Yihoowa Siiqo Kaaletuwaa Kaalleetii?
Yihoowa Siiqo Kaaletuwaa Kaalleetii?
“Geella oge ubbaa taani ixxais.”—MAZ. 119:128.
1, 2. (a) Issisaa gakkanau kaaletuwaa koyiyo wode, intte nashshana danddayiyo akeekissoy awugee, aybissi? (b) Yihooway baayyo oottiyaageetussi yootiyo akeekissoy awugee, aybissi?
ANE hagaa qoppite: Issisaa baanau qoppideta; shin ogiyaa erenna gishshau maaduwaa koyideta. Inttena kaalettanaadan ogiyaa eriya issi laggiyaa oycheeta. He uri ogiyaa bessiiddi, hagaadan gaana danddayees: “He ushacha baggi simmiya ogiyaara booppite. Hegan deˈiya, ogiyaa bessiya malaatay inttena balettana danddayees. Daro asati he malaataa kaalli biidi, bantta koyiyoosaa gakkibookkona.” Intte laggee immido qofaa nashshidi, a akeekissuwaa kaalleetii? Issi issi hanotan, Yihooway he laggiyaa mala. I nuuni merinaa deˈuwau kaalettiya ogiyan baanaadan loˈˈo kaaletuwaa immees; qassi he ogiyaappe wora baanaadan oottiya iitabaappe haakkanaadankka akeekissees.—Zaa. 5:32; Isi. 30:21.
2 Nuna keehippe siiqiya lagge mala gidida, Xoossaa Yihooway akeekissiyo, he iitabatuppe amaridaageeta ha huuphe yohuwaaninne kaalliyaagan beˈana. Yihooway hegaadan nuna akeekissiyoy nuussi qoppiyoonne nuna siiqiyo gishshataassa gidiyoogaa hassayite. I nuuni biyoosaa gakkanaadan, giishin merinaa deˈuwaa demmanaadan koyees. Asay iitaban xoonettidi, ogiyaappe kiyiyo wode i keehippe azzanees. (Hiz. 33:11) Ha huuphe yohuwan, bala ogiyaa kaallanaadan oottiya heezzubata beˈana. Koyroogee, asay nu bolli gattiyoobaa; naaˈˈanttoy, nu wozanaa koshshaa. Heezzanttoy qassi keehippe iita gidida, pattennabaa. Nuuni ogiyaappe wora baanaadan oottiya ha iitabati aybakko, qassi hegaa eqettanaadan saluwan deˈiya nu aaway waatidi tamaarissiyaakko erana koshshees. Geeshsha Maxaafaa xaafidaageetuppe issoy, “Geella oge ubbaa taani ixxais” yaagiis. (Mazamure 119:128) Inttessikka hegaadan siyettii? Geella oge ubbaappe waanidi haakkana danddayiyaakko ane beˈoos.
“Daro Asaa” Kaalloppite
3. (a) Nuuni awugaa ogiyaara baanaakko erennaba gidikko, daro asaa kaalliyoogee daafan yeggana danddayiyoy aybissee? (b) Kessaabaa 23:2n deˈiya keehippe koshshiya baaso siraatay awugee?
3 Haahosaa manddariyo wode, awugaa ogiyaara baanaakko erennaba gidikko waatuuteetii? Daro asay issi ogiyaara biyaaba gidikko, he asaa kaallanau koyana danddayeeta. Hegaa mala ogee daafan yeggana danddayees. He asati harasaa biyaageeta, woykko ogee bayidoogeeta gidana danddayoosona. Hegaara gayttidaagan, beni Israaˈeelatuyyo Yihooway immido higgiyaappe issuwan qonccida baaso siraataa akeekite. Pirddaara gayttidaagan ‘daro asaa kaallenna’ mala daannatanne markkattiyaageeta akeekissiis. (Kessaabaa 23:2 nabbaba.) Polo gidenna asaa naati laggiyaa sugettan pirddaa geellayana danddayiyoogee tuma. Gidikkokka, daro asaa kaallennaadan odettida baaso siraatay imettidoy pirddaara gayttidabaa xaallaassee? Mule gidenna.
4, 5. Yaasanne Kaaleeba daro asaa kaallanaadan oottiya aybi gakkidee, shin hegaa eqettanaadan eta maaddiday aybee?
4 “Daro asaa” kaallanaadan oottiyaabay nu bolli awudenne gakkana danddayees. Hegee qoppennan gakkanau, qassi eqettanau keehippe metana danddayees. Leemisuwau, issi wode Yaasunne Kaaleeba bolli gakkida laggiyaa sugettaa qoppite. Eti hara tammu asatuura Hidootaa Biittaa wochanau biidosona. Eti simmiyo wode, etaara biida tammati loˈˈo gidennanne hidootaa qanxxissiyaabaa asau yootidosona. Eti ubba he biittan deˈiyaageetuppe issoti issoti, makkalancha kiitanchatuppenne maccaasaappe yelettida, Nefiliimetu zare gidida, wogga wolqqaama asata yaagidi yootidosona. (Doo. 6:4) SHin, eti giidobay malatennaba. Nefiliimeti xeetan qoodettiya layttappe kase Bashsha Haattan xayidosona; eti naˈa yelibookkona. SHin ha tammu asati yootidobay, ammanuwan shuggida asata balettiis. He asati yootido iita qofay sohuwaara aakkidi, asay yayyanaadan oottiis. Hidoota Biittaa gelanau Yihoowa kaaletuwaa kaalliyoogee bala giidi daroti qoppiyoogaa doommidosona. He iita hanotan Yaasunne Kaaleebi ay oottidonaa?—Qoo. 13:25-33.
5 Eti daro asaa kaallibookkona. Asay siyennan ixxidaba, ubba shuchan caddidi eta woranau koyidaba gidikkokka, he naaˈˈu asati tumaa yootidosonanne a mintti oyqqidosona. Eti xalanaadan oottiday aybee? Eta ammanuwaa gidiyoogee sirissenna. Ammanoy deˈiyo asati, milatenna asa oduwaanne Xoossaa Yihooway gelido qaalaa giddon deˈiya dummatettaa metootennan akeekoosona. He naaˈˈu asati guyyeppe, Yihooway ba gelido qaalaa ubbaa polidoogan banttau siyettidabaa yootidosona. (Yaasu 14:6, 8; 23:2, 14 nabbaba.) Yaasunne Kaaleebi ammanettiya bantta Xoossaa mintti oyqqidosona; qassi ammanoy paccido daro asaa kaalliyoogan a azzanttanau mule qoppibookkona. Yaatiyo gishshau, eti minni eqqiyoogan ha wodiyan deˈiya nuuyyo loˈˈo leemiso gidoosona.—Qoo. 14:1-10.
6. Nuuni daro asaa kaallanau koyana danddayiyoy ayba ogiyaanee?
6 Daro asaa kaallanau koyi ereetii? Yihoowappe haakkida, qassi i kessido kandduwaa maaraa kaallenna asay ha wodiyan keehippe daro. Wodiyaa aattiyoobaanne allaxxiyoobaa xeelliyaagan ha daro asay darotoo tuma gidenna qofaa aassees. Televizhiiniyan, pilmiyaaninne biiduwaa kaassan beˈiyo, shori baynna kanddoy, makkalaynne iita ayyaanaa oosoy qohennabadan he asati yootana danddayoosona. (2 Xim. 3:1-5) Wodiyaa aattiyoobaanne allaxxiyoobaa inttessi woy intte soo asaassi dooriyo wode, hegee loˈˈo woy iita gidiyoogaa daro asay yootido woy oottido gishshau kuuyeetii? Hegaadaana gidikko, intte daro asaa kaalliiddi deˈeeta giyoogaa gidennee?
7, 8. (a) Nu “akeekaa abbiyaa” loohissana danddayiyoy ayba ogiyaanee, nuuni oottanabaa harati yootanaadan koyiyoogaappe hegaadan loohissiyoogee keehippe goˈˈiyoy aybissee? (b) Daro yelaga Kiristtaanetu loˈˈo leemisuwaa beˈiyoogee ufayssiyoy aybissee?
7 Kuuyanau maaddiya alˈˈo imotaa, giishin “akeekaa abbiyaa” Yihooway nuussi immiis. SHin ‘goˈettiyoogan’ he abbiyaa loohissana koshshees. (Ibr. 5:14, NW) Daro asaa kaalliyaaba woy nu oottanabaa harati yootanaadan koyiyaaba gidikko, nu akeekaa abbiyaa loohissokko. Leemisuwau, Yihoowa asay haakkana bessiyo pilmee, maxaafaynne Interneettiyaa saytee awugaakko xaafettidi imettenna. Ha alamiyaa hanotay sohuwaara laamettiyo gishshau, xaafiyaaba gidiyaakko, hegaa malabaa sohuwaara sohuwaara laammana koshshees. (1 Qor. 7:31) SHin nuuni hegaadan oottenna waanna gaasoy, hegee Geeshsha Maxaafaa baaso siraataa akeekan qoppidinne woossidi, he baaso siraataara moggiya kuushshaa kuyennaadan oottees.—Efi. 5:10.
8 Geeshsha Maxaafaa maaraadan nuuni kuuyiyoobaa asay dosennan aggana danddayiyoogee tuma. Ubba asay beˈiyoobaanne oottiyoobaa beˈanaadaaninne oottanaadan, yelaga Kiristtaaneta timirtte keettan daroti minttettana danddayoosona. (1 PHe. 4:4) Gidikkokka, daro asaa kaallanau ixxisi giida Yaasuugaanne Kaaleebaagaa mala ammanoy deˈiyo, yelaga gidin cima Kiristtaaneta beˈiyoogee ufayssiyaaba.
“Intte Ayfiyaanne Intte Wozanaa” Amuwaa Kaalloppite
9. (a) Issisaa biidi, nuuyyo loˈˈo milatida ogiyaa kaalliyoogee iita gidana danddayiyoy aybissee? (b) Qoodaabaa 15:37-39n deˈiya higgee, beni Israaˈeelatuyyo keehippe koshshiyaaba gididoy aybissee?
9 Ogiyaappe wora baanaadan oottiya, nuuni beˈana naaˈˈantto qofay nu wozanaa amuwaa. Hegaa kaalliya qofan leemisana danddayeettees: Intte issisaa baanau oge bolli deˈikko, ogiyaa malaatiya karttaa aggibayidi, intteyyo loˈˈo milatiya oge awugaaranne baanau qofaa qachiyaabadan qoppite. Intteyyo loˈˈo milatiya ogiyaara baanau koyiyoogee intte qoppido sohuwaa gakkennaadan oottiyoogee qoncce. Hegaara gayttidaagan, Yihooway beni Israaˈeelatuyyo immido hara higgiyaa akeekite. Eti bantta maayuwaa gaxaa xeeran macaraa kessanaadaaninne salo milatiya qacinaa sikkanaadan higgee imettidoy aybissakko, ha wodiyan daroti akeekokkona. (Qoodaabaa 15:37-39 nabbaba.) Ha higgee koshshidoy aybissakko akeekidetii? He higgiyaa azazettiyoogee, Xoossaa asay bantta yuushuwan deˈiya, eeqau goynniya asatuppe dumma gididi deˈanaadan maaddiis. Eti Yihoowan nashettidi deˈanau, hegaadan oottiyoogee keehippe koshshiyaaba. (Wog. 18:24, 25) SHin he higgee, merina deˈuwaa ogiyaappe nuna wora kaalettana danddayiya, iita gidida nu wozanaa amoykka qonccanaadan oottees. Waatidi?
10. Yihooway asaa wozanaa qofaa beˈana danddayiyoogaa bessidoy ayba ogiyaanee?
10 Yihooway ha higgiyaa ba asau immido gaasoy, eti bantta “aifiyaanne [bantta] wozanaa amuwaa kaallidi, [appe] wora” simmennaadaana gidiyoogaa hassayite. Yihooway asaa wozanaa qofaa beˈana danddayees. Nuuni beˈiyoobay nu wozanaa balettana danddayiyoogaa i loyttidi erees. Geeshsha Maxaafay, “Asa wozani ubbabaappe aadhdhi cimmiyaabaanne keehi daro iita. A ooni eranau danddayii?” yaagidi akeekissiyoy hegaassa. (Erm. 17:9) Yihooway Israaˈeelatuyyo yootido akeekissoy bessiyaaba gidiyoogaa akeekidetii? Eti bantta yuushuwan deˈiya, eeqau goynniya asati oottiyoobaa beˈanau koyana danddayiyoogaa, qassi hegee eta balettana danddayiyoogaa i loytti erees. Eti he asatu mala gidanau, etaagaadan qoppanaunne oottanau koyana danddayoosona.—Lee. 13:20.
11. Nu ayfee beˈiyoobay nuna balettana danddayiyoy ayba ogiyaanee?
11 Ha wodiyankka, nuuni beˈiyoobay cimiya nu wozanaa sohuwaara balettana danddayees. Nuuni asatettaa amuwaa denttettiya alamiyan deˈoos. Yaatin, Qoodaabaa 15:39n deˈiya baaso siraataa waatidi oosuwan peeshshana danddayiyoo? Ane hagaa qoppite: Inttenaara tamaariya, oottiya woy intte heeran deˈiya asati harata asho gaytotettau denttettiya ogiyan maayiyaaba gidikko, inttekka hegaadan maayana koyeetii? ‘Intte wozanaanne ayfiyaa’ amuwaa kaallanau koyeetii, qassi beˈidoban cimetteetii? Qassi, etaagaadan maayiyoogan intte kaalliyo maaraa xaasayi xeellanau koyeetii?—Roo. 12:1, 2.
12, 13. (a) Nu ayfee iitabaa beˈanau amottikko, ay oottana koshshii? (b) Nuuni harata paacciyaabaa oottennaadan aybi maaddii?
12 Nu huuphiyaa naagiyoogee keehippe koshshees. Nu ayfee iitabaa beˈanau amottikko, ammanettida Iyyoobi ba ayfiyaara maacettido maachaa, giishshin ba macheeppe attin hara maccaasaa dumma ayfiyan xeellennaadan murttido murttiyaa hassayana koshshees. (Iyy. 31:1) Hegaadankka, Kawuwaa Daawiti, “Taani ta aifiyan pokkobaa xeellikke” yaagidi murttiis. (Maz. 101:3) Nu loˈˈo zoriyaa wozanaanne Yihoowaara deˈiya nu dabbotaa moorana danddayiya aybinne ‘pokkoba.’ Hegee, nagara gididabaa oottanau nu ayfee amottanaadaaninne nu wozanay balanaadan oottiya ubba paaciyaa gujjees.
13 Hara baggaara, harati nagaraa oottanau paacettanaadan oottiya “pokkobaa” oottanau mule koyokko. Yaatiyo gishshau, bessiya maayuwaa kiphatan maayanaadan Geeshsha Maxaafay yootiyo zoriyaa xoqqu oottidi xeelloos. (1 Xim. 2:9) Kiphata giyoogee nuna ufayssiya ogiyan maayiyoogaa giyoogaa gidenna. Nuuni koyiyoobaa xallaa gidennan harata ufayssiyaabaakka kaseyiyoogan, eta zoriya wozanaanne etau siyettiyaabaa qoppana koshshees. (Roo. 15:1, 2) Hegaara gayttidaagan loˈˈo leemiso gidiya daro shaˈan qoodettiya yelagati deˈiyoogee Kiristtaane gubaaˈiyau gita anjjo. Eti oottiyo ubbaban, giishin maayuwaa maayiyo ogiyankka, ‘bantta wozanaanne bantta ayfiyaa’ amuwaa gidennan, Yihoowa ufayssiyaabaa dooriyoogee keehippe ufayssiyaaba!
“Pattennabaa” Kaalloppite
14. “Pattennabaa” kaalliyoogaa xeelliyaagan Sameeli woygi akeekissidee?
14 Intte biyo ogee, issi gita bazzuwaa kanttidi baanaadan oottiyaabadan qoppite. Haahuwan intte haatta beˈidabadan qoppidi, ogiyaa aggidi he sohuwaa biikko aybi hananee? Hegee intte shemppo miyaaba gidana danddayees. Hegaara issi mala hanotan, pattennabaa kaalliyoogee daafaabaa kaalettiyoogaa Yihooway loyttidi erees. Issi leemisuwaa qoppite. Israaˈeelati bantta yuushuwan deˈiya kawotettatuugaadan banttana haariya kawo koyidosona. He koshshay, Yihooway bantta Kawo gidiyoogaa eti koyennaagaa bessiyaaba gidiyo gishshau, hegee gita nagara. Eta haariya asi deˈanaadan Yihooway paqqadidaba gidikkokka, “pattennabaa” kaalliyoogee kaalettiyoobaa hananabaa yootiya Sameela baggaara akeekissiis.— 1 Sameela 12:21 nabbaba.
15. Israaˈeelati pattennabaa kaallidoy ayba ogiyaanee?
15 Israaˈeelati Yihoowa haaruwaappe asa haaroy aadhidi ammanettiyaabadan qoppennan aggokkona. Hegaadaana gidikko, eti tumuppe pattennabaa kaallidosona. Qassi Seexaanay yootiyo, pattennaba gidida darobaa kaalliyo daafan geloosona. Eta haariya asi eti eeqau goynnanaadan oottana danddayees. Eeqau goynniyoogee, mittaappenne shuchaappe merettida he eeqay, ubbabaa medhida, ayfiyan beettenna Xoossaa Yihoowappe aaruwan ammanttiyaaba giidi eti balan qoppanaadan oottees. SHin kiitettida PHauloosi yootidoogaadan, eeqay ‘aybanne gidenna.’ (1 Qor. 8:4) Eeqay beˈana, siyana, haasayananne oottana danddayenna. Intte eeqaa beˈanaunne bochanau danddayiyaaba gidikkokka, au goynniyoogee, tummuppe bashshaa kaalettiya, pattennabaa kaalliyoogaa.—Maz. 115:4-8.
16. (a) Seexaanay ha wodiyan daroti pattennabaa kaallanaadan oottiyoy ayba ogiyaanee? (b) Xoossaa Yihoowaara geeddarssiyo wode, aquwaabay pattennaba giyoy aybissee?
16 Asay ha wodiyankka pattennabaa kaallanaadan Seexaanay hiillan balettees. Leemisuwau, woppaa demmanau aquwaaban ammanettanaadan oottiyoogan i daro asaa balettees. Miishshay, aqoynne daro damoozaa demissiya oosoy keehippe goˈˈiyaaba milatana danddayees. Harggiyo wode, ikkonoomiyaa hanotay iiti iiti biyo wode woy meretay gattiyo daafay denddiyo wode aquwaabay ashshana danddayii? Asay deˈuwaa halchuwaa, kaaletuwaanne deˈuwaa xeelliyaagan oychiyo oyshau zaaruwaa koyiyoogan hidootaa qanxxiyo wode, aquwaabay ay maaddii? Issi uri hayqqana haniyo wode hegee ay maaddana danddayii? Ayyaanaaban koshshiyaabaa kunttanau, nuuni aquwaaban ammanettiyaaba gidikko, hidootaa qanxxana danddayoos. Aquwaabay ashshana danddayenna; hegee pattennaba. Miishshaynne aqoy, baree aduqqanaadan woy harggiyaappenne hayquwaappe attanaadan mule oottana danddayenna gishshau, asatetta woppaakka demissana danddayenna. (Lee. 23:4, 5) SHin nu Xoossaa Yihooway keehippe ammanttiyaagaa! Nuuni tumu woppaa demmana danddayiyoy, aara mino dabbotaa medhiyoogaa xallaana. Hegee ayba gita anjjoo! Pattennabaa kaalliyoogan Yihoowa mule aggokko.
17. Nuuni tobbido iitabata xeelliyaagan intte murttee aybee?
17 Yihooway nuuyyo lagge malanne deˈuwaa ogiyan Kaalettiyaagaa gidiyoogee gita anjjo gidennee? Heezzu iitabata, giishin daro asaa, nu wozanaanne nu ayfiyaa amuwaa, qassi pattennabaa kaallennaadan Yihooway siiquwan akeekissiyoobaa ubbatoo oosuwan peeshshiyaaba gidikko, nuuni biyoosaa gakkana, giishin merina deˈuwaa demmana danddayoos. Kaalliya huuphe yohuwan, wora baanaadan oottiya geella ogiyaa ixxanaadaaninne appe haakkanaadan Yihooway yootiyo heezzu akeekissuwaa beˈana.—Maz. 119:128.
Ne Qofay Aybee?
Kaallidi deˈiya xiqisetun qonccida baaso siraataa waatada oosuwan peeshshana danddayay?
[Oyshata]
[Sinttaa 11n deʼiya misiliyaa qonccissuwaa]
Daro asaa kaallanau paacetta eray?
[Sinttaa 13n deʼiya misiliyaa qonccissuwaa]
Nu ayfiyaanne wozanaa amuwaa kaalliyoogee iita gididoy aybissee?
[Sinttaa 14n deʼiya misiliyaa qonccissuwaa]
Neeni pattennabaa kaallaydda deˈay?
