Abrahaami Oonee?
Abrahaami Oonee?
ALAMIYAA haymaanootetun aagaappe aaro sohoy deˈiyoogeeti amaridaageeta. Ayhudati, Isilaamatinne Kiristtaaneti bonchiyo Abrahaamee, * “Geeshsha Maxaafan keehi erettidaagaa,” qassi “ammanuwan gita leemiso” geetettiis. Geeshsha Maxaafay Abrahaama ‘Xoossaa ammaniya ubbatuyyo aawa’ yaagees.—Roo. 4:11.
Asay Abrahaama hegaadan keehippe bonchiyoy aybissee? Issibay, Geeshsha Maxaafan Xoossaa dabbo geetettiday Abrahaama xalla.—Isi. 41:8; Yaaq. 2:23.
SHin hara bagaara, Abrahaami nu mala asa. Nuna gakkiya metuwaappe daroy a gakkidaba gidikkokka, i he metuwan gencciis. I genccidoy ayba ogiyaanakko erana koyay? Ha keehippe erettida bitaniyaabaa Geeshsha Maxaafay ay qonccissiyaakko akeeka.
I Kase Deˈido Hanotaa
Abrahaami 2018n K.K. yelettidi, Uura kataman dicciis. (Doo. 11:27-31) Uuri keehi gitanne dure katama. He katamay eeqa goynoy kumido katama. Abrahaama aawaa Taari dumma dumma eeqatuyyo goynniyaageetuppe issuwaa gidennan aggenna. (Yaas. 24:2) Gidikkokka, Abrahaami deˈoy baynna eeqa xoossatuyyo goynniyoogaappe Yihoowa * xallau goynnanau dooriis.
Abrahaami hegaadan kuuyanaadan denttettiday aybee? I Nohe naˈaa Seemi hayqqanaappe 150 layttaa kasetidi yelettiis. I hegaa keena layttaa baappe bayratiya uraara matattidi deˈidaba gidikko, hegee a ayba ogiyan maaddana danddayii? Abrahaami eti Bashsha Haattaappe attido hanotaabaa Seemappe siyennan aggenna. Seemanne eta soo asaa he Bashshaappe ashshida Xoossaa, Yihoowayyo goynniyoogee keehippe koshshiyoogaakka Abrahaami siyennan aggenna.
Abrahaami Seemappe siyidaba gidin woy hara baggaara eridaba gidin, tumu Xoossaabaa siyidobaara moggiyaabaa oottiis. ‘Wozanaa paacciya’ Yihooway Abrahaama wozanan issi loˈˈobaa beˈidi, i kaseegaappe loˈˈo asa gidanaadan maaddiis.—Lee. 17:3; 2 Odi. 16:9.
A Deˈuwaa
Abrahaami darotoo ba deˈuwan metootidaba gidikkokka, hada deˈo gidennan, oosoy darido ufayssiya deˈo deˈiis. A gakkidabatuppe amaridaageetu xallaa ane beˈoos.
▪ Abrahaami Uuran deˈiyo wode, ba yelettido biittaa aggidi, I bessiyo hara biitta baanaadan Xoossay ayyo yootiis. Abrahaaminne Saara ubbabaa, giishin eti awa baanaakko woy eti baanaadan Xoossay aybissi azazidaakko erennaba gidikkokka, ayyo azazettidosona. Guyyeppe Abrahaaminne Saara Kanaane biitta bi dunkkaanidi, hayqqana gakkanaashin yan imattadan deˈidosona.—Oos. 7:2, 3; Ibr. 11:8, 9, 13.
▪ Abrahaameenne Saara naˈa yelennan deˈishin, Yihooway Abrahaamappe gita kawotettaa kessanau qaalaa geliis. I saˈaa asay ubbay Abrahaama baggaara anjjettanaagaakka yootiis. (Doo. 11:30; 12:1-3) Yihooway he gelido qaalaa polanaagaa guyyeppe minttidi yootiis. I a zerettay saluwaa xoolinttiyaadan corattanaagaa Abrahaamayyo yootiis.—Doo. 15:5, 6.
▪ Layttay Abrahaamayyo 99, qassi Saariyyo 90 heera gidido wode, eti attuma naˈa yelanaagaa Yihooway qaalaa geliis. Hegee asa xeelan danddayettiyaaba milatenna, shin Abrahaaminne Saara Yihoowayyo “danddayettennabi” baynnaagaa sohuwaara akeekidosona. (Doo. 18:14) Issi layttappe guyyiyan, Abrahaamayyo layttay 100 gidido wode, i Yisaaqa giidi sunttido naˈaa yelliis. (Doo. 17:21; 21:1-5) Yisaaqa baggaara asaa naatuyyo gita anjjoy yaanaagaa Xoossay qaalaa geliis.
▪ Daro layttappe guyyiyan issi meeze gidennabaa Abrahaami oottanaadan Yihooway oychiis. Yisaaqi machibeennabanne naˈa yelibeennaba gidikkokka, Yihooway Abrahaami ba siiqiyo naˈaa yarshshanaadan oychiis. Ba naˈay hayqqanaagaa qoppiyoogee a unˈˈissidaba gidikkokka, Abrahaami Yihoowau azazettidi ba naˈaa yarshshanau giigiis. Xoossay ba gelido qaalaa polanau, koshshiyaaba gidikko, Yisaaqa hayquwaappe denttanau ayyo wolqqay deˈiyoogaa Abrahaami minttidi ammaniis. (Ibr. 11:19) Abrahaami ba naˈaa yarshshana hanishin, Xoossay kelttiyaa gelidi Yisaaqa ashshiis. I Abrahaami wozanappe azazettido gishshau nashshiis. Yaatidi Yihooway, Abrahaamayyo kase gelido qaalaa zaarettidi yootiis.—Doo. 22:1-18.
▪ Abrahaami 175 laytta deˈidi hayqqiis. Geeshsha Maxaafay i “daro wodiyaa de7idi, lo77o ceeggidi” hayqqidoogaa yootees. (Doo. 25:7, 8) Yaatiyo gishshau, Xoossay Abrahaamayyo qaalaa gelido harabay, giishin i ceeggidi saro hayqqanaagaa yootidoogee polettiis.—Doo. 15:15.
I Laatissidobaa
Abrahaami beni wode deˈida, haymaanootiyan woy taarikiyan erettida asa xalla gidenna. A taarikee, ha wodiyan nu ubbaayyo keehippe koshshiya loˈˈo leemiso. (Ibr. 11:8-10, 17-19) Abrahaami ba deˈuwan qonccissido loˈˈo eeshshatuppe oyddata ane beˈoos. I keehippe erettiyo eeshshan, giishin ammanuwan doommana.
[Tohossa qofata]
^ MENT. 2 Abrahaami kase Abraama geetettees; a machiyaa qassi Saarayo geetettausu. Guyyeppe Xoossay Abraama sunttaa “Daro kawotettaayyo Aawa” giyo birshshettay deˈiyo Abrahaama giidi laammiis; qassi Saarayi sunttaa “Kawo Biyyiyo” giyo birshshettay deˈiyo Saaro giidi laammiis. (Doo. 17:5, 15) Ha huuphe yohotun Abrahaamanne Saaro geetettiya eta sunttaa goˈettoos.
^ MENT. 6 Yihoowa giyaagee Geeshsha Maxaafan qonccida Xoossaa sunttaa.
[Sinttaa 4n deʼiya saaxiniyaa]
Geeshsha Maxaafaa Taarikiyan Xoqqa Sohoy Imettido Bitaniyaa
Doomettaabaa maxaafay koyro tammu shemppotun, Aabeela, Heenookanne Noha gujjin ammanettida amarida asatu taarikiyaa yootees. SHin kaalliya 15 shemppoti daro baggi issi ura, giishin Abrahaama deˈuwaara gayttidabaa yootoosona.
Hegaa bollikka, Geeshsha Maxaafan keehippe koshshiya qofatuppe daroti koyro xaafettidoy Abrahaameera gayttidaagaana. Leemisuwau, Abrahaama deˈuwaabaa yootiya taarikiyan . . .
▪ Xoossay ba ashkkaratuyyo Gonddalle woykko Naagiyaagaa gidiyoogee koyro odettidoogaa akeekoos.—Doo. 15:1; qassi Zaarettido Wogaa 33:29, Mazamure 115:9nne Leemiso 30:5 xeella.
▪ Xoossan ammaniyoogaa xeelliyaagan koyro odettidoogaa akeekoos.—Doo. 15:6.
▪ hananabaa yootiyaagaa giya qaalay koyro odettidoogaa akeekoos.—Doo. 20:7.
▪ issi uri ba naˈaa siiqiyo siiquwaabay koyro odettidoogaa akeekoos.—Doo. 22:2.
