Minna Eqqa, Seexaanaa Piriyaappe Haakka!
Minna Eqqa, Seexaanaa Piriyaappe Haakka!
‘Xalahe halaqaa iita cimuwaa teqqite.’ —EFI. 6:11.
WOYGADA ZAARUUTII?
Yihoowau oottiya uri miishshaa siiqiyo piriyan gelennaadan waanidi naagettana danddayii?
Aqo oyqqida Kiristtaanee olla mala gidida, wodiraa laammiyo nagaraa oottennaadan aybi maaddana danddayii?
Miishshaa siiqiyoonne shori baynna asho gaytotettaa poliyo paaciyan kunddana xayikko, nuuni ayba anjjuwaa demmana gaada qoppay?
1, 2. (a) Seexaanay ayyaanan tiyettidaageetussinne ‘hara dorssatussi’ qarettennay aybissee? (b) Seexaanaa piretuppe ha huuphe yohuwan beˈanaageeti awugeetee?
SEEXAANAA DABLOOSI asaa naatuyyo, ubba qassi Yihoowau oottiyaageetuyyo qarettenna. Seexaanay ayyaanan tiyettidaageetuppe attidaageeta oliiddi deˈees. (Ajj. 12:17) Ammanettida ha Kiristtaaneti ha wodiyan Kawotettaabaa sabbakiyo oosuwaa sintta xeera gididi oottoosona, qassi Seexaanay ha alamiyaa haariyaagaa gidiyoogaa qonccissidosona. Dabloosi ayyaanan tiyettidaageetuura hashetiya, qassi baappe halida merinaa deˈuwaa demmanau hidootiya ‘hara dorssatakka’ dosenna. (Yoh. 10:16) I keehippe hanqqettidoy hegaassa. Nu hidootay saluwaana gidin saˈaana gidin, Seexaanay nuussi morkke. I halchidoy nuna qohanaassa.—1 PHe. 5:8.
2 Seexaanay ba halchuwaa polanau dumma dumma piriyaa woy gitiyaa goˈettees. I ammanenna asaa qofaa jallissido gishshau, eti mishiraachuwaa siyokkona, qassi ha pireta akeekana danddayokkona. SHin Dabloosi Kawotettaa mishiraachuwaa ekkida, issota issotakka ba gitiyan oyqqees. (2 Qor. 4:3, 4) Hagaappe kase huuphe yohuwan Seexaanaa piretuppe heezzata, giishin (1) Naagettennan haasayiyoobaa, (2) Yashshaanne asay unˈˈettiyoogaa, qassi (3) Bana keehippe mooranchadan xeelliyoogaanne hegeetuppe naagettana danddayiyo ogiyaa beˈida. Seexaanaa piretuppe woy gitetuppe hara naaˈˈata, giishin miishshaa siiqiyoogaanne wodiraa laammanaadan paacciyaabaa waatidi teqqana danddayiyaakko ane beˈoos.
MIISHSHAA SIIQIYOOGAA—CUULLIYA PIRIYAA
3, 4. Ha saˈaa deˈuwau hirggiyoogee miishshaa siiqanaadan oottana danddayiyoy ayba ogiyaanee?
3 Yesuusi issi leemisuwan aguntta giddon wodhida zerettaabaa yootiis. I issi uri qaalaa siyana danddayikkonne, “ha sa7aa de7uwau hirggiyoogeenne duretetta siiqiyoogee [“aquwau deˈiya balettiyo wolqqay,” NW] qaalaa cuullees; cuullin he zerettai aifennan atti aggees” yaagiis. (Maa. 13:22) Ee, miishshaa siiqiyoogee nu morkkee Seexaanay goˈettiyo piretuppe issuwaa.
4 Naaˈˈubati issippe gididi ‘qaalaa cuulloosona.’ Issoy ‘ha saˈaa deˈuwau hirggiyoogaa.’ Ha ‘wayssiya wodiyan’ neeni unˈˈettanaadan oottiya darobay deˈees. (2 Xim. 3:1) Ubbabay keehippe alˈˈo gidiyo gishshau woy neeyyo oosoy baynna gishshau, koshshiyaabaa demmanau metootana danddayaasa. Neeni sintta wodiyaabau hirggananne ‘Taani xuurataa kiya simmada gidiya miishsha demmaneeshsha?’ gaada qoppana danddayaasa. Issoti issoti hegaadan hirggiyo gishshau, miishshay deˈikko koshshiyaabaa ubbatoo demmana danddayiyaabadan qoppidi, duretanau bichaaroosona.
5. ‘Aquwau deˈiya wolqqay’ balettana danddayiyoy ayba ogiyaanee?
5 Yesuusi yootido harabay ‘aquwau deˈiya balettiyo wolqqaa.’ Hegee hirggiyoogaara issippe gididi qaalaa cuullana danddayees. ‘Miishshay asa iitaappe ashshiyoogaa’ Geeshsha Maxaafay yootees. (Era. 7:12) Gidikkokka, duretanau bichaariyoogee eratetta gidenna. Daroti duretanau keehippe baaxetiyo peeshshan, miishshaa siiqiyo piree eta yaa oyqqiyoogaa akeekidosona. Ubba issoti isooti aquwau haarettidosona.—Maa. 6:24.
6, 7. (a) Miishshaa siiqiyoogee issi urau ooso sohuwan pire gidana danddayiyoy ayba ogiyaanee? (b) Kaseegaappe daro saatiyau oottanaadan issi Kiristtaaniyaa oychikko, i ay qoppana koshshii?
6 Duretettaa amoy neeni akeekennan doommana danddayees. Leemisuwau, kaallidi deˈiyaagaa qoppa. Ne halaqay neeyyo hagaadan gees: “Taani neessi yootiyo ufayssiyaabi deˈees! Ha dirijjitee wolqqaama oosuwaa doommana hanees. Yaatiyo gishshau, neeni amarida aginau darotoo kaseegaappe daro saatiyau oottana koshshennan aggenna. Hegan neeni daro miishshaa demmana.” Neeyyo hegaadan giyaakko waatuutii? Neeni ne soo asau koshshiyaabaa kunttana bessiyoogee tuma, shin ne aawatettay hegaa xalla gidenna. (1 Xim. 5:8) Neeni qoppana koshshiya hara darobay deˈees. Neeni kaseegaappe ay keena saatiyaa gujjada oottuutii? Ne oosoy, gubaaˈiyaa shiiquwaanne ne Soo Asaa Goynuwaa omarssaa gujjin ayyaanaaban neeni oottiyooban kelttiyaa gelii?
7 Neeyyo keehippe koshshiyaabay aybakko qoppa; kaseegaappe daro miishshaa demmiyoogeeyye, Yihoowaara deˈiya dabbotay? Kaseegaappe daro miishshaa demmanau amottiyoogee ne deˈuwan Kawotettaabaa kaseyennaadan oottaneeshsha? Neeni neeyyoonne ne soo asau ayyaanaaban koshshiyaabaa sheneho giikko, miishshaa siiqiyoogee nena waatidi qohiyaakko akeekay? Neeni haˈˈi hegaa mala hanotan deˈiyaaba gidikko, miishshaa siiqiyoogee nena cuullennaadan waanada naagettana danddayay?—1 Ximootiyoosa 6:9, 10 nabbaba.
8. Nu deˈuwaa qoranaadan maaddana danddayiya, Geeshsha Maxaafan deˈiya leemisoti awugeetee?
8 Nena miishshaa siiqiyoogee cuullennaadan, ubbatoo ne deˈuwaa qorana koshshees. Ba oottiyooban ayyaanaabaa bonchennaagaa bessida, Eesawa mala gidanau neeni mule koyennaagee qoncce! (Doo. 25:34; Ibr. 12:16) Qassi neeni baayyo deˈiyaabaa bayzzidi, hiyyeesau immanaadaaninne Yesuusa kaallanaadan shoobettida dure bitaniyaa mala gidanaukka koshshenna. He bitanee hegaadan oottiyoogaappe, “i daro dure gidiyo gishshau, qarettiiddi aggi bayidi biis.” (Maa. 19:21, 22) He bitaniyaa aqoy ayyo pire gidin, gita maatay, giishin ha saˈan deˈida asa ubbaappe aadhiya Yesuusa kaalliyoogee appe haliis! Yesuus Kiristtoosi erissiyo ashkkara gidiyo maatay neeppe halennaadan naagetta.
9, 10. Geeshsha Maxaafay qonccissiyoogaadan, aquwaabaa nuuni waatidi xeellana bessii?
9 Aquwaabau keehippe hirggennaadan kaallidi deˈiya, Yesuusi zorido zoriyaa oosuwan peeshsha: “‘Nuuni ai maanee? Woi ai uyanee? Woi ai maayanee?’ yaagidi hirggoppite. Aissi giikko, he ubbabaa Xoossaa ammanennaageeti darissidi koyoosona; he ubbai inttena koshshiyoogaa saluwan de7iya intte Aawai erees.”—Maa. 6:31, 32; Luq. 21:34, 35.
10 Aquwau deˈiya balettiya wolqqan cimettoppa. Yaatiyoogaappe, “Taayyo koshshiya keesa qumaa immappe attin, tana dure woikko manqqo kessoppa” yaagida, Geeshsha Maxaafaa xaafidaageetuppe issuwaa gidida Aguraagaadan qoppa. (Lee. 30:8) Aguri deˈuwau amarida miishshay koshshiyoogaa, hegaadankka aquwau balettiyo wolqqay deˈiyoogaa eriis. Ha saˈaa deˈuwau hirggiyoogeenne aquwau deˈiya balettiyo wolqqay ayyaanaaban qohana danddayiyoogaa akeeka. Aquwaabau keehippe hirggiyoogee ne wodiyaanne wolqqaa wurssana danddayees; qassi neeni Kawotettaabaa oottanau koyennaadan diggana danddayees. Yaatiyo gishshau, Seexaanay goˈettiyo, miishshaa siiqiyo piriyan gelennaadan murtta!—Ibraawe 13:5 nabbaba.
WODIRAA LAAMMIYOOGAA —GEEMMI UTTIDA OLLAA
11, 12. Issi Kiristtaanee banaara oottiya uraara waanidi wodiraa laammana danddayii?
11 Wolqqaama doˈaa oyqqanau koyiya uri he doˈay darotoo simerettiyo ogiyan ollaa bookkana danddayees. I he ollay beettennaadan qayxaariyaa hiixxidoogaa bolli biittaa mayzzees. Seexaanay daroti kunddanaadan oottido paacetuppe issoy he piriyaa mala. He paacee shori baynna asho gaytotettaa. (Lee. 22:14; 23:27) Issi issi Kiristtaaneti sohuwaara he paaciyan yeggiyaabaa oottidi, he olan gelidosona. Aqo oyqqida issi issi Kiristtaaneti bantta aqo lagge gidenna uraara siiqettidi wodiraa laammidosona.
12 Issi uri aqo lagge gidenna uraara siiqettiyoogaa doommiyoy ooso sohuwaana gidana danddayees. Wodiraa laammida asaa giddon baggappe dariya macca asay, qassi 4 attuma asaappe 3y hegaadan oottidoy banttanaara oottiyaageetuura gidiyoogaa issi xinaatee qonccissiis. Neeni mattuman neeppe dummatiyaageetuura oottay? Oottiyaaba gidikko, intte gayttiyo hanotay ay malee? Oosuwaara gayttidabaappe harabau gayttennaadan zawaa essay? Leemisuwau, issi michiyaa banaara oottiya uraara daroto haasayaydda, geella aara ulottada ba aqo laggiyaara deˈiya metuwaakka yootana danddayausu. Issi ishay qassi banaara oottiya maccaasiyo laggedan xeellidi hagaadan qoppana danddayees: “A ta qofaa xoqqu oottada xeellausu, qassi taani iira haasayiyo wode ezggausu. Ubba a tana nashshausu. Ta machiyaakka tau hegaadan hanidaakko ayba loˈˈoo shin!” Ha Kiristtaaneti wodiraa laammanau waani paacettiyaakko akeekadii?
13. Issi Kiristtaanee gubaaˈiyan deˈiya, ba aqo lagge gidenna uraara bessenna ogiyan waani siiqettana danddayii?
13 Issi Kiristtaanee gubaaˈiyan deˈiya, ba aqo lagge gidenna uraara bessenna ogiyan siiqettana danddayees. Ha tumu taarikiyaa qoppa. Daaneelinne a machiyaa Saara * naaˈˈaykka kumetta wode aqinye. Daaneeli kase i gubaaˈiyan baayyo imettiya ayba oosonne eeno giidi oottiya gubaaˈe cima gidiyoogaa yootiis. I demmiyo maata ubbaa ufayttidi ekkees. Daaneeli ba haggaazuwan yelaga gidida ichashu attumaasata xannaˈissiis; etappe heezzati xammaqettidosona. I xannaˈissin matan xammaqettida he ishanttussi daro maadoy koshshiis. Daaneeli gubaaˈe giddon darobaa oottiyo gishshau, Saara darotoo eta maaddausu. Saarokka minttettana koshshiyo wode, Daaneela xinaateti minttettoosona. Hegee iita pire gidiis. Daaneeli hagaadan giis: ‘Ta machiyaa bau deˈiya abbiyan harata maaddiyo gishshau, iyyokka wodiyaappe wodiyan ayyaanaabaaninne qofan maadoy koshshiis. He wode ta o maaddabeykke. Hegee keehippe qohiis. Ta keettaayiyaa taani kase xannaˈissido issi yelagaara wodiraa laammaasu. Tau oosoy keehi darido gishshau, a ayyaanaaban shuggidoogaa akeekabeykke.’ Hegaa malabay gakkennaadan waana naagettana danddayay?
14, 15. Aqo oyqqida Kiristtaaneti wodiraa laammennaadan maaddana danddayiyay aybee?
14 Olla mala gidida, wodiraa laammiyo nagaran kunddennaadan, ne aqo laggiyau ammanettiyoogee aybakko yerera. Yesuusi, “Xoossai issippe gattidoogaa asi shaakkoppo” yaagiis. (Maa. 19:6) Gubaaˈiyan neeyyo deˈiya maatay ne aqo laggiyaappe aadhiyaabadan mule qoppoppa. Hegaa bollikka, koshshennabau ne aqo laggiyaappe darotoo shaahettiyoogee neeni ne aqo laggiyaara kaseegaadan siiqettennaagaa bessiyaaba gidana danddayiyoogaa, qassi wodiraa laammanaadan oottiya paaciyan nena yeggana danddayiyoogaa akeeka.
15 Gidoppe attin, neeni gubaaˈe cima gidikko, wudiyaukka qoppana koshshees. Kiitettida PHeexiroosi, “Intte giddon de7iya Xoossaa dorssaa wudiyaa Xoossai koyiyoogaadan heemmite. Dosaanappe attin, wolqqan gidenna. Qassi intte go77a xalaalaa xeellennan, lo77o qofan heemmite” yaagiis. (1 PHe. 5:2) Gubaaˈiyan deˈiya, neeni heemmiyoogeeta sheneho gaana bessenna. Gidikkokka, neeni loˈˈo azinaappe koyettiyaabaa oottennan aggada, gooba cima gidanau darobaa oottana bessenna. Ne machiyo sheneho gaada gubaaˈiyan deˈiya harata maaddiyoogau waagi baa. Hegee ne aqo deˈuwaa metuwan yeggees. Daaneeli, ‘Intte soo asau qoppennaadan oottiyaagaa keena darobaa gubaaˈiyan oottanau mule baaxetana koshshenna’ yaagiis.
16, 17. (a) Aqo oyqqida Kiristtaaneti aqo lagge gidenna uraara siiqettanau koyennaagaa ooso sohuwan bessana danddayiyoy ayba ogiyaanee? (b) Kiristtaaneti wodiraa laammennaadan naagettana mala maaddana danddayiya xuufeta yoota.
16 Wochiyo Keelaanne Beegottite! maxeeteti Aqo oyqqida Kiristtaaneti wodiraa laammiyo piriyan gelennaadan maaddiya daro zoriyaa yootoosona. Leemisuwau, Masqqala 15, 2006, Wochiyo Keelay (Amaarattuwaa) hagaadan gi zoriis: “Ooso sohuwan gidin hara sohuwan aqo lagge gidenna uraara siiqettanaadan oottiyaabaappe naagetta. Leemisuwau, ooso saatee wuri simmin, mattuman neeppe dummatiya uraara oottiyoogee paaciyan yeggana danddayees. Neeni aqo oyqqida asa gidiyoogaadan, ne aqo lagge gidenna uraara siiqettanau koyennaagaa ne haasayaaninne ne hanotan qonccissana koshshees. Neeni Xoossau aqida asa gidiyoogaadan, lambbeechiyoogan woy shori baynna maayuwaaninne alleequwan aqo lagge gidenna uri nena siiqanaadan oottanau koyennaagee qoncce. . . . Ne ooso sohuwan ne aqo laggiyaanne ne naatu pootuwaa wottiyoogee, neeni xoqqu oottada xeelliyoobaa haratikka neenikka hassayanaadan oottees. Ne aqo lagge gidenna uri nena siiqanaadan denttettenna mala, woy ubba i hegaadan oottiyo wode coˈˈu gaada xeellenna mala murtta.”
17 Hosppune 2009 Beegottite! maxeetiyan, “Aqo Laggiyau Ammanettiyoogaa Giyoogee Woygiyoogee” giya huuphe yohuwan deˈiya qofay, ne aqo lagge gidenna uraara shori baynnabaa oottanau qoppennaadan akeekissiis. He maxeetee, hegaa mala qofay wodiraa laammiyo hanotettaa gujjiyoogaa qonccissiis. (Yaaq. 1:14, 15) Neeni aqo oyqqidaba gidikko, ne aqo laggiyaara issippe hegaa mala xuufiyaa issi issitoo tobbiyoogee eratetta. Aqo deˈoy Yihooway giigissido geeshshaba. Ne aqo laggiyaara intte aqo deˈuwaabaa haasayanau wodiyaa bazziyoogee, neeni geeshshabaa xoqqu oottada xeelliyoogaa bessiyo oge.—Doo. 2:21-24.
18, 19. (a) Wodiraa laammiyoogee kaalettiyo iitabay aybee? (b) Aqo laggiyau ammanettiyoogee demissiyo anjjoy aybee?
18 Neeni mattuman neeppe dummatiya uraa bessenna ogiyan siiqanau paacettiyaaba gidikko, shaaramuxiyoogeenne wodiraa laammiyoogee kaalettiyoobaa yerera. (Lee. 7:22, 23; Gal. 6:7) SHori baynnabaa oottiyoogee Yihoowa azzanttees, qassi he uraanne a aqo laggiyaa qohees. (Milkkiyaasa 2:13, 14 nabbaba.) Hara baggaara qassi, kandduwan geeshsha gididi deˈiyaageeti demmiyo anjjuwaakka yerera. Eti sinttappe merinaa deˈuwaa demmanaagaa xalla gidennan, ha wodiyan banttana zoriya wozanay qumˈˈennan loˈˈo deˈuwaa deˈoosona.—Leemiso 3:1, 2 nabbaba.
19 Mazamuraawee, “Ne [Xoossaa] higgiyaa siiqiyaageetau kumetta sarotettai de7ees; eta mulekka aibinne xubettanau danddayenna” yaagiis. (Maz. 119:165) Yaatiyo gishshau, tumaa siiqa, qassi ha iita wodiyan ‘neeni waana deˈiyaakko akeeka; aadhida eratettaara deˈiya asadan deˈappe attin, aadhida eratetti baynna asadan deˈoppa.’ (Efi. 5:15, 16) Seexaanay Yihoowayyo goynniyaageeta oyqqanau daro piriyaa wottiis. SHin nuuni naagettanaadan maaddiya darobay deˈees. Yihooway nuuni minnidi eqqanaunne “xalahe halaqai dafidi yeddiyo wonddafiyaa tama ubbaa toissanau” koshshiyaabaa immiis!—Efi. 6:11, 16.
[Tohossa qofaa]
^ MENT. 13 Sunttati laamettidosona.
[Oyshata]
[Sinttaa 29n deʼiya misiliyaa qonccissuwaa]
Miishshaa siiqiyoogee issi ura ayyaanaaban cuullana danddayees. Hegee ne bolli gakkennaadan naagetta
[Sinttaa 32n deʼiya misiliyaa qonccissuwaa]
Lambbeechiyoogee woy issi uri nena lambbeechiyo wode coˈˈu giyoogee wodiraa laammanaadan oottana danddayees
