Xoossaa Ayyaanaa Kaaletuwaa Kaallana Koshshiyoy Aybissee?

“Neeni ta Xoossaa. Ne ayyaanay loˈˈo; i tana salalla ogiyaa kaaletto.”—MAZ. 143:10, NW.

1. Ayfiyan beettenna wolqqay issi ura waatidi kaalettana danddayiyaakko leemisuwaa yoota.

INTTE biyo ogiyaa eranau komppaasiyaa goˈetti ereetii? Komppaasee qaaxxiya issibaa xallay, giishin huuphessa bagga malaatiya, maaginetiyaappe merettida marppe malabay deˈiyo miishsha. Saˈaa yuushuwan deˈiya, maaginetiizim giyo ayfiyan beettenna wolqqay, komppaasiyan deˈiya marppe malabay huuphessa baggi malaatanaadan oottees. Daro xeetu layttau, ooratta sohuwaa koyiyaageetinne haahosaa manddariyaageeti abbaaninne saˈan eti biyo ogiyaa kaalettanaadan komppaasiyaa goˈettidosona.

2, 3. (a) Keehi daro wodiyaappe kase Yihooway goˈettido, wolqqaama gidida wolqqay aybee? (b) Ayfiyan beettenna, Xoossaa wolqqay ha wodiyan nuna kaalettees giidi qoppana koshshiyoy aybissee?

² Nuuni kaaletuwaa demmanaadan keehippe maaddiya, ayfiyan beettenna hara wolqqay deˈees. I aybee? Hegee, Geeshsha Maxaafan doometta paydotun odettidaagaa. Doomettaabaa maxaafay, “Xoossai salotanne sa7aa koiro medhdhiis” yaagidi, keehi daro wodiyaappe kase Yihooway oottidobaa yootees. Meretaabaa yootiya taarikee, “Xoossaa Ayyaanai haattaappe bollaara maayi uttiis” yaagiyo gishshau, i hegaa oottido wode, keehippe wolqqaama gidida wolqqaa kiittiis. (Doo. 1:1, 2) He oosuwaa oottido wolqqay aybee? Meretaa medhanau goˈettido, wolqqaama gidida geeshsha ayyaanaa. Nuuni deˈuwan deˈiyoy Yihooway ubbabaa oottanau he ayyaanaa goˈettido gishshataassa.—Iyy. 33:4; Maz. 104:30.

³ Nuuni deˈon deˈiya asa gidiyoogaadan, Xoossaa wolqqay nu deˈuwan harabaakka oottees giidi qoppana koshshii? Xoossaa Naˈaa, Yesuusi ba erissiyo ashkkaratuyyo, “Ayyaanai . . . inttena tumatetta ubbaakko efaana” yaagido gishshau, nuuni hegaadan qoppana koshshiyoogaa erees. (Yoh. 16:13) Ha ayyaanay aybakko nuuni waatidi erana danddayiyoo, qassi nuna i kaalettanaadan koyana bessiyoy aybissee?

Geeshsha Ayyaanay Aybee?

4, 5. (a) Sillaasiyan ammaniyaageeti geeshsha ayyaanaabaa qoppiyo bala qofay aybee? (b) Geeshsha ayyaanay tumuppe aybakko intte waatidi qonccissuuteetii?

⁴ Intte haggaazuwan haasayissiyo asatuppe issoti issoti Sillaasiyan ammaniyaageeta gidennan aggokkona. Yaatiyo gishshau, eti balan geeshsha ayyaanay Xoossaa Aawaara issi lagge giidi qoppoosona. (1 Qor. 8:6) SHin Sillaasiyaa timirttee Geeshsha Maxaafaa timirttiyaara moggennaba gidiyoogaa qonccissanau metenna.

⁵ Yaatin, geeshsha ayyaanay tumuppe aybee? Inggilizettuwan giigida, Pilgganau maaddiya qofaa oyqqida—Ooratta Alamiyaa Geeshsha Maxaafaa Xuufetu Birshshettan, Doomettaabaa 1:2 tohossa qofay hagaadan gees: “Ruh [Ibraysxxe qaala] giya qaalay ‘ayyaanaa,’ geetettidi birshshettidoogaa bolli, ‘carkkuwaa’ geetettidi, qassi ayfiyan beettenna wolqqa malaatiya hara qaalatunkka birshshettiis.” (Doo. 3:8; 8:1) Carkkoy beettennaba gidikkokka au wolqqay deˈiyoogaadan, bolli baynna geeshsha ayyaanaykka ayfiyan beettenna shin oottees. Ha ayyaanay Xoossay ba sheniyaa polanau asaa bolli woy issibaa bolli peeshshiyo wolqqa. Hegaa mala maalaalissiya wolqqay kiyiyoy, hegau geeshsha pultto gidida, Ubbaa Danddayiya Xoossaappe gidiyoogee ammananau metiyaabee? Mule gidenna!—Isiyaasa 40:12, 13 nabbaba.

6. Daawiti Yihoowakko woossido keehippe koshshiya woosay awugee?

 ⁶ Nu deˈuwan nuna kaalettanaadankka Yihooway ubbatoo ba ayyaanaa goˈettii? I mazamuraawiyaa Daawitayyo, “Taani nena erissananne neeni baanau bessiya ogiyaa nena tamaarissana” yaagidi qaalaa geliis. (Maz. 32:8) Daawiti hegaa koyidee? I, “Neeni ta Xoossaa gidiyo gishshau, taani ne sheniyaa oottana mala, tana tamaarissa; ne ayyaanay loˈˈo; i tana salalla ogiyaa kaaletto” yaagidi Yihoowakko woossido gishshau, ee koyiis. (Maz. 143:10, NW) Nuunikka nuna Xoossaa ayyaanay kaalettanaadan hegaadan koyananne eeno gaana koshshees. Hegee koshshiyoy aybissee? Oyddu gaasota ane qoppite.

Nu Kaalliyo Ogiyaa Suurissanau Danddayokko

7, 8. (a) Xoossaa maadoy baynnan nuna nurkka kaalettana danddayennay aybissee? (b) Nuuni ha iita siraataa kanttiyo ogiyaa nurkka demmanau koyana bessennay aybissakko leemisuwan yoota.

⁷ Koyruwan, nuuni nuna kaalettana danddayenna gishshau, Xoossaa ayyaanay kaalettanaadan koyana bessees. “Kaalettiyoogaa” giyoogee “baana bessiya ogiyaa malaatiyoogaa” giyoogaa. Gidikkokka, Yihooway nuuni nu huuphiyaa kaalettanaadan medhibeenna; ubba qassi nuuni polo gidenna gishshau hegaa oottana danddayokko. Yihooway kiittin hananabaa yootiya Ermmaasi, “Abeet GODAU, asa de7oi he aawussi buzo gidennaagaanne ba hemetaa suurissanaagee aawu shene gidennaagaa taani erais” yaagidi xaafiis. (Erm. 10:23) Suurissanau danddayennay aybissee? Nuuni nuna kaalettana danddayenna gaasuwaa Xoossay yootishin Ermmaasi siyiis. Nu garssa asatettaa xeelliyaagan Yihooway, “Asa wozani ubbabaappe aadhdhi cimmiyaabaanne keehi daro iita. A ooni eranau danddayii?” yaagiis.—Erm. 17:9; Maa. 15:19.

⁸ Oge erenna uri, loytti kaalettiya uri woy komppaasee baynnan battaale bazzuwan barkka biyoogee eeyyatetta gidennee? Bazzuwan metoy gakkiyo wode waani attanaakko, qassi ba biyoosaa gattiya ogiyaa waati demmanaakko erenna gishshau, ba shemppuwaa daafan yeggees. Xoossay bana suure ogiyaa bessanaadan koyennan, ha iita siraatan bana barkka kaalettana danddayiyaabadan qoppiya uraykka hegaadan ba shemppuwaa daafan yeggees. Nuuni suure ogiyan hemettidi ha siraataa kanttana danddayiyoy, Daawiti, “Taani ubbatoo ne ogiyan hemettais; mulekka ne ogiyaappe gaxi kiya erikke” yaagidoogaadan, Yihoowakko woossiyoogaa xallaana. (Maz. 17:5; 23:3) Hegaa mala kaaletuwaa demmana danddayiyoy ayba ogiyaanee?

9. Sinttaa 19n qonccidaagaadan Xoossaa ayyaanay waatidi nuna ammanttiya ogiyan kaalettana danddayii?

⁹ Nuuni nu huuphiyaa kawushshiyaageetanne Yihoowa bolli zemppiyaageeta gidikko, ammanttiya ogiyan nuna kaalettanaadan i ba geeshsha ayyaanaa immana. He ayyaanay nuna maaddiyoy ayba ogiyaanee? Yesuusi ba erissiyo ashkkaratuyyo, “Geeshsha Ayyaanai, minttettiyaagee, Aawai ta sunttan kiittanaagee, inttena ubbabaa tamaarissana. Taani intteyyo odido ubbabaakka inttena hassayissana” yaagiis.  (Yoh. 14:26) Kiristtoosi yootidobaa ubbaa gujjin, nuuni ubbatoo woossidi Xoossaa Qaalaa xannaˈiyo wode, geeshsha ayyaanay nuuni Yihoowa aadhida eratettaa loyttidi akeekanaadan maaddees; yaatiyo gishshau, i koyiyoobaa loyttidi kaallana danddayoos. (1 Qor. 2:10) Hegaa bollikka, nuuni qoppennan deˈuwaa ogiyaappe wora simmiyo wode, nuuni baana bessiya ogiyaa geeshsha ayyaanay kaalettees. Nuuni tamaarido Geeshsha Maxaafaa baaso siraataanne nuuni baana ogiyaa kaalettanaadan hegaa waatidi oosuwan peeshshana danddayiyaakko akeekanaadan he ayyaanay maaddees.

Yesuusi Xoossaa Ayyaanaa Kaaletuwaa Kaalliis

10, 11. Xoossaayyo mexi issi Naˈay geeshsha ayyaanay ay oottanaagaa qoppidee, qassi a deˈuwan aybi hanidee?

¹⁰ Nuuni geeshsha ayyaanaa kaaletuwaa koyana bessiyo naaˈˈantto gaasoy, Xoossay ba Naˈaa he ayyaanan kaalettido gishshataassa. Xoossaayyo mexi issi Naˈay ha saˈaa yaanaappe kase, “GODAA Ayyaanai, aadhdhida eratettaanne akeekaa Ayyaanai, zoriyaanne wolqqaa Ayyaanai, eratettaanne GODAAYYO yayyiyo Ayyaanai a bolli shemppana” yaagiya hiraagaa erees. (Isi. 11:2) Yesuusi paaciyan kumida ha saˈan deˈiyo wode, Xoossaa ayyaanaa maaduwaa ay keena koyidaakko qoppite!

¹¹ Yihooway giidobay polettiis. Yesuusi xammaqetti simmin sohuwaara hanidabaa Luqaasa Wonggelee hagaadan gees: “Yesuusi Geeshsha Ayyaanan kumidi, Yorddaanoosappe simmiis. Ayyaanai kaalettin, bazzo [biis].” (Luq. 4:1, 2) Yan Yesuusi xoomiyo, woossiyoonne wotti dentti qoppiyo wode, Yihooway ba Naˈaa kaalettidabanne i sinttappe waananaakko, qassi ay oottanaakko yootidaba milatees. Yesuusi qoppiyoobaaninne kuuyiyooban Xoossaa ayyaanay a wozanaanne qofaa kaalettiis. Hegaappe denddidaagan, Yesuusi ubba hanotan ay oottanaakko erees; qassi i oottanaadan a Aaway koyiyoobaa oottiis.

12. Xoossaa ayyaanay nuna kaalettanaadan woossana koshshiyoy aybissee?

¹² Yesuusi Xoossaa ayyaanay ba deˈuwan oottidobaa goˈˈaa eriyo gishshau, geeshsha ayyaanaa demmanau woossiyoogeenne a kaaletuwaa kaalliyoogee keehippe koshshiyoogaa ba erissiyo ashkkaratuyyo minttidi yootiis. (Luqaasa 11:9-13 nabbaba.) Hegee nuussi keehippe koshshiyoy aybissee? I nu qofaa laammana danddayiyo gishshataassa; hegee qassi nuuyyo Kiristtoosa wozanay deˈanaadan oottees. (Roo. 12:2; 1 Qor. 2:16) Xoossaa ayyaanay nu deˈuwan kaalettanaadan eeno giyoogan, nuuni Kiristtoosaagaadan qoppanaunne a leemisuwaa kaallanau danddayoos.—1 PHe. 2:21.

Alamiyaa Ayyaanay Wora Kaalettees

13. Alamiyaa ayyaanay aybee, he ayyaanay asay ay oottanaadan denttettii?

¹³ Xoossaa ayyaanay nuna kaalettanaadan koyana bessiyo heezzantto gaasoy, geeshsha ayyaanay kaalettana xayikko, ha wodiyan daro asaa deˈuwaa kaalettiya tuna ayyaanay nuna wora kaalettana danddayiyo gishshataassa. Geeshsha ayyaanay nuna kaalettana danddayiyo ogiyaappe keehi dummatiya ogiyaa kaallanaadan oottiya, wolqqaama ayyaanay alamiyan  deˈees. Alamiyaa ayyaanay asau Kiristtoosa qofay deˈanaadan oottiyoogaappe, eta qofaynne oosoy alamiyaa haariya Seexaanaagaa mala gidanaadan oottees. (Efisoona 2:1-3; Tiitu 3:3 nabbaba.) Issi uri alamiyaa ayyaanan xoonettidi ashuwaa oosuwaa oottiyo wode, i Xoossaa Kawotettaa laattennaadan oottiya azzanttiyaabay gakkees.—Gal. 5:19-21.

14, 15. Alamiyaa ayyaanaa eqettana danddayiyoy ayba ogiyaanee?

¹⁴ Yihooway nuuni alamiyaa ayyaanaa eqettanaadan maaddiyaabaa nuussi immiis. Kiitettida PHauloosi, ‘iita gallassan teqqanau, Godaaninne a gita wolqqan minnanaadan’ yootiis. (Efi. 6:10, 13) Seexaanay nuna balettanau baaxetiyo baaxiyaa eqettanaadan, Yihooway ba ayyaanaa baggaara nuuyyo wolqqaa immees. (Ajj. 12:9) Alamiyaa ayyaanay wolqqaama, qassi nuuni appe muleera haakkana danddayokko. Gidikkokka, i nuna hambbalaashanaadan paqqadana koshshenna. Geeshsha ayyaanay alamiyaa ayyaanaappekka wolqqaama; i nuna maaddees!

¹⁵ Koyro xeetu layttan Kiristtaane ogiyaa aggidaageeta xeelliyaagan kiitettida PHeexiroosi, “Sitta ogiyaa aggidi balidosona” yaagiis. (2 PHe. 2:15) Nuuni ‘saˈaa ayyaanaa gidennan Xoossaa ayyaanaa ekkido’ gishshau, Xoossaa keehippe galatana koshshees. (1 Qor. 2:12) Geeshsha ayyaanaa maaduwaaninne ayyaanaaban suure ogiyaappe nuuni kiyennaadan Yihooway giigissido ubbabaa kumetta hanotan goˈettiyoogan, ha iita alamiyan deˈiya Seexaanaa ayyaanaa eqettana danddayoos.—Gal. 5:16.

Geeshsha Ayyaanay Loˈˈo Ayfiyaa Ayfees

16. Geeshsha ayyaanay nuuni ay ayfanaadan maaddana danddayii?

¹⁶ Xoossaa ayyaanay nuna kaalettanaadan koyana bessiyo oyddantto gaasoy, he kaaletuwaa kaalliyaageeti bantta deˈuwan loˈˈo ayfiyaa ayfanaadan he ayyaanay maaddiyo gishshataassa. (Galaatiyaa 5:22, 23 nabbaba.) Kaseegaappe aaruwan siiqiyaagaa, ufayttiyaagaanne sarotettaa dosiyaagaa gidanau koyenna uri nu giddon deˈii? Daroppe danddayancha, kehanne loˈˈo gidanau koyennay oonee? Ammanuwan, ashkketettaaninne ba huuphiyaa naagiyoogan goˈettennay oonee? Xoossaa ayyaanay nuna, nunaara deˈiyaageetanne haggaaziyaageeta goˈˈiya loˈˈo ayfiyaa nuuni ayfanaadan oottees. Nuuyyo koshshiyaanne nuuni ayfana danddayiyo geeshsha ayyaanaa ayfiyau wottido zawi baynna gishshau, he ayfiyaa ayfiyoogee ubbatoo gujji gujji biyaaba.

17. Geeshsha ayyaanaa ayfiyaa macaratuppe issuwaa nuuni kaseegaappe aaruwan ayfana danddayiyoy ayba ogiyaanee?

¹⁷ Nuuni oottiyoobaynne haasayiyoobay geeshsha ayyaanaa kaaletuwaa kaalliyoogaanne a ayfiyaa ayfiyoogaa bessiyaakkonne nuna qoriyoogee eratetta. (2 Qor. 13:5a; Gal. 5:25) Nuuni ayyaanaa ayfiyaa macaratuppe amaridaageeta ayfana koshshiyoogaa akeekikko, he ayfiyaa ayfanau geeshsha ayyaanay kaalettanaadan kaseegaappe aaruwan baaxetana danddayoos. Hegaadan oottana danddayiyoy, Geeshsha Maxaafaynne Kiristtaane xuufeti ayyaanaa ayfiyaa macaratubaa huuphiyan huuphiyan qonccissiyoobaa xannaˈiyoogaana. Yaatiyoogan, ayyaanaa ayfiyaa nu galla galla deˈuwan waatidi oosuwan peeshshana koshshiyaakko akeekananne hegaa gujjidi ayfanau baaxetana danddayoos. * Xoossaa ayyaanay nu deˈuwaaninne nu mala Kiristtaanetu deˈuwan oottiyoobaa akeekiyo wode, a kaaletuwaa nuuni kaallana bessiyoy aybissakko qonccidi beettees.

Xoossaa Ayyaanau Eeno Geetii?

18. Xoossaa ayyaanaa kaaletuwaa kaalliyoogan Yesuusi nuussi leemiso gidiyoy ayba ogiyaanee?

¹⁸ Yesuusi ubbabay merettiyo wode Xoossaayyo “waanna oosanchcha” gidiyo gishshau, asaa naati saˈaa bolli yuuyanau goˈettiyo, saˈaa yuushuwan deˈiya maaginetiizim giyo wolqqaabaa loyttidi erees. (Lee. 8:30; Yoh.1:3) Gidikkokka, Yesuusi saˈan deˈiyo wode bana kaalettanaadan he wolqqaa goˈettidoogaa bessiyaabi  Geeshsha Maxaafan baawa. I asa gididi deˈiyo wode, Xoossaa ayyaanay ay keena wolqqaamakko ba deˈuwan beˈidoogaa Geeshsha Maxaafay yootees. I geeshsha ayyaanay bana kaalettanaadan koyiis; qassi geeshsha ayyaanaa kaaletuwaa eeno giisinne he kaaletuwaadan deˈiis. (Mar. 1:12, 13; Luq. 4:14) Intte hegaadan ootteetii?

19. Geeshsha ayyaanay nu deˈuwan kaalettanaadan nuuni ay oottana bessii?

¹⁹ Xoossaa wolqqay eeno giyaageetu wozanaanne qofaa haˈˈikka denttetteesinne kaalettees. I inttena suure ogiyaa kaalettanaadan eeno gaana danddayiyoy ayba ogiyaanee? Yihooway ba ayyaanaa intteyyo immanaadaaninne intte he ayyaanau eeno giidi azazettanau maaddanaadan ubbatoo woossite. (Efisoona 3:14-16 nabbaba.) Geeshsha ayyaanaa kaaletuwan xaafettida, Xoossaa Qaalaa Geeshsha Maxaafan deˈiya zoriyaa pilggiyoogan, intte woosaara moggiyaabaa oottite. (2 Xim. 3:16, 17) Geeshsha Maxaafan deˈiya aadhida eratetta azazuwaa azazettite; qassi geeshsha ayyaanaa kaaletuwaa ufayttidi kaallite. Ha iita siraataa kanttanaadan Yihooway inttena intte deˈuwan kaalettana danddayiyoogaa ammaniyoogaa bessiyaabaa oottite.

[Tohossa qofaa]

Waanna Qofaa Akeekadii?

• Geeshsha ayyaanay nuna nu deˈuwan maaddana danddayiyoy ayba ogiyaanee?

• Xoossaa ayyaanay nuna kaalettanaadan koyana bessiyo oyddu gaasoti awugeetee?

• Geeshsha ayyaanaa kaaletuwan kumetta hanotan goˈettanau nuuppe koyettiyaabaa oottana danddayiyoy ayba ogiyaanee?

[Oyshata]

[Sinttaa 17n deʼiya misiliyaa qonccissuwaa]

Yesuusi ba deˈuwan oottidobau denttettiday Xoossaa ayyaanaa

[Sinttaa 19n deʼiya misiliyaa qonccissuwaa]

Xoossaa ayyaanay wozanaanne qofaa denttetteesinne kaalettees