Armmageedoona Xeelliyaagan Tumaa

“Iita ayyaanati . . . sa7aa kawota ubbaa . . . Ibraisxxe qaalan Armmageedoona giyo sohuwaa shiishshidosona.”—AJJ. 16:14, 16.

ARMMAGEEDOONA giya qaalay soho suntta. Gidikkokka, he sohoy ha saˈan deˈida soho milatenna.

Yaatin, “Armmageedoona” giya qaalay tumuppe ayba qofa qonccissii? He qaalay darotoo olaa mala hanotaara gayttidaba gidiyoy aybissee?

Armmageedoona Giyo Sohuwaa SHiishshidosona

Har–Mageedon giya Ibraysxxe qaalaa birshshettay “Magiddo Deriyaa” giyoogaa. He sunttan xeesettiya deree hanno gakkanaashin deˈennaba gidikkokka, Magiddo giyo sohoy deˈees. He sohoy beni Israaˈeelati deˈiyo sohuwaappe arggo baggan huuphessan yaara kanttiya naaˈˈu gita ogeti gayttiyoosan deˈiya, keehi goˈˈiya soho. He sohuwaa matan Xoossaa asaa goˈˈida daro olati denddidosona. Yaatiyo gishshau, Magiddo giya sunttay olaara gayttidi erettiis. *

SHin, Magiddo giya qaalay he sohuwan ayba olati denddidaakko qonccissiyaaba gidennan, he olati denddidoy aybissakko qonccissiyaaba. Magiddoy Xoossaa Yihooway Israaˈeelatuyyo immido Hidootaa Biittan deˈiya soho. (Kes. 33:1; Yaa. 12: 7, 21) Oliya asatuppe Israaˈeelata ashshanau Xoossay qaalaa  geliis, qassi hegaadankka oottiis. (Zaa. 6:18, 19) Leemisuwau, Kanaanetu Kawuwaa Yaabina olanchatinne a olanchatu gadaawaa Sisaari Israaˈeelata olanau yiido wode, Yihooway eta maalaaliya ogiyan ashshidoy Magiddoona.—Daan. 4:14-16.

Yaatiyo gishshau, “Armmageedoona” giya qaalay leemiso hanotan gitabaa qonccissees. He qaalay naaˈˈu wolqqaama citati olettiyoogaara gayttidaba.

Seexaanaynne dayddanttati, saˈaa kawotettati bantta olanchata shiishshanaadan mata wode denttettanaagaa Ajjuutaa maxaafan deˈiya hiraagay yootees; yaatiyoogan eti Xoossaa asaanne eta oosuwaa keehippe eqettidi denddana. He denddidaageeta Xoossay xooniyo wode, he olan miilooniyan qoodettiya asay hayqqana.—Ajj. 19:11-18.

Geeshsha Maxaafay “maariyaagaa, siiquwan kumidaagaanne hanqquwaassi e[e]sotennaagaa” gidiyoogaa yootiyo Xoossay hegaa keena daro asaa woriyoy aybissee? (Nah. 9:17) Xoossay oottanabaa akeekanau nuuni heezzu oyshata zaarana koshshees: (1) Olaa doommiyay oonee? (2) Xoossay olettiyoy aybissee? (3) He olay saˈaunne an deˈiya asau demissana merinaa goˈˈay aybee?

1. OLAA DOOMMIYAY OONEE?

Armmageedoona olay Xoossay denttiyo ola gidenna. Hegaappe dumma hanotan, Xoossay loˈˈo asaa eta xayssanau koyiyaageetu kushiyaappe ashshanau olettees. He olaa doommiyaageeti alamiyaa haariya, “sa7aa kawota ubbaa.” Eti olaa denttiyoy aybissee? Seexaanay ashangguluutedan ba koyidoogaadan oottiyo kawotetta dirijjitetinne wotaaddara dirijjiteti Xoossaa Yihoowayyo goynniyaageeta xayssanaadan denttettiyo gishshataassa.—Ajj. 16:13, 14; 19:17, 18.

Ha wodiyan issi issi biittan asay laˈatettan haasayiyoogaa, qassi laˈatettan haymaanootiyaa kaalliyoogaa xoqqu oottidi xeelliyoogaa qoppiyo wode, kawotettati haymaanootiyaara gayttida ay oosonne zaggidi teqqanau woy ubba muleera digganau malanaagee qoppanau danddayettennaba milatana danddayees. Gidikkokka, 20tta xeetu layttan hegaa malabay haniis; haˈˈikka haniiddi deˈees. * Gidoppe attin, Armmageedoona olay denddanaadan  oottiya qohoy hegaappe kase gakkida qohuwaappe, guuxxiis giishin naaˈˈu waanna allaalletun dummatees. Koyruwan, he qohoy alame yuushuwan gakkana. Naaˈˈanttuwan, Yihooway hegaappe kase ekkido tanggo ubbaappe keehi wolqqaama tangguwaa ekkidi kushiyaa zaarana. (Erm. 25:32, 33) Geeshsha Maxaafay he olaa, ‘Ubbaappe Wolqqaama Xoossaa gita gallassaa olaa’ yaagees.

2. XOOSSAY OLETTIYOY AYBISSEE?

Yihooway baayyo goynniyaageeti sarotettan deˈanaadaaninne bantta morkketa siiqanaadan tamaarissees. (Mik. 4:1-3; Maa. 5:43, 44; 26:52) Yaatiyo gishshau, eti he wolqqaama qohoy banttana gakkiyo wode teqqanau olettokkona. Xoossay ba asaa ashshanau tangguwaa ekkennaba gidiyaakko, eti muleera xayana shin. Hegaadan haniyaakko, Xoossaa Yihoowa sunttay moorettees. Olaa denttiyaageeti A asaa xayssiyaaba gidikko, hegee Yihooway siiqenna, suurebaa oottenna woykko ayyo wolqqi baawa giidi asay qoppanaadan oottees. Hegee hanana danddayennaba.—Maz. 37:28, 29.

Xoossay oonanne xayssanau koyenna; hegaa gishshau, i asay naagettanaadan ba oottanabaa kasetidi yootees. (2 PHe. 3:9) I Geeshsha Maxaafan xaafissido taarikiyaa baggaara, beni ba asay qohettiyo wode i kushiyaa zaaridoogaa ubba asau akeekissees. (2 Kaw. 19:35) Sinttappe Seexaanaynne i ba koyidobaa ootissiyo asati Xoossaa asaa bolli denddiyo wode, Yihooway he wodiyankka ba asaa xayssanau koyiyaageetu bolli tangguwaa ekkanaagaa Geeshsha Maxaafay yootees. Yihooway iitata xayssanaagaa Xoossaa Qaalay daro wodiyaappe kase yootiis. (Lee. 2:21, 22; 2 Tas. 1:6-9) He wode, olettiyaageeti Ubbaa Danddayiya Xoossaara olettiyoogaa akeekanaagee sirissenna.—Hiz. 38:21-23.

3. HA OLAY DEMISSANA MERINAA GOˈˈAY AYBEE?

Armmageedoona olay miilooniyan qoodettiya asay attanaadan oottees. Hegee saˈan sarotettay yaana wodiyau doometta.—Ajj. 21:3, 4.

Ajjuutaa maxaafay he olaappe attana, qooday hagaa keena geetettibeenna, “zawai bainna daro” asaabaa yootees. (Ajj. 7:9, 14) He asati Xoossaa kaaletuwaa kaallidi, Yihooway koyro halchidoogaadan saˈaa Gannate oottiyo oosuwan maaddana.

Xoossaa asaa bolli he qohoy awude gakkanaakko eriyoo?

[Tohossa qofata]

[Sinttaa 6n deʼiya misiliyaa qonccissuwaa]

Xoossaa Yihooway beni wode ba asaa ashshiis

[Sinttaa 7n deʼiya misiliyaa qonccissuwaa]

Yihooway Armmageedoona olaa wodekka ba asaa ashshana