Hiraagaa 5. Saˈaa Mooriyoogaa

‘Xoossay saˈaa xayssiyaageeta xayssana.’—AJJ. 11:18.

● Piiri, Nayjeeriyaa biittan kipwar giyo heeran, ushshaa agiyo tamiriyaa ayfiyaa shiishshees. Nijeere shaafaa doonan gukkida daro nadaajee a oosoy keehi qohettanaadan oottiis. I hagaadan giis: “Hegee moleta woriis, nu gogaa mooriis, qassi nu heeran deˈiya shaafata mooriis. Ta deˈuwau koshshiyaabaa demmanau oottiyoobaakka bashshiis.”

HANOTAY AY QONCCISSII? Issi issi eranchati giyoogaadan, layttan layttan 6.5 miiloone toone litiro nadaajee ano abbatun gukkees. Hegaappe xeetaappe 50 kushe gidiyaagee plasttike gidiyo gishshau xeetan qoodettiya layttau wooqqennan takkees. Asaa naati saˈaa mooriyoogaappekka haray saˈaa aquwaa xexeefiiddi deˈoosona. Xinaatee qonccissiyoogaadan, asaa naati issi laytta giddon goˈettido saˈaa aquwaa saˈay zaarettidi a sohuwaa zaaranau issi layttanne ichashu aginaa koshshees. Sidni Morning Heerald giyo Awusttiraaliyaa gaazeexay, “Asaa qoodaynne asay saˈaa aquwaa hegaadan goˈettiyo hanotay ubbatoo gujjiyaaba gidikko, 2035n nuuyyo naaˈˈu saˈaa koshshees” yaagiis.

DAROTOO ASAY WOYGII? Asaa naatuyyo metuwaa giigissiyo eray deˈees. Nuuni ha metuwaa qaaranaunne saˈaa bashshaappe ashshanau danddayoos.

HEGEE TUMEE? Minnidi oottiya daro asatinne citati heeraa hanotaara gayttidabaa asay akeekanaadan maaddoosona. Gidikkokka, saˈay keehippe moorettiiddi deˈees.

NE QOFAY AYBEE? Xoossay qaalaa gelidoogaadan, kelttiyaa gelidi, saˈaa bashshaappe ashshiyoogee bessiyaabee?

Kaseti beˈido ichashu hiraagatu bolli, wurssetta gallassatun polettiya hara loˈˈobaykka deˈiyoogaa Geeshsha Maxaafay yootees. Issi leemisuwaa usuppuntta hiraagaappe beˈa.

[Sinttaa 8n deʼiyaagaa qonccissuwaa]

“Tana guutta gannateeppe wolqqan kessidi, buuraynne marzzee kumidosaa baanaadan oottidoba tau milatees.”​—ERIN TAMBER GEETETTIYA, AMARKKAN ABBAA HEERAN DEˈIYA MACCAASIYAA, MEKSIKKO ABBAA XANXXAN 2010N NADAAJJEE GUKKIDO WODE BAU SIYETTIDA HIRGGAA YOOTIDOOGAA.

[Sinttaa 8n deʼiya saaxiniyaa]

Xoossay Oyshettana Bessii?

Ha wodiyan nuuni beˈiyo iitabaa Geeshsha Maxaafay kasetidi yootiyoogee, he hanotan Xoossay oyshettanaadan oottii? I nuuni waayettanaadan oottii? Yihoowa Markkati attamissido, Tumuppe Geeshsha Maxaafay Tamaarissiyoy Aybee? giya maxaafaa shemppo 11n, ha oyshatuyyo aliya zaaruwaa demmana danddayaasa.

[Sinttaa 8n deʼiya misiliyaa qonccissuwaa]

U.S. Coast Guard photo