Armmageedoona—Issoti Issoti I Ayba Giyoonaa?

“He iita ayyaanati kawota Ibraisxxe qaalan Armmageedoona giyo sohuwaa shiishshidosona.”—AJJ. 16:16.

“ARMMAGEEDOONA” giya qaalaa siyiyo wode neeni ay qoppay? Wolqqaama bashshaabaa qoppennan aggakka. Ha qaalay Geeshsha Maxaafan issisaa xallan deˈiyaaba gidikkokka, televizhiiniyaaninne eraadooniyan darotoo odettees; qassi haymaanootiyaa kaalettiyaageetikka hegaabaa darotoo yootoosona.

Armmageedoona xeelliyaagan daro asay qoppiyoobay Geeshsha Maxaafay tamaarissiyoobaara moggii? Hegaa zaaruwaa eriyoogee keehippe koshshiyaaba. Aybissi giikko, Armmageedoona xeelliyaagan tumaa eriyoogee, neeni yayyana bessennabaa yayyennaadaaninne sinttanaabaa loˈˈobaa hidootanaadan maaddees; qassi Xoossaa xeelliyaagan suure ogiyan qoppanaadan maaddees.

Kaallidi deˈiya heezzu oyshata qoppa; qassi Armmageedoona xeelliyaagan daro asay qoppiyo qofaa Geeshsha Maxaafay tumuppe tamaarissiyoobaara geeddarssa.

  1. ARMMAGEEDOONI ASI EHIYO BASHSHEE?

Oduwaa xaafi giigissiyaageeti, qassi pilggiyaageeti asay ehiyo bashshaa qonccissanau, darotoo “Armmageedoona” giya qaalaa goˈettoosona. Leemisuwau, Koyro Alamiyaa Olaynne Naaˈˈantto Alamiyaa Olay Armmageedoona geetettiis. He olatuppe simmin, Amarkkaynne Sooveete aysoy atomike ola miishshaa issoy issuwaa bolla tokkosoosona giidi asay yayyiis. Televizhiiniyaanne eraadooniyaa malaban hegee niyukileere ola miishshaa tokkosiyoogan denddiya Armmageedoona geetettiis. Ha wodiyan, heeray hambbalaashettiyoogee saˈaa carkkuwaa hanotay laamettanaadan oottees gi yayyiya pilggiyaageeti, hegee laamettiyoogan denddiya Armmageedooni mata wode yaanaagaa yootoosona.

Eti giyoobay qonccissiyoobaa: Saˈaanne an deˈiya mereta ubbaa sinttappe gakkanabaa xeelliyaagan aawatiya waannati asaa naata. Kawotettati eratettan tangguwaa ekkana xayikko, saˈaa merinau qohiyaabay gakkana.

Geeshsha Maxaafay tamaarissiyoobaa: Asay saˈaa xayssanaadan Xoossay paqqadenna. Yihooway * saˈaa “coo” medhibeennaagaa nuuni ammananaadan oottiyaabaa Geeshsha Maxaafay yootees. I saˈaa ‘asi de7anaadan’ medhiis. (Isi. 45:18) Xoossay asay saˈaa muleera xayssanaadan paqqadenna; hegaappe, ‘saˈaa xayssiyaageeta xayssana.’—Ajj. 11:18.

2. ARMAAGEEDOONI MERETAY GATTIYO DAFABEE?

Meretay gattiyo wolqqaama daafabaa qonccissanau oduwaa xaafi giigissiyaageeti issi issitoo “Armmageedoona” giya qaalaa goˈettoosona. Leemisuwau, 2010n ‘Heytin denddida “Armmageedoonabaa”’ issi iripporttee yootiis. He iripporttee yootidobay waayiyaanne qohuwaa gattidi, qassi asaa woridi he biittaa shabbirida wolqqaama biittaa qaattaabaa. Iripporttiyaa yootiyaageetinne pilmiyaa giigissiyaageeti hanettidaba xallau gidennan, sinttappe hanana giidi eti hirggiyoobaukka he qaalaa goˈettoosona. Leemisuwau, saluwaappe yiya xoolintte malabay (asteroid) saˈaara domˈˈettiyo wode gattana giidi qoppiyo qohuwaa qonccissanau “Armmageedoona” giya qaalaa goˈettoosona.

Eti giyoobay qonccissiyoobaa: Armmageedooni suure asaakka shaakkennan woriya, halchennan haniyaaba. Neeni hegaappe naagettanau oottana danddayiyoobi baawa.

Geeshsha Maxaafay tamaarissiyoobaa: Armmageedooni asa shaakkennan xayssiya, halchennan haniyaaba gidenna. Hegaappe dumma hanotan, Armmageedoonan xayanaageeti iita asatu xalaala. Geeshsha Maxaafay, mata wode ‘iitaa oottiyaageeti deˈennaagaanne neeni eta koyiyaakkokka eti beettennaagaa’ yootees.—Maz. 37:10.

3. XOOSSAY ARMMAGEEDOONAN SAˈAA XAYSSANEE?

Haymaanootiyaa kaalliya daro asati saˈay xayanaadan oottiya wurssetta olay iitatunne loˈˈotu giddon denddana giidi ammanoosona. Prinsten Sarvey Riserch Asoshiyetis giyo dirijjitee Amarkkaa biittan xinaatiyau oychido gastta asaappe xeetaappe 40 kushee alamee “Armmageedoona olan” xayanaagaa ammanees.

 Eti tamaarissiyoobay qonccissiyoobaa: Asaa naati saˈan merinau deˈanaadan halchettibeenna, saˈaykka merinau deˈanau giigibeenna. Xoossay asaa naati ubbay bantta deˈo layttan issi wode hayqqanaadan qoppidi medhiis.

Geeshsha Maxaafay tamaarissiyoobaa: Xoossay ‘saˈaa a baasuwaa bolli essidoogaanne i meri merinaukka qaaxxennaagaa’ Geeshsha Maxaafay geeshshidi yootees. (Maz. 104:5) Saˈan deˈana asaa xeelliyaagan Geeshsha Maxaafay, “Xilloti biittaa laattananne yan merinau de7ana” yaagees.—Maz. 37:29.

Armmageedoona xeelliyaagan daro asay qoppiyoobay Geeshsha Maxaafaara moggennaagee qoncce. Yaatin, hegaa xeelliyaagan tumay aybee?

[Tohossa qofaa]