Laˈatettaa Xoossaayyo Ootta

“Nuuni Xoossaa siiqiyoogee a azazuwaa naagiyoogaa; a azazoikka deexo gidenna.”—1 YOH. 5:3.

WOYGADA ZAARUUTII?

Seexaanay Xoossaa higgeta deexxiyaaba milatissanau maliyoy ayba ogiyaanee?

Nu laggeta dooriyo wode akeekay keehippe koshshiyoy aybissee?

Nuuni laˈatettaa Xoossau ammanettidaageeta gididi deˈanau aybi maaddii?

1. Yihooway ba laˈatettaa waatidi goˈettii, qassi i Addaameyyoonne Hewaaniyyo ay mala laˈatettaa immidee?

 POLO laˈatettan deˈiyay Yihoowa xalaala. Gidikkokka, i he laˈatettaa bessenna ogiyan goˈettenna; qassi ba ashkkarati oottiyo guuttabaara ubbaa kaallenna. Hegaappe dumma ogiyan, eti banttau kuuyanaadaaninne bantta suure amuwaa polanaadan laˈatettaa immiis. Leemisuwau, Xoossay Addaameenne Hewaana oottennaadan azazido azazoy issuwaa xalla; hegeekka, “lo77uwaanne iitaa erissiya mittaa teeraappe” meennaadan azazidoogaa. (Doo. 2:17) Eti banttana Medhidaagaa sheniyaa poliiddi maalaaliya laˈatettan deˈana danddayoosona.

2. Xoossay immido laˈatettay Addaameppenne Hewaanippe halidoy aybissee?

² Xoossay Addaamessinne Hewaanissi hegaa keena laˈatettaa immidoy aybissee? I etau zoriya wozanaa immidonne eta ba leemisuwan medhido gishshataassa. I eta Medhido gishshau a siiqiyoogaappe denddidaagan, eti suure gididabaa oottana giidi qoppiis. (Doo. 1:27; Roo. 2:15) Addaameenne Hewaana banttau deˈuwaa Immidaagaanne i etau immido laˈatettaa nashshibeennaagee azzanttiyaaba. Eti Seexaanay yootiyoobaa siyidi, kandduwaaban laˈa gidanau dooridosona. Eti kaseegaappe aaruwan laˈa gidiyoogaappe, banttananne bantta zerettaa nagaraa aylletettau bayzzidosona; hegee tuggaanne hayquwaa kaalettiis.—Roo. 5:12.

3, 4. Yihooway kessido maaraa xeelliyaaban Seexaanay nuna balettanau maliyoy ayba ogiyaanee?

³ Seexaanay naaˈˈu polo asatinne daro kiitanchati Xoossaa haaruwaa bolli makkalanaadan denttettana danddayikko, nunakka balettana danddayees. A hiillay haˈˈikka he wodeegaa mala. I Xoossay kessido maaray deexxiyaabadaaninne nuna ufayssa diggiyaabadan qoppanaadan oottidi nuna balettanau malees. (1 Yoh. 5:3)  Nuuni hegaadan qoppiya asaara daro wodiyaa aattiyaaba gidikko, etaagaadan qoppiyoogaa doommana danddayoos. Haˈˈi iyyo layttay 24 gidido issi michiyaa, “Ta laggetuugaappe dumma ogiyan qoppanau yayyido gishshau, iita laggetettay tana keehi qohiis” yaagaasu. Hegaappe denddidaagan a shori baynna asho gaytotettaa polaasu. Laggetu woyganddee nenakka hegaadan qohennan aggenna.

⁴ Issi issitoo Kiristtaane gubaaˈiyan deˈiyaageetikka iitabau denttettana danddayiyoogee azzanttiyaaba. Issi yelaga ishay, gubaaˈiyan deˈiya a laggetuppe issoti issoti Yihoowa Markka gidenna macca naatuura wodiyaa aattiyoogaa yootiis. I ba laggetuura daro wodiyaa aattido peeshshan kaseegaappe aaruwan eta mala gidiis. I hagaadan giis: ‘Taayyo Yihoowaara deˈiya dabbotay shuggi shuggi biis. SHiiqoy tana kaseegaadan ufayssenna; qassi haggaaziyoogaa mule aggaas gaana danddayays. Taani etaara wodiyaa aattiyoogaa aggana koshshiyoogaa he wode akeekada, agga bayaas!’ Ne laggeti nena ay keena qohana danddayiyaakko akeekay? Ha wodiyan nuna maaddana danddayiya Geeshsha Maxaafaa leemisuwaa ane beˈa.—Roo. 15:4.

ETA WOZANAA WUUQQIIS

5, 6. Abeseloomi harata balettidoy ayba ogiyaanee, a maqqoy shin polettidee?

⁵ Harata iitabau denttettida daro asatu leemisoy Geeshsha Maxaafan deˈees. Hegeetuppe issoy, Kawuwaa Daawita naˈaa Abeselooma. Abeseloomi malancha asa. I Seexaanaagaadan iita amoy ba wozanan diccanaadan oottiis. Ayyo maati baynnaba gidikkokka, ba aawaa sohuwan kawotanau koyiis. * Abeseloomi ba koyidobaa demmanau, asay i banttana maaddanau koyiyaabadan, qassi kawoy maaddanau koyennabadan qoppanaadan oottiis. Ee, Dabloosi Edene gannatiyan oottidoogaadan, Abeseloomi asaa maaddiyaaba milatiis, qassi ba aawaa sunttaa mooriis.—2 Sam. 15:1-5.

⁶ Abeselooma iita maqqoy polettidee? Ee, amarida keenaa polettiis; ayssi giikko, Geeshsha Maxaafay, “Israa7eela asaa wozanaa Abeseloomi wuuqqiis” yaagees. (2 Sam. 15:6) Abeseloomi daro asaa cimmidaba gidikkonne, wurssettan xoonettiis. A otoroy inne aara exatida shaˈan qoodettiya asay hayqqanaadan oottiis.—2 Sam. 18:7, 14-17.

7. Abeselooma leemisuwaappe ay tamaarana danddayiyoo? (Sinttaa 19n deˈiya misiliyaa xeella.)

⁷ Israaˈeelati hegaadan cimettidoy aybissee? Abeseloomi etau qaalaa gelidobaa polanaadan koyennan aggokkona. Woykko a meraa loˈˈotettan cimettennan aggokkona. Gaasoy aybanne gido, eti Yihoowayyoonne i sunttido kawuwau ammanettibeennaagaa eroos. Ha wodiyan, Seexaanay Yihoowa ashkkaratu wozanaa wuuqqanau Abeselooma mala asaa goˈettiyoogaa aggibeenna. Eti hagaadan gaana danddayoosona, ‘Yihooway kessido maaray laˈa gidennaadan oottees. Yihoowayyo haggaazenna asaa ubbaa beˈa. Eti daroban ufayttoosona!’ Neeni hegaa malabaa siyiyo wode, hegee worddo gidiyoogaa akeekada, Xoossaayyo ammanettada deˈuutii? Nena tumuppe laˈa kessana danddayiyay Yihooway immido “bali bainna higgiyaa,” giishin Kiristtoosa higgiyaa xalla gidiyoogaa akeekuutii? (Yaaq. 1:25) Hegaa akeekikko, he higgiyaa xoqqu oottada xeella, qassi ne laˈatettaa Yihoowa ufayssiya ogiyan goˈetta.—1 PHeexiroosa 2:16 nabbaba.

8. Yihooway kessido maaraa sheneho giyoogee ufayssa demissennaagaa bessiya leemisoti awugeetee?

⁸ Seexaanay zambbido waannati yelagata. Ha wodiyan ayyo layttay 30ppe bolla gidido issi ishay, “Taani Yihooway kessido kandduwaa maaraa iitabaappe naagiyaabadan gidennan, laˈatetta diggiyaabadan qoppaas” yaagidi, ba panttatetta wodiyaabaa yootiis. I hegaappe denddidaagan shori baynna asho gaytotettaa poliis. SHin hegee i ufayttanaadan  oottibeenna. I ubba, daro layttau ba mooruwan zilˈˈettiiddi deˈiis. Panttatetta wodiyan shori baynna asho gaytotettaa polida issi michiyaa hegaappe simmin a azzanidoogaanne aynne pattenna asadan bana xeellidoogaa xaafaasu. A gujjadakka, “Haˈˈi 19 layttay aadhi simminkka he mooruwaa hassayays” yaagaasu. Hara michiyaa hagaadan gaasu: “Taani keehi siiqiyoogeeti ta oottidoban azzanidoogaa qoppiyoogee tana sheekissiis, qassi ayyaanaabankka keehippe qohiis. Yihoowan nashettennan deˈiyoogee keehippe azzanttiyaaba.” Seexaanay neeni nagaray kaalettiyo hegaa malabaa qoppanaadan koyenna.

9. (a) Yihoowabaa, a higgiyaabaanne baaso siraataabaa xeelliyaaban nuna oychana koshshiya oyshati awugeetee? (b) Xoossaa loyttidi eriyoogee keehippe koshshiyoy aybissee?

⁹ Yihoowa Markka gidida daro yelagati, ubba gasttatuppekka daroti Yihoowayyo azazettennaagee iitabaa kaalettiyoogaa banttana gakkidabaappe tamaaridoogee azzanttiyaaba! (Gal. 6:7, 8) Yaatiyo gishshau, kaallidi deˈiyaagaadan nena oycha: ‘Seexaanay tana balettanau goˈettiyo hiillaa akeekiyaanaa? Taani Yihoowa ubbatoo tumaa yootiyaanne taayyo loˈˈobaa amottiya mata dabbodan xeelliyaanaa? Tumuppe loˈˈobaanne ufayssaa demissiyaabaa i tana mule diggennaagaa wozanappe ammaniyaanaa?’ (Isiyaasa 48:17, 18 nabbaba.) Neeni ha oyshata wozanappe ee gaada zaaranau, Yihoowa loyttada erana koshshees. Geeshsha Maxaafan deˈiya higgetinne baaso siraatati Yihooway nena laˈatettaa digganau koyiyoogaa gidennan, i ubba nena siiqiyoogaa qonccissiyoogaa neeni akeekana koshshees.—Maz. 25:14.

 AADHIDA ERATETTAANNE AZAZETTIYA WOZANAA DEMMANAU WOOSSA

10. Nuuni yelaga Kawuwaa Solomona leemisuwaa kaallanau baaxetana koshshiyoy aybissee?

¹⁰ Solomoni yelagatettan deˈiyo wode bana kawushshidi, “Taani guutta na7a gidiyo gishshau, asaa waata kaalettanaakko taani erikke” yaagidi woossiis. Yaagi simmidi, aadhida eratettaanne azazettiya wozanaa demmanau woossiis. (1 Kaw. 3:7-9, 12) Yihooway i wozanappe woossido woosaa siyiis, qassi neeni yelaga gidin cima gidin, i ne woosaakka siyana. Yihooway nena sohuwaara akeekanchanne aadhida erancha oottennaagee qoncce. SHin neeni Geeshsha Maxaafaa minnada xannaˈiyaaba, geeshsha ayyaanaa demmanau woossiyaabanne Kiristtaane gubaaˈiyaa baggaara demmiyo kaaletuwaanne timirttiyaa oosuwan peeshshiyaaba gidikko, i nena aadhida erancha oottana. (Yaaq. 1:5) Yihooway baayyo azazettennaageetu ubbaappe, ubba ha alamiyan ‘aadhida eranchanne akeekancha’ geetettiyaageetuppekka aaruwan, ba ashkkarata ubba yelagatakka aadhida erancha oottees.—Luq. 10:21; Mazamure 119:98-100 nabbaba.

11-13. (a) Mazamure 26:4ppe, Leemiso 13:20ppenne 1 Qoronttoosa 15:33ppe nuuni tamaarana danddayiyo goˈˈiyaabay aybee? (b) Ha xiqisetun deˈiya baaso siraataa waatada oosuwan peeshshuutii?

¹¹ Nuuni Yihoowa loytti eranau Geeshsha Maxaafaa xannaˈiyoogeenne nabbabidobaa wotti dentti qoppiyoogee maaddiyoogaa bessiya, kaallidi deˈiya xiqiseta qoppa. He xiqisetu ubban nuuni laggeta dooriyo wode keehippe maaddiya baaso siraatay deˈees: “Taani cimmiya asatuura issippe uttikke; lo77o milatiya iitatu maabaran gelikke.” (Maz. 26:4) “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.” (Lee. 13:20) “Iita laggetettai lo77o hanotettaa moorees.”—1 Qor. 15:33.

¹² He xiqisetuppe tamaarana danddayiyo goˈˈiya timirttee aybee? (1) Yihooway nuuni nu laggeta akeekan dooranaadan koyees. I nuna kandduwaabaaninne ayyaanaaban iitabaappe naaganau koyees. (2) Nu laggeti nuna loˈˈobau woy iitabau denttettoosona; hegee wottin deˈiyaaba. He xiqisetun deˈiya qaalati Yihooway nu wozanaa denttettanau koyiyoogaa bessoosona. He xiqisetuppe awugeenne “yaata” woy “yaatoppa” giya higge gidennaagaa akeeka. Hegaappe dumma ogiyan, eti tumay aybakko qonccissoosona. Hegee, Yihooway nuna, ‘Tumay hagaa. Neeni waatuutii? Ne wozanan deˈiyaabay aybee?’ yaagees giyoogaa mala.

¹³ Wurssettan, ha heezzu xiqiseti tumaa yootiyo gishshau, eti awudenne laamettokkona, qassi darobau goˈˈoosona. Leemisuwau, kaallidi deˈiyaagaa mala oyshaa nena oycha: Taani ‘loˈˈo milatiya iita’ asatuura wodiyaa aattennaadan naagettana danddayiyoy ayba ogiyaanee? Taani he asatuura gayttana danddayiyoy ayba hanotatuunee? (Lee. 3:32; 6:12) Yihooway taani etaara wodiyaa aattanaadan koyiyo “aadhdhida eranchcha” asati oonee? I taani etappe haakkanaadan koyiyo “eeyya” asati oonee? (Maz. 111:10; 112:1; Lee. 1:7) Taani iita laggeta dooriyo wode moorettiya ‘loˈˈo hanotettay’ aybee? Taayyo iita lagge gidanay alamiyaa asaa xalaalee? (2 PHe. 2:1-3) Ha oyshata woygada zaaruutii?

14. Intte So Asaa Goynuwaa omarssay kaseegaappe loˈˈo gidanaadan ay oottana danddayeetii?

¹⁴ Nenanne ne soo asaa qofissiyaaban Xoossaa qofay aybakko akeekanau hara xiqiseta nabbabiyo wode, ha xiqisetu qofaa yereridoogaadan yererana danddayaasa. * Yelidaageetoo, hegaa mala qofaa intte So Asaa Goynuwaa omarssan tobbana danddayekketii? Hegaadan oottiyo wode, intte halchoy so asay ubbay Xoossaa higgeenne a baaso siraatay i nuna ay keena siiqiyaakko qonccissiyoogaa loytti akeekanaadaaninne nashshanaadan maaddanaassa gidiyoogaa  akeekite. (Maz. 119:72) Hegaa mala xinaatee soo asay ubbay kaseegaappe aaruwan Yihoowakko shiiqanaadaaninne issoy issuwaara siiqettanaadan maaddees.

15. Neeni aadhida eranchanne azazettiyaagaa gidaydda deˈiyaakkonne waatada akeekana danddayay?

¹⁵ Neeni aadhida eranchanne azazettiyaagaa gidaydda deˈiyaakkonne waatada erana danddayay? Issi ogee, “Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees” yaagida, Kawuwaa Daawita mala Yihoowau ammanettida, beni wode deˈida asatu qofaara ne qofaa geeddarssiyoogaa. (Maz. 40:8) Hegaadankka, Mazamure 119 xaafidaagee, “Taani ne higgiyaa aiba siiqiyaanaa! Gallassaa kumettaa taani qoppiyoogee a” yaagiis. (Maz. 119:97) Neessi hegaa mala siiqoy deˈanaadan minnada baaxetana koshshees. Neeni Geeshsha Maxaafaa minnada xannaˈiyo, woossiyoonne wotta dentta qoppiyo wode, hegaa mala siiqoy minnees. Yihooway koyiyoobaa azazettiyoogee daro anjjuwaa demissiyoogaa ne deˈuwan beˈiyo wodekka he siiqoy minnees.—Maz. 34:8.

AYYAANAABAA LAˈATETTAA NAAGANAU BAAXETA!

16. Tumuppe laˈa gidanau baaxetiyo baaxiyan xoonanau nuuni ay akeekana bessii?

¹⁶ Asaa naati deˈido wode ubban kawotettati laˈatettau olettidosona. Yaatin, neeni ayyaanaabaa laˈatettaa naagada deˈanau hegaappe aaruwan baaxetana koshshennee? Ne morkketi Seexaanaanne woriyaaba gidida alamiyaa qofaa xalla gidennaagaa akeeka. Cimmiya wozanaa gujjin, ne nagarancha asatettaarakka baaxetana koshshees. (Erm. 17:9; Efi. 2:3) Gidoppe attin, Yihooway maaddin neeni he baaxiyan xoonana danddayaasa. Neeni Yihooway koyiyoobaa oottiyo wode ubban, guuxxiis giishin naaˈˈu anjjuwaa demmaasa. Koyruwan, Yihoowa wozanaa ufayssaasa. (Lee. 27:11) Naaˈˈanttuwan, Xoossay immido, “ailletettaappe kessiya bali bainna [higgee]” laˈa kessana danddayiyoogaa ne deˈuwan beˈiyo wode, merinaa deˈuwau efiya ‘xuntta ogiyaappe’ kiyennaadan yaa murttaasa. Sinttappe, Yihooway baassi ammanettidaageetussi immanau qaalaa gelido polo laˈatettaa demmaasa.—Yaaq. 1:25; Maa. 7:13, 14.

17. Nuuni moorobaa oottiyo wode, hidootaa qanxxana koshshennay aybissee, qassi Yihooway nuna maaddiyoy ayba ogiyaanee?

¹⁷ Nuuni ubbay issi issitoo baliyoogee tuma. (Era. 7:20) Hegaadan haniyo wode, hidootaa qanxxoppa, woykko neeni aynne pattennabadan qoppoppa. Neeni balabaa oottikko, hegaa giigissanau cimatu maaduwaa oychanau koshshikkokka, bessiyaabaa ootta. Yaaqoobi, “[Eti] ammanuwan Xoossaa woossido woosai hargganchchaa pattana; Godaikka a harggiyaappe denttana; qassi nagara i oottidobaa gidikkokka Godai ayyo atto gaana” yaagiis. (Yaaq. 5:15) Ee, Xoossay tumuppe maariyoogaanne nenan loˈˈobaa beˈidi gubaaˈiyau nena ehiidoogaa mule dogoppa. (Mazamure 103:8, 9 nabbaba.) Neeni kumetta wozanaappe Yihoowayyo oottanau baaxetido peeshshan, i ubbatoo nena maaddana.—1 Odi. 28:9.

18. Nuuni Yohaannisa 17:15n deˈiya, Yesuusa woosaara moggiyaabaa oottana danddayiyoy ayba ogiyaanee?

¹⁸ Yesuusi ammanettida ba kiittido 11tuura saˈan deˈido wurssetta qammi eta gishshaa woossiiddi, “Neeni xalahiyaappe eta naagana mala [woossays]” yaagiis. Hegee awudenne hassayiyooba. (Yoh. 17:15) Yesuusi ba kiittidoogeetu xallaassi gidennan, bana kaalliya ubbaassi qoppees. Hegaa gishshau, ha wayssiya wodiyan nuna naagiyoogan Yihooway Yesuusa woosaa siyanaagaa ammanettana danddayoos. “Boree bainnan hemettiyaageetassikka [Yihooway] gonddalle. . . . Ba ammanettiyaageetu ogiyaakka naagees.” (Lee. 2:7, 8) Boree baynnan hemettiyoogee metiyaaba gidiyoogee tuma, shin merinaa deˈuwau efiyaanne tumuppe laˈa kessiya ogee hegaa xalaala. (Roo. 8:21) He ogiyaappe kiyanaadan ooninne nena balettana mala paqqadoppa!

[Tohossa qofata]

[Oyshata]

[Sinttaa 19n deʼiya misiliyaa qonccissuwaa]

Nuuni ha wodiyan Abeselooma mala asaa shaakki erananne etappe naagettana danddayiyoy ayba ogiyaanee?