Saynisiyaara Gayttidaban Tuma

“Taani neessi zoreenne eratettai de7iyo hasttamu leemisota xaafoohoo! Nena kiittidaagaayyo neeni likke zaaruwaa zaarana mala, taani nena tumatettaa tamaarissaas.”—LEE. 22:20, 21.

GEESHSHA MAXAAFAY DUMMA GIDIDOY AYBA OGIYAANEE? Beni wode maxaafati darotoo yootiyoobay, qohiyoogaanne tuma gidennaagaa ha wodiyaa saynisee qonccissido qofaa. Ha wodiyan xaafiyaageetikka, bantta maxaafay ooratta demmidobaara mogganaadan giigissoosona. SHin Geeshsha Maxaafay Medhidaagee bana xaafissidoogaanne A Qaalay ‘merinau deˈiyoogaa’ yootees.—1 PHe. 1:25.

LEEMISUWAA: Muuse Higgee Israaˈeelati “dunkkaanidosaappe kareera” sheeshshau uttidi bookki mooganaadan azazees. (Zaa. 23:12, 13) Eti asaa woy mehiyaa ahaa bochikko, geeyana koshshees. (Wog. 11:27, 28; Qoo. 19:14-16) He wode, inchirichay oyqqido uri hara ura he harggiyan oyttennaagaa shaakkana gakkanaashin asaara gayttenna.—Wog. 13:1-8.

HA WODIYAA AKKAMUWAN ERETTIDABAA: Heeraa geeshshatettay, kushiyaa meecettiyoogeenne harggiya uri asa oyttennaadan shaahettiyoogee ha wodiyankka harggiyaa teqqanau keehippe maaddees. Amarkka biittan payyatettaara gayttidabaa oottiya, Sidisi giyo dirijjitee, sheeshsha keetti matan baynnaba gidikko, “haattay deˈiyo sohuwaappe guuxxiis giishin 30 meetiriyaa haakkidi sheeshshaa uttananne hegaa moogana” koshshiyoogaa yootiis. Alamiyaa Payyatettaa Dirijjitee yootiyoogaadan, heeraa asay katta sheeshshaa kammiyo wode, kara harggee oyqqiyo asaa qooday xeetaappe 36 kushe kaseegaappe guuxxees. Aakimeti ahaa bochidi kushiyaa meecettenna wode, daro hargganchata hara harggiyaa oyttidoogaa eroosappe 200 laytta gidibeenna. Sidisi dirijjitee, kushiyaa meecettiyoogee ha wodiyankka ‘harggee daro asaa oyqqennaadan teqqanau keehippe maaddiyaaba’ gidiyoogaa yootiis. Inchirichay woy hara harggee oyqqidoogeeta hara asaappe shaakkiyoogaabaa shin? Mata wode issi maxeetee hagaadan giis: “Wurssiya harggee denddiyo wode, asaappe asaa oyqqennaadan maaddiyaabay sahettida ura asaappe shaakkiyoogaa xalla gidana danddayees.”

NE QOFAY AYBEE? Ha wodiyaa saynisiyaara moggiya beni wode haymaanoote maxaafi haray deˈees gaada qoppay? Woy qassi Geeshsha Maxaafay dummee?

[Sinttaa 6n deʼiya misiliyaa qonccissuwaa]

“Geeshshatettaa mintti naaganaadan Muuse wode odettidabaa nabbabiyoogee keehippe maalaalissees.”

—MANUAL OF TROPIKAL MEDISIN, ALDO KASTTELLAANANNE ALBERT J. CHALMERSA GIYO DOTTORETI XAAFIDOOGAA