Woosaa Siyiyaagaakko SHiiqa

XOOSSAA ammanoos giya daroti eti a ammaniyoy aybissakko qonccissana danddayokkona. Eti haymaanootee darotoo iitabaa oottiyoy woy Xoossay asay tuggatanaadan paqqadidoy aybissakkokka qonccissana danddayokkona. Eti oottana danddayiyoobay eti erenna Xoossaakko woossiyoogaa xalla.

Gidoppe attin, neeni hegaappe aaruwan Xoossaakko shiiqana danddayaasa. Neeni Xoossaa eriyoogan ne ammanuwaa minttana danddayaasa; hegee neeni a siiqanaadaaninne nashshanaadan oottees. Tumu ammanuwau naqaashi deˈees. (Ibr. 11:1) Neeni Xoossaabaa tumaa tamaarikko, a eranaunne ne dabbodan a haasayissanau danddayaasa. Kase Xoossay deˈiyoogaa siriiddikka woossiya issi issi asati waanidaakko qoppa.

◼ Koyro huuphe yohuwan ibay odettido Patirisho. “Taani tammaa gidiya ta laggetuura deˈishin eti issi gallassi haymaanootiyaabaa tobbiyoogaa doommidosona. Kase Xoossi baawa giya ta aaway nu soo yiida issi Yihoowa Markkeera tobbiyoobaa siyanau koyenna gishshau sooppe kiyada yiidoogaa etau yootaas. Ta laggetuppe issoy, ‘Yihoowa Markkati likke gidennan aggokkona’ yaagiis.

“Haranna, ‘Hegaa eranau eta shiiquwaa aybissi bookko?’ yaagaasu. Nuuni oottidoykka hegaadaana. Nuuni ubbabaa ammanibeennaba gidikkokka, Yihoowa Markkati pashkki giidi mokkiyo gishshau, amaridaageeti ubbatoo shiiqiyoogaa doommida.

“Gidoppe attin, issi Woggaa gallassi ta qofaa laammanaadan oottiyaabaa siyaas. SHiiquwan haasayiyaagee asay tuggatiyoy aybissakko qonccissiis. Asay polo gididi merettidoogaa, qassi nagaraynne hayqoy issi asa gaasuwan doommidi, ubba asaa gakkidoogaa hegaappe kase akeekabeykke. Haasayiyaagee, koyro bitaniyaappe halidabaa asaa naati zaarettidi demmanau Yesuusi hayqqana koshshidoy aybissakkokka qonccissiis. * (Roo. 5:12, 18, 19) Taani sohuwaara ubbabaa akeekaas. Ta wozanan, ‘Tumuppe nuussi qoppiya Xoossi deˈees’ yaagaas. Geeshsha Maxaafaa xannaˈiyoogaa doommada hegaappe kase akeeka erennabaa, giishin aara dabbotana danddayiyo urakko woossana danddayiyoogaa sohuwaara akeekaas.”

◼ Koyro huuphe yohuwan abay odettido Alena. “Issi gallassi Yihoowa Markkati nu soo yiidosona; ta keettaayiyaa saˈan merinau deˈiyoogaa xeelliyaagan eti yootiyoobaa siyanau koyido gishshau, eti soo gelanaadan shoobbaasu. Taani keehippe yiillotaas. Yaatiyo gishshau, eti wuygen deˈishin ta keettaayyiyo qolˈˈo efaada, ‘Cimettoppa. Neeni hegaa malabaa ammanana bessenna!’ yaagaas.

“A zaarada, ‘Yaatikko baada eti likke gidennaagaa qonccissiyaabaa yoota’ yaagaasu.

 “Taani eti likke gidennaagaa bessiyaabaa aybanne yootana danddayikke. SHin eti daro keha; qassi deˈoy merettidi doommidaakko woy lodda laamiyan doommidaakko yootiya maxaafaa taayyo immidosona. He maxaafay yootiyoobay qonccenne ammanttiya naqaashi deˈiyooba gidiyo gishshau, taani Xoossaabaa gujjada erana koshshees gaada kuuyaas. Yihoowa Markkatuura Geeshsha Maxaafaa xannaˈiyoogaa doommaas, yaatada he maxaafay yootiyoobay kase taani haymaanootiyaabaa qoppiyo ubbabaappe keehi dummatiyoogaa sohuwaara akeekaas. Yihoowabaa era era biyo wode, ta wozanaabaa ayyo woosan yootiyoogaa doommaas. Taani qoppiyo issi issi ufayssennabay deˈiyo gishshau, maaddanaadan akko woossaas. Ta woosaa Yihooway siyidoogaa ammanettays.”

◼ Inggilize biittan deˈiya Andira. “Taani saynisiyan keehi ammaniyaabanne a eranau koyiyaaba gidikkonne, lodda laamiyan ammaniyoy asay hegee likke giyo gishsha xallaassa. Ha alamiyan hanettiya iitabaa ubbaa gaasuwan Xoossan ammanikke.

“Gidikkokka, issi issitoo hagaadan qoppays: ‘Xoossay deˈiyaaba gidikko, hegaara gayttida  ubbabaa eranau koyays. Danoynne olay daridoy aybissee?’ Tana metoy gakkiyo wode maaduwaa demmanau issi issitoo woossays, shin ookko woossiyaakko erikke.

“Hegaappe simmin, Yihoowa Markkati attamissido, Ha Alamee Bashshaappe Attanee? giya trakttiyaa issi uri ta keettaayeessi immiis. Hegee taani darotoo oychiyo oysha. He trakttee taani, ‘Geeshsha Maxaafay he oyshau zaariyoobaa qoppana bessiishsha?’ gaanaadan oottiis. Guyyeppe, taani shemppiyo gallassi issi uri, Geeshsha Maxaafay Xoossa Qaaleeyye woy asa Qaalee? * giya maxaafaa taassi immiis. Geeshsha Maxaafay tumu saynisiyaara moggottiyoogaa taani akeekido wode, Geeshsha Maxaafaabaa loyttada erana koshshees gaada qoppaas. Yaatiyo gishshau, taani Geeshsha Maxaafaa xannaˈanaadan issi Yihoowa Markkay oychin eeno gaas. Taani Yihoowa halchuwaa akeekido wode, i taani koyidobaa woosan yootananne aara dabbotana danddayiyo ura gidiyoogaa eraas.”

◼ Londdone kataman Protesttantte haymaanootiyan diccida Jaano. Haymaanootee loˈˈo milatiiddi iitabaa oottiyoogeenne tuggay daridoogee taani haymaanootiyaa agganaadan oottiis. Kolloojjiyan tamaariyoogaakka agga bayada, miishshaa demmanau yexxiyoogaanne gitaariyaa kaaˈiyoogaa doommaas. Taani Paataara gayttidoy he wode. I Kaatolike haymaanootiyan dicciis, shin taagaadan ammanuwaa aggiis.

“Nuuni, timirttiyaa aggidanne Arshsho bagga biittaa haymaanootiyaa dosiya hara amaridaageetuura issi ona keettan deˈoos. Darotoo saˈaa qamissidi, deˈuwan deˈiyoy aybissakko daro saatiyau tobboos. Taaninne Paati Xoossan ammanennaba gidikkokka, deˈoy merettanaadan oottida wolqqay deˈennan aggenna giidi qoppoos.

“Nuuni muuziqaara gayttida oosuwaa koyanau Inggilizen huuphessa baggi bi simmin, nu naˈay yelettiis. Issi qammi nu naˈay sahettin, taani an ammanenna Xoossaakko woossaas. Hegaappe daro takkennan, taaninne Paati darotoo ooyettiyo gishshau, naˈaa ekkada sooppe kiyaas. He wodekka, woosaa siyiyay deˈikko maaddanaadan woossaas. Taani erabeennaba gidikkonne, Paatikka woossiis.

“Hegaappe simmin he gallassi, naaˈˈu Yihoowa Markkati Paata soo yiidi, Geeshsha Maxaafaappe goˈˈiya zoriyaa ayyo yootidosona. Paati taayyo silkkiyaa dawalidi, aara issippe Yihoowa Markkatuura Geeshsha Maxaafaa xannaˈana koyiyaakkonne tana oychiis. Xoossaa ufayssanau, nuuni azinanne macho gidiyoogaa higgiyan koyettiyaagaadan mazggafissana koshshiyoogaa sohuwaara erida. Nu dabbotay duuxxana haniyo gishshau, hegaadan oottana danddayennabadan qoppida.

“Nuuni Geeshsha Maxaafaa hiraagaa poluwaabaa, tuggay gakkiyo gaasuwaanne Xoossaa Kawotettaabaa loyttidi eranau koyida. Loddan loddan, Xoossay asaassi qoppiyoogaa erida, qassi i azaziyoobaa oottanau koyida. Higgiyan koyettiyaagaadan azinanne macho gidida. Xoossaa Qaalan deˈiya aadhida eratettay nu heezzu naata dichanau maaddiis. Yihooway nu woosaa siyidoogaa ammanettoos.”

Naqaashaa Ne Huuphe Pilgga

Miilooniyan qoodettiya haratuugaadan, ha huuphe yohuwan etabaa beˈido asati worddo haymaanootiyan cimettibookkona; qassi asay tuggatanaadan Xoossay paqqadidoy aybissakko eridosona. Qommoora beˈido asati Yihooway tumuppe woosaa siyiyoogaa ammananaadan oottiday, eti Geeshsha Maxaafaa suure akeekidoogaa gidiyoogaa hassayay?

Xoossay deˈiyoogaa qonccissiya naqaashaa pilggana koyay? Neeni Yihoowabaa tumaa, qassi ‘woosaa Siyiyaagaakko’ shiiqana danddayiyo ogiyaa eranaadan Yihoowa Markkati nena maaddanau ufayttoosona.—Maz. 65:2.

[Tohossa qofata]

[Sinttaa 10n deʼiya misiliyaa qonccissuwaa]

“Taani Yihoowa halchuwaa akeekido wode, i taani koyidobaa woosan yootananne aara dabbotana danddayiyo ura gidiyoogaa eraas”

[Sinttaa 9n deʼiya misiliyaa qonccissuwaa]

Naqaashaynne Xoossaabaa tumaa eranau amottiyoogee tumu ammanuwau koshshiyaaba