Aqo Oyqqiyoogaunne Oyqqennan Deˈiyoogau Aadhida Eratetta Zoriyaa

“Taani hegaa, . . . qofay laalettennan ubbatoo Godaayyo intte oottanaadan denttettanaassi gays.”—1 QOR. 7:35, NW.

1, 2. Aqo oyqqiyoogaanne ekkennan woy gelennan deˈiyoogaa xeelliyaagan Geeshsha Maxaafay zoriyo zoriyaa issi uri pilggana koshshiyoy aybissee?

MATTUMAN nuuppe dummatiya uraara deˈiya gaytotettaa keena, deˈuwan keehi ufayssiya, yiilloyiya woy hirggissiya harabay guutta. Hegaa mala hanotan danddayana koshshiyo gishshau, nuuni Xoossaa kaaletuwaa koyoos; shin hegaadan oottanau denttettiya harabaykka deˈees. Aqo oyqqennan ufayttidi deˈiya issi Kiristtaanee a soo asay woykko a laggeti aqo oyqqanaadan a denttettiyaabadan qoppana danddayees. Haray qassi aqo oyqqanau koyiyaaba gidikkokka, giiga aqo lagge demmibeennaagaa gidana danddayees. Azina woy macho gidiyo aawatettau giigettanau issotu issotuyyo kaaletoy koshshees. Aqo oyqqidaageeta gidin oyqqibeenaageeta gidin, Kiristtaaneta kandduwaa geeshshatettaara gayttidaagan paacee gakkees.

² Ha allaallee nuuni ufayttanaadan woy ufayttennaadan oottiyoogaa xalla gidennan, Xoossaa Yihoowaara deˈiya nu dabbotaakka minttees woy moorees. PHauloosi Qoronttoosa Kiristtaanetuyyo xaafido koyro dabddaabbiyaa, 7tta shemppuwan, aqo oyqqiyooggaanne oyqqennan deˈiyoogaa xeelliyaagan zoriyaa immiis. A halchoy a dabddaabbiyaa nabbabiyaageeti ‘qofay laalettennan ubbatoo Godaayyo oottanaadan denttettanaassa.’ (1 Qor. 7:35, NW) PHauloosi ha keehippe koshshiya allaalliyaa xeelliyaagan zorido zoriyaa intte qoppiyo wode, aqo oyqqidaba gidin oyqqibeennaba gidin, intte hanotaa Yihoowayyo loytti oottanau maaddiyaabadan xeellanau malite.

Buzo Kuuyiyo Keehippe Koshshiyaabaa

3, 4. (a) Asay aqo oyqqibeenna laggiyaabaa woy dabbuwaabaa keehippe qoppiyo wode, issi issitoo metoy merettiyoy ayba ogiyaanee? (b) Issi uri aqo deˈuwaa bessiyaagaadan xeellanaadan PHauloosa zoree waatidi maaddana koshshii?

³ Koyro xeetu layttan deˈida Ayhudatuugaadan, ha wodiyan deˈiya daro wogatun asay aqo oyqqiyoogaa keehippe koshshiyaabadan xeellees. Issi yelagay woy yelagiyaa ekkennan woy gelennan takkikko, etau qoppiya dabbotinne laggeti eta zoranau koyana danddayoosona. Eti, i woy a aqo lagge mintti koyanaadan, qassi oona ekkin woy gelin loˈˈokko yootana danddayoosona. Ubba aqo oyqqibeenna naaˈˈu asati gayttanaadan hanotaa giigissana danddayoosona. Hegaadan oottiyoogee issi issitoo yeellayees, laggetettaa moorees, qassi qohees.

⁴ Harati ekkennan woy gelennan deˈanaadan woykko aqo oyqqanaadan PHauloosi mule denttettibeenna. (1 Qor. 7:7) I macho ekkennan Yihoowayyo oottiyoogan ufayttidi deˈiis; shin aqo oyqqanau haratuyyo deˈiya maataa bonchiis. Ha wodiyan deˈiya Kiristtaanetussikka, ekkennan woy gelennan deˈanau woykko aqo oyqqanau kuuyiyo maatay deˈees. Awugaa dooranaakko harati eta denttettana koshshenna.

Ekkennan Woy Gelennan Deˈiyo Injje Wodiyaa

5, 6. PHauloosi ekkennan woy gelennan deˈanaadan minttettidoy aybissee?

⁵ PHauloosi ekkennan woy gelennan deˈiyoogaa loˈˈo ogiyan xeelliyoogaa Qoronttoosa Kiristtaanetuyyo yootidoogee akeekana koshshiyaaba. (1 Qoronttoosa 7:8 nabbaba.) PHauloosi ekkibeennaba gidikkokka, Kiristtaane giyo  haymaanootiyan deˈiya ekkenna qeesetuugaadan ekkidaageetuppe bana xoqqu oottibeenna. Hegaappe, PHauloosi ekkennan woy gelennan mishiraachuwaa sabbakiya daroti demmiyo goˈˈaa qonccissiis. Eti demmiyo goˈˈay aybee?

⁶ Aqo oyqqibeenna issi Kiristtaanee, aqo oyqqida uri oottana danddayennabaa Yihoowa oosuwan oottanau darotoo ba hanotaa giigissana danddayees. PHauloosi “Aihuda gidenna asaayyo Yesuusi kiittidoogaa” gidiyo dumma aawatettaa ekkiis. (Roo. 11:13) Oosuwaa shemppo 13ppe 20 gakkanaashin nabbabidi, PHauloosinne misoonaawe gididi aara oottiyaageeti issisaappe harasaa biidi ooratta moottan sabbakidoogaanne gubaaˈiyaa essidoogaa akeekite. PHauloosi haggaaziyo wode, ha wodiyan amaridaageeta gakkiya daro metuwaa genccidi aattiis. (2 Qor. 11:23-27, 32, 33) SHin erissiyo ashkkara gidanaadan darota maaddiyoogan demmiyo ufayssay, i he metuwan genccanaadan oottiis. (1 Tas. 1:2-7, 9; 2:19) PHauloosi ekkidaba woykko ayyo so asay deˈiyaaba gidiyaakko i oottido ubbabaa polana danddayii? Waayi danddayana.

7. Kawotettaara gayttidabaa oottanau bantta hanotaa goˈettida, gelibeenna Kiristtaanetu leemisuwaa yoota.

⁷ Aqo oyqqibeenna daro Kiristtaaneti Kawotettaara gayttidaban darobaa oottanau bantta hanotaa goˈettoosona. Boliiviyaa biittan deˈiya, gelibeenna aqinye gidida, Saaranne Limbbaana asay daro layttau mishiraachuwaa siyi erenna heeran deˈanau biidosona. Korinttee baynnaagee meto gidanee? Eti hagaadan giidosona: “Yan eraadoonee woy televizhiinee baynna gishshau, asay wodiyaa aattiyo waannabaappe, giishin nabbabiyoogaappe eta qofaa laaliyaabi baawa.” Yan deˈiya asatuppe issoti issoti nabbabiiddi deˈiyo Yihoowa Markkatu xuufiyaa he aqinyeta bessidosona; shin he xuufeti attamettiyoogee attoosappe keehi gamˈˈiis. He michoti ubba keettan koshshay deˈiyo asaa demmoosona gaana danddayettees; yaatiyo gishshau, mishiraachuwaa he moottan deˈiya ubba keettaa gattanau metootidosona. Issi cima maccaasiyaa etau, “Yihoowa Markkati haˈˈi nunaara gayttido gishshau, wurssettay matattidaba milatees” yaagaasu. He moottan deˈiya issoti issoti sohuwaara shiiquwan beettiyoogaa doommidosona.

8, 9. (a) Ekkennan woy gelennan deˈiyoogee loˈˈo gidiyoogaa yootido wode, PHauloosi qoppidobay aybee? (b) Ekkibeenna woy gelibeenna Kiristtaaneti demmiyo goˈˈay aybee?

⁸ Aqo oyqqida Kiristtaanetikka metiya moottan mishiraachuwaa yootiyo wode loˈˈo ayfe demmoosona. SHin ekkibeenna woy gelibeenna aqinyeti oottiyo issi issi oosoy aqo oyqqidaageetuyyo woy naati deˈiyoogeetuyyo metana danddayees. Issi uri ba gubaaˈiyan mishiraachuwaa aassanau danddayiyo  hanotaabaa PHauloosi qoppiis. I ubbaykka baagaadan ufayttanaadan koyiis. Yaatiyo gishshau, i issi uri ekkennan woy gelennan Yihoowayyo oottiyoogee loˈˈo gidiyoogaa yootiis.

⁹ Amarkkaa biittan deˈiya, issi gelabeenna michiyaa hagaadan gaada xaafaasu: “Aqo oyqqibeenna uri ufayttennabadan issoti issoti qoppoosona. SHin issi uri ufayttidi deˈiyoogee Yihoowaara deˈiya dabbotaara gayttidaba gidiyoogaa taani akeekaas. Ekkennan woy gelennan deˈiyoogee goˈˈaa aggibayiyooba gidikkonne, issi uri he hanotaa loytti goˈettikko, maalaaliya imota.” Ufayssaa demmiyoogaa xeelliyaagan a hagaadan gaada xaafaasu: “Ekkennan woy gelennan deˈiyoogee ufayssa diggiyaaba gidennan, ufayssaa demissana danddayiyaaba. Aqo oyqqidaageeta gidin ekkibeennaageeta woy gelibeennaageeta Yihooway wozanappe siiqiyoogaa erays.” A haˈˈi Kawotettaabaa aassiyaageeti keehippe koshshiyo biitti baada ufayssan haggaazausu. Intte ekkibeenna woy gelibeennaba gidikko, harata tumaa tamaarissanau intte hanotaa loyttidi goˈettana danddayeetii? Ekkennan woy gelennan deˈiyoogee Yihooway immiyo alˈˈo imota gidiyoogaa inttekka akeekana danddayeeta.

Ekkanau Woy Gelanau Koyiyaageeta

10, 11. Ekkanau woy gelanau qoppiyaaba gidikkonne, giiga aqo lagge demmibeennaageeta Yihooway maaddiyoy ayba ogiyaanee?

¹⁰ Ammanettidi Yihoowayyo oottiyaageetuppe daroti, ekkennan woy gelennan amarida wodiyaa takki simmidi, aqo lagge koyanau qofaa qachoosona. Eti kaaletoy koshshiyoogaa akeekidi, giiga aqo lagge demmanau maaddana mala Yihoowa oychoosona.—1 Qoronttoosa 7:36 nabbaba.

¹¹ Intteegaadan Yihoowayyo kumetta shemppuwaappe oottanau koyiya ura ekkanau woy gelanau qoppiyaaba gidikko, hegaa Yihoowayyo woosan yootite. (Pili. 4:6, 7) Hegaa mala uraa demmanau ay keena wodiyaa gamˈˈikkokka, hidootaa qanxxoppite. Siiqiya nu Xoossay inttena maaddiyoogaa ammanettite; yaatikko, intteyyo koshshiyaabaara moggiya hanotan i inttena maaddana.—Ibr. 13:6.

12. Issi uri aqo lagge gidanaadan oychiyo wode issi Kiristtaanee akeekan qoppana koshshiyoy aybissee?

¹² Kiristtaane gidida, ekkanau woy gelanau koyiya ura, ayyaanaaban shuggida uri woykko Kiristtaane gidenna uri aqo lagge gidanau oychana danddayees. Hegaa malabay inttena gakkiyaaba gidikko, aqo laggiyaa xeelliyaagan iita dooro dooriyoogee kaalettiyo azzanoy, issi uri ekkennan woy gelennan deˈiyo wode amottiyoogaappe aaruwan qohana danddayiyoogaa akeekite. Intte aqo oyqqikko intte aqo deˈoy loˈˈin iitin, hayqqana gakkanaashin he aqo laggiyaara deˈana bessees. (1 Qor. 7:27) Hagaa mala hara injje hanotay baynnabadan qoppidi, intte guyyeppe zilˈˈettanaadan oottiya hanotan ekkanau woy gelanau kuuyoppite.—1 Qoronttoosa 7:39 nabbaba.

Aqo Deˈuwau Giigettite

13-15. Ekkanaappe woy gelanaappe kase issippe wodiyaa aattiyo wode, aqo deˈuwan metoy merettanaadan oottiyaabaa ay ay tobbana koshshii?

¹³ PHauloosi aqo oyqqennan Yihoowayyo oottanaadan minttettidaba gidikkonne, aqo oyqqanau kuuyidaageeta karibeenna. Hegaappe dumma hanotan, ayyaanaa kaaletuwan i zorido zoree, aqo laggeti aqo deˈuwan merettiyaabaa danddayidi, shaahettennan issippe deˈanaadan maaddees.

¹⁴ Ekkanau woy gelanau qoppiya issoti issoti hidootiyoobaa laammana koshshees. Eti issippe wodiyaa aattiyo wode, bantta siiqoy dumma, hara asaagaa mala gidenna, qassi aqo deˈuwan keehippe ufayttanaadan oottiyaaba giidi qoppana danddayoosona. Eti aymo mala qofan aqo oyqqoosona; qassi issippe deˈiyo wodiyan eti ufayttennaadan oottana danddayiyaabi aybinne baynnabadan qoppoosona. Hegaa mala qofay tuma gidenna. Aqo oyqqidaageeti mattuman siiqettiyoogee ufayssiyaaba gidikkonne, machiyaageenne bullashettiyaara aqo deˈuwan gakkiya metuwaa giigissanau hegaa xallay maaddenna.—1 Qoronttoosa 7:28 nabbaba. *

¹⁵ Mati gelida woy ekkida daroti bantta aqo laggee keehippe koshshiyaaban banttappe dummatiyo wode garamettoosona; ubba hidootaa qanxxoosona. Eti miishshaa waati kessanaakko, allaxxiyo wodiyaa waatidi aattanaakko, awan deˈanaakko, qassi bantta soo asaa awude awude oychana koshshiyaakko issuwaa qofay haraagaappe dummatana danddayees. Qassi eta naaˈˈaukka issoy haraagan ufayttenna eeshshay deˈees. Eti kase  issoy issuwaara wodiyaa aattiyo wode, hegaa malabaa sheneho gaanau metootokkona; shin hegee guyyeppe aqo deˈuwan metoy merettanaadan oottana danddayees. Eti ekkanaappe woy gelanaappe kasetidi, banttana qofissidabaa giigissana koshshees.

16. Aqo deˈuwan gakkiya metuwaa xoonanau waati baaxetanaakko aqo laggeti maayettana koshshiyoy aybissee?

¹⁶ Aqo deˈuwan injjetidoogeeta gidanaunne ufayttanau aqo laggeti bantta metuwaa xoonanau issippe baaxetana koshshees. Eti naata seeriyo ogiyan, qassi banttana yelidaageeti cimiyo wode xeelliyo ogiyan maayettana koshshees. So asaa metuwaa gaasuwan gakkiya unˈˈissiyaabay eti shaahettanaadan oottana koshshenna. Geeshsha Maxaafaa zoriyaa oosuwan peeshshiyoogan, eti daro metuwaa giigissanau, giigenna metotun genccanaunne ufayttidi issippe deˈanau danddayoosona.—1 Qor. 7:10, 11.

17. “Sa7aabaa” xeelliyaagan aqo laggeti banttana aybi qofissanaagaa naagana koshshii?

¹⁷ PHauloosi 1 Qoronttoosa 7:32-34n, aqo deˈuwan merettiya harabaa yootiis. (Nabbaba.) Aqo oyqqidaageeti “sa7aabaa,” giishin qumaa, maayuwaa, keettaanne ayyaanaabaa gidenna harabaa qoppiyoogee attenna. Hegaadan haniyoy aybissee? Issi Kiristtaanee ekkanaappe kase, ba kumetta wodiyaa haggaazuwan aattana danddayees. SHin ekkiyo wode, he wodiyaappenne wolqqaappe amaridaagaa ba macheeyyo koshshiyaabaunne o ufayssanau goˈettana bessiyoogaa akeekees. Machiyaakka ba azinau hegaadan oottana bessiyoogaa akeekausu. Yihooway ba aadhida eratettan hegee koshshiyoogaa akeekees. Yihooway azinaynne machiyaa aqo oyqqennan deˈiyo wode Ba oosuwau goˈettiyo wodiyaappenne wolqqaappe amaridaagaa darotoo bantta aqo deˈoy injjetanaadan goˈettana koshshiyoogaa erees.

18. Aqo oyqqi simmidi, issoti issoti bantta laggetuura oottiyoobaa xeelliyaagan giigissana koshshiyaabay ayba gidana danddayii?

¹⁸ SHin harabaakka akeekana koshshees. Aqo laggeti Xoossaayyo oottiyo wodiyaappenne wolqqaappe amaridaagaa issoy issuwau koshshiyaabaa kunttanau goˈettana koshshikko, aqo  oyqqennan deˈiyo wode hara asaara gayttanau goˈettiyoobaakka hegaadan oottana koshshennee? Azinay ubbatoo ba laggetuura ispporttiyan wodiyaa aattiyoogaa aggennaba gidikko, hegee machiyo qohana danddayiyoy aybiinee? Woykko machiyaa dosiyoobaa ba laggetuura oottiyoogan daro wodiyaa wurssiyoogaa aggennaba gidikko, azinau aybi siyettana danddayii? SHeneho giido aqo laggee takkennan azzanana, baddo gididabadaaninne ba aqo laggee bana siiqennabadan qoppana danddayees. Aqo laggeti bantta issippetettaa minttanau danddayiyo ubbabaa oottikko, hegaa malabay gakkennaadan oottana danddayoosona.—Efi. 5:31.

Yihooway Kandduwaa Geeshshatettaa Koyees

19, 20. (a) SHori baynnabaa oottanaadan paacciyaabaappe aqo oyqqidaageeti naxa gidennay aybissee? (b) Aqo laggeti adussa wodiyau issoy issuwaappe shaahettikko, ayba daafan gelana danddayiyoonaa?

¹⁹ Yihoowa ashkkarati kandduwaaban geeshsha gididi deˈanau murttidosona. Issoti issoti hegaara gayttidaagan merettiya metuwaappe haakkanau ekkanau woy gelanau qofaa qachidosona. SHin aqo oyqqiyoogaa xallay shori baynna asho gaytotettaappe naagettanaadan oottiyaaba gidenna. Beni wode, gimbbettida katamay asaa daafaappe ashshiyoy, yaappe kiyennan takkiyo wode xallaana. Panggatinne bonqqiyaageeti katamaa yuushuwan yuuyiyo wode issi uri katamaa penggiyaappe kare kiyikko, eti a bonqqana woy worana danddayoosona. Hegaadankka, aqo oyqqida asay bessenna asho gaytotettaappe naagettiyoy, aqo deˈuwaa Giigissidaagee asho gaytotettau wottido zawaa naagidi deˈiyoogaa xallaana.

²⁰ PHauloosi 1 Qoronttoosa 7:2-5n he zawaabaa qonccissiis. Asho gaytotettaa ba azinaara poliyo maatay deˈiyoy machee xalaalaassa; hegaadan macheera asho gaytotettaa poliyo maatay deˈiyoy azinaa xalaalaassa. Ekkida woy gelida urau “bessiyaabaa” woykko asho gaytotettaa, naaˈˈaykka issoy issuwaa diggana koshshenna. Gidikkokka, issi issi aqo laggeti shemppuwau woykko oosuwau harasaa biyoogan, issoy issuwaappe daro wodiyau shaahettoosona; yaatiyoogan issoy issuwau “bessiyaabaa” oottokkona. Issi uri bana “naagenna gishshau” Seexaanaa sugettan xoonettidi wodiraa laammikko, hegee ay keena azzanttanaakko qoppite. Bantta aqo deˈuwaa daafan yeggenna ogiyan so asau koshshiyaabaa kunttiya, so asau huuphe gididaageeta Yihooway anjjees.—Maz. 37:25.

Geeshsha Maxaafaa Zoriyaa Azazettiyoogaa Goˈˈaa

21. (a) Aqo oyqqanaunne ekkennan woy gelennan deˈanau kuuyiyoogee metiyaaba gidiyoy aybissee? (b) Koyro Qoronttoosa shemppo 7n deˈiya zoree goˈˈiyaagaa gididoy aybissee?

²¹ Aqo oyqqanaunne ekkennan woy gelennan deˈanau kuuyiyoogee issi uri ba deˈuwan kuuyiyo keehippe metiyaabaappe issuwaa. Asaa naatu gaytotettan merettiya daro metuwau gaasoy polotettaa pacaa; qassi polo asi baawa. Yaatiyo gishshau, aqo oyqqidaageeta gidin oyqqibeennaageeta gidin, ubba Yihooway nashshiyoogeetinne anjjidoogeetikka, azzanttiyaabaappe muleera naxa gidokkona. Intte 1 Qoronttoosa shemppo 7n deˈiya, eratetta zoriyaa oosuwan peeshshiyaaba gidikko, hegaa mala metoy darennaadan oottana danddayeeta. Intte aqo oyqqidaba gidin ekkennan woy gelennan deˈiyaaba gidin, Yihoowa sinttan ‘loˈˈobaa’ oottiyaageeta gidana. (1 Qoronttoosa 7:37, 38 nabbaba.) Xoossan nashettiyoogee intte gakkanau danddayiyo hoolle ubbaappe aadhiyaaba. An nashettiyoogan, i ehaana ooratta alamiyan deˈanau ayyaanaaban ubbatoo dicceeta. Attuma asaanne macca asaa giddon deˈiya gaytotettan ha wodiyan meeze gidida sugettay, he ooratta alamiyan deˈenna.

[Tohossa qofaa]

Woygada Zaaruutii?

• Issi uri aqo oyqqanaadan ooninne sugana koshshennay aybissee?

• Aqo oyqqennan Yihoowayyo haggaaziyo wodiyaa waatada loytta goˈettana danddayay?

• Aqo oyqqanau qoppidi issippe wodiyaa aattiyaageeti aqo deˈuwan gakkiya metuwau waanidi giigettana danddayiyoonaa?

• Aqo oyqqiyoogaa xallay shori baynna asho gaytotettaappe naagettanaadan oottiyaaba gidennay aybissee?

[Oyshata]

[Sinttaa 16n deʼiya misiliyaa qonccissuwaa]

Bantta haggaazuwaa aassanau bantta wodiyaa goˈettiya aqo oyqqibeenna Kiristtaaneti ufayttoosona

[Sinttaa 18n deʼiya misiliyaa qonccissuwaa]

Issoti issoti aqo oyqqi simmidi ay giigissiyoogee koshshana danddayii?