Meretay Daafabaa Gattiyo Wode Gencciyoogaa

Meretay gattiyo daafabay dari dari biyoogaanne gattiyo qohoy gujjiyoogaa beˈiyo wode, issi uri genccanau ay oottana danddayii? Oottana danddayiyo goˈˈiyaabata ane beˈoos.

Iitabaappe baqata. Geeshsha Maxaafay, “Cincca asi iitaa be7idi, qosetti aattees; shin akeeki paccido asi metuwan gelidi qohettees” yaagees. (Lee. 22:3) Hagee daafabaara gayttidaagan maaddiya, aadhida eratetta zore. Biitta garssa suuloy (volkkeeno) xuuqqanaagee, wolqqaama diˈoy diˈˈanaagee woy gotee denddanaagee kasetidi odettiyo wode, he heeraappe baqatidi harasaa biyoogee eratetta. Deˈoy keettaappe woy hara aquwaappe aaruwan alˈˈo.

Issi issi asay wolqqaama qohoy gakkenna heeraa dooridi deˈana danddayees. Aawatettay deˈiyo issi uri hagaadan giis: “Daafabay asay corattidi deˈiyo heeraa qohees. Qohuwaappe dariya baggay gakkiyo heeray kumetta saˈan keehi guutta; qassi sinttappe wolqqaama bashshaappe dariya baggay gakkanay he sohotuuna.” Leemisuwau, abbaa doonan deˈiya, garatiya heeran woykko darotoo biittay qaaxxiyo heeran hegaa malabay gakkana danddayees. Neeni hegaa mala heeran deˈennan aggana woy hegaa mala heeraappe harasaa baada deˈana danddayikko, daafabay nena darin qohennan aggana danddayees.

Kasetada halcha. Neeni naagettiyaaba gidikkokka, meretay gattiyo daafabay ne bolli qoppennan gakkana danddayees. Neeni kasetada halchiyaaba gidikko, hegaa malabay gakkiyo wode qohettennan attanau danddayaasa. Hegee qommoora odettida, Leemiso 22:3 zoriyaarakka moggiyaaba. Qoppennabay gakkiyo wode sohuwaara ekkada biyo keehippe koshshiyaabaa giigissa wottadii? Akkamuwan koyro maaduwau koshshiyaabata, uyiyo haattaa, moorettenna qumaanne xaafetti uttida keehi koshshiyaabata oyqqiyoogee loˈˈo gidiyoogaa, 1-2-3 of Dizaster Ejukeeshin giyo xuufee yootees. Gakkana danddayiya daafabaa ubbaanne he ubba hanotan ay oottana danddayiyaakko so asaara tobbiyoogeekka eratetta.

Xoossaara dabbotaa minttada deˈa. Hegee ayba hanotankka maaddiyaaba. Geeshsha Maxaafay, Xoossay ‘nu waaye ubban nuna minttettiya, maarotettaa Aawaanne minttetto ubbaa Xoossaa’ gidiyoogaa yootees. Hara xiqisee qassi i ‘kayyottidaageeta minttettiya Xoossaa’ gidiyoogaa yootees.—2 Qor. 1:3, 4; 7:6.

Ee, Xoossay banan ammanettiyaageetu bolli gakkiyaabaa loyttidi erees. I siiqiya Xoossaa, qassi dumma dumma ogiyan minttettees. (1 Yoh. 4:8)Maalaaliyaabau gidennan a ayyaanau Xoossaa woossiyoogee, aybiininne maaddana danddayees.  Daafabay gakkidoogeeti minttettiyaanne woppissiya xiqiseta hassayanaadan geeshsha ayyaanay maaddana danddayees. Xoossau ammanettidi oottiyaageeti beni Israaˈeela kawuwaa Daawitaagaadan, “Neeni ta GODAI tanaara de7iyo gishshau, taani haiquwaa milatiya xumaa giddoora biikkokka, iitabau yayyikke. Ne gatimainne ne guufee tana minttettoosona” yaagana danddayoosona.—Maz. 23:4.

Kiristtaaneti issoy issuwaa maaddoosona. Koyro xeetu layttan Agaaboosa giyo Kiristtaanee, “sa7a ubban gita namisai denddanaagaa . . . hananabaa yootiis; hegee hanidoogee Qalaudeyoosa kawotettaa wodiyaana.” He namisay Yihudan deˈiya, Yesuusi erissiyo ashkkaratuppe darota keehippe qohiis. Harasan deˈiya erissiyo ashkkarati bantta mala Kiristtaaneti keehippe metootidoogaa siyido wode ay oottidonaa? He taarikee, “Kaalliyaageeti huuphiyan huuphiyan bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona” yaagees. (Oos. 11:28, 29) Etassi koshshiyaabaa siiquwan kunttidosona.

Ha wodiyan wolqqaama bashshay gakkiyo wode Xoossaa ashkkarati hegaa malabaa oottoosona. Yihoowa Markkati bantta mala Kiristtaaneta maaddiyoogan keehippe erettoosona. Leemisuwau, Usuppune 27, 2010n, CHiile biittan biittay qaaxxido wode, Yihoowa Markkati qohettidaageeta sohuwaara maaddidosona. Sunaami giyo beetay i keettaa xayssido, Karla hagaadan gaasu: “Wonttetta gallassi [nu mala Kiristtaaneti] nuna maaddanau harasaappe yiidoogaa beˈidoogee minttettiis. Bantta dosan oottiya he ishanttu kehatettan nuna minttettidaagee Yihoowa gidiyoogee erettidaba. Tana siiqiyaanne naagiya uri deˈiyoogaa eraas.” Yihoowa Markka gidenna i aayee aaway, Yihoowa Markkati maaddido ogiyaa xomoosidi, “Hagee taani ta woosa keettan daro layttau beˈidoobaappe keehi dummatiyaaba” yaagiis. I beˈidobay Yihoowa Markkati bana Geeshsha Maxaafaa xannaˈissanaadan oychana mala denttettiis.

Xoossaa siiqiya asatuura nuuyyo deˈiya issippetettay, daafabay gakkiyo wode keehippe maaddana danddayees.

[Sinttaa 6n deʼiya misiliyaa qonccissuwaa]

Qoppennabay gakkiyo wode sohuwaara ekkada biyo keehippe koshshiyaabaa giigissa wottadii?

[Sinttaa 7n deʼiya misiliyaa qonccissuwaa]

Maalaaliyaabau gidennan a ayyaanau Xoossaa woossiyoogee, aybiininne maaddana danddayees

[Sinttaa 7n deʼiya misiliyaa qonccissuwaa]

Kiristtaaneti daafabay gakkiyo wode, issoy issuwaa maaddoosona

[Sinttaa 7n deʼiya misiliyaa qonccissuwaa]

“Tana siiqiyaanne naagiya uri deˈiyoogaa eraas”