanootiyaa kaalettiyaageeti daro asaa balettanaagaa, tumu Kiristtaaneti ixettanaagaanne yedetettanaagaakka yootiis. Hagee ubbay mishiraacho gidenna.—Maa. 24:4-13; Luq. 21:11.

SHin mishiraachoykka dees. Yesuusi hegaappe simmidi, qommoora gartte malaataa giddon deˈiya qaalaa yootiis; he qofay, hegee woygiyoogaakko asay daro xeetu layttau qoppanaadan oottiis; qassi oosuwaukka denttettiis. Asay Yesuusi haasayido qaalay keehippe koshshiyaaba gidiyoogaa maayees; shin he qaalaa birshshettaabaa maayenna. Ha mishiraachoy tumuppe aybee? Kawotettay aybee? Ha hiraagay polettiyoy awudee, qassi oonee poliyay? Qassi wurssettay aybee? Ane beˈoos.

 [Sinttaa 2n deʼiya misiliyaa qonccissuwaa]

Oyddu Wonggeleta Milatissidi Xaafido Washingtene Xuufiyaa. Maatiyoosa 24:14y Borxxu Gi Uttiis

[Sinttaa 2n deʼiyaagaa]

From the book Facsimile of the Washington Manuscript of the Four Gospels in the Freer Collection 1912