Yihoowau Kumetta Wozanappe Yarshshiyoogaa

“Intte oottiyo ooso ubbaa . . . Godau oottiyoogaadan, wozanappe oottite.”—QOL. 3:23.

ZAARANA DANDDAYIYAAKKO AKEEKA:

Nuuni galla galla oottiyooban Yihoowa waati bonchana danddayiyoo?

Xoossau goynniyoogaara gayttidaagan ayba yarshsho shiishshiyoo?

Nuussi deˈiyaabaa Yihoowayyo immana danddayiyoy ayba ogiyaanee?

1-3. (a) Yesuusi yarshsho gididi hayqqido gishshau, Yihooway nuuni ayba yarshshonne yarshshanaadan koyennee? Qonccissa. (b) Ha wodiyan yarshshiyo yarshshuwaa xeelliyaagan ayba oyshay denddii?

 YESUUSA wozuwaa yarshshoy Muuse Higgee attanaadan oottidoogaa Yihooway koyro xeetu layttan ba asau qonccissiis. (Qol. 2:13, 14) Ayhudati xeetan qoodettiya layttau yarshshido yarshshoti he wodeppe simmin aynne koshshokkonanne maaddokkona. Higgee “Kiristtoosi yaana gakkanaassi . . . naagiyaagaa” gididi oottiyoobaa poliis.—Gal. 3:24.

² Hegaa giyoogee yarshshoy he wodeppe simmin Kiristtaaneti wudennaba giyoogaa gidenna. Hegaappe dumma hanotan, PHeexiroosi, “Yesuus Kiristtoosa baggaara Xoossaa ufaissiya ayyaanaa yarshshuwaa Xoossaayyo” yarshshana koshshiyoogaa yootiis. (1 PHe. 2:5) Hegaa bollikka, PHauloosi bana Yihoowayyo geppida issi Kiristtaanee ba deˈuwan oottiyoonne haniyo ubbabay “yarshsho” geetettana danddayiyoogaa qonccissiis.—Roo. 12:1.

³ Hegaa gishshau, issi Kiristtaanee issi issibaa Yihoowayyo immiyoogan, woy kaseegaappe loyttidi oottanau issi issibaa aggiyoogan Yihoowau yarshshees. Israaˈeelatuppe koyettiyaabaa eriyoogaappe denddidaagan, ha wodiyan nu yarshshoy ubbay Yihoowa ufayssiyaakkonne shaakki erana danddayiyoy ayba ogiyaanee?

GALLA GALLA DEˈUWAN

4. Nuuni galla galla deˈuwan oottiyoobaara gayttidaagan ay hassayana koshshii?

⁴ Nuuni galla galla deˈuwan oottiyoobata Yihoowayyo yarshshiyoobadan qoppiyoogee deexxiyaaba milatana danddayees. So giddon, ooso sohuwaaninne timirtte keettan oottiyoobay, giyaa biyoogee, woy hegaa mala harabay ayyaanaabaara gayttiyaaba milatennan aggana danddayees. Gidikkokka, neeni ne huuphiyaa  Yihoowayyo geppidaba woy matan geppanau koyiyaaba gidikko, galla galla oottiyoobatussi neeyyo deˈiya xeelaabaa qoppiyoogee keehippe koshshees. Nuuni kumetta gallassan Kiristtaane. Geeshsha Maxaafaa baaso siraataa nu deˈuwan oottiyoonne haniyo ubbaban oosuwan peeshshana koshshees. Yaatiyo gishshau, PHauloosi, “Intte oottiyo ooso ubbaa asau gidennan Godau oottiyoogaadan, wozanappe oottite” yaagidi zoriis.—Qolasiyaasa 3:18-24 nabbaba.

5, 6. Nu hanotaynne nu maayoy ay mala gidana bessiyaakko kuuyanaadan nuna maaddana danddayiyay aybee?

⁵ Issi Kiristtaanee galla galla oottiyo ubbabay Xoossau oottiyo geeshsha ooso gidenna. SHin PHauloosi “Godau oottiyoogaadan wozanappe” oottanaadan zorido zoree, nu deˈuwan oottiyo ubbabaa qoppanaadan oottees. Yaatin nuuni ha zoriyaa oosuwan peeshshana danddayiyoy ayba ogiyaanee? Nuuni oottiyoobaynne maayiyo hanotay ubbatoo bonchissiyaagee? Galla galla oottiyoobata oottiyo wode, nu hanotay woy nu maayoy nuuni Yihoowa Markka gidiyoogaa yootanau yeellatanaadan oottanee? Mule hegaadan hananaadan koyokko! Xoossaa sunttaa borissana danddayiya aybanne Yihoowa ashkkarati oottanau koyokkona.—Isi. 43:10; 2 Qor. 6:3, 4, 9.

⁶ “Godau oottiyoogaadan wozanappe” oottanau koyiyoogee nu deˈuwan oottiyo dumma dummabaara gayttiyo ogiyaa ane pilggoos. Hegaadan oottiyo wode, Israaˈeelati Yihoowayyo yarshshiyo yarshsho ubbay etau deˈiya ubbabaappe loˈˈuwaa gidana bessiyoogaa hassayite.—Kes. 23:19.

INTTE DEˈUWAARA GAYTTIYO OGIYAA

7. Kiristtaaneti banttana geppiyoogee woygiyoogee?

⁷ Intte huuphiyaa Yihoowayyo geppido wode, intte kumetta wozanaappe geppidoogee qoncce. Hegee, intte deˈuwan oottiyoonne haniyo ubbaban Yihoowa kaseyana giideta giyoogaa mala. (Ibraawe 10:7 nabbaba.) Hegee loˈˈo kuushsha. Issiban Yihoowa shenee aybakko intte eranau koyiyo wode, qassi a sheniyaara moggiyaabaa oottanau baaxetiyo wode, hegau wurssetta ayfee loˈˈo gidiyoogaa intte beˈidoogee sirissenna. (Isi. 48:17, 18) Xoossaa asay banttana Tamaarissiyaagaa leemisuwaa kaalliyo gishshau, geeshsha qassi ufayttiyaageeta.—Wog. 11:44; 1 Xim. 1:11, NW.

8. Yihooway beni wode yarshshota geeshshadan xeellidoogaa nuuni hassayiyoogee keehippe koshshiyoy aybissee?

⁸ Yihooway Israaˈeelati bau yarshshiyo yarshshuwaa geeshshadan xeellees. (Wog. 6:25; 7:1) “Geeshshatetta” geetetti birshshettida Ibraysxxe qaalaa hara birshshettay, Xoossaayyo zaggettiyoogaa woykko a xallaassa gidiyoogaa giyoogaa. Nu yarshshoy Yihoowa ufayssanaadan alamiyan deˈiya tunabaappe shaahettidaagaanne hegan hambbalaashettibeennaagaa gidana bessees. Yihooway ixxiyo aybanne  dosana danddayokko. (1 Yohaannisa 2:15-17 nabbaba.) Hegee Xoossaa xeelan nuna tunissana danddayiya oonaaranne laggetiyoogaappe woy aybiininne geliyoogaappe haakkana bessees giyoogaa gidiyoogee qoncce. (Isi. 2:4; Ajj. 18:4) Qassikka hegee nu ayfee tunabaa woy shori baynnabaa xeellanaadan paqqadokko, woy hegaa malabaa amottokko giyoogaa.—Qol. 3:5, 6.

9. Issi Kiristtaanee harata loˈˈo hanotan oyqqiyoogee keehippe koshshiyaaba gididoy aybissee?

⁹ PHauloosi ba mala Kiristtaaneta, “Lo77obaa oottiyoogaanne issoi issuwaa maaddiyoogaa dogoppite. Aissi giikko, Xoossaa ufaissiyaagee hegaa mala yarshshuwaa” yaagidi zoriis. (Ibr. 13:16) Yaatiyo gishshau, nuuni ubbatoo haratussi loˈˈobaa oottiyoogaanne eta maaddiyoogaa Yihooway bana ufayssiya yarshshodan xeellees. Harata siiqiyoogeenne etau qoppiyoogee tumu Kiristtaaneta shaakki erissiya malaata.—Yoh.13:34, 35; Qol. 1:10.

GOYNUWAARA GAYTTIDA YARSHSHOTA

10, 11. Nu haggaazuwaunne goynuwau Yihoowa xeelay aybee, hegee nuuni waatanaadan denttettana koshshii?

¹⁰ Nuuni Kiristtaane gidiyoogaadan haratuyyo loˈˈobaa oottiyo keehippe qoncce ogetuppe issoy, ‘nu hidootaabaa asau yootiyoogaa.’ Injjetiya hanota ubbaa markkattanau goˈetteetii? PHauloosi Kiristtaaneti oottiyo, ha keehippe koshshiya oosoy menttershshay Xoossaa sunttaabaa asau markkattiyo “galataa yarshsho” gidiyoogaa yootiis. (Ibr. 10:23, NW; 13:15; Hoo. 14:2) Nuuni Kawotettaa mishiraachuwaa ay keena wodiyau sabbakiyaakko, qassi waatidi kaseegaappe loˈˈo hanotan sabbakanaakko qoppiyoogee maaddana danddayees. Haggaazo SHiiquwaa kifiletuppe daroti nuuni hegaadan oottanaadan maaddoosona. SHin nuuni haggaazuwaa kiyidi gidin kiyennan markkattiyoogee “galataa yarshsho,” giishin nu goynuwaa macara gidiyo gishshau, he yarshshoy nuuni immana danddayiyo ubbabaappe loˈˈo gidana koshshees. Nu hanotay dumma dumma gidikkokka, mishiraachuwaa sabbakiyoogan aattiyo wodee, darotoo nuuni ayyaanaabaa ay keena nashshiyaakko bessees.

¹¹ Kiristtaaneti banttarkka woy haratuura ubbatoo goynniyoogan wodiyaa aattoosona. Yihooway nuuni hegaadan oottana mala koyees. Nuuni Sambbataa bonchennaagee woykko baalaa bonchanau Yerusalaame beennaagee tuma. Gidikkokka, beni bonchiyo he baalatuppe nuuni tamaariyoobi deˈees. Xoossay nuuni hayqqida oosuwaa oottiyoogaa guutta wodiyau  aggidi, a Qaalaa xannaˈanaadan, woossanaadaaninne Kiristtaane shiiqotun shiiqanaadan koyees. Qassi so asau huuphe gidida Kiristtaaneti bantta so asaara issippe goynniyo goynuwaa sintta xeera gididi kaalettana bessees. (1 Tas. 5:17; Ibr. 10:24, 25) Ayyaanaaban nuuni oottiyoobaa xeelliyaagan, ‘Kaseegaappe loˈˈo hanotan Xoossau goynnana danddayiyaanaa?’ giidi nuna oychiyoogee koshshiyaaba.

12. (a) Beni wode goynuwan ixaanaa cuwayiyoogaa ha wodiyan aybin leemisana danddayiyoo? (b) Nu woosay ixaanaa cuwayiyoogaa mala gidana danddayiyoy ayba ogiyaanee?

¹² Kawuwaa Daawiti, “Ta woosai ixaanaa cuwaadan ne sintti shiiqo” yaagidi Yihoowau yexxiis. (Maz. 141:2) Ane issitoo intte woosaabaa, giishin intte ubbatoo woossiyaakko, qassi intte woosay murutakko qoppite. Yihooway siyiyo woosay ufayssiyaanne sawuwaa tonggu giya cuwaadan akko biyo gishshau, Ajjuutaa maxaafay ‘geeshshatu woosaa’ ixaanan leemisees. (Ajj. 5:8) Beni Israaˈeelen Yihoowayyo yarshshiyo sohuwan ubbatoo cuwayiyo ixaanaa azazidoogaadan akeekan giigissana koshshees. Yihooway he cuwayiyo ixaanan ufayttiyoy i kessido maaraadan shiiqiyo wode xallaana. (Kes. 30:34-37; Wog. 10:1, 2) Nuuni wozanappe woossiyo woosay hegaa mala hanotan shiiqiyaaba gidikko, hegaa Yihooway siyiyoogaa ammanettana danddayoos.

IMMIYOOGAANNE EKKIYOOGAA

13, 14. (a) Eppafiroditoosinne Piliphisiyuusa gubaaˈee PHauloosa aybin maaddidonaa, qassi hegan PHauloosau aybi siyettidee? (b) Nuuni Eppafiroditoosanne Piliphisiyuusa gubaaˈiyaa leemisuwaa kaallana danddayiyoy ayba ogiyaanee?

¹³ Alame yuusho oosuwaa maaddanau nuuni immiyo miishshay guutta gidin daro gidin, yarshshuwan leemisettana danddayees. (Mar. 12:41-44) Koyro xeetu layttaa M.Ln, Piliphisiyuusa gubaaˈee PHauloosa koshshiyaaban maaddanaadan Eppafiroditoosa Roome kiittiis. Piliphisiyuusa gubaaˈee a bolli PHauloosau miishshaakka kiittidoogee erettidaagaa. He gubaaˈee hegaappe kasekka PHauloosau kehiis. Eti PHauloosi miishshaabau hirggennan haggaazuwan daro wodiyaa aattanaadan qoppidi, ayyo kehatettaa bessidosona. He imotaa PHauloosi aybidan xeellidee? I hegaa “Xoossaayyo sawuwaa tonggu giyaanne i dosiyo, a ufaissiya yarshsho” yaagiis. (Piliphphisiyuusa 4:15-19 nabbaba.) PHauloosi Piliphisiyuusa gubaaˈiyaa kehatettaa tumuppe nashshiis; Yihoowaykka nashshiis.

¹⁴ Ha wodiyankka hegaadan, nuuni alame yuusho oosuwaa kaafanau immiyo imotaa Yihooway keehippe nashshees. Hegaa bollikka, nuuni Kawotettaara gayttidabaa nu deˈuwan ubbatoo kaseyiyaaba gidikko, asatettaaninne ayyaanaaban nuna koshshiya ubbabaa kunttanau Yihooway qaalaa geliis.—Maa. 6:33; Luq. 6:38.

NASHSHIYOOGAA BESSITE

15. Nuuni Yihoowa galatana koshshiyo gaasotuppe amaridaageeti awugeetee?

¹⁵ Nuuni Yihoowa galatanaadan oottiyaabay qoodiininne wurenna. Nuussi deˈuwaa immido gishshau, tumuppe galla galla a galatana koshshennee? Deˈuwan nuussi koshshiya ubbabaa—qumaa, maayuwaanne keettaa, hegaadankka shemppiyo carkkuwaa immees. Hegaa bollikka, suure eray baaso gidido nu ammanoy nuuyyo hidooti deˈanaadan oottiis. Yihoowa oonatettaanne i nuuyyo oottidobaa gaasuwan, nuuni ayyo goynniyoogeenne galataa yarshshuwaa yarshshiyoogee bessiyaaba.—Ajjuutaa 4:11 nabbaba.

16. Kiristtoosa wozuwaa yarshshuwau galatiyoogaa ayba ogiyan bessana koshshii?

¹⁶ Hagaappe kase deˈiya huuphe yohuwan nuuni beˈidoogaadan, Xoossay asaa naatuyyo immido keehi alˈˈo imotay Kiristtoosa wozuwaa yarshshuwaa. Hegee Xoossay nuna keehippe siiqiyoogaa bessees.  (1 Yoh. 4:10) Hegau galatiyoogaa aybin bessiyoo? PHauloosi hagaadan giis: “Kiristtoosa siiqoi nuna godatees; aissi giikko, issi asi asa ubbaayyo haiqqidoogaa nuuni akeekida. . . . Paxa de7iyaageeti bantta gishshau haiqqidaagaayyoonne qassi haiquwaappe denddidaagaayyo de7anaappe attin, sinttappe bantta huupheyyo de7enna mala, i asa ubbaa gishshau haiqqiis.” (2 Qor. 5:14, 15) Hegee PHauloosi, nuuni Xoossaa aaro kehatettaa nashshiyaaba gidikko, nu deˈuwaa Xoossaanne A Naˈaa bonchanau goˈettana giis giyoogaa mala. Nuuni Xoossaanne Kiristtoosa siiqiyoogaanne galatiyoogaa, azazettiyoogan, qassi sabbakanaunne erissiyo ashkkara oottanau wozanappe koyiyoogan bessoos.—1 Xim. 2:3, 4; 1 Yoh. 5:3.

17, 18. Issoti issoti kaseegaappe aaruwan Yihoowau galataa yarshshuwaa shiishshidoy ayba ogiyaanee? Leemisuwaa yoota.

¹⁷ Kaseegaappe aaruwan muruta yarshshuwaa Xoossaayyo shiishshana danddayeetii? Daroti Yihooway etau oottido loˈˈobaa ubbaa wotti dentti qoppi simmidi, kaseegaappe aaruwan Kawotettaabaa sabbakanau woy ayyaanaaban hara oosuwaa oottanau bantta wodiyaanne oottiyo harabaa giigissidosona. Issoti issoti layttan layttan issi aginau woy daro wodiyau kaafiya aqinye gididi oottoosona; harati qassi kumetta wode aqinye gididi oottoosona. Harati Yihoowa oosuwau goˈettiyo keettata keexxoosona. He oosoti nashshiyoogaa bessiyo loˈˈo oge gidokkonaa? Suure qofay denttettin, giishin nashshiyoogaanne galatiyoogaa bessanau ha oosota oottikko, he geeshsha oosoy Xoossaa ufayssees.

¹⁸ Daro Kiristtaaneti Yihoowa galatanaadan eta wozanay denttettiis. Moreno giyo michiyaa hegeetuppe issinno. Ayyaanaabaara gayttidaagan a oychiyo oyshatussi, naatettaappe doommada kaalliyo Kaatolike haymaanootiyaappenne Isiyaa biitta asaa eraappe zaaro demmanau koyaasu. Gidikkokka, ha naaˈˈaappekka aliya zaaro demmabeykku. A ayyaanaaban koyiyoobaa demmidoy, Yihoowa Markkatuura Geeshsha Maxaafaa xannaˈiyoogaa doommido wode. Morena ba oyshatussi Geeshsha Maxaafaappe zaaruwaa demmido gishshaunne hegee o woppissido gishshau, bau deˈiya wolqqa ubban Yihoowau haggaaziyoogan a wozanappe galatanau koyaasu. A xammaqettido wodiyaappe doommada kaafiya aqinye gida takkada, hanotay giigin sohuwaara kumetta wode aqinye gidaasu. Hegee hanidoy 30 layttappe kase; shin Morena haˈˈikka kumetta wode haggaazawusu.

19. Neeni kaseegaappe aaruwan Yihoowayyo yarshshana danddayiyoy ayba ogiyaanee?

¹⁹ Yihoowayyo ammanettidi oottiya daroti aqinye gididi oottanau danddayennaagee tuma. Yihoowa oosuwan nuuni oottiyoy aybanne gido, ubbaykka a ufayssiya ayyaanaabaa yarshshuwaa shiishshana danddayoos. Nuuni ubbatookka Yihoowa kalˈˈatiyoogaa hassayidi, nu hanota ubban geeshshatettaa maaraa loytti kaallana bessees. Nu ammanoy, polettiiddi deˈiya Yihoowa halchuwan kumetta hanotan ammanettanaadan oottees. Loˈˈo oosuwaa oottiyoogan mishiraachoy aakkanaadan maaddoos. Yihooway nuussi oottido ubbabaa gishshau keehi nashshiyoogan, ubbatoo kumetta wozanappe Yihoowayyo yarshshiyaageeta gidoos.

[Oyshata]

[Sinttaa 27n deʼiya misiliyaa qonccissuwaa]

Yihoowa loˈˈotettay neeni kaseegaappe aaruwan galataa yarshshuwaa shiishshanaadan denttettii?

[Sinttaa 25n deʼiya misiliyaa qonccissuwaa]

Injjetiya hanota ubbaa markkattanau goˈetteetii?