“Taani Ooyyo Yayyanee?”
“Taani Ooyyo Yayyanee?”
“Olai ta bolli woraajjiyaakkokka, taani GODAN ammanettais.” —MAZ. 27:3.
KAALLIDI DEˈIYA XIQISETI YOOTIYOOGAADAN NEENI XALANAADAN AYBI MAADDII?
1. Mazamure 27y nuuni ay akeekanaadan maaddii?
ALAMIYAA hanotay iiti iiti biyaaba gidikkokka, nuuni sabbakiyo oosoy dari dari biyoy aybissee? Daroti ikkonoomiyaaban metootiyaaba gidikkonne, nuuni nu wodiyaappenne wolqqaappe dariya baggaa sabbakanau goˈettiyoy aybissee? Daroti sinttanaabau hirggiyo wode, nuuni hirggennan deˈana danddayiyoy ayba ogiyaanee? Kawuwaa Daawiti ayyaanay denttettin yexxido, Mazamure 27n deˈiya qofay ha oyshata zaarees.
2. Yayyiyoogee issi uri waananaadan oottii, shin nuuni ay ammanettana danddayiyoo?
2 Daawiti ha mazamuriyaa hagaadan giidi doommiis: “GODAI taayyo poo7onne tana ashshiyaagaa; yaatin, taani ooyyo yayyanee? GODAI ta de7oi naagettiyo miixaa; yaatin, taani ooyyo dagammanee?” (Maz. 27:1) Yayyiyoogee issi ura shugulddissidi aynne oottennaadan diggana danddayees. SHin Yihoowan ammanettiya uri xala, qassi yayyenna. (1 PHe. 3:14) Yihoowa nuuyyo miixa oottikko, nuuni “woppu giidi, saro de7ana; metuwaa hirggaappekka shemppana.” (Lee. 1:33; 3:25) Hegaadan deˈana danddayiyoy aybissee?
YIHOOWAY “TAAYYO POO7ONNE TANA ASHSHIYAAGAA”
3. Yihooway nuuyyo pooˈo gididoy ayba ogiyaanee, shin nuuni ay oottana bessii?
3 Yihooway nuna tumaa tamaarissiyoogaa qonccissanau Geeshsha Maxaafay, ‘GODAY taayyo pooˈo’ yaagees. (Maz. 27:1) Pooˈoy nu ogiyan deˈiya daafabaa woy xubbiyaabaa bessana danddayees, shin hegaa ogiyaappe diggenna. He beˈidobay gattiyo daafabaappe nuuni haakkana bessees. Hegaara issi mala hanotan, Yihooway alamiyan hanettiyaabaa birshshettay aybakko nuussi qonccissees. I ha alamiyan deˈiya daafabaappe nuuni naagettanaadan yootees. I ubbatoo goˈˈiya Geeshsha Maxaafaa baaso siraataa nuussi immees, gidoppe attin nuuni tamaariyoobaa oosuwan peeshshana bessees. Hegaadan oottiyo wode, nu morkketuppe woykko nu asttamaaretuppe aadhida erancha gidiyoogaa bessiyaabaa oottoos.—Maz. 119:98, 99, 130.
4. (a) Daawiti ammanettidi, “GODAI . . . tana ashshiyaagaa” giidoy aybissee? (b) Yihooway ba ashkkarata ashshanay awudee?
4 Daawiti yexxido, Mazamure 27:1n deˈiya qofay, hegaappe kase Yihooway a waatidi ashshidaakko dogibeennaagaa bessiyaaba. Leemisuwau, Yihooway a “gaammuwaanne beeriyaa xugunttaappe” ashshiis. Yihooway i wogga wolqqaama asa gidida Gooliyaada xoonanaadankka maaddiis. Guyyeppe, Kawuwaa Saaˈooli Daawita tooran caddanau malido payduwan Yihooway a ashshiis. (1 Sam. 17:37, 49, 50; 18:11, 12; 19:10) Daawiti ammanettidi, “GODAI . . . tana ashshiyaagaa” giidoy hegaassa. Yihooway Daawita ashshidoogaadan ba ashkkarata ashshana. I hegaadan oottanay awudee? Matan yaana “daro waayiyaa” wode.—Ajj. 7:14; 2 PHe. 2:9.
YIHOOWAY NENA MAADDIDO WODIYAA UBBAA HASSAYA
5, 6. (a) Nuuni hassayiyoobay xalanaadan waatidi maaddii? (b) Yihooway hagaappe kase ba ashkkarata waatidi maaddidaakko qoppiyoogee nuna goˈˈiyoy aybissee?
5 Xala gidanau keehippe maaddiya issibaa Mazamure 27:2, 3y yootees. (Nabbaba.) Daawiti bana Yihooway ashshido hanotata hassayiis. (1 Sam. 17:34-37) He hassayiyo hanotati xalanaadan a maaddido gishshau, keehi iita metuwaakka gencciis. Ne deˈuwan Yihooway nena waatidi maaddidaakko hassayay? Hegee neeni xalanaadan oottii? Leemisuwau, nena metoy unˈˈido gishshau minttada woossadii, qassi guyyeppe he metuwaa genccanaadan Yihooway neeyyo waatidi aadhida eratettaa woy wolqqaa immidaakko akeekadii? Woykko, neeni ufayssan Yihoowayyo oottennaadan xube gididabaa xoonanaadan i waatidi maaddidaakko woy oosoy kumido aaho penggee neeyyo waani dooyettidaakko hassayay? (1 Qor. 16:9) Hegaa malabaa hassayiyo wode neeyyo aybi siyettii? He hanotati neeni keehi wolqqaama xubiyaa woy metuwaa xoonanaadan woy genccanaadan Yihooway maaddana danddayiyoogaa neeni ubbatoo ammanettanaadan oottokkonaa?—Roo. 5:3-5.
6 Issi wolqqaama kawotettay Yihoowa Markkatu dirijjitiyaa xayssanau koyiyaakko nuuni waatanee? Ha wodiyan daroti hegaadan oottanau malidosona, shin eta halchoy haliis. Yihooway hagaappe kase ba asaa waatidi maaddidaakko hassayiyoogee, nuuni sinttappe hananabaa ammanettidi naaganaadan oottees.—Dane. 3:28.
TUMU GOYNUWAA NASHSHA
7, 8. (a) Mazamure 27:4y yootiyoogaadan Daawiti Yihoowa ay oychidee? (b) Yihoowa gita ayyaana beeta maqidasee aybee, qassi nuuni he beeta maqidasiyan ayyo goynniyoy ayba ogiyaanee?
7 Tumu goynuwaa siiqiyoogeekka nuuni xalanaadan maaddees. (Mazamure 27:4 nabbaba.) Daawita wode, ‘GODAA keettay’ gayttiyo dunkkaaniyaa. Daawiti ba naˈaa Solomoni keexxana, keehi loˈˈiya beeta maqidasiyau koshshiya ubbabaa giigissiis. Daro layttappe guyyiyan, asay Yihoowayyo goynnanau beeta maqidasiyaa baana koshshenna wodee yaanaagaa Yesuusi qonccissiis. (Yoh. 4:21-23) Kiitettida PHauloosi Ibraawe shemppo 8ppe 10 gakkanaashin, Yesuusi Yihoowa sheniyaa polanau yiido wode, giishin 29 M.Ln i xammaqettido wode, gita ayyaana beeta maqidasee eqqidoogaa yootiis. (Ibr. 10:10) Ha gita ayyaana beeta maqidasee, nuuni Yesuusa wozuwaa yarshshuwan ammaniyoogan Xoossaa ufayssiya ogiyan akko shiiqanaadan Yihooway giigissidobaa. Nuuni he beeta maqidasiyan goynniyoy ayba ogiyaanee? “Suure wozanaara, tumu ammanuwaara” woossiyoogaana; Yihoowabaa xalan sabbakiyoogaana; gubaaˈe shiiquwaunne so asaa goynuwau issippe shiiqiyo wode, nu mala Kiristtaanetuyyo qoppiyoogaananne eta minttettiyoogaana. (Ibr. 10:22-25) Tumu goynuwaara gayttidaban Yihooway giigissidobaa nashshiyoogee, wayssiya wurssetta gallassatun nuna minttees.
8 Alame yuushuwan, ammanettida Yihoowa ashkkarati hara qaalaa tamaariyoogaaninne Kawotettaabaa sabbakiyaageeti keehi koshshiyo heera biyoogan kaseegaappe aaruwan haggaazoosona. Eta hanotay, eti Daawitaagaadan issibaa xallaa Yihoowa oychiyoogaa bessees. Eti Yihoowa loˈˈotettaa beˈanaunne aybi hanikkokka ayyo haggaazanau koyoosona.—Mazamure 27:6 nabbaba.
XOOSSAY MAADDIYOOGAA AMMANETTA
9, 10. Mazamure 27:10y nuuni ay ammanettanaadan oottii?
9 Daawiti, “Ta aawainne ta aayyiyaa tana aggiyaakkonne, GODAI tana dichchana” yaagidi, Yihoowa maaduwan keehippe ammanettiyoogaa yootiis. (Maz. 27:10) Daawita yelidaageeti a aggibeennaagaa, 1 Sameela shemppo 22y yootiyo hanotaappe akeekana danddayoos. Gidikkokka, ha wodiyan darota eta soo asay aggibayiis. SHin eta soo asay aggibayido darota siiqiya Kiristtaane gubaaˈee maaddiis, qassi eti qohettennaadan naagiis.
10 Yihooway ba ashkkarata harati aggibayiyo wode maaddiyaaba gidikko, hara ayba metoynne gakkiyo wode eta kaafennee? Leemisuwau, nu soo asau asatettan koshshiyaabaa waati kunttanaakko hirggiyaaba gidikko, Yihooway nuna maaddanaagaa ammanettana danddayokkoo? (Ibr. 13:5, 6) I ammanettida ba ashkkaratu ubbaa hanotaanne etau koshshiyaabaa erees.
11. Nuuni Yihoowan ammanettiyaageeta gidiyoogee harati nubaa ay qoppanaadan oottii? Leemisuwaa yoota.
11 Laybeeriyaa biittan deˈiya, Vikttooriyo giyo Geeshsha Maxaafaa xannaˈiyaari hanotaa qoppa. A xammaqettanau giigettiyo wode, iira deˈiya bitanee onne i heezzu naata aggidi biis. Keettinne oosoy baynnaba gidikkokka, a ayyaanaaban minna minna baasu. Vikttooriya xammaqetta simmin, 13 laytta gidido i naˈiyaa miishshay kumido issi borssaa demmaasu. Eti paacettennaadan, miishshaa qoodanaukka koyibookkona. Borssaa goda gidida wotaaddaraa sohuwaara koyidi demmidosona. I etau, ubba asay Yihoowa Markkatuugaadan ammanettiyaagaa gidiyaakko, kumetta alamee haˈˈiigaappe loˈˈonne sarotettay kumido soho gidanaagaa yootiis. Vikttooriya he wotaaddaraa ooratta alamiyaa xeelliyaagan Yihooway qaalaa gelidobaa Geeshsha Maxaafaappe bessaasu. Wotaaddaray i suuretettan keehippe maalaalettidi, a immidoogaa giddoppe daro miishshaa iyyo woytiis. Yihooway etau koshshiyaabaa kunttana danddayiyoogaa Yihoowa Markkati wozanappe ammaniyoogee, eti boree baynnaageetanne ammanettiyaageeta gidiyoogan erettanaadan oottiis.
12. Nuuni aquwaaban metootiiddikka Yihoowayyo ubbatoo oottiyo wode ay qonccissiyoo? Leemisuwaa yoota.
12 Seeraaliyoone biittan xammaqettennan aassiya Toomaasau aybi siyettidaakko qoppa. I naaˈˈantto xekka timirtte keettan tamaarissiyoogaa doommiis, shin issi laytta gidiya wodiyau damoozaa ekkibeenna. Toomaasi issi laytta gidiya wodiyaagaa gujjin ba damoozaa ekkanau koshshiyaabay aybee? Timirtte keettaa ayssiya qeesee a oychiyoobay deˈees. He qeesee Yihoowa Markkati ammaniyoobaa timirtte keettay ixxiyoogaa yootiis. I Toomaasi ba oosuwaappenne ba ammanuwaappe issuwaa dooranaadan odiis. Toomaasi he oosuwaanne au qanxxettibeenna damoozaa ubbaa aggibayidi, eraadooniyaanne moobayliyaa giigissiyoogaa doommiis. Hagaappenne hagaa mala daro leemisotuppe akeekiyoogaadan, koshshiyaabaa demmokko giyo hirggay hara asaa yashshana danddayees, shin ba asaa iitabaappe naagiya, ubbabaa Medhidaagee nuuyyo koshshiyaabaa kunttanaagaa ammanettiyo gishshau, nuna aybinne yashshenna.
13. Hiyyeesa biittatun Kawotettaabaa sabbakiyo oosoy aakki aakki biyoy ayba ogiyaanee?
13 Hiyyeesa gidida daro biittatun deˈiya ishatinne michoti minnidi sabbakoosona. Hegau gaasoy aybee? Issi macara biiroy hagaadan giidi xaafiis: “Geeshsha Maxaafaa xannaˈiya darotuyyo oosoy baynna gishshau, gallassaa giddon xannaˈanau etau daro saatee deˈees. Ishatussikka sabbakanau daro wodee deˈees. Asau, ubba qassi wolqqaama metoy gakkiyo heeran deˈiyaageetussi nuuni deˈiyoy wurssetta gallassaana gidiyoogaa yootana koshshenna.” Hegaa yootana koshshennay eti bantta heeran hanettiya iitabaa beˈiyo gishshataassa gidiyoogaa he macara biiroy xaafiis. Aassiyaageetu ubbau amakaayiyan heezzaappe dariya Geeshsha Maxaafaa xinaateti deˈiyo biittan, 12 layttappe dariya wodiyaa haggaazida issi misoonaawee hagaadan giis: “Aassiyaageetuppe daroti qofay shaahettanaadan oottiyaabi darenna deˈuwaa deˈiyo gishshau, haggaazuwaa kiyanaunne Geeshsha Maxaafaa xannaˈissanau etau daro wodee deˈees.”
14. Zaway baynna daro asaa Xoossay naaganay ayba ogetuunee?
14 Yihooway ba asaa issippe asatettaaninne ayyaanaaban maaddanau, naaganaunne ashshanau qaalaa geliis, qassi i hegaa polanaagaa ammanettoos. (Maz. 37:28; 91:1-3) Zaway baynna daro asay ‘daro waayiyaappe’ attana. (Ajj. 7:9, 14) Yaatiyo gishshau, ha siraataa wurssetta gallassan ba asay ubbay xayennaadan Xoossay naagana. Paaciyan genccanaunne eti aara medhido dabbotaa naaganau koshshiya ubbabaa Yihooway etau immana. Daro waayiyaa wurssettankka Yihooway ba asaa naagana.
‘ABEET YIHOOWAU, NE OGIYAA TANA TAMAARISSA’
15, 16. Nuuni Xoossaa kaaletuwaa kaalliyo wode goˈettiyoy ayba ogiyaanee? Leemisuwaa yoota.
15 Nuuni xala gididi deˈanau, Xoossaa ogiyaa ubbatoo tamaarana koshshees. Daawiti, “Abeet GODAU, ne ogiyaa tana tamaarissa; ta morkketu gishshau, tana suure ogiyaa kaaletta” yaagidi woossido woosay hegaa qonccissees. (Maz. 27:11) Xoossaappe tamaaranau, nuuni Geeshsha Maxaafay yootiyoobaanne Yihoowa dirijjitee immiyo kaaletuwaa loytti ezggana, qassi hegaa sohuwaara oosuwan peeshshana koshshees. Bessenna acuwan gelibeenna daroti bantta deˈuwaa sima oottanaadan imettida, aadhida eratetta zoriyaa oosuwan peeshshiyoogee mata wode gakkida ikkonoomiyaa metuwan banttana goˈˈidoogaa beˈidosona. Eti acuwan gelidi bantta abbee danddayenna aquwaa shiishshidi tuggatiyoogaappe, bantta haggaazuwaa aassana danddayoosona. Nuuni ubbay, ‘Taani Geeshsha Maxaafaaninne ammanettida wozannaama ashkkaray giigissiyo xuufetun nabbabiyo ubbabaa, ubba hegee tana goˈˈiyaabaa agga bayanaadan oottiyaaba gidikkokka, sohuwaara oosuwan peeshshiyaanaa?’ yaagidi nuna oychiyoogee bessiyaaba.—Maa. 24:45.
16 Yihooway nuna geeshshatetta ogiyaa tamaarissanaadaaninne an kaalettanaadan eeno giikko, yayyanaadan oottiyaabi aybinne baawa. Amarkkaa biittan issi kumetta wode aqinyee ba soo asay ubbay kumetta wodiyaa haggaaziyoogaa aggennaadan maaddiya oosuwaa oottanau oychido wode, ayyo kolloojjiyaa digiree baynnaba gidikko, i he oosuwaa oottana danddayennaagaa a halaqay yootiis. Nena hegaa malabay gakkiyaakko, xoqqa timirttiyaa tamaariyoogaa aggada kumetta wodiyaa haggaaziyoogaa doommido gishshau zilˈˈettuutii? Naaˈˈu saaminttaappe guyyiyan he halaqay oosuwaappe yedetettin, hara halaqay ishaa a halchoy aybakko oychiis. Ishay inne a keettaayyiyaa kumetta wodiyaa haggaaziya Yihoowa Markka gidiyoogaanne eti he oosuwaa agganau koyennaagaa yootiis. Ishay harabaa yootanaappe kase halaqay hagaadan giis: “Neeni haratuppe dummatanaadan oottidabi deˈiyoogaa eraas! Ta aaway gashetido wode ne mala naaˈˈu Kiristtaaneti galla galla yiidi ayyo Geeshsha Maxaafaa nabbaboosona. Taani Yihoowa Markkatuppe issuwaa maaddanau injjetiya hanotay merettikko maaddanau maacaas.” Wonttetta gallassi, kase halaqay a diggido oosoy he ishau imettiis. Nu deˈuwan Kawotettaabaa kaseyiyo wode, Yihooway nuuyyo koshshiyaabaa kunttanau gelido qaalaa polees.—Maa. 6:33.
AMMANANANNE HIDOOTAN NAAGANA BESSEES
17. Nuuni sintta wodiyaa ammanettidi naaganaadan maaddiyaabay aybee?
17 Daawiti, “GODAA kehatettaa taani paxa de7aidda be7anaagaa ammanais” yaagidi, ammanoynne hidootay koshshiyoogaa qonccissiis. (Maz. 27:13) Xoossay nuuyyo hidootaa immibeennabanne Mazamure 27n deˈiya qofaa nuuni erennaba gidiyaakko, nu deˈoy ay mala gidanee! Yaatiyo gishshau, ha wurssetta gallassan, Yihooway nuuyyo wolqqaa immanaadaaninne Armmageedoona wode nuna ashshanaadan ubbatoo woossana koshshees.—Mazamure 27:14 nabbaba.
[Oyshata]
[Sinttaa 23n deʼiya misiliyaa qonccissuwaa]
Daawiti Yihooway bana ashshido ogiyaa hassayidoogee i xalanaadan maaddiis
[Sinttaa 25n deʼiya misiliyaa qonccissuwaa]
Nuuni hiyyeesatettaa loytti haggaazanau hanotaa injjeyiyaabadan xeelliyoo?
