Kiristtaanetu Balee Bonchissiyaagaa, Simanne Xoossaa Ufayssiyaagaa

YEEKKIYA asaa wocamay siyettees. Kayyottidaageeti karetta maayuwaa maayidi, zilaalliiddi saˈan kunddi kunddi yeekkoosona. Muuziqaa cenggurssay siyettiyo wode asay durees. Harati qassi miiddinne uyiiddi ufayssan hombbocoosona. Amaridaageeti woyneenne biiray kumidaagaappe uyi mattottidi saˈan zinˈˈidosona. He ubbabay haniyoy aybiira gayttidaagaanee? Alamiyan issi issi heeran issi uri hayqqiyo wode, baliyaa yiida xeetan qoodettiya asay shiiqidi hegaadan oottees.

Yihoowa Markkatuppe daroti deˈiyoy, eta dabbotinne shooroti malan ammaniyoonne hayqqida asaa keehippe yayyiyo heeraana. Miilooniyan qoodettiya asay, issi uri hayqqiyo wode paxa deˈiyaageeta maaddanau woy qohanau danddayiya, mayzza aawatu ayyaana gidees giidi ammanees. Baliyaa meeziyaappe daroy he ammanuwaara gayttidaba. Issi uri hayqqiyo wode kayyottiyoogee wottin deˈiyaaba. Issi issi wode, Yesuusinne i erissiyo ashkkarati eti siiqiyo uri hayqqin azzanidosona. (Yoh. 11:33-35, 38; Oos. 8:2; 9:39) Gidikkokka, eta wode asay bessiyaagaappe aaruwan kayyottiyo, meeze gidida hanotaadan kayyottibookkona. (Luq. 23:27, 28; 1 Tas. 4:13) Aybissi? Hegau issi gaasoy eti hayquwaabaa tumaa eriyoogaa.

Geeshsha Maxaafay hagaadan giidi qonccissi yootees: “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona. . . . Eta siiqoi, ixoinne qanaatee ubbai etaara issippe xayiichchiis. . . . Neeni baanasan duufuwan oosoi, woikko halchchoi, woikko eri, woikko aadhdhida eratetti baawa.” (Era. 9:5, 6, 10) Ayyaanay denttettin xaafettida ha xiqiseti, hayqqida uri aybanne erennaagaa qonccissoosona. Hayqqida uri aybanne qoppenna, haasayenna, akeekenna woy au aybinne siyettenna. Geeshsha Maxaafay yootiyo, ha keehippe koshshiya tumaa eriyoogee Kiristtaaneti baliyaa kessiyo ogiyaa waatidi bochii?

‘Tunabaa Bochoppite’

Eta zaree woy diccido wogay ayba gidikkonne, Yihoowa Markkati hayqqida asi erees woy paxa deˈiyaageeta qohanau woy maaddanau danddayees gidi ammaniyoogaara gayttida ay meezeppenne haakkoosona. Ahaa naagiiddi aqiyoogaa, mooguwaappe simmin miiddi uyiiddi duriyoogaa, issi uri hayqqido gallassaa bonchiyoogaa, hayqqida urau yarshshuwaa yarshshiyoogaanne hayqqidaagaa machiyaa a dabbotuura asho gaytotettaa polada geeyiyoogaa mala wogati ubbay tunabanne Xoossaa ufayssennaageeta; ayssi giikko, Geeshsha Maxaafay tamaarissenna, shemppoy hayqqenna giyo, iita ayyaanaa timirttiyaara gayttidaba gidiyo gishshataassa. (Hiz. 18:4) Tumu Kiristtaaneti “Godaa burccukkuwaaninne qassi xalahetu burccukkuwan” uyenna gishshau, hegaa mala wogaa kaallokkona. (1 Qor. 10:21) “Etappe shaahettite. Tunabaakka bochchoppite” yaagiya azazuwaa azazettoosona. (2 Qor. 6:17) Gidikkokka, hegaadan oottiyoogee ubbatoo metennaba gidenna.

Afirkkaaninne hara heeran, daro asay issi issi wogaa polana xayikko hayqqida mayzzatu ayyaanay hanqqettees giidi ammanees. He wogaa polana xayikko heeraa asaa ubbaa bolli boshay gakkees giidi asay qoppees. Geeshsha Maxaafaa maaraara moggenna mooguwaa wogaa kaallenna gishshau, Yihoowa Markkatuppe darota heeraa asay woy eta dabboti cayoosona, boroosonanne bohoosona. Issota issota issippetettaa ixxoosona, qassi hayqqidaageeta bonchokkona giidi mootoosona. Issi issitoo,  issi Kiristtaanee hayqqiyo wode a dabboti wolqqan bantta wogan baliyaa kessoosona. Yaatin, Xoossaa ufayssenna baliyaa wogaa mintti kaallanaadan giddiya asatuura walaqettennaadan naagettana danddayiyoy ayba ogiyaanee? Hegaappekka aaruwan, nuuyyo Yihoowaara deˈiya dabbotaa moorana danddayiya, tuna wogaappenne meeziyaappe haakkanau ay oottana danddayiyoo?

Intte Qofaa Qonccissi Yootite

Alamiyan issi issi heeran, hayqqida uraa zariyaa cimatinne a keettaa asa gidenna dabboti he uraa mooguwaara gayttidabaa so asaara issippe kuuyiyoogee meeze gididaba. Yaatiyo gishshau, issi ammanettida Kiristtaanee Geeshsha Maxaafaa baaso siraataadan Yihoowa markkati baliyaa kessanaadaaninne polanaadan ba qofaa qonccissi yootana bessees. (2 Qor. 6:14-16) Baliyan oosettiyaabay nu mala Kiristtaanetu zoriyaa wozanaa qohiyaaba, woy hayqqidaageeta xeelliyaagan nuuni ammaniyoobaanne tamaarissiyoobaa eriya harata xubbiyaaba gidana bessenna.

Baliyaa wogaa polanaadan Kiristtaane gubaaˈe cimay oyshettiyaaba gidikko, balee Geeshsha Maxaafaa kaaletuwaara moggiya ogiyan polettanaadan gubaaˈe cimati maaddiya qofaa yootananne ayyaanaaban kaafana danddayoosona. Kiristtaane gidenna issoti issoti tunaba oottanau koyikko, minni eqqiyoogee, qassi xalan gidikkonne kehatettaaninne bonchuwan nu ammaniyoobaa qonccissiyoogee koshshiyaaba. (1 PHe. 3:15) Yaatinkka, ammanenna dabboti baliyan tunabaa oottanau koyiyoogaa aggennaba gidikko shin? Yaatikko, Kiristtaane gidida dabboti he baliyaa wogaa shaakkennaadan qofaa qachana danddayoosona. (1 Qor. 10:20) Hegaadan haniyo wode, siiqiyo uri hayqqin kayyottidaageeta ‘Xoossaa maxaafaappe minttettanau’ Kawotettaa Addaraashan woy hara injjetiya sohuwan mooguwaa haasayaa shiishshana danddayettees. (Roo. 15:4) Ahay he sohuwan deˈennaba gidikkokka, hegaadan oottiyoogee bonchettidabanne maaraba. (Zaa. 34:5, 6, 8) Ammanenna dabboti oottiyo bessennabay nu unˈˈuwaanne azzanuwaa yaa gujjana danddayikkonne, ‘ubbaappe aadhiya wolqqaa’ immiya Xoossay nuuni suure gididabaa oottanau murttidoogaa beˈiyoogaa eriyoogee minttettana danddayees.—2 Qor. 4:7.

Intte Koyiyo Maaraa Xaafi Wottite

Issi uri ba baliyaa siraatay ay mala gidanaadan koyiyaakko xaafi wottikko, Yihoowa Markka gidenna dabboti hayqqida uraa koshshaa bonchana danddayiyo gishshau, eta ammanttiya ogiyan haasayissanau metenna. Baliyaa waati kessana koshshiyaakko, balee awaana gidana bessiyaakko, qassi hegaa giigissiyoonne polissiyo aawatettay deˈiyoy oona gidana bessiyaakko xaafi wottiyoogee keehippe koshshiyaaba. (Doo. 50:5) Markki deˈiyoosan xaafidi parami wottiyoogee keehippe goˈˈiyaaba. Geeshsha Maxaafaa baaso siraataa maaran akeekaaninne aadhida eratettan sinttanaabaa qoppiyaageeti, hegaadan oottanau keehippe  ceeggana woy gashetana gakkanaashin takkana bessennaagaa akeekoosona.—Lee. 22:3; Era. 9:12.

Issoti issoti hegaa malabaa xaafi wottiyoogee deexxiyaabadan qoppoosona. SHin hegaadan oottiyoogee issi uri ayyaanaaban kaymidoogaa, qassi harata siiqiyoogaanne etassi qoppiyoogaa bessiyaaba. (Pili. 2:4) Hayqqida uri ammanennaba woy maayennaba gidida tuna meeziyaa kaallanaadan harati kayyottida so asaa unˈˈissana danddayiyo gishshau, hegaa malabaa he soo asay kuuyanaadan aggibayiyoogaappe issi uri ba huuphe kuuyiyoogee daro loˈˈo.

Baliyaa Sima Oottite

Afirkkan daro biittatun, daro asay mayzzatu ayyaanay hanqqettennaadan wolqqaama baliyaa kessana bessees giidi ammanees. Harati baliyaa deretettaaninne aquwaaban banttau deˈiya gitatettan ‘ceeqettiyoogaa’ bessanau goˈettoosona. (1 Yoh. 2:16) Asay bessiya moogo giidi qoppiyoogaadan hayqqida uraa mooganau daro wodiyaa, wolqqaanne aquwaa wurssees. Danddayettida keenan daro asay baliyaa yaanaadan hayqqida uraa gita pootuwaa dumma dumma sohuwan wottiyoogan, baliyaa asa ubbau erissoosona. Hayqqida uraa pootoy shuraabiyan attamettidi azzanidaageeti maayanaadan etau imettees. Asay maalaalettanaadan alˈˈo gidida, keehi loˈˈiya ahaa saaxiniyaa shammoosona. Afirkkan issi biittan, issoti issoti duretettaanne wogotettaa bessanau kaamiyaa, horophilliyaa wolwoluwaanne hegaa malabaa milatissidi medhido ahaa saaxiniyaa goˈettoosona. Ahaa asay beˈanaadan saaxiniyaappe kessidi keehippe alleeqettida alggan wottana danddayoosona. Maccaasay hayqqiyo wode bullacha maayuwaa boottaa mayzzidi daroban alleeqissananne dumma dummabaa tiyana danddayoosona. Xoossaa asaappe ooninne hegaa malabaa oottiyoogee tumuppe bessiyaabee?

Kaymida Kiristtaaneti, Xoossay kessido maaraa erennanne bonchenna asay oottiyo bessennabaappe haakkiyoogee aadhida eratetta gidiyoogaa akeekoosona. Likkiyaappe aadhida, qassi Geeshsha Maxaafaa maaraara moggenna meezeenne oosoy, ‘aadhana ha saˈaappe yiidoogaappe attin, Xoossaappe yibeennaagaa’ nuuni akeekoos. (1 Yoh. 2:15-17) Haraatuppe aadhanau giidi, Kiristtaaneti haakkana bessiyo, annaacettiyoogaa qonccissiyaabaa  oottennaadan keehippe naagettana bessees. (Gal. 5:26) Issi heeraa wogaynne issippetettaa deˈoy asay hayqqida uraa yayyiyoogaara gayttidaba gidiyo wode, darotoo balee wolqqaamanne hanotaa kaallanau metiyaagaa gididi, sohuwaara maara xayana danddayiyoogee hanettin beˈidoba. Hayqqida uraa keehippe bonchiyoogee Kiristtaane gidennaageeti he sohuwan tuna meeziyaa polanaadan denttettana danddayees. Hegaa mala baliyan asay cenggurssaa xoqqu oottidi zaarennan zilaalana, ahaa idimmana, paxa deˈiya uradan ahaa haasayissana, qassi miishshaa woy harabaa ahaa bolli wottana danddayees. Issi Kiristtaaniyaa baliyan hegaa malabay hanikko, hegee Yihoowa sunttaanne a asaa sunttaa keehippe mooriyaaba.—1 PHe. 1:14-16.

Hayqqida asaa hanotaabaa tumaa eriyoogee baliyaa kessiyo wode Xoossaa ufayssennaba aybanne oottenna mala xalanaadan nuna maaddana koshshees. (Efi. 4:17-19) Yesuusi ha saˈan deˈida asa ubbaappe gitanne keehippe erettidaagaa gidikkonne, i moogettidoy wogotiyoogaa bessenna, sima hanotaana. (Yoh. 19:40-42) “Kiristtoosa wozanai” deˈiyoogeeta hegaa mala moogoy yeellayenna. (1 Qor. 2:16) Kiristtaanetu baliyaa sima oottiyoogee Geeshsha Maxaafay tuna giyoobaappe haakkanaadaaninne balee bonchissiyaagaa, mankkatidaagaanne Xoossaa siiqiyaageetuyyo bessiyaagaa gidanaadan maaddees.

Ufayssiyaabaa Oottiyoogee Bessiyaabee?

Mooguwaappe simmin dabboti, shoorotinne harati maanau, uyanaunne duranau issippe shiiqiyoogee dere woga gidana danddayees. Darotoo hegaa mala baliyan asay mattotteesinne shori baynnabaa oottees. Issoti issoti hegaadan ufayssan hombbociyoogee azzanuwaa dogissees giidi qoppoosona. Harati qassi hegee bantta biittaa woga giidi qoppoosona. Gidikkokka, daroti hegaadan ufayssan hombbociyoogee hayqqida uraa bonchanaunne sabbanau, qassi a shemppoy mayzzatu ayyaanaara gayttanaadan oottiya, keehippe koshshiya siraata giidi ammanoosona.

Geeshsha Maxaafay, “Miichchaappe azzanoi keha; aissi giikko, azzanoi som77uwaa karexissikkokka wozanaa poo7issees” yaagiyoogee aadhida eratetta zore gidiyoogaa tumu Kiristtaaneti akeekoosona. (Era. 7:3) Hegaa bollikka, eti asaa baree qantta gidiyoogaanne dendduwaa hidootaa wotti dentti qoppiyoogaa goˈˈaa eroosona. Tumakka, Yihoowaara mino dabbotay deˈiyoogeetussi ‘yelettiyo gallassaappe hayqqiyo gallassay loˈˈo.’ (Era. 7:1) Yaatiyo gishshau, baliyaa wode ufayssan hombbociyoogee iita ayyaanaa timirttiyaara, qassi shori baynna oosuwaara gayttidaba gidiyoogaa eriyo gishshau, hegaa mala baliyaa kessiyoogee woy ubba biyoogee tumu Kiristtaanetussi bessennaba. Baliyaa wode ufayssan hombbociyaageetuura issippe hombbociyoogee, Yihoowayyo goynniya, nu mala Kiristtaanetu zoriya wozanaanne Xoossaa bonchennaagaa bessiyaaba.

Harati Dummatettaa Akeekanaadan Oottite

Ayyaanaaban xuman deˈiyaageeti hayqqidaageeta keehippe yayyiyo, meeze gidida hanotaappe nuuni naxa kiyidoogau Yihoowa keehippe galatoos! (Yoh. 8:32) Nuuni ‘pooˈuwan deˈiyaageeta’ gidiyoogaadan, ayyaanaabaa akeekiyoogaa bessiya, sima gidida, bonchissiyaanne dendduwaa hidootan ammaniyoogaa bessiya ogiyan azzanoosinne kayyottoos. (Efi. 5:8; Yoh. 5:28, 29) Hegaa mala hidootay nuuni darotoo hidooti “bainna asatudan” likkiyaappe aattidi azzanennaadan maaddees. (1 Tas. 4:13) Hegee nuuni asau yayyennan, xalan tumu goynuwaa mintti kaafanaadan maaddees.—1 PHe. 3:13, 14.

Nuuni Geeshsha Maxaafaa baaso siraataa ammanettidi naagiyoogee, ‘Xoossaassi azazettiyaageetunne azazettennaageetu gidduwan’ deˈiya dummatettaa asay akeekanaadan maaddees. (Mil. 3:18) Issi galla hayqoy xayana. (Ajj. 21:4) He maalaalissiya hidootay polettiyo wodiyaa naagiiddi, Yihoowa sinttan pokkoynne boree baynnaageeta, qassi ha iita alamiyaappenne Xoossaa bonchissenna meeziyaappe haakkidaageeta gidanau amottoos.—2 PHe. 3:14.

[Sinttaa 30n deʼiya misiliyaa qonccissuwaa]

Baliyaa xeelliyaagan nuuni koyiyoobaa xaafi wottiyoogee eratetta

[Sinttaa 31n deʼiya misiliyaa qonccissuwaa]

Kiristtaanetu balee simanne bonchissiyaagaa gidana koshshees