Abrahaama—Xalatettan Erettidaagaa

Abrahaami ba soo asaynne ba ashkkarati Kanaane baanau giigettiyaageeta xeellees. (Doo. 12:1-5) Abrahaami bantta deˈuwau koshshiyaabau a yaynniya he cora asaa xeelliyo wode, eta ayssanau bau deˈiya aawatettaa loyttidi akeekees. I erenna biittan aquwaaban etau koshshiyaabaa waatidi kunttanee? Hegee aaho hentta gadee, aradda biittaynne daro haattay deˈiyo dure katamaa Uuran metennabeeshsha? I he biyo biittan sahettikko woy hayqqikkoshin? A soo asau koshshiyaabaa kunttanay oonee? Abrahaami hegaa malabau hiriggidaba gidiyaakkonne, he hirggay a guyye giissanaadan paqqadibeenna. I tangguwaa ekkanau, giishin ayba gidikkokka, Xoossaa azazuwaa azazettanau murttiis; hegee tumu xalatettaa bessiyaaba.

XALATETTAY AYBEE? Xalatettay, minonne zirxxa gidiyoogaa, giishin yashshan kokkoriyoogaappe woy yooqiyooqiyoogaappe dummatiya eeshsha. Xala gidiyoogaa giyoogee nuuni mule yayyokko giyoogaa gidenna. Hegaappe dumma hanotan, Xoossay xalatettaa immido uri yayyiyaaba gidikkokka tangguwaa ekkees.

ABRAHAAMI XALA GIDIYOOGAA BESSIDOY AYBA OGIYAANEE? Abrahaami daro asaagaappe dummabaa oottanau dooriis. Abrahaami diccidoy asay daro eeqa xoossatuyyo goynniyo heeraana. Gidikkokka, hara asay woyganddee giidi yayyiyoogee, i eriyo suure gididabaa oottiyoogaappe guyye giissanaadan paqqadibeenna. Hegaappe dumma hanotan, Abrahaami xalan ba deˈuwan hara asaagaappe dummabaa oottiis; giishin “Ubbaappe Xoqqiya,” issi Xoossaa Yihoowa xalaalau goynnanau dooriis.—Doo. 14:21, 22.

Abrahaami aquwaabaa koshshaappe tumu Xoossau goynniyoogaa kaseyiis. I Uuran deˈiya ishalo deˈuwaa aggidi, aquwaassi a koshshiyaabaa Yihooway kunttanaagaa wozanappe ammanettidi, asi baynnasaa biis. Aqi peˈidi, Abrahaami Uuran ishaluwan deˈido deˈuwaabaa qoppana danddayiyoogee tuma. SHin ayyoonne a soo asau koshshiyaabaa Yihooway ubbatoo kunttanaagaa Abrahaami ammanettiis. Abrahaami ba deˈuwan Yihoowa ubbaappe xoqqu ootti xeellidi, Xoossaa baxuuxiyoogan a azazuwaa azazettanau xaliis.

NUUNI HEGAAPPE TAMAARIYOOBAY AYBEE? Nu heeran deˈiya asay Yihoowayyo azazettana xayikkokka, nuuni xalan azazettiyoogan Abrahaama leemisuwaa kaallana danddayoos. Leemisuwau, Xoossaa Yihoowa ammaniyo ammanuwau exatiyaageetu bolli, etau loˈˈobaa qoppidi, laggetinne dabboti yedetaa gattana danddayiyoogaa Geeshsha Maxaafay yootees. (Yoh. 15:20) Gidikkokka, nuuni Yihoowabaa tamaaridobaa ammaniyo wode, harata bonchiyoogaa bessiya hanotan nu ammanuwau exatoos.—1 PHe. 3:15.

 Xoossay banan ammaniyaageetussi koshshiyaabaa kunttanau gelido qaalankka ammanettana danddayoos. Hegaadan ammanettiyoogee nu deˈuwan aquwaabaa gidennan ayyaanaabaa kaseyanau xalanaadan oottees. (Maa. 6:33) Issi keettaa asay hegaadan waatidi oottidaakko akeeka.

Daginne Beeka, etau naaˈˈu guutta attuma naati deˈiyaaba gidikkokka, Geeshsha Maxaafaa mishiraachuwaa sabbakiyaageeti keehippe koshshiyo biitta baanau koyidosona. Hegaa xeelliyaagan akeekan pilggidinne mintti woossidi, bantta qoppido sohuwaa baanau qofaa qachidosona. Daagi hagaadan giis: “Nuuyyo hanotay waananaakko erennan naata ekkidi baanau xalana koshshiis. SHin nuuni hegaadan oottanau koyro qoppiyo wode, Abrahaamanne Saari leemisuwaabaa tobbida. Eti ayba ogiyan Yihoowan ammanettidaakko, qassi i eta mule aggibeennaagaa qoppiyoogee nuna tumuppe keehi maaddiis.”

Eti asa biittan deˈido deˈuwaabaa Daagi, “Nuuni daro ogiyan anjjettida” yaagiis. I hagaadan giidi qonccissiis: “Nu deˈoy kaseegaappe keehi sima gidiyo gishshau, sabbakiyoogan, issoy issuwaara haasayiyoogaaninne naatuura kaaˈiyoogan, so asay gallassaappe dariya baggaa issippe aattoos. Laˈatettaa demmidoogan nuussi siyettiyaabaa qonccissana danddayokko.”

Hegaa mala kuushshaa kuuyana danddayiyay ubba asaa gidennaagee tuma. SHin Xoossay nuna maaddanaagaa ammanettidi ayyo goynniyoogaa kaseyiyoogan, nuuni ubbay Abrahaama leemisuwaa kaallana danddayoos. Hegaadan oottiyo wode, “nuuni xalidi, ‘Godai tana maaddiyaagaa; taani yayyikke’” gaanaadan Geeshsha Maxaafay zoriyo zoriyaa oosuwan peeshshoos.—Ibr. 13:5, 6.

[Sinttaa 7n deʼiya misiliyaa qonccissuwaa]

Xoossau Yayyiya Alˈˈo Machiyo

Saara ammanuwan erettiya bitaniyaa gelaasu. SHin Xoossau yayyiya ha maccaasiyaa ba huuphe loˈˈo leemiso gidiyaabaa oottaasu. Saara Xoossau yayyiya maccaasati kaallana koshshiya loˈˈo leemiso gidiyoogaa, Geeshsha Maxaafay heezzutoo yootees. (Isi. 51:1, 2; Ibr. 11:11; 1 PHe. 3:3-6) Geeshsha Maxaafay ha loˈˈo maccaaseebaa yootiyoobay guutta gidikkokka, iyyo loˈˈo eeshshay deˈiyoogaa nuuni akeekana danddayoos.

Leemisuwau, Uura katamaappe kiyidi baanaadan Xoossay azazidoogaa Abrahaami Saariyyo yootiyo wode, iyyo aybi siyettidaakko qoppa. Eti awa biyaakko, qassi aybissi biyaakko erennaagee o qofissidee? Aquwaaban banttau koshshiyaabau hirggadee? A ba laggetanne bantta soo asaa awude beˈanaakko, ubba mule beˈennan attanaakko erennan, eta aggada biyoogaa qoppada azzanadee? A hegaa malabaa qoppidoogee sirissenna. Gidikkokka, azazettido gishshau Yihooway bana anjjanaagaa ammanettada, ba dosan aggada baasu.—Oos. 7:2, 3.

Saara Xoossau azazettiya ashkkara gidiyoogaa bolli, keehippe loˈˈo macho. Saara so asaa ayssanau ba azinaara keesettiyoogaappe, a keehippe bonchaasu; so asaa i kaalettiyo wode siiquwan kaafaasu. Hegaadan oottiyoogan, ba loˈˈo eeshshan bana puulayaasu woy alleeqettaasu.—1 PHe. 3:1-6.

Hegaa mala eeshshay ha wodiyan deˈiya machota maaddana danddayii? Aqo deˈuwan 30 layttaa ufayssan deˈida Jiilo giyo maccaasiyaa, “Maayettennabaa yayyennan ta azinau yootananne ta qofaa qonccissana koshshiyoogaa Saari leemisuwaappe tamaaraas” yaagaasu. A gujjada hagaadan gaasu: “Hegaadankka, so asau huuphe gidiyoogaadan issibaa wurssettan kuuyana koshshiyay ta azinaa. I kuuyobare, he kuushshay polettanaadan taayyo danddayettiyaabaa ubbaa oottana koshshees.”

Nuuni Saarippe tamaariyoobatu giddon i leemisuwaa kaallanaadan keehi denttettiyaabay, Saara meraa keehippe loˈˈiyaaba gidikkokka, hegee a otorettanaadan oottana mala paqqadabeennaagaa gidennan aggenna. (Doo. 12:10-13) A otorettiyoogaappe, bantta deˈuwan iita wodiyaaninne loˈˈo wodiyan ubban ba huuphiyaa kawushshada Abrahaama kaafaasu. Abrahaaminne Saara ammanettiya, bantta huuphiyaa kawushshiyaanne siiqettiya, qassi issoy issuwau tumuppe anjjo demissida azinanne macho gidiyoogee sirissenna.