“Ta Amoy Polettiis”

Emiiliyo giyo michiyaa tammanne ichashu layttappe kase kumetta wode aqinye gidada oottaasu. SHin guyyeppe a kumetta wodiyaa haggaazana danddayabeykku. Mata wode, a ufayttada aattido wodiyaa darotoo wotta denttada qoppausu; qassi zaarettada kumetta wodiyaa aqinye gidanau koyaasu.

Gidoppe attin, Emiiliya daro saatiyau oottiyo gishshau, hegee a kaseegaadan ufayttennaadan oottiis. Issitoo, banaara oottiyaageeti siyishin a, “Taani haˈˈiigaappe guutta saatiyaa oottanau amottays!” yaagaasu. A haasayidobaa i halaqay siyidi, hegee tumakkonne o oychiis. Hegee tuma gidiyoogaa Emiiliya ayyo yootaasu. SHin dirijjitee ubba oosanchati bantta kumetta wolqqaappe oottanaadan koyiyo gishshau, a ba qofaa polanaadan waanna halaqay paqqadana koshshees. Nu michiyaa waanna halaqaa haasayissanau giigettaasu; qassi xala gidanaunne sarotettaa demmanau woossaasu.

Emiiliya waanna halaqaa haasayissiyo wode, kaseegaappe guutta saatiyaa oottanau hiillaaninne xalan oychaasu. A ba shemppo saatiyan harata maaddiyoogaa yootido wode hagaadan gaasu: “Taani Yihoowa Markka gidiyo gishshau, asaa ayyaanaaban maaddays. Ha wodiyan daro asaa kanddoy moorettiis. Kandduwaara gayttidaagan etau suure maaraa koshshees; taani Geeshsha Maxaafaappe yootiyo aadhida eratettay eta keehippe maaddees. Taani oottiyo harabay hagan oottiyoobaa loyttada oottenna mala digganaadan koyikke; shin asaa haˈˈiigaappe daro saatiyau maaddanau koyays. Taani ooso keettan guutta saatiyaa oottanau koyiyoy hegaassa.”

Waanna halaqay a yootiyoobaa loytti siyidi, ikka issi wode hara asaa maaddanau qoppidoogaa yootiis. Hegaappe simmin, “Neeni yootidobaa gaasuwan ne oychidobaa taani maayaas. SHin neeyyo kaseegaappe guutta miishshay qanxxettanaagaa eray?” yaagiis. Emiiliya hegaa eriyoogaa, qassi koshshiyaaba gidikko ba deˈuwaa sima oottanaagaa yootaasu. A qassi, “Taani keehi xoqqu oottada xeelliyo halchoy asaa tumuppe goˈˈiyaabaa oottiyoogaa” yaagaasu. Waanna halaqay iyyo, “bantta goˈˈaa aggi bayidi bantta wodiyaa harata maaddanau goˈettiyaageeta” nashshiyoogaa yootiis.

He dirijjitiyan oottiya ooninne hegaa mala dumma maataa demmi erenna. Emiiliya haˈˈi saaminttan oyddu gallassa xalla oottausu. O keehi garamissidabay damoozay gujettidoogaa; yaatin a kaseegaa keenaa miishshaa demmawusu! A, “Ta amoy polettiis; yaatin taani zaarettada kumetta wodiyaa aqinye gidaas!” yaagaasu.

Kumetta wodiyaa aqinye gidanau woy zaarettada doommanau ne hanotaa giigissanau qoppadii?

[Sinttaa 32n deʼiya misiliyaa qonccissuwaa]

Waanna halaqay iyyo hagaadan giis: “Bantta goˈˈaa aggi bayidi bantta wodiyaa harata maaddanau goˈettiyaageeta nashshays”