Issi Yihooway Ba Soo Asaa Shiishshees
Issi Yihooway Ba Soo Asaa Shiishshees
‘Ayyaanay immiyo issippetettaa naaganaadan taani inttena woossays.’ —EFI. 4:1, 3.
WOYGADA QONCCISSUUTII?
Xoossaa halchoy polettido ogeti awugeetee?
Nuuni ‘ayyaanay immiyo issippetettaa’ naagiyoy ayba ogiyaanee?
‘Issoy issuwau kehanaadan’ nuna aybi maaddii?
1, 2. Yihooway saˈaassinne asaa naatussi halchido halchoy aybee?
SO ASAA. Hegaa siyiyo wode neeni ay hassayay? Siiquwaa woy ufayssaa woy issi hoolliyau issippe oottiyoogaa woy woppu giidi dicciyo, tamaariyoonne ba qoppidobaa haasayiyo sohuwaa hassayay? Intte soo asay issoy issuwau qoppiyaabaa gidikko, neeni hassayiyoy hegaa gidennan aggenna. So asaa deˈuwaa Doomissidaagee Yihoowa. (Efi. 3:14, 15) I saluwaaninne saˈan deˈiya ba meretati ubbay hirggennaadan, issoy issuwaa sirennaadaaninne issippetettan deˈanaadan halchiis.
2 Asaa naati nagaraa ootti simmin eti Xoossaa keetta asa gidiyoogee attiis; gidikkokka, hegee Yihoowa halchoy laamettanaadan oottibeenna. I Gannate saˈay Addaamenne Hewaani zerettan kumanaadan oottana. (Doo. 1:28; Isi. 45:18) I he halchuwaa polanau koshshiya ubbabaa giigissiis. Qonccissiyo waanna qofay issippetettaabaa gidido Efisoona maxaafay, he giigissotuppe darota yootees. He maxaafaappe amarida xiqiseta kaallidi beˈana, yaatidi Yihooway ba meretata issippe shiishshanau halchido halchuwaara moggiya ogiyan nuuni waani deˈana danddayiyaakko tamaarana.
XOOSSAY BA HALCHUWAA POLIDO OGIYAANNE AN OOSETTIYAABAA
3. Efisoona 1:10n odettida, Xoossaa halchoy polettido ogeti awugeetee, qassi he ogetuppe koyroogee doommidoy awudee?
3 Muusee Israaˈeeletussi, “GODAI nu Xoossai issi GODAA” yaagiis. (Zaa. 6:4) Yihooway oottiyo ubbabay a halchuwaara gayttidaba. Yaatiyo gishshau, “Xoossai wodiyaa wurssettai gakkiyo wode [“i keerido wodiyan,” NW] polanau qoppido qofai” saluwaaninne saˈan deˈiyaageeta ubbaa issi keetta asadan issippe shiishshanaassa. I he halchuwaa naaˈˈu ogetun poliis. (Efisoona 1:8-10 nabbaba.) Koyruwan, Xoossay ayyaanan tiyettidaageeta saluwaa deˈuwau giigissees, eti yan Yesuus Kiristtoosappe garssaara bantta oosuwaa oottana. Hegee doommidoy, Yihooway Kiristtoosaara saluwan haaranaageeta PHenxxaqosxxe gallassi 33 M.Ln shiishshiyoogaa doommido wode. (Oos. 2:1-4) Ayyaanan tiyettidaageeti Kiristtoosa wozuwaa yarshshuwaa gaasuwan deˈuwaa demmana bessiya xillo geetettido gishshau, eti “Xoossaa naata” gidiyoogaa eroosona.—Roo. 3:23, 24; 5:1; 8:15-17.
4, 5. Xoossaa halchoy polettido ogetuppe naaˈˈanttoy aybee?
4 He halchoy polettido ogetuppe naaˈˈanttoy, Kiristtoosa Mase Kawotettaa haaruwan Gannate saˈan deˈanaageeta giigissiyoogaa. He asatuppe koyroogeeti “zawai bainna daro asaa.” (Ajj. 7:9, 13-17; 21:1-5) SHaˈu Layttaa Haaruwaa wode hayquwaappe denddiya, biilooniyan qoodettiyaageeti eta bolli gujettana. (Ajj. 20:12, 13) Hayquwaappe denddiyaageeti gujettiyo wode, nu issippetettaa bessiyo ay keena hanotay deˈanaakko qoppa! SHaˈu layttaa wurssettan ‘saˈan deˈiyaageeti’ wurssetta paaciyaa paacettana. Ammanettidaageeta gidiyoogaa bessiyaageeti ‘Xoossaa naata’ gididi saˈan deˈana.—Roo. 8:21; Ajj. 20:7, 8.
5 Ha wodiyan, Yihooway ayyaanan tiyettidaageeti saluwan deˈanaadan, qassi hara dorssati Gannate saˈan deˈanaadan eta giigissiiddi deˈees. SHin nuuni huuphiyan huuphiyan ha wodiyan Xoossaa halchoy polettiyo ogiyaara moggidi deˈiyoy ayba ogiyaanee?
‘AYYAANAY IMMIYO ISSIPPETETTAA NAAGA’
6. Kiristtaaneti issippe shiiqana koshshiyoogaa Geeshsha Maxaafay qonccissiyoy ayba ogiyaanee?
6 Kiristtaaneti issippe shiiqana bessiyoogaa Geeshsha Maxaafay yootees. (1 Qor. 14:23; Ibr. 10:24, 25) Nuuni issippetettaa medhanau, giyaa woy ispportte sohuwaa biya asay oottiyoogaappe aadhiyaabaa oottana bessees. Nuuni Yihooway tamaarissiyoobaa oosuwan peeshshiyo wodenne Xoossaa geeshsha ayyaanay nuna molanaadan eeno giyo wode, he issippetettaa medhoos.
7. ‘Ayyaanay immiyo issippetettaa naagiyoogee’ woygiyoogee?
7 Nuuni Kiristtoosa wozuwaa yarshshuwan ammaniyo gishshau, Yihooway nuna, ayyaanan tiyettidaageeta ba naatudan, qassi hara dorssata ba dabbodan xillo oottidi xeellees. SHin nuuni ha siraatan deˈiyo wodiyan haratuura walaqettiyo wodee deˈees. (Roo. 5:9; Yaaq. 2:23) Hegee xayikko, “issoi issuwaa” danddayiyoogaa aggennaadan Xoossay zoriyoy aybissee? Nu mala Kiristtaanetuura issippetettaa naagidi deˈanau ay oottana bessii? Nu ‘huuphiyaa kaushshiyaageetanne ashkketa’ gidana koshshees. Hegaa bollikka, PHauloosi nuuni “issippe gatti qachchiya sarotettan, Geeshsha Ayyaanai . . . immiyo issippetettaa naaganau” minnanaadan zoriis. (Efisoona 4:1-3 nabbaba.) Ha zoriyaa oosuwan peeshshiyo issi ogee, Xoossaa ayyaanaa kaaletuwaa kaallanaunne he ayyaanay nuuni a ayfiyaa ayfanaadan maaddana mala eeno giyoogaa. He ayfee, ubbatoo asaa issuwaa issuwaappe shaakkiya asatetta oosuwaappe dummatiya ogiyan, nuuni walaqettiyaaba gidikko sigettanaadan maaddees.
8. Asatettaa oosoy issippetettaa mooriyoy ayba ogiyaanee?
8 “Asatettaa oosoi” issippetettaa mooriyoy ayba ogiyaanakko akeeka. (Galaatiyaa 5:19-21 nabbaba.) SHaaramuxiyoogee he ura Yihoowappenne gubaaˈiyaappe shaakkees; hegaadankka, wodiraa laammiyoogee yelidaageetuppe naata, qassi mooribeenna ura a aqo laggiyaappe shaakkees. Naaˈˈubaappe issoynne geeshsha gidana xayikko masttishiyan ohettennaagaadan, asatettaaninne kandduwan tunida woykko geeshsha gidenna uri Xoossaaranne a asaara issippetettan deˈana danddayenna. Yeellaa xayiyoobaa haniyoogee, Xoossay kessido xillotetta higgiyaa mule bonchennaagaa bessiyaaba. Asatettaa oosoti haratikka, asaa issuwaa issuwaappenne Xoossaappe shaakkoosona. Hegaa mala oosoy Yihoowa eeshshaara mule moggenna.
9. Nuuni ‘ayyaanay immiyo issippetettaa naaganau’ wozanappe baaxetiyaakkonne nuna qorana danddayiyoy ayba ogiyaanee?
9 Yaatiyo gishshau, nuuni ubbay nuna kaallidi deˈiyaagaadan oychana koshshees: ‘Taani “issippe gatti qachchiya sarotettan, Geeshsha Ayyaanai [nuuyyo] immiyo issippetettaa naaganau” ay keena baaxetiyaanaa? Issi uraara walaqettiyo wode waatiyaanaa? Eti taayyo exatanaadan ta laggetuppe darotuyyo hegaa yootiyaanaa? Sigettanau koshshiyaabaa taani ta huuphe oottiyoogaappe, cimati sigettanaadan koyiyaanaa? Issi uri tau lanccidoogaa erikko, he allaalliyaabaa haasayanaappe gaada appe haakkiyaanaa?’ Hegaadan oottiyoogee, nuuni Yihooway Kiristtoosa baggaara ubbabaa issippe shiishshanau halchido halchuwaara moggiyaabaa oottiyoogaa bessiyaabee?
10, 11. (a) Nu ishatuura sarotettan deˈiyoogee ay keena koshshiyaabee? (b) Nuuni sarotettaanne Yihoowa anjjuwaa demmiyoy ay oottiyoogaanee?
10 Yesuusi hagaadan giis: “Hegaa gishshau, neeni yarshshiyoosan yarshshishin, ne ishaa naaqqidobai neeyyo hegan hassayettikko, ne yarshshuwaa he sohuwankka yeggabayada ba; kasetada ne ishaara sigettaichcha; hegaappe guyyiyan yaada, ne yarshshuwaa yarshsha. . . . Elle aara sigettaichcha.” (Maa. 5:23-25) Yaaqoobi, “Xillotettaa aifee sarotettaa oottiyaageeti sarotettan zerido zerettaappe beettiis” yaagiis. (Yaaq. 3:17, 18) Yaatiyo gishshau, nuuni haratuura sarotettan deˈennaba gidikko, suurebaa oottana danddayokko.
11 Leemisuwau, kase olay denddido issi issi biittatun panjjee moogettido gishshau, kumetta biittaa heezzau shaakkin issi kusheppe dariyaagaa goshshanchati goyokkona. Panjjee xuuqqiyo wode, goshshanchati he biittaa goyokkona, he heeran deˈiya asay ooso demmenna, qassi kataman deˈiya asay miyooba demmenna. Hegaadankka, nu mala Kiristtaanetuura deˈiya sarotettaa mooriya eeshshay nuuyyo deˈikko, ayyaanaaban diccana danddayokko. SHin sohuwaara atto giyoogaaninne harata goˈˈiyaabaa oottiyoogan, nuuni ubbay sarotettaanne Yihoowa anjjuwaa demmoos.
12. Nuuni issippetettaa naaganaadan cimati maaddiyoy ayba ogiyaanee?
12 “Imota” gidida attuma asati ‘ammanin beettiya issippetettaa’ naaganaadankka nuna maaddoosona. (Efi. 4:8, 13) Cimati Xoossaa oosuwaa nunaara issippe oottiyo wodenne Geeshsha Maxaafaappe nuna zoriyo wode, nuuni ooratta asatettaa gujji gujji maayanaadan maaddoosona. (Efi. 4:22-24) Eti zoriyo zoriyan Yihooway ba Naˈaa haaruwaa wode ooratta alamiyan deˈanau giigettanaadan nena maaddiyoogaa akeekay? Cimatoo, hegaa qoppidi harata suurisseetii?—Gal. 6:1.
‘ISSOY ISSUWAU KEHITE’
13. Nuuni Efisoona 4:25-32n deˈiya zoriyaa oosuwan peeshshana xayikko aybi hanii?
13 Efisoona 4:25-29y nuuni oottana koshshenna issi issibata qonccissees. Hegeeti worddotiyoogaa, hanqqettiyoogaa, azalliyoogaanne minttettiya loˈˈo qaalaa haasayiyoogaappe iita qaalaa haasayiyoogaa. Geeshsha ayyaanay issippetettay deˈanaadan oottiya wolqqa gidiyo gishshau, issi uri ha zoriyaa oosuwan peeshshana xayikko, he ayyaanaa azzanttees. (Efi. 4:30) PHauloosi hegaappe kaallidi xaafidobaa oosuwan peeshshiyoogeekka sarotettaunne issippetettau keehippe koshshiyaaba. I hagaadan giis: “Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite. Issoi issuwaayyo kehitenne qarettite; qassi Xoossai Kiristtoosa baggaara intteyyo atto giidoogaadan, inttekka issoi issuwaayyo atto giite.”—Efi. 4:31, 32.
14. (a) ‘Kehite’ giya qaalay ay bessii? (b) Nuuni kehanaadan aybi maaddii?
14 ‘Kehite’ yaagiya qaalay, nuuni ubbatoo keha gidennan aggana danddayiyoogaanne kaseegaappe aaruwan kehana koshshiyoogaa bessees. Haratu qofaa nuugaappe kaseyiyoogaa meezetiyoogee keehippe koshshiyaaba! (Pili. 2:4) Nuuni haasayanau qoppidobay harata miichana woy nuna erancha milatissana danddayees, shin hegee kehatetta gidana danddayii? Ha allaalliyaa kasetidi qoppiyoogee nuuni ‘kehanaadan’ maaddees.
SIIQIYOOGAANNE BONCHIYOOGAA SO GIDDON TAMAARA
15. Azinati Yesuusa leemisuwaa ayba ogiyan kaallana koshshiyaakko akeekanau, Efisoona 5:28y waati maaddii?
15 Geeshsha Maxaafay Kiristtoosanne gubaaˈiyaa giddon deˈiya dabbotay azinaanne machee dabbotaa mala gidiyoogaa yootees. Hegee, azinay machiyo kaalettana, siiqananne iyyo koshshiyaabaa kunttana bessiyoogaa, qassi machiyaa ba azinau haarettana koshshiyoogaa nuuni qoppanaadan oottees. (Efi. 5:22-33) PHauloosi, “Simmi qassi [hegaadan] azinai ba maccaasiyo ba bollaadan siiqanau bessees” yaagiyo wode, “hegaadan” giidobay aybee? (Efi. 5:28) I hegaappe kasetidi yootidobay, ‘Kiristtoosi woosa keettaa siiqidi, ba huuphiyaa ayyo immidonne woosa keettaa ba qaalaaninne haattan meecci geeshshido’ ogiyaabaa akeekissees. Yihooway Kiristtoosa baggaara ubbabaa zaarettidi shiishshanau halchido halchuwaara moggiyaabaa oottanau, azinay ayyaanaaban ba soo asau koshshiyaabaa kunttana bessees.
16. Yelidaageeti Yihooway etau immido aawatettaa poliyo wode ayba anjjo demmiyoonaa?
16 Yelidaageeti bantta naatussi koshshiyaabaa kunttanaadan Yihooway aawatettaa immidoogaa hassayana koshshees. Ha wodiyan alamiyan deˈiya daroti “siiqoi bainnaageeta” gidiyoogee azzanttiyaaba. (2 Xim. 3:1, 3) Daro aawati bantta aawatettaa sheneho goosona; hegee naata qoheesinne azzanttees. SHin PHauloosi Kiristtaane gidida aawata, “Intte intte naata Godaa seeraaninne zoriyan dichchiteppe attin, eta hanqqetissoppite” yaagidi zoriis. (Efi. 6:4) Naati siiqiyoogaanne aawatettaa bonchiyoogaa koyro tamaariyoy soona. Bantta naata hegaa tamaarissiyaageeti Yihooway ubbaa issippe shiishshanau halchido halchoy polettiyo ogiyaara moggiyaabaa oottoosona. Nuuni yiilluwaa, hanqquwaanne cashshaa ubbaa xayssidi, nu keettan siiqoy deˈanaadan oottiyoogan, nu naati waatidi siiqanaakko, qassi waatidi maataa bonchanaakko keehippe koshshiya timirttiyaa tamaarissoos. Hegee eti Xoossay ehaana ooratta alamiyan deˈanau giigettanaadan maaddees.
17. Nuuni Dabloosa eqettanau aybi koshshii?
17 Nuuni, salo gufanttuwan deˈiya sarotettaa koyro moorida Dabloosi, Xoossaa sheniyaa polanau baaxetiyo wode nunaara keehippe eqettiyoogaa akeekana koshshees. Alamiyan deˈiya daro asay aqo laggiyaappe paraman shaahettiyo wode, ekki gelidi gidennan coo issippe deˈiyo wodenne attumay attumaa, qassi maccay maccaa ekkiyoonne geliyo wode Dabloosi koyiyoobaa oottees. Gidoppe attin, nuuni ha wodiyan daro asay oottiyoogaadan oottokko. Nuuni Kiristtoosa leemisuwaa kaalloos. (Efi. 4:17-21) Yaatiyo gishshau, nuuni Dabloosaaranne daydanttatuura olettidi xoonanau, ‘Xoossay nuuyyo immiyo olaa maayo ubbaa maayana’ koshshees.—Efisoona 6:10-13 nabbaba.
‘SIIQUWAN DEˈA’
18. Kiristtaanetu issippetettau koshshiya waannabay aybee?
18 Kiristtaanetu issippetettau koshshiya waannabay siiquwaa. Nu ‘issi Godaa,’ nu ‘issi Xoossaanne’ issoy issuwaa wozanappe siiqiyoogan, “issippe gatti qachchiya sarotettan, Geeshsha Ayyaanai [nuuyyo] immiyo issippetettaa naaganau” murttida. (Efi. 4:3-6) Yesuusi he siiquwaa xeelliyaagan kaallidi deˈiyaagaadan woossiis: “Taani eta xalaalau woossikke; shin eti qaalaa yootin, tana ammanidaageetuyyookka woossais. Eti ubbai issuwaa gidana mala, taani woossais. Aawau, neeni ta giddon de7iyoogaadan, qassi taanikka ne giddon de7iyoogaadan, eti nu giddon de7ona. . . . Neeni tana siiqido siiqoi eta giddon de7ana mala, qassi taanikka eta giddon de7ana mala, taani ne sunttaa eta erissaas; sinttaukka erissana.”—Yoh. 17:20, 21, 26.
19. Neeni ay oottanau murttadii?
19 Laammanau metiya eeshshay nuuyyo deˈana danddayees; shin siiqoy nuuni mazamuraawiyaagaadan, “Taani ne sunttaayyo yayyana mala, taayyo issi wozanaa imma” yaagidi woossanaadan denttettana koshshees. (Maz. 86:11) Dabloosi nuna siiqiya nu Aawaappenne i siiqiyoogeetuppe shaakkanau maliyo wode, nuuni eqettanau murttana bessees. Nu son, haggaazuwaaninne gubaaˈiyan ‘Xoossay siiqiyo naatudan a milatanaunne siiquwan deˈanau’ baaxetana koshshees.—Efi. 5:1, 2.
[Oyshata]
[Sinttaa 29n deʼiya misiliyaa qonccissuwaa]
Yarshshiyo sohuwan ba yarshshuwaa yeggibayidi ba ishaara sigettanau bees
[Sinttaa 31n deʼiya misiliyaa qonccissuwaa]
Yelidaageetoo, harata bonchanaadan intte naata tamaarissite
