Masiyaara Gayttidosona!

“Nuuni Masiyaara gaittida.”—YOH. 1:41.

1. Inddiraasi, “Nuuni Masiyaara gaittida” yaagidoy aybissee?

XAMMAQIYA YOHAANNISI ba erissiyo ashkkaratuppe naaˈˈatuura deˈiiddi, Yesuusi yiyaagaa beˈidi, “Xoossaa dorssai hageeho!” yaagiis. Inddiraasinne hara erissiyo ashkkaray sohuwaara Yesuusa kaallidi, he galla aara peˈidosona. Guyyeppe Inddiraasi ba ishaa Simoon PHeexiroosa demmidi, ufayttiiddi, “Nuuni Masiyaara gaittida” giidi a Yesuusakko ekkidi biis.—Yoh. 1:35-41.

2. Masiyaara gayttida hara hiraagatakka pilggiyoogan nuuni ayba goˈˈaa demmiyoo?

² Takkidi, Inddiraasi, PHeexiroosinne harati Geeshsha Maxaafaappe loytti akeekidi, Naazireete Yesuusi qaala gelido Mase gidiyoogaa sirennan yootana danddayoosona. Masiyaara gayttida hiraagata ubbatoo pilggiyoogee, Xoossaa qaalaanne i Tiyidoogaa nuuni mintti ammananaadan maaddees.

‘Beˈa, Ne Kawoy Yees’

3. Yesuusi bonchuwan Yerusalaame gelido wode polettida hiraagati awugeetee?

³Masee bonchuwan Yerusalaame gelana. Zakkaariyaasi hananabaa kaallidi deˈiyaagaadan yootiis: “Nenoo Xiyoone katamau, ufaitta! Nenoo Yerusalaame katamau, ilila! Be7a, xoonida ne xillo kawoi neekko yees. Ne kawoi ashkke gididi, hariyaa bolli, hare maraa bolli uttidi, neekko yees.” (Zak. 9:9) Mazamuraaweekka, “GODAA sunttan yiya asi anjjettidaagaa gido!” yaagidi xaafiis. (Maz. 118:26) Asay hegaadan oottanaadan denttettiday Yesuusa gidenna. SHin, he cora asay keehippe ufayttiiddi hegaadan oottidoogan hiraagay polettiis. Intte he taarikiyaa nabbabiyo wode, he hanotaa beˈiyaabadaaninne ufayttidi hombbociya asaa cenggurssa siyiyaabadan qoppite.— Maatiyoosa 21:4-9 nabbaba.

4. Mazamure 118:22, 23y polettidoy ayba ogiyaanakko qonccissa.

⁴Yesuusi Mase gidiyoogaa daroti ammanibeennaba gidikkokka, Xoossaa matan i alˈˈo. Naqaashan ammananau koyennaageeti, kasetidi odettidaagaadan Yesuusa ‘ixxidosonanne bonchibookkona.’ (Isi. 53:3; Mar. 9:12) SHin Xoossay ba ayyaanan denttettin, mazamuraawee kaallidi deˈiyaagaadan xaafiis: “Gimbbiyaageeti karidi ixxido shuchchai, godaa xaphuwaa minttiya ubbaappe aadhdhiya shuchcha  gidiis. Hagee GODAI oottidobaa.” (Maz. 118:22, 23) Yesuusi bana ixxiya, haymaanootiyaa kaalettiyaageeti, ha xiqisiyaa hassayanaadan yootiis; PHeexiroosi qassi, hegee Kiristtoosa bolla polettidoogaa yootiis. (Mar. 12:10, 11; Oos. 4:8-11) Yesuusi Kiristtaane gubaaˈiyau ‘godaa xaphuwaa minttiya shuchcha gidiis.’ Xoossaa dosenna asay a ixxidaba gidikkokka, “Xoossaa matan i doorettida al77o.”—1 PHe. 2:4-6.

Issoy A Kaddiis; Harati A Aggi Bayidosona!

5, 6. Masiyaa kaddiyoogaara gayttidaagan kaseti odettidabaynne polettidabay aybee?

⁵Laggetuppe issoy iita gididi Masiyaa kaddanaagee kasetidi odettiis. Daawiti kasetidi, “Taani ammanettiyo ta siiqo laggee, ta qumaa tanaara miidaagee ba ginddiyaa ta bolli denttiis” yaagiis. (Maz. 41:9) Qumaa issippe miya asata asay laggedan xeellees. (Doo. 31:54) SHin Asqqorootu Yihuday Yesuusa kaddiyoogan keehi iitabaa oottiis. Yesuusi bana kaddiya uraabaa ba kiittidoogeetuyyo, “Taani intte ubbaabaa haasayikke. Taani dooridoogeeta erais; shin Xoossaa maxaafai, ‘Taani barssidoogee ta kushiyaa saxxiis’ giidoogee tuma gidanau bessees” yaagido wode, Daawita hiraagay polettidoogaa eta hassayissiis.—Yoh. 13:18.

⁶Kaddidaagee Masiyaa 30 biran bayzzana; hegee issi aylliyaa bayzziyo waaga. Zakkaariyaasa 11:12, 13n odettidaagaadan Yesuusa kaddidaagee hegaa keena hirayso waagan a bayzzidoogaa Maatiyoosi yootiis. SHin Maatiyoosi hagaa “hananabaa yootiya Ermmaasi” odidobadan qonccissidoy aybissee? Maatiyoosa wode, Zakkaariyaasa maxaafaa gujjin Geeshsha Maxaafaa xuufeta issippe shiishshidoogan Ermmaasa maxaafay koyro gidennan aggenna. (Luqaasa 24:44⁠ra gatta xeella.) Yihuday he miishshaa beeta maqidasiyan oli bayidi, biidi suletti hayqqido gishshau, he biran goˈettibeenna.—Maa. 26:14-16; 27:3-10.

7. Zakkaariyaasa 13:7y waani polettidee?

⁷Masee erissiyo ashkkaratikka a aggi bayidi baqatana. Zakkaariyaasi, “Dorssati laalettanaadan, dorssaa heemmiyaagaa wora” yaagidi xaafiis. (Zak. 13:7) Niisaana 14, 33 M.Ln, Yesuusi ba erissiyo ashkkaratuyyo, “Hachchi qammi intte ubbai tana yeggi bayidi baqatana; aissi giikko, Xoossaa maxaafai, ‘Xoossai dorssaa heemmiyaagaa worana; worin dorssaa wudee laalettana’ yaagees” yaagiis. “Erissiyo ashkkarati he wode ubbati [Yesuusa] yeggi bayidi” baqatidoogaa Maatiyoosi yootido gishshau, hegee giidoogaadankka polettiis.—Maa. 26:31, 56.

Asay A Mootananne SHocana

8. Isiyaasa 53:8y polettidoy ayba ogiyaanee?

⁸Asay Masiyaa shilootan essidi a bolli pirddiis. (Isiyaasa 53:8 nabbaba.) Niisaana 14n maallado Sanihediriine yaaˈay shiiqidi, Yesuusa kushiyaa qachidi, Rooma asa gidida,  biittaa haariya PHenxxeniyaa PHilaaxoosakko efiidosona. PHilaaxoosi Yesuusa qori oychidi, ayba balanne demmibeenna. PHilaaxoosi Yesuusa birshshanau koyidi oychin, asay, “A kaqqa” yaagidi, iita bitanee Barbbaani birshshettanaadan yootidosona. PHilaaxoosi asaa ufayssanau koyidi, Barbbaana birshshiis; qassi Yesuusa garafidi, kaqqanau etau aattidi immiis.—Mar. 15:1-15.

9. Mazamure 35:11n kasetidi odettidaagaadan Yesuusa wode aybi hanidee?

⁹Worddo markkati Masiyaa bolli markkattana. Mazamuraawiyaa Daawiti, “Wordduwaa markkattiyaageeti ta bolli denddoosona. Taani erennaban tana mootoosona” yaagiis. (Maz. 35:11) Hiraagan odettidaagaadan, “qeese halaqatinne yaa7aa asai ubbai Yesuusa woranau a bolli worddo markka demmanau koyidosona.” (Maa. 26:59) “Daro asati a bolli wordduwaa markkattidosona; shin eta markkatettai issi mala gidenna.” (Mar. 14:56) Yesuusa morkketi koyidoy Yesuusi hayqqanaadan gidiyo gishshau, asay wordduwaa markkattiyoogee etau aynne milatibeenna.

10. Isiyaasa 53:7y waani polettidaakko qonccissa.

¹⁰Masee bana mootiyaageetu sinttan coˈˈu gaana. Isiyaasi, “I un77etiisinne qohettiis; shin ba doonaa pogibeenna. SHukkanau efiyo dorssaadan laagettiis; ba ikisiyaa meediyaageetu sinttan co77u giya dorssa maraadan, ikka ba doonaa pogibeenna” yaagidi hananabaa yootiis. (Isi. 53:7) Yesuusi, “qeese halaqatinne dere cimati a mootin, etau ainne zaaro immibeenna.” He wode PHilaaxoosi, “Hageeti nena mootiyoobaa ubbaa siyikkii?” yaagidi oychiis. SHin Yesuusi, “harai atto, issi qaalakka zaarennan ixxin, deriyaa haariyaagee daro garamettiis.” (Maa. 27:12-14) Yesuusi bana mootiyaageetuyyo iitabaa zaaribeenna.—Roo. 12:17-21; 1 PHe. 2:23.

11. Isiyaasa 50:6⁠ynne Mikiyaasa 5:1y waani polettidee?

¹¹Asay Masiyaa shocanaagaa Isiyaasi kasetidi yootiis. Isiyaasi, “Taani ta zokkuwaa shociyaageetussi, ta gacuwaakka buuchchaa shoddiyaageetussi aattada immaas. Ta som77uwaa kaushshaappenne cuchchaa cushettiyoosaappe genttabeikke” yaagidi xaafiis. (Isi. 50:6) Mikiyaasi, “Israa7eela kaalettiyaagaa gappataa gatiman shocanau hanoosona” yaagidi hiraagaa yootiis. (Mik. 5:1) Ha hiraagati Yesuusaara gayttidaagan polettidoogaa, Wonggeliyaa xaafee Marqqoosi kaallidi deˈiyaagaadan giis: “Etappe issooti issooti a bolli cushettaa doommidosona; a aifiyaa goozidi dechchidi, ‘Nena dechchidai oonee? Ane hananabaa yoota!’ yaagidosona; qassi naagiyaageetikka a qinxxalliyaa baqqiiddi ekki efiidosona.” Marqqoosi, wotaaddarati kaallidi deˈiyaagaadan oottidoogaakka yootiis: “A huuphiyaa shombboqo gatiman shocidosona; qassi a bolli cuchchidosona; gulbbatidi [qilliicciyoogan] ayyo goinnidosona.” (Mar. 14:65; 15:19) Asay hegaa malabaa a bolli oottanaadan denttettiya ay mooronne Yesuusi oottibeenna.

Hayqqana Gakkanaashin Ammanettiis

12. Mazamure 22:16⁠ynne Isiyaasa 53:12y Yesuusa bolli waani polettidee?

¹²Masee kaqettiyo hanotay kasetidi odettiis. Daawiti, “Iita asati cora kanatudan tana yuuyi aadhdhidi teqqoosona. Ta kushetanne ta tohota caddoosona” yaagiis. (Maz. 22:16) Wonggeliyaa xaafee Marqqoosi, Geeshsha Maxaafaa nabbabiyaageeti loytti eriyo hanotaa, “A kaqqiyo wode, maallado heezzu saate” yaagidi yootiis. (Mar. 15:25) Masee nagaranchatuura qoodettanaageekka kasetidi odettiis. Isiyaasi, “I ba shemppuwaa haiquwau aattidi immiis; yaatidi mooranchchatuura paidettiis” yaagidi xaafiis. (Isi. 53:12) “Naa77u panggata issuwaa appe ushachcha baggaara, qassi issuwaa appe haddirssa baggaara” kaqqido wode, ha hiraagay polettiis.—Maa. 27:38.

13. Mazamure 22:7, 8y Yesuusa bolli polettidoy ayba ogiyaanee?

¹³Asay Masiyaa toochanaagaa Daawiti kasetidi  yootiis. (Mazamure 22:7, 8 nabbaba.) Yesuusi mittan kaqettidi waayettiyo wode asay a qilliiccidoogaa Maatiyoosi kaallidi deˈiyaagaadan yootiis: “Ogiyaara aadhdhiya asai Yesuusa karidi, ba huuphiyaa qaattiiddi cayiis. ‘Beeta Maqidasiyaa qolada heezzu gallassa giddon keexxiyaagoo, ne huuphiyaa ashsha; neeni Xoossaa Na7a gidikko, ane masqqaliyaa bollappe wodhdha’ yaagiis.” Hegaadankka, qeese halaqati higgiyaa tamaarissiyaageetinne cimati, qilliiccidi hagaadan yaagidosona: “Harata ashshiis; shin bana ashshanau danddayenna. I Israa7eela kawo; ane masqqaliyaa bollappe ha77i wodhdho; nuunikka qassi a ammanana. Xoossan i ammanettees; Xoossai a ashshana koyikko ane ashsho; aissi giikko, i bana, ‘Taani Xoossaa Na7aa’ gees.” (Maa. 27:39-43) SHin Yesuusi hegaa ubbaa danddayidi, aynne iitaba zaaribeenna. I nuuyyo ayba loˈˈo leemisoo!

14, 15. Masiyaa maayuwaaranne ayyo caala woyne eessaa immiyoogaara gayttidaagan odettida hiraagati waani polettidaakko qonccissa.

¹⁴Asay Masiyaa maayuwan saamaa yeggana. Mazamuraawee, “Ta maayuwaa shaakki ekkoosona; ta adussa maayuwan saamaa yeggoosona” yaagidi xaafiis. (Maz. 22:18) Rooma wotaaddarati “[Yesuusa] kaqqidoogaappe guyyiyan, a afalaa shaakkidi, saamaa yeggidi” ekkido wode hegee polettiis.—Maa. 27:35; Yohaannisa 19:23, 24 nabbaba.

¹⁵Asay Masiyau caala woyne eessaanne ciyyiyaa immana. Mazamuraawee, “Taani namisettido wode, taayyo cammiya qumaa aattidosona. Taani saamettido wode, taayyo caala woine eessaa immidosona” yaagiis. (Maz. 69:21) Maatiyoosi kaallidi deˈiyaagaadan giido wode he hiraagay polettiis: “Eti ciyyee walahettido woine eessaa Yesuusayyo uyanau immidosona; immin i hegaa ganxxi xeellidi, uyennan ixxiis.” Guyyeppe, “etappe issoi woxxidi, gombbilla mala ispponjjiyaa ekkidi, caala woine eessaa kunttiis; hegaa shombboqo gatimaa xeeran wottidi, ushshanau a doonaakko shiishshiis.”—Maa. 27:34, 48.

16. Mazamure 22:1n deˈiya hiraagay waani polettidaakko qonccissa.

¹⁶Xoossay Masiyaa aggi bayidaba milatana. (Mazamure 22:1 nabbaba.) Hiraagan odettidaagaadan, “uddufun saatiyan Yesuusi ba qaalaa xoqqu oottidi, ‘Elohee, Elohee, laamaa sabaqitaanii?’ yaagiis. Hegaa giyoogee, ‘Ta Xoossau, ta Xoossau, tana aissi aggadii?’ giyoogaa.” (Mar. 15:34) Yesuusi hegaadan giidoy, saluwan deˈiya ba Aawan ammanettiyoogaa aggido gishshataassa gidenna. Kiristtoosi Xoossaayyo ubba wode ammanettidaagaa gidiyoogee erettanaadan, Xoossay Yesuusa a  morkketu kushiyaappe ashshibeenna. Yesuusi ba cenggurssa xoqqu oottidi, “Ta Xoossau, ta Xoossau, tana aissi aggadii?” giido wode, Mazamure 22:1y polettiis.

17. Zakkaariyaasa 12:10⁠ynne Mazamure 34:20y waani polettidee?

¹⁷Asay Masiyaa caddana; shin a meqettaappe issoynne meqqenna. Yerusalaamen deˈiya asay “bantta caddidoogaa” beˈana. (Zak. 12:10) Mazamure 34:20y, “GODAI a mintti naagiyo gishshau a meqettaappe issoinne meqqenna” yaagees. Hegaara moggiya ogiyan, kiitettida Yohaannisi kaallidi deˈiyaagaadan xaafiis: “Wotaaddaratuppe issoi a [Yesuusa] miyyiyaa tooran caddiis; caddin sohuwaarakka suuttainne haattai goggi bayiis. Intte ammanana mala, hagaa be7idaagee [Yohaannisi] markkattiis; i markkattiyoogeekka tumaa; . . . Hegee hanidoogee Xoossaa maxaafai, ‘A meqettatuppe issoinne meqqenna’ giidoogee polettanaassa. Qassikka Xoossaa maxaafai harai, ‘Asai ba caddidoogaa be7ana’ yaagees.”—Yoh. 19:33-37.

18. Yesuusi duretu duufuwan moogettidoy ayba ogiyaanee?

¹⁸Masee dure asaa duufuwan moogettana. (Isiyaasa 53:5, 8, 9 nabbaba.) Niisaana 14n, omarssa heeran Armmaatiyaasa katamaa asa gidida, “Yooseefa giyo issi dure bitanee” Yesuusa ahaa oychin, PHilaaxoosi ayyo immiis. Maatiyoosi gujjidikka hagaadan giis: “[Yooseefi] Yesuusa ahaa ekkidi, geeshsha moogo afalan xaaxiis. Xaaxidi baayyo moogettanau shuchchaa woocido ooratta gonggoluwaa giddon a ahaa wottiis; qassi he gonggoluwaa doonan gita shuchchaa gonddorssi wottidi, aggi bayidi biis.”—Maa. 27:57-60.

Mase Kawuwaa Sabbite!

19. Mazamure 16:10n deˈiya hiraagay waani polettidee?

¹⁹Masee hayquwaappe denddana. Daawiti, “[Yihoowau] neeni tana Si7ooliyan aggakka” yaagidi xaafiis. (Maz. 16:10, NW) Yesuusi moogettidosaa biida naaˈˈu maccaasati ay keena garamettidaakko qoppite. Eti yan issi kiitanchaara gayttin, i etau hagaadan giis: “Dagammoppite. Masqqaliyaa bolli misimaariyan xishidi kaqqido Naazireeta Yesuusa intte koyeeta. I hagan baawa; denddiichchiis. Eti a wottidosaa hagaa be7ite.” (Mar. 16:6) PHenxxaqosxxe gallassi 33 M.Ln, kiitettida PHeexiroosi Yerusalaamen shiiqida asau, “[Daawiti] Kiristtoosa dendduwaa sinttau xeellidi, ‘A shemppoi Si7ooliyan attibeenna; a bollaikka musibeenna’ giidi yootiis” yaagiis. (Oos. 2:29-31) Xoossay ba siiqo Naˈaa bollay musanaadan aggiigibeenna. Ubba Yihooway maalaaliya ogiyan ayyaana bollaa immidi Yesuusa denttiis!—1 PHe. 3:18.

20. Masiyaa haaruwaa xeelliyaagan kasetidi odettida hiraagay polettidoy ayba ogiyaanee?

²⁰Kasetidi odettidaagaadan, Xoossay, Yesuusi ba Naˈaa gidiyoogaa yootiis. (Mazamure 2:7; Maatiyoosa 3:17 nabbaba.) Asay Yesuusanne a Kawotettaa xoqqu xoqqu oottiis; nuunikka abaanne a loˈˈo haaruwaabaa haratuyyo ufayssan yootoos. (Mar. 11:7-10) Kiristtoosi matan ‘tumatettaa, ashkketettaanne xillotettaa gishshaa piriixiyo’ wode, ba morkketa ubbaa xayssana. (Maz. 2:8, 9; 45:1-6) A kawotettay kumetta saˈan sarotettaynne ishaloy deˈanaadan oottana. (Maz. 72:1, 3, 12, 16; Isi. 9:6, 7) Nuuni Yihoowa Markka gidiyoogaadan, a alˈˈo Naˈay Mase Kawo gididi saluwan haariiddi deˈiyoogaa awaajjiyoogee ayba gita maatee!

Woygada Zaaruutii?

• Issoy Yesuusa kaddidoy, qassi harati aggi bayidoy ayba ogiyaanee?

• Yesuusi kaqettiyoogaara gayttidaagan kasetidi odettida issi issi hiraagati awugeetee?

• Yesuusi qaala gelido Masiyaa gidiyoogaa neeni ammaniyoy aybissee?

[Oyshata]

[Sinttaa 15n deʼiya misiliyaa qonccissuwaa]

Yesuusi bonchuwan Yerusalaame gelidoogan polettida hiraagay awugee?

[Sinttaa 17n deʼiya misiliyaa qonccissuwaa]

Yesuusi nu nagaraa gishshau hayqqiis; shin haˈˈi i Mase Kawo gididi haariiddi deˈees