Tumaa Baaso Qofaappe Tamaarite

‘Higgiyaappe neeni eraunne tumau baaso qofaa demmadasa.’—ROO. 2:20, NW.

HA OYSHATU ZAARUWAA KOYA:

Muuse Higgee yootiyo yarshshoy ay bessii?

Israaˈeelati yarshshido issi issi yarshshoynne ha wodiyan Kiristtaaneti yarshshiyo yarshshoy issi mala gididoy aybiinee?

Nu yarshshoy Yihoowa ufayssiyaagaa woy ufayssennaagaa gidanaadan oottiyaabati aybee?

1. Nuuni Muuse Higgiyaa goˈˈaa akeekanau wozanappe koyana bessiyoy aybissee?

 KIITETTIDA PHauloosi ayyaanaa kaaletuwan xaafidobay baynnaakko, Muuse Higgiyan deˈiya darobaa goˈˈaa akeekanau nuna keehippe metana. Leemisuwau, i Ibraawe Kiristtaanetussi xaafido dabddaabbiyan, Yesuusi ‘ammanettida, qeese ubbatu halaqaa’ gidiyoogaadan naaˈˈanttennan issitoo ‘atto giissiya yarshuwaa’ shiishshidi, he yarshshuwan ammaniyaageeti “merinaa atotettaa” demmanaadan oottidoy ayba ogiyaanakko qonccissiis. (Ibr. 2:17, NW; 9:11, 12) PHauloosi gayttiyo dunkkaanee ‘saluwan deˈiyaabau eesho’ gidiyoogaanne Muusee giddo gidido caaquwaappe ‘aadhdhiya caaquwau’ Yesuusi Giddo gididoogaa qonccissiis. (Ibr. 7:22; 8:1-5) Higgiyaa hegaadan qonccissidoogee, PHauloosa wode Kiristtaanetussi keehippe maaddiis; ha wodiyankka maaddees. He qonccida qofay Xoossay nuussi giigissidobaa goˈˈaa loyttidi akeekanaadan maaddees.

2. Ayhuda Kiristtaaneti Ayhuda gidennaageetuppe aaruwan goˈettidoy aybiinee?

² PHauloosi Roomen deˈiya Kiristtaanetussi xaafido wode, issi issi qofaa gubaaˈiyan deˈiya, Ayhuda gididanne Muuse Higgiyaa tamaaridaageetussi xaafiis. He asati Xoossay immido he Higgiyaa eriyo gishshau, Yihoowanne i geeshshatettau kessido baaso siraataa xeelliyaagan ‘eratettaunne tumau baaso qofaa’ demmiyoogan goˈettidoogaa akeekiyoogaa yootiis. Ayhuda Kiristtaaneti banttappe kase deˈida Ayhudatuugaadan he ‘tumaa baaso qofaa’ akeekiyoogeenne hegaa wozanappe bonchiyoogee, Yihooway ba asaassi immido Higgiyaa erennaageeta kaalettanaadan, tamaarissanaadaaninne etau pooˈissanaadan maaddiis.—Roome 2:17-20 nabbaba.

 YESUUSA YARSHSHUWAU EESHO GIDIDABAA

3. Beni Israaˈeelatu yarshshuwaabaa xannaˈiyoogan ayba ogiyan goˈettiyoo?

³ PHauloosi yootido, tumau baaso qofay ha wodiyan nuunikka Yihoowa halchuwaa akeekanaadan keehippe koshshiyaaba. Muuse Higgiyaa baaso siraatay goˈˈiyoogaa mulekka aggibeenna. Hegaa hassayidi, Higgiyau issi macaraa, giishin dumma dumma yarshshotinne imotati banttana ziqqi oottiya Ayhudata Kiristtoosakko waatidi kaalettidaakkonne Xoossay etappe koyiyoobaa akeekanaadan waatidi maaddidaakko ane beˈoos. Qassi Yihooway ba ashkkaratuppe koyiyoobay mule laamettenna gishshau, yarshshuwaanne imotaa xeelliyaagan Xoossay Israaˈeeletussi immido higgee nu geeshsha oosuwaa nuuni ay keena murutissi oottiyaakko qoranaadan maaddiyoogaa beˈana.—Mil. 3:6.

4, 5. (a) Muuse Higgee Xoossaa asaa ay akeekissidee? (b) Yarshshuwaa xeelliyaagan Xoossay immido higgee aybau eeshoo?

⁴ Muuse Higgiyaa daro macarati eti nagarancha gidiyoogaa qonccissidoogaa beni Ayhudati akeekidoogee erettidaba. Leemisuwau, ahaa bochida ooninne bana geeshshana koshshees. Hegau borssoy baynna issi zoˈo ussiyaa shuhettada xuugettausu. Geeshshiyo uri tunidosappe heezzanttanne laappuntta gallassi a bolli caccafiyo, ‘tunatettaappe geeyiyo haattaa’ giigissanau ussiyo xuuggido bidinttaa shiishshidi wottana bessees. (Qoo. 19:1-13) Asi yelettiiddi nagaraanne polotettaa pacaa laattidi yelettiyoogaa hassayanaadan, issi maccaasiyaa yeliyo wode amarida wodiyau tuna gidada deˈana koshshees; hegaappe guyyiyan ba nagaray atto geetettanaadan yarshshuwaa shiishshausu.—Wog. 12:1-8.

⁵ Galla galla deˈuwan hara daro hanotatunkka nagaraa atto giissanau mehiyaa yarshshana koshshees. Goynniya uri akeekin akeekennan aggin, he yarshshotinne guyyeppe Yihoowa beeta maqidasiyan yarshshidoogeeti Yesuusa polo yarshshuwau “eesho” gididosona.—Ibr. 10:1-10.

YARSHSHANAADAN DENTTETTIYAABAA

6, 7. (a) Israaˈeelati Yihoowayyo yarshshiyoobaa dooriyo wode ay akeekana koshshii, eti yarshshiyo Xoossaa ufayssiya yarshshoy ay bessii? (b) Nuna woygiya oyshaa oychana danddayiyoo?

⁶ Yihoowayyo yarshshiyo ay meheenne qooqe, qohettidaagaa woykko sahettidaagaa gidennan, ubbaban “tilla” gidiyoogee kaallana bessiya maara. (Wog. 22:20-22) Israaˈeelati Yihoowayyo mittaa teeraa woy kattaa immiyo wode he imotay “muruta,” qassi eti gadeppe shiishshiyo katta “ubbaappe lo77iyaagaa” gidana koshshees. (Qoo. 18:12, 29) Muruta gidennabaa yarshshiyoogee Yihoowa ufayssenna. Mehiyaa yarshshuwaa xeelliyaagan keehippe koshshiya giday, Yesuusa yarshshoy borssoy woy qiti baynnaagaa gidiyoogaa, qassi Yihooway asaa naata wozanau babaa ubbaappe aadhiyaanne i keehippe siiqiyoobaa yarshshiyoogaa bessees.—1 PHe. 1:18, 19.

⁷ Issi uri Yihoowa A loˈˈotetta ubbau keehippe nashshiyaaba gidikko, bau deˈiya ubbabaappe aadhiyaabaa ufayttidi yarshshennee? Ay keena muruta yarshsho yarshshanaakko issi uri ba huuphe kuuyees. SHin paci deˈiyo yarshshuwaa yarshshiyoogee he uri saxaa gattiyoogaa, ubba hegaa toohodan xeelliyoogaa bessiyo gishshau, Xoossay hegan ufayttennaagaa i akeekees. (Milkkiyaasa 1:6-8, 13 nabbaba.) Hegee nuuni, ‘Taani Yihoowayyo  oottanaadan denttettiyay aybee? Taani Xoossaayyo oottiyo oosoy ay keena murutakko, qassi ayyo oottanaadan tana denttettidabay aybakko zaaretta xeellana koshshii?’ yaagidi, Xoossaayyo oottiyo oosuwaa xeelliyaagan wotti dentti qoppanaadan oottana koshshees.

8, 9. Israaˈeelati yarshshuwaa yarshshanaadan denttettida qofaa nuuni akeekana koshshiyoy aybissee?

⁸ Issi Israaˈeela asi yarshshiyoy Yihoowa wozanappe galatiyoogaa bessanau ba dosaana gidikko, woy xuuggiyo yarshshuwaagaa mala hanotan Xoossan nashettanau koyidi gidikko, bessiya mehiyaa dooranau metootenna. He uri baayyo deˈiya ubbabaappe loˈˈuwaa Yihoowayyo immanau ufayttees. Ha wodiyan Kiristtaaneti Muuse Higgiyan odettida yarshshuwaa yarshshennaba gidikkokka, eti Yihoowayyo oottanau bantta wodiyaa, wolqqaanne aquwaa goˈettiyoogan yarshshuwaa shiishshoosona. Kiitettida PHauloosi Kiristtaaneti bantta hidootaa ‘asau yootiyoogee,’ qassi ‘loˈˈobaa oottiyoogeenne banttau deˈiyaabaa hara uraara shaakkiyoogee’ Xoossaa ufayssiya yarshsho gidiyoogaa qonccissiis. (Ibr. 13:15, 16, NW) Yihoowa ashkkarati ayyo oottiyoogan etau siyettiyaabay, Xoossay etau immido ubbabau a keehippe galatiyoogaa bessees. Yaatiyo gishshau, ha wodiyan Yihoowayyo oottiyaageetanne beni wode bantta dosan yarshshuwaa shiishshidaageeta hegau denttettidabaynne eta xeelay issi mala.

⁹ Yaatin, issi uri ba mooruwaa gishshau nagaraa yarshshuwaa yarshshana koshshiyoogaa Muuse Higgee yootiyoogaa xeelliyaagan woygana danddayettii? He yarshshoy yarshshana bessiyaaba gidiyo gishshau, issi uri ba dosan he yarshshuwaa shiishshanau metootees giidi qoppeetii? Hegaa mala yarshshuwaa undduudiiddi shiishshana danddayettii? (Wog. 4:27, 28) Issi uri Yihoowaara deˈiya dabbotaa minttanau wozanappe koyiyaaba gidikko, hegaa mala hanotan yarshshenna.

10. Moorettida dabbotaa giigissanau Kiristtaaneti geella oottana koshshiya yarshsho malabay aybee?

¹⁰ Ha wodiyankka hegaadan, qoppennan, erennan woy akeekennan issi Kiristtaaniyaa yiilloyidoogaa akeekana danddayeeta. Intte moorobaa oottidoogaa intte zoriya wozanay yootana danddayees. Yihoowayyo oottiyoogaa xoqqu oottidi xeelliya ooninne ba mooruwaa giigissanau danddayiyo ubbabaa oottanaagee erettidaagaa. Hegaadan oottanau, yiilloyido uray atto gaanaadan wozanappe oychana danddayoos woy wolqqaama nagaraa oottikko, siiqiya cimati ayyaanaaban maaddanaadan koyana danddayoos. (Maa. 5:23, 24; Yaaq. 5:14, 15) Yaatiyo gishshau, nu mala Kiristtaaniyaa bolli woy Xoossaa bolli nagaraa oottikko hanotaa giigissanau nuuni oottana koshshiyaabay deˈees. Hegee yarshshuwaa shiishshiyoogaa mala. Nuuni hegaadan oottiyo wode Yihoowaaranne nu mala Kiristtaaniyaara deˈiya dabbotay zaarettidi giigana danddayees; qassi nu zoriya wozanay qumˈˈennaagaa gidana. Hegee,  Yihoowa ogee aybippenne loˈˈo gidiyoogaa nuuni ammanettanaadan oottees.

11, 12. (a) Issippetetta yarshshuwaa wode hanettiyaabay aybee? (b) Issippetetta yarshshuwaappe nuuni ay tamaarana danddayiyoo?

¹¹ Muuse Higgiyan koyettiya issi issi yarshshoti issippetetta yarshsho geetettoosona. He yarshshoti Yihoowaara sarotettan deˈiyoogaa bessoosona. He yarshshuwaa shiishshiya urinne a soo asay yarshshido mehiyaa ashuwaa moosona; eti miyoy beeta maqidasiyan deˈiya kifiletuppe issuwaana gidennan aggenna. Yarshshuwaa shiishshida qeeseenne beeta maqidasiyan oottiya hara qeeseti he ashuwaappe amaridaagaa ekkoosona. (Wog. 3:1; 7:31-33) Yarshshiya uri he yarshshuwaa shiishshiyoy Xoossaara deˈiya dabbotaa minttanau koyiyo gishshataassa. Hegee yarshshuwaa shiishshida uri, a soo asay, qeesetinne Yihooway ufayssaaninne sarotettan issippe qumaa moosona giyoogaa mala.

¹² Leemiso hanotan Yihoowaara issippe maanau a shoobbiyoogaappe, qassi i he shoobiyaa ekkiyoogaappe aadhiya maati deˈana danddayii? He mokkiya uri hegaa mala bonchettida imattau bau deˈiya ubbabaappe loˈˈuwaa shiishshanau koyiyoogee qoncce. Higgiyan deˈiya tumau baaso qofaappe issuwaa gidida issippetetta yarshshuwaa giigissoy, banttana Medhidaagaara sarotettaaninne mata dabbotan deˈanau koyiya asaa naati ubbay, Yesuusa gita yarshshuwaa baggaara hegaadan deˈana danddayiyoogaa bessees. Ha wodiyan nuuni nuuyyo deˈiya aquwaanne nu wolqqaa nu dosan Yihoowa oosuwau yarshshodan immiyo wode, a dabbo gidana danddayoos.

YARSHSHUWAARA GAYTTIDAAGAN NAAGETTANA BESSIYAABAA

13, 14. Kawuwaa Saaˈooli yarshshana koyido yarshshoy Yihoowa ufayssibeennay aybissee?

¹³ Yihoowa ufayssanau koyikko, Muuse Higgiyan odettida yarshshota suure xeelaynne suure wozanay denttettin shiishshana bessiyoogee erettidaagaa. Gidikkokka, Geeshsha Maxaafay nuuni naagettanaadan leemiso gidiya, Xoossaa ufayssenna yarshshuwaabaakka yootees. I he yarshshotun ufayttennaadan oottiday aybee? Naaˈˈu hanotata ane beˈoos.

¹⁴ Yihooway Amaaleeqatu bolli pirddiyo wodee gakkidoogaa hananabaa yootiya Sameeli Kawuwaa Saaˈoolayyo yootiis. Yaatiyo gishshau, Saaˈooli he morkketanne etau deˈiya mehiyaa muleera xayssana koshshees. SHin Saaˈooli xooni simmidi ba wotaaddarati Amaaleeqatu kawuwaa Agaaga worennaadan oottiis. Saaˈooli Yihoowayyo yarshshanau giidi, mehiyaappekka loˈˈiyaagaa ashshiis. (1 Sam. 15:2, 3, 21) Yaatin Yihooway waatidee? Saaˈooli azazettibeenna gishshau, Yihooway a ixxiis. (1 Sameela 15:22, 23 nabbaba.) Nuuni hegaappe ay tamaariyoo? Nu yarshshoy  Xoossaa ufayssanaadan, nuuni a azazuwaa azazettana koshshiyoogaa tamaaroos.

15. Isiyaasa wode yarshshuwaa shiishshida, issi issi Israaˈeelatu iita oosoy ay qonccissidee?

¹⁵ Isiyaasa maxaafankka hegaa mala leemisoy deˈees. Isiyaasa wode wozanappe gidana xayikkonne Israaˈeelati Yihoowayyo yarshshuwaa yarshshoosona. SHin eta iita oosuwaappe denddidaagan, eta yarshshoy hada gidiis. Yihooway, “Intte yarshshuwaa daroi taayyo ai go77ii?” yaagidi oychiis. Gujjidikka Yihooway hagaadan giis: “Hanno gakkanau intte taayyo shiishshido xuugettida orgge dorssatanne xiikkido mehetu modhdhuwaa yarshshuwaa taani kallaas; korima booratu, dorssa maratunne deeshshatu suuttan taani ufaittikke. . . . Simmi hada yarshshuwaa ehiyoogaa aggite! Intte cuwayiyo ixaanai tana sheneyees.” Eti mooridobay aybee? Xoossay etayyo hagaadan giis: “Intte daro woosaa woossikkokka, taani siyikke; aissi giikko, intte kushee suuttan munaqettiis. Meecettite; geeyite; intte iita oosuwaa ta sinttappe diggite. Iitaa oottiyoogaa aggite.”—Isi. 1:11-16.

16. Xoossay issi ura yarshshuwan ufayttanaadan woy ufayttennaadan oottiyay aybee?

¹⁶ Bantta nagaraappe simmennaageeti yarshshiyo yarshshuwan Yihooway ufayttenna. Gidikkokka, Xoossaa azazuwaara moggottidi deˈanau wozanappe baaxetiyaageetu woosaaninne yarshshuwan i ufayttees. Higgiyaa baaso qofay, eti nagarancha gidiyoogaa, qassi nagaray atto geetettiyoogee etau koshshiyoogaa hegaa mala asati eranaadan oottiis. (Gal. 3:19) Hegaa akeekiyoogee, nagaraappe simmanau wozanappe koyanaadan oottees. Hegaadan ha wodiyankka, tumuppe nagaraa atto giissana danddayiya Kiristtoosa yarshshoy nuuyyo koshshiyoogaa nuuni akeekana bessees. Nuuni hegaa akeekiyaabanne nashshiyaaba gidikko, wozanappe ayyo oottiyoogan yarshshiyo ubbaban Yihooway “ufaittana.”—Mazamure 51:17, 19 nabbaba.

YESUUSA YARSHSHUWAN AMMANIYOOGAA OOSUWAN BESSITE!

17-19. (a) Yesuusa wozuwaa yarshshuwau Yihoowa galatiyoogaa waatidi bessana danddayiyoo? (b) Kaalliya huuphe yohuwan ay beˈanee?

¹⁷ Kiristtaanetu wodiyaappe kase deˈidaageeti Xoossaa halchuwau “eesho” gidiyaabaa xallaa beˈidosona; shin nuuni tuma gididabaa beˈoos. (Ibr. 10:1) Yarshshuwaara gayttida higgee Ayhudati Xoossaara loˈˈo dabbotan deˈanaadan, giishin a wozanappe galatanaadan, banttau deˈiya ubbabaappe loˈˈuwaa ayyo immanau koyanaadaaninne wozoy etau koshshiyoogaa akeekanaadan maaddiya xeelay deˈiyoogeeta gidanaadan minttettiis. Kiristtaane Giriike Geeshsha Maxaafaa Xuufeti qonccissiyoobay, Yesuusa wozuwaa yarshshuwaa baggaara Yihooway nagaray kaalettidobaa merinau xayssanaagaanne ubba nuuni ha wodiyan Yihoowa sinttan loˈˈo zoriya wozanay deˈiyoogeeta gidanaadan oottidoogaa akeekanaadan maaddiis. Yesuusa wozuwaa yarshshoy maalaaliya imota!—Gal. 3:13; Ibr. 9:9, 14.

¹⁸ Nuuni wozuwaa yarshshuwan goˈettanau hegaa akeekiyoogaa xalla gidennan, harabaykka koshshiyoogee qoncce. Kiitettida PHauloosi, “Nuuni ammanuwan xillana mala, Kiristtoosi yaana gakkanaassi higgee nuna naagiyaagaa gidiis” yaagidi xaafiis. (Gal. 3:24) Hegaa mala ammanoy oosuwan qonccees. (Yaaq. 2:26) Yaatiyo gishshau, PHauloosi Muuse Higgee yootiyo erau baaso qofaa demmida, koyro xeetu layttaa Kiristtaaneti he eraa oosuwan bessanaadan minttettiis. Hegaadan oottiyoogan, eta oosoy eti tamaarissiyo, Xoossay kessido siraataara moggiyoogaa bessoosona.—Roome 2:21-23 nabbaba.

¹⁹ Ha wodiyan deˈiya Kiristtaaneti Muuse Higgiyaa naagana koshshennaba gidikkokka, eti Yihoowa ufayssiya yarshshuwaa yarshshana bessees. Nuuni hegaadan oottana danddayiyo ogiyaa kaalliya huuphe yohuwan beˈana.

[Oyshata]

[Sinttaa 19n deʼiya misiliyaa qonccissuwaa]

Yihooway ba ashkkaratuppe koyiyo waannabay mule laamettenna

[Sinttaa 20n deʼiya misiliyaa qonccissuwaa]

Hageetuppe awugaa Yihoowayyo yarshshuutii?

[Sinttaa 21n deʼiya misiliyaa qonccissuwaa]

Yihoowa ufayssiya yarshshuwaa yarshshiyaageeti an nashettoosona