Naˈay Aawaa Erissanau Ufayttees
Naˈay Aawaa Erissanau Ufayttees
“Na7aappenne Na7ai Aawaa bessanau koyiyo asatuppe attin, harai ooninne Aawai oonakko erenna.”—LUQ. 10:22.
WOYGADA ZAARUUTII?
Yesuusi ooppenne aaruwan Aawaa erissana danddayidoy aybissee?
Yesuusi ba Aawaa haratussi erissidoy ayba ogiyaanee?
Harati Aawaa eranaadan maaddiyoogan neeni Yesuusa leemisuwaa kaallana danddayiyoy ayba ogetuunee?
1, 2. Darotussi kirqqi giida oyshati awugeetee, aybissi?
‘XOOSSAY oonee?’ yaagiya oyshay darotussi kirqqi giyaaba. Leemisuwau, Kiristtaane geetettiya daroti Xoossay Sillaase giidi ammaniyaaba gidikkokka, etappe daroti ha timirttee eranau danddayettennaba gidiyoogaa maayoosona. Xaafenne woosa keettaa kaalettiyaagaa gidida issi bitanee, Sillaasiyaa timirttiyan asay erana danddayenna issi issibay deˈiyo gishshau, hegaa qonccissana danddayettennaagaa xaafiis. Hara baggaara, lodda laamiyan ammaniya daroti Xoossi baawa giidi ammanoosona. Eti maalaaliya meretay ubbay qaadadan haniis goosona. Gidikkokka, CHarles Daarwini Xoossay deˈiyoogaa kaddibeenna. I asay Xoossaabaa wurssi eranau danddayennaagaa yootiis.
2 Eti ammaniyoy ayba gidikkokka, Xoossay deˈiyoogaara gayttida oyshati daro asaa qofissoosona. Gidikkokka, daroti aliya zaaruwaa demmibeenna gishshau, Xoossaabaa eranau koyiyoogaa aggi bayoosona. Seexaanay “ammanenna asatu qofaa jallissiis.” (2 Qor. 4:4) Ubbabaa Medhida, Aawaabaa tumaa daroti erennaageenne hegee etau kirqqi giidoogee garamissenna!—Isi. 45:18.
3. (a) Medhidaagaa nuussi qonccissiday oonee? (b) Nuuni kaallidi beˈana oyshati awugeetee?
3 Gidoppe attin, asay Xoossaabaa tumaa eriyoogee keehippe koshshiyaaba. Aybissi? Yihoowa “sunttaa xeesiya” asaa xallay attiyo gishshataassa. (Roo. 10:13) Xoossaa sunttaa xeesiyoogee i oonakko, qassi ay mala Xoossakko eriyoogaa gujjees. Yesuus Kiristtoosi ba erissiyo ashkkaratuyyo ha keehippe koshshiya tumaa tamaarissiis. I Aawaa etau qonccissiis. (Luqaasa 10:22 nabbaba.) Yesuusi ooppenne aaruwan Aawaa erissana danddayidoy aybissee? Yesuusi hegaadan oottidoy ayba ogiyaanee? Aawaa haratussi erissiyoogan nuuni Yesuusa leemisuwaa kaallana danddayiyoy ayba ogiyaanee? Ha oyshata ane beˈoos.
YESUUS KIRISTTOOSA—OOPPENNE AARUWAN GIDAY DEˈIYOOGAA
4, 5. Yesuusi oogaappenne aaruwan Aawaa qonccissanau danddayiyoy aybissee?
4 Aawaa erissanau ooppenne aaruwan giday deˈiyoy Yesuusa. Aybissi giikko, deˈon deˈiya ubbabay merettanaappe kase, guyyeppe asa gididi Yesuusa geetettida ayyaana meretay ‘Xoossaassi mexi issi Naˈa’ gididi saluwan deˈiis. (Yoh. 1:14; 3:18) Hegee dumma maata! Harabay ubbay merettanaappe kase Naˈay Aaway bessiyo siiquwan ufayttidi deˈiis, qassi Abaanne A eeshshaabaa darobaa tamaariis. Aawaynne Naˈay zawi baynna wodiyau issoy issuwaara darobaa haasayiyoogan issoy issuwaara keehippe siiqettidoogee erettidaba. (Yoh. 5:20; 14:31) Naˈay ba Aawaa eeshshaabaa ay keena darobaa tamaaridaakko qoppa!—Qolasiyaasa 1:15-17 nabbaba.
5 Aaway Naˈaa Ba doona gididi haasayiyaagaa, giishin “Xoossaa Qaalaa” gidanaadan sunttiis. (Ajj. 19:13) Yaatiyo gishshau, Aawaa haratussi qonccissanau Yesuusau oogaappenne aadhiya giday deˈees. Wonggeliyaa xaafida Yohaannisi ‘Qaalaa,’ Yesuusa “Aawaa lanqqiyan” deˈiyaabadan qonccissidoogee bessiyaaba. (Yoh. 1:1, 18) Yohaannisi hegaadan giidoy qumaa miyo wodiyan he wode meeze gididabaa qoppidi gidennan aggenna. He wode issi imattay haraara haasayanau injjetiya hanotan a matan uttees. Hegaara issi mala hanotan, Naˈay “Aawaa lanqqiyan” deˈiyo gishshau aara ulobaa haasayana danddayees.
6, 7. Aawaanne Naˈaa dabbotay minni minni biidoy ayba ogiyaanee?
6 Aawaanne Naˈaa dabbotay minni minni biis. Naˈay ‘ubba gallassi Xoossaa ufayssiyaagaa’ gidiis. (Leemiso 8:22, 23, 30, 31 nabbaba.) Yaatiyo gishshau, eti naaˈˈay issippe oottiyo wode, qassi Naˈay ba Aawaagaa mala eeshshaa qonccissiyoogaa tamaariyo wode, eta naaˈˈaa giddon deˈiya dabbotay minni minni biidoogee qoncce. Qoppiya hara meretati meretti simmin, Yihooway eta ubbaa waatidi oyqqidaakko Naˈay beˈiis; qassi i Xoossaa eeshshaa kaseegaappe aaruwan nashshi nashshi biidoogee qoncce.
7 Yihooway haariyoy suure ogiyaana gidiyoogaa xeelliyaagan guyyeppe Seexaanay denttido oyshaykka, Yihooway metiya hanotay gakkido wode siiquwaa, suure pirddaa, aadhida eratettaanne wolqqaa waatidi qonccissiyaakko Naˈay tamaaranaadan maaddiis. Hegee, Yesuusi saˈan haggaaziyo wode bana gakkana metuwan genccanau kasetidi giigettanaadan maaddidoogee qoncce.—Yoh. 5:19.
8. Aawaa eeshshatubaa loyttidi eranau Wonggeliyan deˈiya taarikee nuna maaddiyoy ayba ogiyaanee?
8 Naˈay Yihoowayyo mata dabbo gididi deˈido gishshau, oogaappenne aaruwan Aawaabaa darobaa qonccissiis. Nuuni Aawaa eranau, a mexi issi Naˈay tamaarissidobaanne oottidobaa akeekiyoogaappe aadhiya ogee deˈana danddayii? Leemisuwau, “siiquwaa” giya qaalay woygiyoogaakko a birshshetta xallaa nabbabidi loytti akeekanau nuna ay keena metanaakko qoppa. SHin, Yesuusi oottidobaanne harata oyqqido ogiyaa xeelliyaagan Wonggeliyan xaafettida taarikiyaa wotti dentti qoppiyoogan, “Xoossai siiqo” giya qofaa loyttidi akeekana danddayoos. (1 Yoh. 4:8, 16) Yesuusi saˈan deˈiyo wode ba erissiyo ashkkaratuyyo qonccissido Xoossaa eeshshata harata xeelliyaagankka hanotay hegaa mala.
YESUUSI BA AAWAA ERISSIDO OGIYAA
9. (a) Yesuusi ba Aawaa qonccissido naaˈˈu waanna ogeti awugeetee? (b) Yesuusi ba timirttiyan ba Aawaa ayba ogiyan qonccissidaakko bessiya leemisuwaa yoota.
9 Yesuusi ba erissiyo ashkkaratuyyoonne guyyeppe bana kaallana haratuyyo ba Aawaa qonccissidoy ayba ogiyaanee? I naaˈˈu waanna ogetun, giishin ba timirttiyaaninne ba eeshshan hegaadan oottiis. Koyro ane Yesuusi tamaarissidobaa qoppoos. Yesuusi bana kaalliyaageeta tamaarissidobay i ba Aawaa qofaanne ogiyaa, qassi au siyettiyaabaa loyttidi eriyoogaa qonccissiis. Leemisuwau, Yesuusi wudiyaappe issi dorssay bayin koyanau biida dorssaa godan ba Aawaa leemisiis. Yesuusi dorssaa goday dorssaa demmiyo wode, “bayibeenna uddufun tammanne uddufun dorssatuppe aattidi, he issi dorssan” ufayttiyoogaa yootiis. He leemisoy ay qonccissii? Yesuusi, “Hegaadankka, saluwan de7iya intte Aawai ha guuttatuppe issoi bayyanaagaakka koyenna” yaagiis. (Maa. 18:12-14) Ha leemisuwaappe Yihoowabaa ay tamaarana danddayay? Issi issitoo neeyyo goˈˈi baynnabadaaninne neeni dogettidabadan siyettiyaaba gidikkokka, saluwan deˈiya ne Aaway nenan ufaytteesinne neeyyo qoppees. I nena ‘ha guuttatuppe issuwaadan’ xeellees.
10. Yesuusi ba eeshshan ba Aawaa qonccissidoy ayba ogiyaanee?
10 Yesuusa eeshshay i ba erissiyo ashkkaratuyyo Aawaa erissido naaˈˈantto oge. Yaatiyo gishshau, kiitettida Piliphoosi, “Aawaa nuna bessa” yaagidi oychido wode Yesuusi, “Tana be7ida urai Aawaakka be7iis” yaagidoogee bessiyaaba. (Yoh. 14:8, 9) Yesuusi ba Aawaa eeshshaa waati qonccissidaakko bessiya issi issi leemisota qoppa. Inchirichay oyqqido issi bitanee bana pattanaadan Yesuusa woossido wode, Yesuusi “inchchirichchai bolla ubban kumido” he bitaniyaa bochidi, “Taani koyais; paxa!” yaagiis. He bitanee paxidi, Yesuusi oottidoban Yihoowa wolqqaa beˈidoogee erettidaba. (Luq. 5:12, 13) Alˈˈaazari hayqqido wodekka, Yesuusi ‘ba wozanan daro mishettidi tookki shemppido,’ qassi ‘afuxxido’ wode, erissiyo ashkkarati Aawaa qaretaa akeekidoogee qoncce. Yesuusi Alˈˈaazara denttanaagaa eriyaaba gidikkokka, Alˈˈaazara so asaagaadaaninne laggetuugaadan ikka mishettiis. (Yoh. 11:32-35, 40-43) Yesuusi oottidoban Aawaa maarotaa neeni akeekanaadan maaddida, neeni dosiyo Geeshsha Maxaafaa taariketi deˈiyoogee sirissenna.
11. (a) Yesuusi beeta maqidasiyaa geeshshido wode ba Aawaabaa ay qonccissidee? (b) Yesuusi beeta maqidasiyaa geeshshidoogaa qonccissiya taarikee nuna minttettiyaaba gididoy aybissee?
11 Gidoppe attin, Yesuusi beeta maqidasiyaa geeshshidoogaappe ay akeekay? Hanettidabaa qoppa: Yesuusi golaa xurqqayyiyaa dooqqidi, miizzaanne dorssaa bayzziyaageeta yedettidi kare kessiis. Miishshaa laammiyaageetu xarapheezaa aatti yeggidi eta miishshaa laaliis. (Yoh. 2:13-17) Yesuusi wolqqan hegaadan oottidobay Kawuwaa Daawiti, “Ne keettau mishettiyo mishoi tana tamadan xuuggees” yaagidi xaafidoogaa erissiyo ashkkarati hassayanaadan oottiis. (Maz. 69:9) Yesuusi zirxxabaa oottiyoogan tumu goynuwau exatanau wozanappe koyiyoogaa bessiis. He taarikiyaappe Aawaa eeshshaa akeekay? Hegee saˈaappe iitatettaa xayssanau Xoossaayyo zawi baynna wolqqay deˈiyoogaa xalla gidennan, i hegaadan oottanau wozanappe koyiyoogaakka qonccissees. Yesuusi iitabaa keehippe ixxiyoogaa bessiya he taarikee, ha wodiyan saˈaa bolli kumida iitatettaa beˈiyo wode Aawaayyo aybi siyettiyaakko qonccissees. Pirdda pacay gakkishin nuuni gencciyo wode hegee keehi minttettiyaaba!
12, 13. Yesuusi ba erissiyo ashkkarata oyqqido ogiyaappe Yihoowabaa ay tamaarana danddayay?
12 Ane hara leemisuwaa, giishin Yesuusi ba erissiyo ashkkarata oyqqido ogiyaa beˈoos. Eti bantta giddon ooni gitakko darotoo palamettidosona. (Mar. 9:33-35; 10:43; Luq. 9:46) Yesuusi ba Aawaara daro wodiyaa deˈiiddi beˈidobaappe, otorettiyoogaa bessiya hegaa malaban Yihoowayyo aybi siyettiyaakko erees. (2 Sam. 22:28; Maz. 138:6) Hegaa bollikka, Seexaanaa Dabloosi hegaa mala eeshshaa qonccissidoogaa Yesuusi beˈiis. Seexaanay gitatettaanne maataa keehippe koyiya, ba xallaa siiqiya mereta. Hegaa gishshau, Yesuusi i loohissido erissiyo ashkkarati otoruwaa aggibeennaagan keehi azzanennan aggenna. I kiitettidaageeta gidanaadan dooridoogeetikka hegaa mala eeshshaa bessidosona! Yesuusi saˈan deˈido wurssetta gallassi gakkanaashin eti hegaadan otorettiyoogaa bessidosona. (Luq. 22:24-27) Gidikkokka, Yesuusi eta ubbatoo kehatettan seeriis; eti issi wode aagaadan banttana kawushshiyaageeta gidaanaagaa hidootiyoogaa mule aggibeenna.—Pili. 2:5-8.
13 Yesuusi Yihoowa leemisuwaa kaallidi ba erissiyo ashkkaratu bala qofaa danddayan suurissido ogiyaappe Aawaa eeshshaa akeekadii? Yesuusi oottidobaappenne haasayidobaappe Aawaabaa akeekay? Aaway ba asay darotoo mooriyaaba gidikkokka, eta aggenna. Xoossaa eeshshaa eriyoogee, nuuni mooriyo wode nagaraappe simmanaadaaninne maarotaa demmanau Yihoowakko woossanaadan minttettees.
NAˈAY BA AAWAA UFAYSSAN ERISSIIS
14. Yesuusi ba Aawaa ufayssan erissana koyiyoogaa ayba ogiyan bessidee?
14 Huqqunni haariya daroti asay erana koshshiyaabaa genttiyoogan, eri baynnaageeta gididi banttau haarettanaadan oottoosona. Hegaappe dumma hanotan, Yesuusi Aawaa haratussi loytti erissiyoogan abaa, i eriyoobaa ufayssan yootiis. (Maatiyoosa 11:27 nabbaba.) Hegaa bollikka, Yesuusi ba erissiyo ashkkarati ‘tumu Xoossaa, Yihoowa eranaadan etayyo akeekaa immiis.’ (1 Yoh. 5:20) Hegee woygiyoogee? Yesuusi Aawaabaa i tamaarissidobaa akeekanaadan bana kaalliyaageeta maaddiis. I ba Aawaa akeekana danddayettenna Sillaasiyaa shaahodan qonccissiyoogaa mala geema timirtte tamaarissibeenna.
15. Yesuusi ba Aawaabaa issi issibaa yootibeennay aybissee?
15 Yesuusi ba Aawaabaa eriyoobaa ubbaa qonccissidee? Akkay, ubbabaa ba erissiyo ashkkaratussi odibeenna wode, aadhida eratettay deˈiyoogaa gidiyoogaa bessiis. (Yohaannisa 16:12 nabbaba.) Aybissi yootibeennee? He wode hegaa mala timirttee etau “gelenna” gishshataassa. Gidikkokka, Yesuusi yootidoogaadan eta “tumatetta ubbaakko” kaalettana “minttettiyaagee,” geeshsha ayyaanay yiyo wode daro eray qonccana. (Yoh. 16:7, 13) Aadhida erancha gidida yelidaageeti odana bessiya issi issibaa bantta naati gasttidi akeekana gakkanaashin etappe genttiyoogaadan, Yesuusi ba erissiyo ashkkarati ayyaanaaban kaymidi Aawaabaa issi issibaa erana gakkanaashin yootennan takkiis. Yesuusi kehatettan, eti akeekana danddayiyoobi guutta gidiyoogaa qoppiis.
HARATI YIHOOWA ERANAADAN MAADDIYOOGAN YESUUSA LEEMISUWAA KAALLA
16, 17. Neeni haratuyyo Aawaa erissana danddayiyoy aybissee?
16 Neeni issi ura loyttada eriyo, qassi a loˈˈo eeshshaa nashshiyo wode, hegee neeni abaa haratuyyo yootanaadan denttettennee? Yesuusi saˈan deˈiyo wode, ba Aawaabaa asau yootiis. (Yoh. 17:25, 26) Yihoowa haratussi erissiyoogan nuuni a leemisuwaa kaallana danddayiyoo?
17 Qommoora beˈidoogaadan, Yesuusi haratuugaappe aaruwan ba Aawaabaa darobaa erees. Gidikkokka, i ba eriyoobaappe haratussi yootidoy guuttaba; ubba bana kaalliyaageeti ba Aawaa eeshshaa loyttidi eranaadan akeekaa immiis. Yesuusi maaddin, ha wodiyan deˈiya daro asaagaappe dumma ogiyan nu Aawaa loyttidi eribookkoo? Yesuusi ba tamaarissidobaaninne ba eeshshan ba Aawaa nuussi ufayssan qonccissido gishshau keehippe galatoos! Nuuni Aawaa erido gishshau ceeqqiyoogee bessiyaaba. (Erm. 9:24; 1 Qor. 1:31) Nuuni Yihoowakko shiiqanau baaxetido gishshau, ikka nuukko shiiqiis. (Yaaq. 4:8) Yaatiyo gishshau, nuuni eriyoobaa haratuyyo yootana danddayoos. Hegaadan oottana danddayiyoy ayba ogiyaanee?
18, 19. Harati Aawaa eranaadan neeni maaddana danddayiyoy ayba ogetuunee? Qonccissa.
18 Nuuni haasayiyoobaaninne oottiyooban haratussi Aawaa erissiyoogan Yesuusa leemisuwaa kaallana koshshees. Nuuni haggaazuwan demmiyo daroti Xoossay oonakko erennaagaa hassaya. Eti worddo timirttiyaa tamaarido gishshau, Xoossaa xeelliyaagan etau bala qofay deˈennan aggenna. Xoossaa sunttaa, asaa naatussi i halchidobaanne a eeshshaa xeelliyaagan nuuni eriyoobaa Geeshsha Maxaafaappe etassi yootana danddayoos. Hegaa bollikka, hagaappe kase nuuni akeekibeenna ogiyan Xoossaa eeshshaa qonccissiya issi issi Geeshsha Maxaafaa taariketa nu mala Kiristtaanetuura tobbana danddayoos. Hegee etakka minttettana danddayees.
19 Yesuusa leemisuwaa kaallanau baaxetiyoogan nu eeshshan Aawaa erissana koshshees. Asay nuuni oottiyooban Kiristtoosa siiquwaa akeekiyo wode, Aawaakkonne Yesuusakko shiiqees. (Efi. 5:1, 2) Kiitettida PHauloosi i ‘Kiristtoosadan hanidoogaadan nuunikka adan hananaadan’ zoriis. (1 Qor. 11:1) Nu eeshshan asay Yihoowa eranaadan maaddiyoogee keehi gita maata! Ee, nuuni ubbay harati Aawaa eranaadan maaddiyoogan ubbatoo Yesuusa leemisuwaa kaalliyaageeta gidoos.
[Oyshata]
