Dabloosa Gitiyaappe Naagetta!

“[Xalahe] halaqaa gitiyaappe kessi ekkana.”—2 XIM. 2:26.

WOYGADA ZAARUUTII?

Neeni ubbatoo harata boriyaaba gidikko, ay oottana koshshii?

Asay unˈˈettin yayyada koyennabaa oottennaadan, PHilaaxoosinne PHeexiroosi oottidobaappe ay tamaarana danddayay?

Nena likkiyaappe aattada mooranchadan xeellennaadan waanada naagettana danddayay?

1, 2. Ha huuphe yohuwan Dabloosa gitetuppe awugeeta beˈanee?

 DABLOOSI Yihoowa asaa shankkatees. A halchoy doˈaa shankkatiya uraagaadan ubbatoo eta woranaassa gidenna. Hegaappe dumma ogiyan, a waanna halchoy shankkatiyo ura paxa oyqqidi, ba koyidobaa ootissanaassa.—2 Ximootiyoosa 2:24-26 nabbaba.

² Gitiyaa yeggiya uri, doˈaa oyqqanau cimmiyoobaa wottana danddayees. I he doˈaa cuulliyaaban oyqqanau, qosettidosaappe kiyanaadan oottana danddayees. Woykko i doˈay bochiyo wode sohuwaara oyqqiyaabaa geeman wottana danddayees. Dabloosi Xoossaa asaa oyqqanau hegaa mala gitiyaa goˈettees. Nuuni a gitiyaappe haakkanau koyikko, beegotti naagana bessees; qassi Seexaanay piriyaa wottidoogaappe naagettanaadan malaataa bessiyaabata akeekana koshshees. Dabloosi Xoossaa asatuppe issota issota oyqqanau goˈettido gitetuppe heezzata, qassi nuuni etappe waani naagettana danddayiyaakko ha huuphe yohuwan beˈana. Hegeeti, (1) Naagettennan haasayiyoobaa, (2) Yashshaanne asay unˈˈettiyoogaa, qassi (3) Bana keehippe mooranchadan xeelliyoogaa. Kaalliya huuphe yohuwan Seexaanaa gitetuppe woykko piretuppe naaˈˈata beˈana.

NAAGETTENNAN HAASAYIYOOBAY QOHENNAADAN TEQQA

3, 4. Nu inxxarssaa naagana xayikko aybi hanana danddayii? Leemisuwaa yoota.

³ SHankkatiya uri doˈay qosettidosaappe kiyanaadan xaragaa yeddana danddayees; yaatidi doˈay baqatiyaagaa oyqqees. Leemiso hanotan, Dabloosi Kiristtaane gubaaˈiyan xaragaa yeddanau koyees. A koshshay polettikko, issota issota gubaaˈiyaappe kessidi ba piriyan oyqqees. Nuuni akeekennan aara hashetidi, a piriyan gelana danddayiyoy ayba ogiyaanee?

⁴ Erissiyo ashkkaraa Yaaqoobi inxxarssay tama mala  gidiyoogaa yootiis. (Yaaqooba 3:6-8 nabbaba.) Nuuni nu inxxarssaa naagana xayikko, gubaaˈiyan xaraga malabaa yeddana danddayoos. Hegee waanidi hanana danddayii? Kaallidi deˈiya hanotaa qoppa: Issi michiyaa kumetta wode aqinye gididoogee gubaaˈiyan odettiis. SHiiquwaappe simmin, naaˈˈu michoti he siyidobaa haasayoosona. Issinna ufayttidoogaanne he ooratta aqinyiyaa ba halchuwaa polanaagaa yootausu. Haranna, ‘A aqinye gididoy gubaaˈiyan haratuppe aadhanau koyiyo gishshataassa gidennan aggenna’ gausu. Neeni he naaˈˈu michotuppe awunni lagge gidanau koyay? Ba haasayan gubaaˈiyan xaraga malabaa yeddana danddayiyaara awunnokko akeekanau metenna.

5. Naagettennan haasayiyoobay qohennaadan teqqanau, nuna waatidi qorana koshshii?

⁵ Naagettennan haasayiyoobay qohennaadan waatidi teqqana danddayiyoo? Yesuusi, “Doonai wozana giddon kumidabaa haasayees” yaagiis. (Maa. 12:34) Yaatiyo gishshau, koyruwan nu wozanaa qorana bessees. Qohiyaabaa haasayanaadan denttettiya qofaa shenetiyoo? Leemisuwau, nuuni issi ishay gubaaˈiyan oottiyo maataa demmanau baaxetiyoogaa siyiyo wode, a koshshay suure gidiyoogaa qoppiyooyye, ba goˈˈaa koyidi hegaadan oottiyaabadan qoppiyoo? Nu ishantti Yihoowassi oottiyoy bantta goˈˈaassa giidi qoppiyaaba gidikko, Xoossaayyo ammanettida ashkkaraa Iyyooba Dabloosi hegaadan giidoogaa hassayana bessees. (Iyy. 1:9-11) Nu ishaa siriyoogaappe, nuuni a aybissi boriyaakko qoppana koshshees. Tumuppe nuuni hegaadan qoppanaadan oottidabi deˈii? Woy qassi ha wurssetta gallassan alamiyan aakkida ixoy nu wozanaa qofaa mooridee?—2 Xim. 3:1-4.

6, 7. (a) Nuuni harata borana danddayiyo issi issi gaasoti awugeetee? (b) Asi nuna cayikko waatana koshshii?

⁶ Nuuni harata borana danddayiyo hara gaasota ane beˈoos. Issoy nuuni oottiyoobaa asay keehi nashshanaadan koyiyoogaa gidana danddayees. Harata boriyoogan nuuni ooppenne aadhiyoogaa bessanau malana danddayoos. Woykko nu mooruwau gaasoyiyoobaa yootana danddayoos. Nuuni boranaadan denttettiday otorettiyoogaa, qanaatiyoogaa woy nu huuphen ammanettennaagaakka gido, hegee qohiyaaba.

⁷ Nuuni issi ura boranau gaasoy deˈiyaabadan qoppana danddayoos. I woy a naagettennan haasayidoban qohettennan aggokko. Hegaadaana gidikko, kushiyaa zaariyoogee bessiyaaba gidenna. Hegaadan oottiyoogee, taman lambbaa gujjiyoogaa mala; qassi Xoossay koyiyoobaa gidennan Dabloosi koyiyoobaa oottiyoogaa. (2 Xim. 2:26) Hegaa mala wodiyan Yesuusa leemisuwaa kaallana koshshees. Yesuusi asay a “cayiyo wode, zaaridi cayibeenna.” Cayiyoogaappe, “xillo pirddiya Xoossaayyo  bana aattidi immiis.” (1 PHe. 2:21-23) Yesuusi Yihooway Ba koyiyo ogiyaaninne wodiyan hanotaa giigissanaagaa ammanettiis. Nuunikka hegaadan Xoossan ammanettana koshshees. Nu haasayan harata minttettiyo wode, gubaaˈee “issippe gatti qachchiya sarotettan” deˈanaadan maaddoos.—Efisoona 4:1-3 nabbaba.

YASHSHAANINNE ASAY UNˈˈETTIYOOBAN CUULETTOPPA

8, 9. PHilaaxoosi Yesuusi hayqqanaadan pirddidoy aybissee?

⁸ Piriyan oyqettida doˈay ba koyidosaa baana danddayenna. Hegaadankka, asay unˈˈettin yayyidi koyennabaa oottiya uri amarida keenaakka gidin, ba koyidobaa oottana danddayenna. (Leemiso 29:25 nabbaba.) Asay unˈˈettin yashshan koyennabaa oottida naaˈˈu asatu leemisuwaanne eti oottidobaappe nuuni tamaarana danddayiyoobaa ane beˈoos.

⁹ Rooma asa gidida, biittaa haariya PHenxxeniyaa PHilaaxoosi Yesuusi moorancha gidennaagaa erees; qassi a qohanau waayi koyana. PHilaaxoosi Yesuusi “bana worissanau bessiyaabaa ainne” oottibeennaagaa yootiis. Gidikkokka, PHilaaxoosi i hayqqanaadan pirddiis. Aybissi? PHilaaxoosi asau yayyido gishshataassa. (Luq. 23:15, 21-25) He asati bantta qaalaa xoqqu oottidi, “Neeni a birshshiyaabaa gidikko, Kawuwaa Qeesaara dabbo gidakka” yaagidi, bantta sheniyaa polanaadan PHilaaxoosa unˈˈettidosona. (Yoh. 19:12) PHilaaxoosi Kiristtoosa birshshikko, ba maataappe wodhays woy bana woroosona giidi yayyennan aggenna. Yaatiyo gishshau, i Dabloosi koyiyoobaa oottiis.

10. PHeexiroosi Kiristtoosa kaddanaadan oottiday aybee?

¹⁰ Kiitettida PHeexiroosi Yesuusau mata laggetuppe issuwaa. I Yesuusi Mase gidiyoogaa yayyennan asau yootiis. (Maa. 16:16) Yesuusi tamaarissiyoobaa akeekibeenna gishshau erissiyo ashkkarati haraati aggidi biido wode, PHeexiroosi a aggidi bibeenna. (Yoh. 6:66-69) Yesuusa a morkketi oyqqanau yiido wode, PHeexiroosi ba Godaa ashshanau bisuwaa shoddiis. (Yoh. 18:10, 11) Gidikkokka, guyyeppe yayyidi, ubba Yesuus Kiristtoosa erennaagaa yootiis. Guutta wodiyau, PHeexiroosi asaa yayyidi, Yesuusa kaddiis.—Maa. 26:74, 75.

11. Nuuni qohettennaadan aybippe naagettana koshshii?

¹¹ Kiristtaane gidiyoogaadan, nuuni asaa yayyidi Xoossaa ufayssennabaa oottennaadan naagettana koshshees. Nuna ootissiyaagee woy harati nuuni ammanettennaagaa bessiyaabaa oottanaadan wolqqanttanau malana woy shori baynnabaa oottanaadan nuna cimmana danddayoosona. Tamaareti paaciyaa wuuqqanaadan, pokkobaa misiliyaa beˈanaadan, sijaaraa uyanaadan, jallissiya xaliyaa goˈettanaadan, likkiyaappe aattidi uyanaadan woy shori baynnabaa oottanaadan laggeti unˈˈettana danddayoosona. Yaatin, asay unˈˈettin yayyidi, Yihoowa ufayssennabaa oottennaadan nuna aybi maaddana danddayii?

12. Nuuni PHilaaxoosanne PHeexiroosa leemisuwaappe tamaarana danddayiyoobay aybee?

¹² PHilaaxoosanne PHeexiroosa leemisuwaappe tamaarana danddayiyoobaa ane beˈoos. PHilaaxoosi Kiristtoosabaa eriyoobay guutta. Gidikkokka, i Yesuusi mooribeennaagaanne coo asa gidennaagaa erees. SHin PHilaaxoosi bana kawushshiyaanne tumu Xoossaa siiqiya asa gidenna. Dabloosi a ba piriyan oyqqiis. PHeexiroosi suure eraa erees, qassi Xoossaakka siiqees. Gidikkokka, issi issitoo i ba abbiyaa pacaa eribeenna, qassi asau yayyiis. Yesuusi oyqettanaappe kase PHeexiroosi, “Eti ubbati nena yeggi bayidi baqatikkokka, taani nena mulekka yeggikke” yaagidi ceeqettiis. (Mar. 14:29) PHeexiroosi mazamuraawiyaagaadan Xoossan ammanettidaba gidiyaakko, bana gakkana paaciyau giigettana shin. He mazamuraawee, “GODAI tanaara de7iyo gishshau,  taani yayyikke. Asi tana ai oottii?” yaagiis. (Maz. 118:6) Yesuusi saˈan deˈido wurssetta qammi, PHeexiroosanne hara naaˈˈu kiitettidaageeta ekkidi Geetesemaane ataakiltte sohuwau giddotiyaasaa biis. Gidikkokka, PHeexiroosinne a laggeti beegottidi naagiyoogaa aggidi xiskkidosona. Yesuusi eta denttidi, “Paaciyan intte gelenna mala, naagitenne Xoossaa woossite” yaagiis. (Mar. 14:38) SHin PHeexiroosi zaarettidikka xiskkiis, qassi guyyeppe asay unˈˈettin yaayyidi koyennabaa oottiis.

13. Nuuni balabaa oottanaadan asay unˈˈettiyo wode eqettana danddayiyoy ayba ogiyaanee?

¹³ PHilaaxoosanne PHeexiroosa leemisuwaappe hara goˈˈiyaabaa tamaarana danddayoos: Suure eray, bana kawushshiyoogee, ba abbiyaa pacaa eriyoogee, Xoossaa siiqiyoogeenne asaa gidennan Yihoowa yayyiyoogee asay nuna unˈˈettiyo wode eqettanau keehippe koshshiyaaba. Nu ammanuwaa baasoy suure eraa gidikko, nuuni ammaniyoobaa haratussi xalan yootoos. Hegee, asay nuna unˈˈettiyo wode eqettanaadaaninne asa yayyennaadan maaddees. Nu minotettan ammanettana bessenna. Hegaappe dumma ogiyan, asay unˈˈettiyo wode eqettanau, ashkke gididi nuuyyo Xoossaa wolqqay koshshiyoogaa ammanana bessees. Nuuni Yihoowa ayyaanaa demmanau woossana koshshees, qassi a siiqiyoogee a sunttaunne i kessido maarau nuuni exatanaadan denttettana bessees. Hegaa bollikka, nuna paacee gakkanaappe kasetidi, asay unˈˈettiyoobau giigettana koshshees. Leemisuwau, kasetidi giigettiyoogeenne woossiyoogee, nu naati balabaa oottanaadan eta laggeti cimmiyo wode eqettanaadan eta maaddana danddayees.—2 Qor. 13:7. *

NENA MOORANCHADAN XEELLIYO, NIPPI OOTTIYA PIRIYAAPPE NAAGETTA

14. Dabloosi nuuni kase oottido nagaraa xeelliyaagan woygidi qoppanaadan koyii?

¹⁴ Issi issi piree doˈay darotoo aadhiyo sohuwan kaqettida gita duruma woy shucha. Doˈay aadhiiddi shubuwaa bochiyo wode, durumay woy shuchay a bolli wodhinne daraxi aggees. Likkiyaappe aattidi bana moorancha giyoogee he daraxiya durumaa woy shuchaa mala geetettana danddayees. Kase oottido nagaraa qoppiyoogee nuna ‘nippi oottana’ danddayees. (Mazamure 38:3-5, 8 nabbaba.) Seexaanay nuuni Yihooway nuuyyo atto geennabadan, qassi nuuni i koyiyoobaa oottana danddayennabadan qoppanaadan koyees.

15, 16. Nena likkiyaappe aattada mooranchadan xeellennaadan waanada naagettana danddayay?

¹⁵ Nippi oottiya ha piriyaappe neeni naagettana danddayiyoy ayba ogiyaanee? Neeni deexo nagaraa oottidaba gidikko, zaarettada Yihoowaara dabbotanau koshshiyaabaa sohuwaara ootta. Gubaaˈe cimati maaddanaadan oycha. (Yaaq. 5:14-16) Neeni mooridobaa suurissanau neeyyo danddayettidabaa ootta. (2 Qor. 7:11) Nena seeriyaaba gidikko keehi azzanoppa. Seeray Yihooway nena siiqiyoogaa bessiyaaba. (Ibr. 12:6) Kase nena nagaran yeggidabaa zaarettada oottennaadan murtta, qassi he murttidobaa oosuwan peeshsha. Nagaraappe simmada, Yesuus Kiristtoosa wozuwaa yarshshoy ne nagaraa kammana danddayiyoogaa ammana.—1 Yoh. 4:9, 14.

¹⁶ Issooti issoti Xoossay etau atto gi simmin, haˈˈikka he nagaraa qoppiiddi likkiyaappe aattidi unˈˈettoosona. Ne hanotaykka hegaadaana gidikko, PHeexiroosinne kiitettida harati Yihooway siiqiyo Naˈaa Yesuusa miyyiyan eqqana bessiyo wodiyan a aggibayin, Yihooway etau atto giidoogaa hassaya. Qoronttoosa gubaaˈiyan shori baynnabaa ootti bohettidi, guyyeppe ba nagaraappe simmida bitaniyau Yihooway atto giis. (1 Qor. 5:1-5; 2 Qor. 2:6-8) Xoossaa Qaalay,  deexo nagaraa oottidi bantta nagaraappe simmidanne Xoossay etau atto giido asatubaa yootees.—2 Odi. 33:2, 10-13; 1 Qor. 6:9-11.

17. Wozoy waatana danddayii?

¹⁷ Neeni tumuppe ne nagaraappe simmada, Yihoowa maarotaa demmidaba gidikko, i neeni kase oottido nagaraa atto gees, qassi dogees. Yesuusa wozuwaa yarshshoy ne nagaraa kammana danddayennabadan mule qoppoppa. Hegaadan qoppikko, Seexaanaa piretuppe issuwan geladasa giyoogaa. Dabloosi neeni ammananaadan koyiyoobay aybanne gido, wozoy bantta nagaraappe simmida ubbatu nagaraa kammana danddayees. (Lee. 24:16) Wozuwan ammaniyoogee nena likkiyaappe aattada moorancha geennaadan, qassi ne kumetta wozanaappe, qofaappenne shemppuwaappe Xoossaayyo oottanaadan wolqqaa immana danddayees.—Maa. 22:37.

SEEXAANAA QOFAA EROOS

18. Nuuni Dabloosa gitiyaappe naagettana danddayiyoy ayba ogiyaanee?

¹⁸ Seexaanay nuna ayba ogiyankka oyqqo, i koyiyo waannabay oyqqiyoogaa. Nuuni Seexaanaa qofaa eriyo gishshau, Dabloosi cimmennaadan naagettana danddayoos. (2 Qor. 2:10, 11) Nuna gakkiya paaciyan genccanau aadhida eratettaa immanaadan Yihoowakko woossiyaaba gidikko, Seexaanaa gitiyan woy piriyan oyqettokko. Yaaqoobi, “Intteppe ooninne baayyo aadhdhida eratettai xayikko, borennan ubbau kehatettan immiya Xoossaa woosso. I ayyo immana” yaagiis. (Yaaq. 1:5) Ubbatoo Xoossaa Qaalaa xannaˈiyoogaaninne oosuwan peeshshiyoogan nu woosaara moggiyaabaa oottana koshshees. Ammanettida wozannaama ashkkaray giigissiyo, Geeshsha Maxaafaa xannaˈanau maaddiya xuufeti Dabloosi wottiyo piriyaa shaakkidi eranaadaaninne hegaappe naagettanaadan nuna maaddoosona.

19, 20. Nuuni iitabaa ixxana koshshiyoy aybissee?

¹⁹ Woossiyoogeenne Geeshsha Maxaafaa xannaˈiyoogee nuuni loˈˈobaa dosanaadan maaddees. SHin nuuni iitabaa ixxiyoogeekka hegaadan keehippe koshshiyaaba. (Maz. 97:10) Nu ashuwaa amuwaa poliyoogee kaalettiyoobaa wotti dentti qoppiyoogee hegaappe haakkanaadan maaddana danddayees. (Yaaq. 1:14, 15) Nuuni iitabaa ixxananne loˈˈobaa tumuppe dosana koshshees. Yaatikko, Seexaanay oyqqanau goˈettiyoobaa nuuni ixxiyo gishshau, hegan cimettokko.

²⁰ Xoossay nuna Seexaanay cimmennaadan maaddiyo gishshau, a keehippe galatoos! Yihooway ba ayyaanaa, ba Qaalaanne ba dirijjitiyaa baggaara nuna ‘iitaappe ashshees.’ (Maa. 6:13) Dabloosi Xoossaa asaa oyqqanau goˈettido hara naaˈˈu piretuppe nuuni waanidi naagettana danddayiyaakko kaalliya huuphe yohuwan beˈana.

[Tohossa qofaa]

[Oyshata]

[Sinttaa 24n deʼiya misiliyaa qonccissuwaa]

Naagettennan haasayiyoobay gubaaˈiyan xaraga mala metoy merettanaadan oottana danddayees

[Sinttaa 27n deʼiya misiliyaa qonccissuwaa]

Nena likkiyaappe aattada moorancha gaana koshshennay aybissee?