Iitabaa Ubbau Gaaso Gidida Uri Deˈii?

RUWANDDA biittan 1994n, meqetti baynna hanotan asaa busakkidoogaa beˈido gishshau, Kawotettatu Issippetettaa wotaaddaratu halaqay, he hanotay Dabloosa beˈidoba mala gidiyoogaa yootiis. He biittan 1994n butettiyoogaa agganaadan asaa teqqenna mala a halaqay a azaziis. Ammananau deexxiya ha hanotaa beˈida hara bitanee hagaadan giis: “Seexaanay deˈiyoogaa ammanenna uri deˈikko, Ruwandda biittan daro asay issippe moogettidosan tanaara gaytto.” Hegaa mala meqetti baynnabaa oottiyay tumuppe Dabloosee?

Eriiddi asa qohanau meqetti baynnabaa oottiyoogaa daro asay ayfiyan beettenna iita ayyaana mereti oottiyoobadan xeellenna. Daroti hegaa malabay haniyoy asaa naati laattido iitatettaa gaasuwaana, qassi iitatettau waanna gaasoy asay ba xallaa siiqiyoogaa giidi qoppoosona. Alame yuushuwan deˈiya, durenne wolqqaama gididaageeti, geemettidi alamiyaa haaranau daro layttau asay eta sheniyaa polanaadan oottiyoobadan harati qoppoosona. Pirdda pacaanne tugga ubbau kawotettatinne haariyaageeti oyshettiyaabadan qoppiyaageetikka deˈoosona.

Intte qofay aybee? Iitatettaa, meqetti baynna hanotaa, danobaanne tuggaa xayssanau baaxetishin, ha wodiyan kumetta saˈan hegee daridoy aybissee? Zaaretti zaarettidi yootidobaa akeekennan ixxidi, asaa naati yuushshi qoppennan banttana qohiyaabaa oottanau dirbbiyaaba milatiyoy aybissee? Ha ubbabau gaaso gidida uri deˈii? Alamiyaa tumuppe haariyay oonee? Hegaa zaaroy inttena maalaalissana danddayees.