Abrahaama—Siiqiyoogan Erettidaagaa

Abrahaami ba kayyuwaappe minettana danddayibeenna. I siiqiyo a machiyaa Saara hayqqaasu. He cimida bitanee o moogiyo wode, ufayssiya darobaa issippe aattido wodiyaa hassayiis. A wozanay azzanuwan seelettin afuttaa tigiis. (Doo. 23:1, 2) Abrahaami yeellatennan afuxxidoogee, a loˈˈo eeshshatuppe issuwaa, giishin siiquwaa qonccissees.

SIIQOY AYBEE? Siiqoy issi uraara ulottiyoogaa woy ayyo wozanappe qarettiyoogaa. Siiqiya uri ba goˈˈaa aggibayana koshshikkokka, siiqiyo urau ay keena qarettiyaakko ba oottiyooban qonccissees.

ABRAHAAMI SIIQIYOOGAA BESSIDOY AYBA OGIYAANEE? Abrahaami ba soo asaa siiqiyoogaa bessiis. Abrahaami oosoy darido asa gidiyoogee qoncce. Gidikkokka, ba soo asau qofan woy ayyaanaaban koshshiyaabaa kunttiyoogaa mule aggi erenna. Abrahaami ba soo asau huuphe gidiyoogaadan, tumu goynuwan sintta xeera gididi eta kaalettiyoogaa Yihooway yootiis. (Doo. 18:19) Hegaappekka harabay, Yihooway Abrahaama siiquwaabaa qonccissiis. Abrahaama haasayissido wode, Yisaaqa xeelliyaagan “neeni siiqiyo” naˈaa yaagiis.—Doo. 22:2.

Abrahaami siiqiyo machiyaa Saara hayqqidoogan ayyo siyettidabaappekka, a siiquwaabaa akeekana danddayoos. Abrahaami iyyo yeekkiis. I mino attumaasa gidikkokka, azzanidi afuxxanau yeellatibeenna. Abrahaami  minotettaanne qaretaa loˈˈo ogiyan qonccissiis.

Abrahaami Xoossaa siiqiyoogaa bessiis. I ba kumetta deˈuwan hegaa mala siiquwaa qonccissiis. Ayba ogiyan qonccissidee? Geeshsha Maxaafay 1 Yohaannisa 5:3n, “Nuuni Xoossaa siiqiyoogee a azazuwaa naagiyoogaa” yaagiyoogaa akeekennan aggokko. Ha xiqisiyaa maaraadan, Abrahaami Xoossaa siiqiyoogan daro loˈˈo leemiso.

Yihooway azazidobaa Abrahaami darotoo sohuwaara azazettiis. (Doo. 12:4; 17:22, 23; 21:12-14; 22:1-3) Azazoy azazettanau metin aggin, woy i hegaadan oottanaadan Yihooway oychiyoy aybissakko erin erana xayin, Abrahaami azazettiis. Hegaa malabay Abrahaama qofissiyaaba gidenna. I issibaa oottanaadan Xoossay koyikko, eeno giidi oottees. Abrahaami ubba azazuwaa Yihoowa siiqiyoogaa qonccissanau injjetiya hanotadan xeelliis.

NUUNI HEGAAPPE TAMAARIYOOBAY AYBEE? Nuuni harata, ubba qassi nu soo asaa wozanappe siiqiyoogan Abrahaama leemisuwaa kaallana danddayoos. Deˈuwan unˈˈissiyaabay nuuni siiqiyoogeetuyyo wode xayana mala oottanaadan mule paqqadokko.

Qassi nuuni Yihoowa wozanappe siiqana bessees. Hegaa mala siiqoy nu deˈuwan nuna oosuwau denttettana danddayees. Leemisuwau hegee, Xoossaa ufayssanau nu xeelaa, haasayaanne eeshshaa laammanaadan denttettana danddayees.—1 PHe. 1:14-16.

Yihoowa azazuwaa azazettiyoogee ubbatoo metennaba gidennaagee tuma. SHin Abrahaama maaddidaagee, giishin a “ta dabbuwaa” giida Xoossay nunakka maaddanaagaa ammanettoos. (Isi. 41:8) A Qaalaa Geeshsha Maxaafay, ‘I inttena minttana, qassi inttessi wolqqaa immana’ yaagees. (1 PHe. 5:10) Hagee, Abrahaami ammanettido Xoossay gelido, keehippe ufayssiya qaala!

[Sinttaa 10n deʼiya misiliyaa qonccissuwaa]

Attuma Asi Yeekkiyoogee Bessennabee?

Daroti ha oyshaa ee giidi zaaroosona. Metoy gakkido wode yeekkidoogaa Geeshsha Maxaafay yootiyo ammanettida mino asi Abrahaama xalla gidennaagaa eriyo wode eti garamettana danddayoosona. Yooseefi, Daawiti, kiitettida PHeexiroosi, Efisoona gubaaˈiyaa cimatinne ubba Yesuusikka yeekkidoogaa Geeshsha Maxaafay yootees. (Doo. 50:1; 2 Sam. 18:33; Luq. 22:61, 62; Yoh. 11:35; Oos. 20:36-38) Attuma asay yeekkiyoogee bessennaba gidiyoogaa Geeshsha Maxaafay yootennaagee qoncce.