Tumuppe Laˈa Gidanau Yihoowa Kaaletuwaa Kaalla
Tumuppe Laˈa Gidanau Yihoowa Kaaletuwaa Kaalla
“Ailletettaappe kessiya bali bainna higgiyaa [xeella].”—YAAQ. 1:25.
QONCCISSANA DANDDAYAY?
Tumuppe laˈa gidanaadan maaddiya higgee awugee, qassi he higgiyan goˈettiyaageeti oonee?
Tumuppe laˈa gidanaadan maaddiya waannabay aybee?
Deˈo ogiyan gencciya ubbay sinttappe laˈa kiyanay ayba ogiyaanee?
1, 2. (a) Alamiyaa laˈatettay waaniiddi deˈii, qassi aybissi? (b) Yihoowa ashkkarati sinttappe ay mala laˈatettan deˈanee?
NUUNI deˈiyoy yaaretiyoogee, iitabaa oottiyoogeenne makkalay dari dari biyo wodiyaana. (2 Xim. 3:1-5) Hegaappe denddidaagan, kawotettati kaseegaappe aaro higgiyaa kessoosona, poliseta gujjoosona, qassi wochanau maaddiya massaariyaa tokkoosona. Issi issi biittan asay qohiyaabaappe naagettanau, ba son kooshimmiyaabaa wottees, keettaa qulppiyaa gujjees, qassi ubba korinttiyaara gayttida shubuwaa dirssaa bolli wottees. Daroti yayyiyo gishshau, omarssan sooppe kiyokkona woykko gallassi gidin omarssi bantta naati banttarkka karen kaaˈanaadan koyokkona. Laˈa gidennaadan oottiyaabi gujji gujji biyoogee qoncce; qassi he hanotay giigiyaaba milatenna.
2 Seexaanay Edene gannatiyan, asaa naati Yihoowappe shaahettidi banttana banttarkka ayssiyoogaa xallan tumuppe laˈa gidana danddayiyoogaa yootiis. Hegee worddo gidiyoogee qonccidi erettiis! Xoossay yootiyoogaa aggidi asay ba koyidoogaa oottiyoogee gujji gujji biyo wode, deretettan ubban tuggay dari dari bees. Hegee nuna Yihoowa ashkkaratakka qohees. Gidikkokka, nuuni asaa naati nagaraanne bashshaa aylletettaappe kiyiyoogaa beˈiyoonne Geeshsha Maxaafay “Xoossaa naati ailletettaappe kiyido bonchcho kessaa” giyo laˈatettan deˈiyo hidootay deˈees. (Roo. 8:21) Yihooway ba ashkkarati he laˈatettan deˈanau giigettanaadan maaddiiddi deˈees. Ayba ogiyan?
3. Yihooway Kiristtoosa kaalliyaageetussi ay higge immidee, qassi nuuni beˈana oyshati awugeetee?
3 Yihooway ba asay he laˈatettan deˈanau giigettanaadan maaddanau, Yaaqoobi yootido, “ailletettaappe kessiya bali bainna higgiyaa” immiis. (Yaaqooba 1:25 nabbaba.) Hara Geeshsha Maxaafaa birshshettatun ha xiqisee, “nuna laˈa kessiya higgiyaa,” (Zi Niwu Inggilish Baybil) qassi “polo gidida, laˈatettaa higgiyaa” (Zi Niwu Amerikan Baybil) geetettiis. Darotoo asay higgiyaa laˈa oottiyaabadan gidennan, laˈatettaa diggiyaabadan qoppees. Yaatin, “ailletettaappe kessiya bali bainna [higgee]” aybee? He higgee nuna laˈa kessiyoy ayba ogiyaanee?
AYLLETETTAAPPE KESSIYA HIGGIYAA
4. “Ailletettaappe kessiya bali bainna [higgee]” aybee, qassi he higgiyan goˈettiyaageeti oonee?
4 Muuse Higgee mooro oosoy aybakko bessido gishshaunne Kiristtoosi a polido gishshau, “ailletettaappe kessiya bali bainna [higgee]” he higgiyaa gidenna. (Maa. 5:17; Gal. 3:19) Yaatin, Yaaqoobi yootido higgee awugee? I qoppidoy ‘ammanuwaa higgiyaanne’ ‘laˈa asaa higgiyaa’ geetettida ‘Kiristtoosa higgiyaa.’ (Roo. 3:27; Yaaq. 2:12, NW; Gal. 6:2) Yaatiyo gishshau, ‘bali baynna higgiyan’ Yihooway nuuppe koyiyo ubbabay deˈees. He higgee ayyaanan tiyettidaageetakka ‘hara dorssatakka’ goˈˈees.—Yoh. 10:16.
5. Laˈatettaa higgee deexo gidennay aybissee?
5 ‘Bali baynna higgee’ daro biittaa higgiyaappe dumma. Akeekanau woy kaallanau metenna azazotinne baaso siraatati a giddon deˈoosona. (1 Yoh. 5:3) Yesuusi, “Ta qambbarai giiga; qassi taani inttena toossidoogeekka kaushsha” yaagiis. (Maa. 11:29, 30) Hegaa bollikka, ‘bali baynna higgiyau’ baasoy siiqo gidiyo gishshau, qassi i masettida shuchan gidennan, wozanaaninne qofan xaafettido gishshau, he higgiyan daro azazuwaa xaafana koshshibeenna.—Ibraawe 8:6, 10 nabbaba.
‘BALI BAYNNA HIGGEE’ NUNA AYLLETETTAAPPE KESSIYO OGIYAA
6, 7. Yihooway kessido maaraa xeelliyaagan woygana danddayettii, qassi laˈatettaa higgee goˈˈiyaaba gididoy aybissee?
6 Yihooway qoppiya ba meretatussi kessido higgee eta goˈˈiyaagaanne iitabaappe naagiyaagaa. Leemisuwau, meretay merettidobaynne meretaa wolqqay au haarettiyo, meretaa higgiyaabaa qoppa. Asay he higgeti bana huqqunniyaabadan qoppenna. Hegaadan qoppiyoogaappe, ubba he higgeti bantta sarotettau keehippe koshshiyoogaa eridi, eta nashshoosona. Hegaadankka, ‘bali baynnaba’ gidida Kiristtoosa higgiyan qonccida, Yihooway kandduwaabaunne ayyaanaabau kessido maaray asaa goˈˈees.
7 Laˈatettaa higgee iitabaappe naagiyoogaa bollikka, nuuni qohettennan woykko haratu maataanne laˈatettaa bonchennaagaa bessiyaabaa oottennan, amottiyo bessiyaabaa ubbaa demmanaadan maaddees. Yaatiyo gishshau, tumuppe laˈa gidanau, giishin nuuni koyiyoobaa oottanau maaddiya waannabay, Yihoowa eeshshaaranne i kessido maaraara moggiyaaba gidida, suurebaa amottiyoogaa. Hegaa giyoogee, nuuni Yihooway dosiyoobaa dosiyoogaanne i ixxiyoobaa ixxiyoogaa tamaarana koshshees; laˈatettaa higgee hegaadan oottanaadan nuna maaddees.—Amo. 5:15.
8, 9. Laˈatettaa higgiyaa naagiyaageeti ay goˈˈaa demmiyoonaa? Leemisuwaa yoota.
8 Nuuni polo asa gidenna gishshau, bala amuwaa amottennaadan baaxetoos. Gidikkokka, nuuni ubbatoo laˈatettaa higgiyau haarettiyo wode, i aylletettaappe kessiyoogaa haˈˈikka beˈana danddayoos. Leemisuwau, Geeshsha Maxaafaa xannaˈiyoogaa doommida Jey giyo bitaniyau tambboy amale gidiis. I ba amalee Xoossaa ufayssennaagaa eriis; yaatiyo gishshau issibaa kuuyana koshshees. I ba ashuwaa amuwau haarettaneeyye Yihoowayyo haarettanee? A asatettay tambbuwaa uyanau keehi koyishinkka, i Xoossaayyo oottanau eratetta dooro dooriis. He amaliyaa aggi simmin au aybi siyettidee? I keehippe ufayttiyoogaanne maalaaliya hanotan “laˈa” gididoogaa yootiis.
9 Asay ‘asatettay koyiyoogaadan’ deˈanaadan oottiya, ha alamiyaa laˈatettay aylle kessiyoogaa, qassi ‘ayyaanaabaa qoppiyo,’ Yihooway immiyo laˈatettay aylletettaappe kessiyoogaanne “de7uwaanne sarotettaa” ehiyoogaa, Jey ba deˈuwan beˈidobaappe tamaariis. (Roo. 8:5, 6) Jey aylledan bana haarida amaliyaa agganau wolqqaa awuppe demmidee? I hegaa aggidoy ba minotettaana gidennan, Xoossay immiyo wolqqaana. I Geeshsha Maxaafaa paci baynnan xannaˈiis, geeshsha ayyaanaa immanaadan Xoossaa woossiis, qassi gubaaˈiyan deˈiya ishatinne michoti siiquwan maaddido maaduwan goˈettiis. A maaddidabay, tumu laˈatettaa koyiyo wode nuna ubbaa maaddana danddayees. Waatidi maaddiyaakko ane beˈoos.
XOOSSAA QAALAA AKEEKAN XEELLA
10. Xoossaa higgiyaa akeekan “xeelliyoogee” woygiyoogee?
10 Yaaqooba 1:25y, “Ooninne ailletettaappe kessiya bali bainna higgiyaa xeellidi, aani aqiyaagee . . . ba oottiyo oosuwan anjjettana” yaagees. “Xeellidi” geetettidi birshshettida koyro Giriiketto qaalay, issibaa loytti xeellanau hokkiyoogaa giyoogaa. Hegee baaxetana koshshiyoogaa bessees. Ee, laˈatettaa higgee nu qofaanne wozanaa denttettanaadan koyikko, Geeshsha Maxaafaa minni xannaˈiyoogan, woossiyoogaaninne nuuni nabbabidobaa wotti dentti qoppiyoogan nuuppe koyettiyaabaa oottana bessees.—1 Xim. 4:15.
11, 12. (a) Nuuni tumaa ogiyan deˈana koshshiyoogaa Yesuusi qonccissidoy ayba ogiyaanee? (b) Yelagati naagettana bessiya iitabay aybee?
11 Hegaadankka, nuuni Xoossaa Qaalaa oosuwan peeshshiyoogan, an ‘aqana’ woykko genccana bessees; yaatiyoogan tumaa ogiyan deˈoos. Yesuusi banan ammanida amaridaageetuyyo kaallidi deˈiyaagaadan giidobay hegaara issi mala: “Intte taani tamaarissiyoogau azazettikko, tumu tana kaalliyaageeta. Intte tumatettaakka erana; qassi tumatettai inttena ailletettaappe kessana.” (Yoh. 8:31, 32) ‘Erida uri “eridoban” goˈettiyo gishshau woy hegee au koshshiyo’ gishshau, issi xuufee ha xiqisiyan ‘eriyoogaa’ geetettida qaalay nashshiyoogaakka geetettiyoogaa yootees. Yaatiyo gishshau, nuuni tumaa ogiyan deˈiyo wode a loyttidi ‘eroos.’ Yaatiyo wode, nuuni saluwan deˈiya nu Aawaa keehippe milatanaadan “Xoossaa qaalai” nu eeshshaa laammiyo gishshau, nunan “oottees” gaana danddayoos.—1 Tas. 2:13.
12 Nena hagaadan oycha: ‘Tumuppe taani tumaa eriyaanaa? Tumaa ogiyan deˈiyaanaa? Woy qassi alamiyaa “laˈatettaappe” amaridaagaa haˈˈikka amottiyaanaa?’ Kiristtaane gidida aawaynne aayyiyaa dichido issi michiyaa ba deˈuwan gakkidabaa yootaasu. A yelagatettan deˈiyo wode Yihoowa ammaniyaaba gidikkonne, A loyttada erabeykku. A hagaadan gaada xaafaasu: “Taani i ixxiyoobaa mule ixxa erikke. Ta oottidobay a qofissees gaada qoppa erikke. Qassi tana metoy gakkiyo wode akko woossa erikke. Taani ta akeekan zemppaas; taani he wode aybanne erenna gishshau, hegee eeyyatetta gidiyoogaa haˈˈi erays.” Ha michiyaa ba qofay bala gidiyoogaa guyyeppe akeekada, keehi koshshiya issi issiban laamettidoogee ufayssiyaaba. A ubba kumetta wode aqinye gidada oottiyoogaa doommaasu.
NEENI LAˈA GIDANAADAN GEESHSHA AYYAANAY MAADDEES
13. Nuuni aylletettaappe kiyanaadan Xoossaa ayyaanay maaddiyoy ayba ogiyaanee?
13 Naaˈˈantto Qoronttoosa 3:17y, “Godaa Ayyaanai de7iyoosan ailletetti baawa” yaagees. Geeshsha ayyaanay nuuni aylletettaappe kiyanaadan maaddiyoy ayba ogiyaanee? Geeshsha ayyaanay laˈatettau keehippe koshshiya, “siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa” mala eeshshati nuuyyo deˈanaadan maaddees. (Gal. 5:22, 23) Hegaa mala eeshshati, ubba qassi siiqoy baynnan asay tumuppe laˈa gidana danddayeenna; ha wodiyan alamiyan deˈiya hanotay hegaa bessees. Kiitettida PHauloosi ayyaanaa ayfiyaa yooti simmidi, “Hageeta milatiyaageeta diggiya higgee baawa” yaagiis. He qofay woygiyoogee? Xoossaa ayyaanay issi ura bolli ba ayfiyaa ayfennaadan teqqiya higgee baawa. (Gal. 5:18) Woni hegaa mala higgee aybissi koshshii? Yihooway nuuyyo Kiristtoosaagaa mala eeshshay ubbatoo gujji gujji baanaadaaninne merinau he eeshshay nuussi deˈanaadan koyees.
14. Alamiyaa ayyaanau haarettiyaageeti aylle gidiyoy ayba ogiyaanee?
14 Alamiyaa ayyaanau haarettiyaanne bantta ashuwaa amuwaa poliya asati laˈa gididabadan qoppana danddayoosona. (2 PHeexiroosa 2:18, 19 nabbaba.) SHin eti aylletettan deˈiyoogaa erokkona. He asatu iita amoynne iita eeshshay gattiyo qohuwaa teqqanau keehi daro higgiyaa kessana koshshees. PHauloosi, “Higgee lo77o asau merettibeenna. SHin higgiyaa menttiyaageetuyyo, azazettennaageetuyyo, . . . kiyiis” yaagiis. (1 Xim. 1:9, 10) Eti meqetti baynna goda gidida bantta ‘asatettay koyiyoobaa’ oottiyo gishshau, nagaraa aylle. (Efi. 2:1-3) He asati xaaruwan deˈiya eessan gelida cunccalliyaa mala. Eti bantta amuwaa alanau koyiiddi piriyan geloosona.—Yaaq. 1:14, 15.
KIRISTTAANE GUBAAˈEE LAˈA KESSEES
15, 16. Nuuni gubaaˈiyaa biyoogaa doommoosappe ay goˈˈa demmidoo, qassi gubaaˈiyan demmido laˈatettay aybee?
15 Neeni Kiristtaane gubaaˈiyaa biyoogaa doommiyo wode, issi maabaran geladasa giyoogaa gidenna. Neeni gubaaˈiyaa yiidoy Yihooway nena ehiido gishshataassa. (Yoh. 6:44) Hegau a denttettiday aybee? Neeni Xoossau yayyiya, xillo asa gidiyoogaa beˈido gishshataassee? “Akkay!” gaana danddayaasa. Yaatin Xoossay nenan ay beˈidee? Neeni a higgiyau azazettanaunne a kaaletuwaa kaallanau koyiyoogaa beˈiis. Neeni gubaaˈiyaa biyoogaa doommoosappe Yihooway nena ba Qaalaa tamaarissiyoogan neeyyo koshshiyaabaa kunttiis. I nena worddo haymaanootiyaa timirttiyaanne mala ammanuwaa aylletettaappe kessidi, Kiristtoosa malatana danddayiyo ogiyaa tamaarissiis. (Efisoona 4:22-24 nabbaba.) Hegaappe denddidaagan, neeni alamiyan eta xallay tumuppe ‘laˈa gidida asaappe’ issuwaa gidiyo maataa demmadasa.—Yaaq. 2:12, NW.
16 Ane hagaa qoppa: Yihoowa bantta kumetta wozanaappe siiqiya asaa giddon deˈaydda yayyay? Neeni Kawotettaa Addaraashan ishatuuranne michotuura haasayiyo wode asi tabaa wuuqqana gaada hirggay? Mule hirggakka woykko yayyakka! Neeni he sohuwan laˈatettan woppu gaada deˈaasa. Neeni harasan hegaadan hanuutii? Hegaadan hanakka! Hegaa bollikka, Xoossaa asaa giddon neeni haˈˈi laˈatettan deˈiyoogee sinttappe demmana laˈatettau xeera beso.
“XOOSSAA NAATI AILLETETTAAPPE KIYIDO BONCHCHO KESSAA”
17. Asaa naati aylletettaappe kiyiyoogee ‘Xoossaa naati qoncciyoogaara’ gayttidoy ayba ogiyaanee?
17 Yihooway saˈan baayyo oottiyaageetussi immana laˈatettaabaa PHauloosi, “Xoossai medhdhido mereta ubbai Xoossaa naati qonccanaagaa daro laamoti uttiis” yaagiis. I gujjidikka, “Mereta ubbai ba huuphen bashshaa ailletettaappe issi gallassi kiyana; qassi he meretati Xoossaa naati ailletettaappe kiyido bonchcho kessaa shaakkana” yaagiis. (Roo. 8:19-21) “Meretai” geetettidaageeti, ayyaanan tiyettida, Xoossaa naati ‘qoncciyoogan’ goˈettana, saˈan deˈanau hidootiya asaa. He qonccettay doommiyoy, Xoossaa “naati” ayyaana mereta gididi hayquwaappe denddidi, kiristtoosaara ha saˈaappe iitatettaa xayssiyoonne “zawai bainna daro asaa” ooratta alamiyaa gelissiyo wodiyaana.—Ajj. 7:9, 14.
18. Azazettiya asaa naatu laˈatettay gujji gujji biyoy ayba ogiyaanee, qassi eti wurssettan shaakkana laˈatettay awugee?
18 Wozettida asaa naati he wode dumma laˈatettan deˈana; giishin Seexaanaanne daydanttatu qohuwaappe laˈa gidana. (Ajj. 20:1-3) Hegee keehippe woppissiyaaba! Kiristtoosaara issippe kawonne qeese gidiya 144,000ti, he wodeppe doommidi, asaa naati Addaameppe laattido nagaraappenne polotettaa pacaappe laˈa gidana gakkanaashin wozuwaa yarshshuwan goˈettanaadan maaddana. (Ajj. 5:9, 10) Asaa naati paacee gakkishinkka ammanettidaageeta gididoogaappe denddidaagan, Yihooway koyro etayyo halchido polo laˈatettaa, giishin “Xoossaa naati ailletettaappe kiyido bonchcho kessaa shaakkana.” Ane hagaa qoppa! Hegaappe simmin, Xoossay suure giyoobaa oottanau metootakka. Ne asatettay, ne wozanaynne qofay polo gidana; qassi polo hanotan Xoossaagaa mala eeshshaa qonccissana danddayaasa.
19. Ha wodiyan nuuni tumu laˈatettaa ogiyaappe kiyennaadan ubbatoo ay oottana bessii?
19 Neeni “Xoossaa naati ailletettaappe kiyido bonchcho kessaa” shaakkanau amottay? Amottiyaaba gidikko, “ailletettaappe kessiya bali bainna” higgee ne qofaanne ne wozanaa laammanaadan paqqada. Ee, Geeshsha Maxaafaa minna xannaˈa. Tumaa ogiyan deˈa. Geeshsha ayyaanaa demmanau woossa. Kiristtaane gubaaˈiyaaninne Yihooway giigissiyo ayyaana quman kumetta hanotan goˈetta. Seexaanay Hewaano cimmidoogaadan, neeni Xoossaa ogee laˈatettaa diggees gaada qoppanaadan oottidi cimmanaadan paqqadoppa. Dabloosi keehi cincca gidikkokka, “nuuni a qofaa” eriyo gishshau, xoonettennan aggana danddayoos. Kaalliya huuphe yohoy hegaa qonccissees.—2 Qor. 2:11.
[Oyshata]
[Sinttaa 14n deʼiya misiliyaa qonccissuwaa]
Taani alamiyaa “laˈatettaappe” amaridaagaa haˈˈikka amottiyaanaa?
[Sinttaa 14n deʼiya misiliyaa qonccissuwaa]
Taani tumaa ogiyan deˈiyaanaa?
