Xoossaa Qaalaappe Tamaara

Ayyaana Meretati Nuna Maaddiyoy Woy Qohiyoy Ayba Ogiyaanee?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Kiitanchati oonee?

Kiitanchati saluwan deˈiya, ayyaana meretata. Eta deˈoy asaagaappe keehi xoqqa. I ba huuphe ayyaana gidida, tumu Xoossay saˈaa medhanaappe kasetidi kiitanchata medhiis. (Iyy. 38:4, 7; Maa. 18:10) Yihoowa yuushuwan miilooniyan qoodettiya, ammanettida kiitanchati deˈoosona.—Mazamure 103:20, 21; Daaneela 7:9, 10 nabbaba.

2. Kiitanchati asaa maaddiyoonaa?

Kiitanchati xillo asa gidida Looxa maaddidosona. Xoossay asaa iitatettaappe denddidaagan issi katamaa xayssanau qofaa qachiis; Looxee deˈidoy he katamaana. Naaˈˈu kiitanchati Looxeenne a soo asay baqatanaadan yootidosona. Issi issi asay hegaa qiredan xeellidi siyennan ixxiis. SHin, Looxeenne a macca naati Xoossay kiitanchatu baggaara yootidobaa siyidi azazettido gishshau, bashshaappe attidosona.—Doomettaabaa 19:1, 13-17, 26 nabbaba.

Geeshsha Maxaafay yootiyoogaadan, kiitanchati ha wodiyan Xoossaa Kawotettaa mishiraachuwaa ammanettidi sabbakiyaageeta kaalettiyoogan asaa maaddoosona. (Maa. 24:14) He mishiraachoy naagettanaadan akeekissiyoogaakka gujjees. Xoossay Looxa akeekissidobay qire gidennaagaadan, hegeekka qire gidenna. Hegee Xoossay kiitanchatu baggaara yootiyooba.—Ajjuutaa 1:1; 14:6, 7 nabbaba.

Xoossay nuna paacee gakkiyo wode minttettanau kiitanchata goˈettana danddayees. I Yesuusa minttettanau issi kiitanchaa goˈettiis.—Luqaasa 22:41-43 nabbaba.

Xoossay mata wodiyan kiitanchata hegaappe dumma ogiyan, giishin tuggau gaaso gidida iita asaa xayssanau goˈettana. Hegee asaa naati ufayttanaadaaninne woppu gaanaadan oottana.—2 Tasalonqqe 1:6-8 nabbaba.

 3. Daydanttati nuna qohiyoy ayba ogiyaanee?

Saˈan deˈiya daro asay Xoossaayyo azazettennan ixxidi iitabaa oottidoogaadan, saluwan deˈiya daro kiitanchatikka Xoossaa bolli makkalidosona. (2 PHe. 2:4) Azazettennan ixxida kiitanchati daydanttata geetettoosona. Etappe waannatiyaagee Seexaanaa Dabloosa. Seexaanaynne daydanttati asaa balettiiddi deˈoosona.—Ajjuutaa 12:9 nabbaba.

Seexaanay shori baynna zalˈˈiyaa, asaa naatu kawotettaanne worddo haymaanootiyaa asaa Xoossaappe wora zaaranau goˈettiis. Hegaa gishshau, asaa naata qohiya pirdda pacan, makkalaaninne tuggan oyshettana bessiyay Seexaanaa.—1 Yohaannisa 5:19 nabbaba.

4. Daydanttati asaa waati balettiyoonaa?

Seexaanay hayqqidaageeti asaa haasayissiya ayyaana gidoosona giidi darota balettees. SHin, Geeshsha Maxaafay hayqqidaageeti aybanne oottennaagaa yootees. (Era. 9:5) Dayddanttati hayqqida ura cenggurssa milatissidi asaa haasayissiyoogan balettoosona. (Isi. 8:19) Eti shareechiya asatu baggaara harata balettoosona. Xoossaa Qaalay nuuni hegaa mala ooso ubbaappe haakkanaadan yootees. Yaatiyo gishshau, iita ayyaana oosuwaara gayttidabaa nuuni xayssana koshshees.−Zaarettido Wogaa 18:10, 11; Oosuwaa 19:19 nabbaba.

Nuuni Yihoowa siiqikko, daydanttatussi yayyana koshshenna. Xoossaa Qaalaa xannaˈidi, oosuwan peeshshiyo wode, Dabloosa teqqoos; qassi Xoossaakko shiiqoos. Yihooway daydanttatuppe keehi wolqqaama. Ammanettida a kiitanchati nuna minttettoosona.−Mazamure 34:7; Yaaqooba 4:7, 8 nabbaba.

Gujo qofaa demmanau, Yihoowa Markkati attamissido ha maxaafaa shemppo 10 xeella. Tumuppe Geeshsha Maxaafay Tamaarissiyoy Aybee?