Xoossaa Qaalaappe Tamaarite

Xoossay Iitabaanne Tuggaa Aybissi Paqqadidee?

Ha huuphe yohoy inttena qofissidaba gidana danddayiya oyshata oyqqiis; qassi he oyshatuyyo zaaruwaa Geeshsha Maxaafan awan demmana danddayiyaakko qonccissees. Yihoowa Markkati he zaarota inttenaara tobbanau ufayttoosona.

1. Iitabay Waani Doommidee?

Saˈan iitabay doommidoy, Seexaanay koyro wordduwaa worddotido wode. Seexaanay iita gididi merettibeenna. I polo gidida kiitancha; shin “tuman genccibeenna.” (Yoh. 8:44 NW) I, Yihoowa xallau bessiya goynuwaa bau ekkana koyiis. Seexaanay Hewaanissi worddo gididabaa yootiis; qassi Xoossaasi gidennan bau azazettanaadan o ammanttiis. Addaameekka Hewaaniira exatidi, Xoossaayyo azazettibeenna. Hegee tuggaanne hayquwaa kaalettiis.—Doomettaabaa 3:1-6, 17-19 nabbaba.

Seexaanay, Hewaana Xoossau azazettennaadan oottido wode, Xoossaa maataa bolli akka makkalanaadan oottiis. Asaa naatuppe daroti Xoossaa haaruwaa ixxidi, Seexaanaara exatidosona. Hegaa gishshau, Seexaanay ‘ha saˈaa haariyaagaa’ gidiis.—Yohaannisa 14:30; Ajjuutaa 12:9 nabbaba.

2. Xoossay medhidoban paci deˈii?

Xoossay medhido asatinne kiitanchati, ayyo polo hanotan azazettana danddayoosona. (Zaa. 32:5) Xoossay nuna, iitaa woy kehaa dooridi oottanau laˈatettay deˈiyoogeeta ootti medhiis. Ha dooriyo maatay nuuni Xoossaa siiqiyoogaa bessanaadan oottees.—Yaaqooba 1:13-15; 1 Yohaannisa 5:3 nabbaba.

3. Xoossay tuggaa hanno gakkanau paqqadidoy aybissee?

Yihooway ubbaa haariyo maataa bolli denddida makkalaa amarida wodiyau danddayiis. Aybissi? Ay haaroynne a maadoy baynnan asaa naata goˈˈennaagaa bessanaassa. (Erm. 10:23) Asaa naatu 6,000 laytta taarikee, hegee tuma gidiyoogaa qonccissiis. Asaa naatu haaroy olaa, danuwaa, pirdda pacaanne harggiyaa xayssana danddayibeenna.—Eranchaa 7:29; 8:9; Roome 9:17 nabbaba.

Hegaappe dumma hanotan, Xoossau eeno giidi haarettiyaageeti goˈettoosona. (Isi. 48:17, 18) Yihooway mata wode asaa haaruwaa ubbaa xayssana. Xoossay banttana haaranaadan koyiya asaa xallay saˈan deˈana.—Isi. 2:3, 4; 11:9; Daaneela 2:44 nabbaba.

  4. Xoossaa danddayay waatiyo hanotay deˈanaadan oottidee?

Seexaanay, Yihoowayyo ammanettiyaagaa gididi azazettiya uri deˈenna giis. Yihoowa danddayay, nuuni ubbay haarettana koyiyoy Xoossaassakko woy asassakko bessanaadan oottiis. Nu deˈoy nuuni dooriyoy awugaakko bessees.—Iyyooba 1:8-11; Leemiso 27:11 nabbaba.

5. Xoossau haarettanau waani doorana danddayiyoo?

Geeshsha Maxaafaa maaraadan tumu goynuwaa kaalliyaaba gidikko, nuuni haarettiyoy Xoossaasa gidiyoogaa bessoos. (Yoh. 4:23) Yesuusi oottidoogaadan, polotikaaninne olan gelokko.—Yohaannisa 17:14 nabbaba.

Seexaanay ba wolqqaa nuuni iita oosuwaa oottanaadan denttettanau goˈettees. Nuuni hegaa malabaappe haakkiyo wode, nu laggetinne nu dabboti nuna ixxana danddayoosona. (1 PHe. 4:3, 4) Hegaa gishshau, awugaa doorana koshshiyaakko paacettana danddayoos. Nuuni Xoossaa siiqiya asatuura laggetanee? Qassi Xoossay ba aadhida eratettaaninne siiquwan immido higgiyaa azazettanee? Hegaadan oottikko, Xoossay koyiyoogaadan oottiya issi urinne deˈenna giidi, Seexaanay yootidobay worddo gidiyoogaa bessoos.—1 Qoronttoosa 6:9, 10; 15:33 nabbaba.

Gujo qofaa demmanau, Yihoowa Markkati attamissido ha maxaafaa shemppo 11 xeella. Tummuppe Geeshsha Maxaafay Tamaarissiyoy Aybee?

[Sinttaa 20n deʼiya misiliyaa qonccissuwaa]

Addaame iitabaa dooriis

[Sinttaa 21n deʼiya misiliyaa qonccissuwaa]

Nuuni dooriyo dooroy, Xoossau haarettana koyiyoogaa woy koyennaagaa qonccissees