Xoossay Ixxiyo Wogata Eqettite!

YESUUS Kiristtoosi, “Tumatettai inttena ailletettaappe kessana” yaagiis. (Yoh. 8:32) Ee, Kiristtaane gidiyoogee malan ammaniyoogaappe, worddo timirttiyaappe, hanennabaa hidootiyoogaappenne shori baynnabaa oottiyoogaappe naxa kessees.

Beni wodeegaadan, ha wodiyan deˈiya Kiristtaanetikka beni wogau aylle gidanaadan darotoo paacettoosona. (Gal. 4:9, 10) Asay kaalliyo woga ubbay qohiyaaba gidenna. Issi Kiristtaanee ba heeran deˈiya loˈˈonne goˈˈiya wogaa kaallanau doorana danddayiyoogee qoncce. SHin wogati Xoossaa Qaalaara maayenna wode Kiristtaaneti hegaa kaallokkona. Hegaa gishshau, Yihoowa Markkati ufayssa Masqqalaa, yeleta gallassaanne Xoossaa Qaalaara moggenna hegaa mala hara baalata bonchennaagan erettoosona.

Darotoo hagaa mala mino equwaara deˈiyo hanotay, laggeti, shoorotinne ammanenna dabboti qilliiccanaadaaninne yedettanaadan oottana danddayees. Hegaa mala hanotay mooguwaara, bullachaaranne yeletaara gayttidabaa darotoo bonchiyo, cora qommo wogay deˈiyo issi issi Afirkka biittatun deˈiyaaba. Issi wogaa kaallanaadan gakkiya sugettay wolqqaama gidana danddayees; hegee darotoo wolqqan yashissiyoogaa gujjees. Kiristtaaneti hagaa mala hanotaa waani genccana danddayiyoonaa? Hegaa mala paaciyan xoonettennan xooni kiyana danddayettii? He oyshaa zaaruwau, Geeshsha Maxaafaara moggenna issi issi wogaa xeelliyaagan ammanettida Kiristtaaneti ay oottidaakko ane beˈos.

Mooguwaara Gayttida Mala Ammano Meezeta

Tohossa Afirkkan deˈiya biittatun mooguwaaranne baliyaara gayttida cora wogati deˈoosona. Kayyottiya asati issi woy hegaappe dariya qammau tamay toˈennan eexxiyo, yeeho keettan aqiyoogee  meeze gididaba. Balee aadhanaashin kayyottiya asati qummaa kattennaadan, huuphiyaa meedettennaadan, ubba bollaakka meecettennaadan digettoosona. Hegaappe simmin, sharafaappenne bonccuwaappe dumma hanotan giigidaban meecettoosona. Hegaa mala wogaa kaalliyoogee Kiristtaanetussi bessii? Bessenna. Hagee ubbay shemppoy hayqqenna giyo ammanuwaanne hayqqidaageeta keehippe yayyiyoogaa bessees.

Eranchchaa 9:5y, “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona” yaagees. Ha tumaa eriyoogee ‘hayqqidaageetu ayyaanaa’ yayyiyoogaappe naxa kessees. SHin issi Kiristtaaniyaa mata dabboti hegaa mala wogaa i kaallanaadan koyiyo wode ay oottana koshshii?

Afirkkan deˈiya, i away hayqqido Jano geetettiya Kiristtaane michee temokruwaa beˈa. A yeeho keetti gakkidosaara, haiqqida uraa ayyaanay hanqqettennaadan, anne hara i dabboti kummetta qammaa duriiddi aqana koshshiyoogaa iyyo odidosona. Jana hagaadan gaasu: “Taani Yihoowa Markkatuppe issinniyo gidiyogaadan hegaa malabaa oottennaagaa yootaas. SHin moogo gallassaappe kaalliya gallassi, hayqqidaagaa ayyaanay gattiyo hara qohuwaappe eta naaganau, cima dabboti kayyottida keettaa asaa bollaa meeccana haniyoogaa iyyo odidosona. Taani haˈˈikka hegaa malaban shaahettanau ixxis gaas. He wode, issi keetta giddon ta aayyiyaa barkka takkanaadan oottidosona. Iira gayttanau koyiya ooninne hegau giigida ushshaa uyana koshshees.

“Ha meezetuppe issuwaanne polanau koyabeykke. Hegaadan oottiyoogaappe, ta ayyiyaa deˈiyoosaa ekka efiyo qumaa kattanau soo baas. Ha hanotay nu soo asaa keehi azzanttiis. Ta dabboti tana sarennabadan qoppidosona.” Hegaa bollikka, i bolli qilliicciyoogaaninne o qanggiyoogan hagaadan giidosona: “Neeni ne haymaanootiyaa gaasuwan nu wogaa ixxis giido gishshau ne aawaa ayyaanay nena wayssana. Neeni naˈa yelakka.” Gidikkokka, Jana yayyabeykku. Wurssettay ayba gididee? A hagaadan yaagaasu: “Taassi he wode naaˈˈu naati deˈoosona. SHin haˈˈi usuppuna! Hagee tana mule naˈa yelakka giidaageeta ubbaa yeellayiyaaba gidiis.”

Asho Gaytotettan “Geeyiyoogaa”

Hara meezee qassi, aqo laggee hayqqi simmin geeyiyo siraataa. Machiyaa hayqqiyo wode, eta soo asay bantta naˈee azinau hayqqidaari michiyo woykko mata dabbotuppe issinniyo au ehoosona. I iraa asho gaytotettaa polanaadan koyoosona. I ba koyido uraa machana danddayiyoy hegaadan oottikko xallaana. Azinay hayqqiyo wodekka hegaara issi malabay oosettanaadan koyoosona. Hegaadan oottiyoogee, paxa deˈiya aqo laggiyaa giddon deˈiya hayqqidaagaa “ayyaanaa” geeshshees giidi qoppoosona.

Hegaa mala “geeshshiyo” maaraa polanau eeno geenna oonanne a dabboti keehippe hanqqettana danddayoosona. Dabboti he uraa bohana, a bolli qilliiccananne a qanggana danddayoosona. Gidoppe attin, Kiristtaaneti hegaa mala wogaa kaallokkona. Aqo deˈuwaappe kareera asho gaytotettaa poliyoogee Xoossaa xeelan “geeshshiyaaba” gidennan tunissiyaaba gidiyoogaa eti eroosona. (1 Qor. 6:18-20) Hegaa bollikka, Kiristtaaneti“ Godaa ammaniya asaa” xallaa ekkana woy gelana koshshees.—1 Qor. 7:39.

Zambbiyan deˈiya Vayolet geetettiya issi Kiristtaane maccaaseessi azinay hayqqiis. Hegaappe simmin, asho gaytotetta iira polanaadan i dabboti issi bitaniyaa ekki yiidosona. Vayoleta ixxis gaasu; hegaa gishshau, heeraa asay goˈettiyo ollaappe haattaa duuqqennaadan o diggidosona. A wogga ogiyaara beennaadankka mintti yootidosona; hegee qassi hara metuwaa kaalettiis. Gidikkokka, i dabboti woy i shooroti oottidobay a yayyanaadan oottibeenna.

Hegaappe simmin Vayoleta heeran deˈiya issi pirdda keetti xeegettaasu. He sohuwankka, a aynne yayyennan shori baynna asho gaytotettaa ixxis giido gaasuwaa Geeshsha Maxaafaappe yootaasu. Pirdda keettay i ammanuwaara moggenna, heera meeziyaanne wogaa kaallanaadan o giddana danddayennagaa odidi issi pirddiis. Keehi ufayssiyaagee, a hegaa mala mino tangguwaa ekkidoogee, guyyeppe iigaa mala paacee gakkiyo hara Yihoowa Markkatu bolli daro metoy gakkenna mala maaddiis.

Afirkkan deˈiya Moniko geetettiya issi michee azinay hayqqi simmin, okka hegaa mala metoy gakkiis. I azinantta soo asay a hara azinaa gelana mala wolqqanttidosona. Monika, “Taani 1 Qor. 7:39n deˈiya azazuwaa naaganau murttido  gishshau ixxis gaas” yaagasu. SHin sugettaa gattiyoogaa aggibookkona. Monika hagaadan gausu: “Eti tana yashissidosona. ‘Neeni ixxis giyaaba gidikko, naaˈˈantto hara azinaa gelakka’ yaagidosona. Ta mala issi issi Kiristtaanetikka banttana geeshshanau geeman ha wogaa polidoogaa eti tau odidosona.” Gidikkokka, Monika genccaasu. A “gelennan naaˈˈu layttau takka simmada, issi Kiristtaanessi bessiya ogiyan zaarettada azinaa gelaas” yaagasu. Haˈˈi Monika kumetta wode aqinye gidada haggaazawusu.

Boshaanne Uluwan Hayqqida Naˈaa Yeliyoogaa

Tohossa bagga Afirkka biittatun deˈiya Kiristtaaneti, boshaanne uluwan hayqqida naˈaa yeliyoogaara gayttidaagan kaallana bessenna meezetikka deˈoosona. Hagee asay polo gidennaagaappe denddidaagan gakkiyaabappe attin, Xoossaa qixaate gidenna. (Roo. 3:23) Issi issi Afirkka wogatun, issi maccaasiyaa boshettiyaaba gidikko, amarida wodiyau asappe haakkana koshshees.

Mata wode boshettida issi maccaasiyaa, issi Yihoowa Markkay i soo yiishin beˈada keehi garamettaasu. I, ikko matiyo wode, “Ha yooppa! Nu wogan mata wode boshettida maccaaseekko asi shiiqenna” yaagasu. SHin he ishay Yihoowa Markkati Geeshsha Maxaafaa qofaa ubba asau yootiyoogaa odidi, boshaara gayttida wogaanne meeziyaa kaallennaagaa yootiis. Hegaappe, Xoossaa Kawotettan boshaynne uluwan hayqqida naˈaa yeliyoogee attanaaga qonccissiya, Isiyaasa 65:20, 23 nabbabiis. Hegaappe denddidaagan, he maccaasiyaa Geeshsha Maxaafaa xinaatiyaa doommanau maayasu.

Uluwan hayqqidi yelettida naˈaa moogiyo wodekka mala ammanuwaara gayttida issi issibay polettees. Yooseefa geetettiya issi Yihoowa Markkay hegaa mala mooguwan beettido wode, he sohuwan deˈiya ubba asay issi qommo bonccuwaa goˈettidi bantta kushiyaa meecettananne xaliyan bantta tiraa tiyettana koshshiyooga au yootidosona. Eti hegaadan oottiyoy, hayqqida naˈaa “ayyaanay” simmidi eta qohennaadaana. Yooseefi hayqqidaageeti paxa deˈiya asaa qohana danddayennagaa Geeshsha Maxaafay tamaarissiyoogaa loytti eriyo gishshau, he meeziyan shaahettennaagaa boncho hanotan odiis. Issoti issoti i he xaliyaa goˈettanaadan minttettanau malidosona. SHin Yooseefi he wodekka ixxis giis. He Kiristtaanee yashshi baynna hanotan eqettidoogaa beˈida, he sohuwan deˈiya haratikka he bonccuwan goˈettanau ixxis giidosona.

Koshshenna Ooshshaappe Haakiyoogan Minni Eqqite

Asaa yayyiyoogeenne bohettana danddayays giyo hirggay minni eqqennaadan wolqqaama paace gidana danddayees. Leemiso 29:25y, “Asassi yayyiyoobi he aawussi pire gidees” yaagees. Qommoora beˈido temokroti ha xiqisiyau kaalliya qofay, “SHin GODAN ammanettiya asi saro de7ees” giyaagee tuma gidiyooga bessees.

Gidikkokka, hegaa mala ooshshay darotoo attana danddayiyaaba. Leemisuwau, issi Kiristtaanee ba dabbuwaa mooguwaa sohuwan beettiyo wode, a suure equwaa mooriya hanotay gakkanaashin takkana bessenna. “Cincca asi metoi yiyo wode be7idi qosettees; shin akeekai paccido asi sitti gi biidi, metuwan gelees; yaatidi guyyeppe wai ana gees.”—Lee. 27:12.

Kaallidi aybi oosettana haniyaakko hiillan oychiyoogee eratettaa. Hegee hanqqetissiyaaba gidikko, issi Kiristtaanee i hegaa mala meezetun shaahettennay aybissakko he injjiyaa goˈettidi odana danddayees. SHin hegaadan oottiyo wode “hegaa ashkketettaaninne yashshatettan” oottiyoogee bessiyaaba. (1 PHe. 3:15) Issi Kiristtaanee Geeshsha Maxaafan baasettida ba equwaa eta bonchiyoogaa bessiya hanotan kasetidi odiyaaba gidikko, a dabboti a yashissiyoogaanne boriyoogaa aggidi ubba a nashshana danddayoosona.

Dabbotu zaaroy aybanne gido woy eti cayiya woy qanggiyaabaa gidikkokka, issi Kiristtaanee Xoossaa bonchissenna meezetun shaahettana koshshenna. Mala ammanuwaa yayyiyoogaappe naxa kiyida. Kiitettida PHauloosi hagaadan giis: “Nuuni ailletetti bainnan, de7ana mala, Kiristtoosi nuna ailletettaappe kessiis; simmi minnidi eqqite; naa77anttuwaa ailletettaa qambbaran geloppite.”—Gal. 5:1.

Daro asay mati hayqqida uri kase hayqqidaageetuyyo kiitaa gattees qassi gaannatees giidi ammanees.