Woosaa Siyiyaagee Aybissi Tuggaa Paqqadidee?

ISSI issi asay woossiyaaba gidikkokka, Xoossay deˈiyoogaa sirees. Eti siriyoy aybissee? Eti ha alamiyan daro tuggay deˈiyoogaa beˈiyo gishshataassa gidennan aggenna. Xoossay asay tuggatanaadan paqqadidoy aybissakko qoppa eray?

Xoossay asay haˈˈi deˈiyoogaadan polo gidennaadaaninne tuggatanaadan medhidee? Asaa naati tuggatanaadan koyiya xoossa nuuni bonchana danddayokko. SHin ane hagaa qoppa: Neeni issi ooratta kaamiyan maalaalettaydda yuuya aadhada xeelliyo wode, issi baggaara moorettidaagaa beˈikko, a medhidaagee hegaadan oottiis guutii? Geennaagee qoncce! Neeni he kaamiyaa medhidaagee pala loyttidi medhiis, shin issi uri woy issibay hegaadan mooriis gaada qoppana.

Hegaadankka, nuuni merettidabay giigido ogiyan maalaalettiiddi, asaa naatu bolli gakkiya shori baynnabaanne tuggaa beˈiyo wode, woygidi kuuyana koshshii? Xoossay koyro bitaniyaanne maccaasiyo polo oottidi medhidaba gidikkonne, eti banttana qohiyaabaa guyyeppe oottidoogaa Geeshsha Maxaafay yootees. (Zaa. 32:4, 5) Xoossay hegaa giigissanau, giishin azazettiya asaa naata zaarettidi polo oottanau qaalaa gelidoogee ufayssiyaaba. Yaatin, i daro wodiyaa takkidoy aybissee?

Daro Wodiyaa Takkidoy Aybissee?

Hegaa gaasoy, Asaa naata ooni haarana bessi? giya oyshaara gayttidaba. Yihooway asaa naati banttana banttarkka haaranaadan mule qoppibeenna. Eti au haarettanaadan koyiis. Geeshsha Maxaafay, “ba hemetaa suurissanaagee  aawu shene gidennaagaa” yootees. (Erm. 10:23) Azzanttiyaabay, koyro asati Xoossaa haaruwaa ixxidi makkalanau dooridosona. Eta iita oosoy eta nagarancha oottiis. (1 Yoh. 3:4) Hegaappe denddidaagan, eti polo asa gidiyoogee attiis, qassi banttananne bantta naata qohiyaabaa oottidosona.

Yihooway shaˈan qoodettiya layttau asay bana barkka haaranaadan paqqadiis; shin asaa naati banttana banttarkka haarana danddayennaagaa taarikee qonccissiis. Asa haaroy ubbay asay tuggatanaadan oottiyoogaakka taarikee qonccissees. Olaa, danuwaa, pirdda pacaa woy harggiyaa xayssida kawotetti baawa.

Xoossay Waatidi Giigissanee?

Xoossay mata wode, xilloy deˈana ooratta alamiyaa ehaanaagaa Geeshsha Maxaafay yootees. (2 PHe. 3:13) Bantta dosan dooridi, Xoossaanne hara asaa siiqiyaageetu xallay he alamiyan deˈana.—Zaa. 30:15, 16, 19, 20.

Geeshsha Maxaafay matattiiddi deˈiya ‘pirddaa gallassan,’ Xoossay tuggaanne hegau gaaso gididaageeta xayssanaagaa yootees. (2 PHe. 3:7) Hegaappe simmin, Xoossay sunttido Kawoy, Yesuus Kiristtoosi azazettiya asa naata haarana. (Dane. 7:13, 14) Yesuusa kawotettay ay oottanee? Geeshsha Maxaafay, “Ashkketi biittaa laattana; eti sarotettaaninne duretettaani ufaittidi daana” yaagees.—Maz. 37:11.

Saluwan uttidi haariya Kawoy, Yesuusi harggiyaa, ceegatettaanne hayquwaa gujjin, ‘deˈuwaa pultto’ gidida Yihoowa bolli asaa naati makkalidoogaa gaasuwan gakkida qohuwaa giigissana. (Maz. 36:9) Yesuusi siiquwan haariyo wode eeno giidi azazettiyaageeta ubbaa pattana. I hariyo wode, Geeshsha Maxaafay yootiyo kaallidi deˈiyaabati polettana:

◼ “Xiyoonen de7iya ooninne, ‘Taani harggais’ yaagenna; yan de7iya asaa nagarai atto geetettana.”—Isi. 33:24.

 ◼ “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajj. 21:4.

Xoossay tuggaa ubbaa xayssanau gelido qaalaa mata wode polanaagaa eriyoogee minttettiyaaba gidennee? He wode gakkanaashin, i nu woosaa siyiyoogaa ammanettana danddayoos; gidikkokka, i asay tuggatanaadan haˈˈissau paqqadiis.

Xoossay deˈees. I neeni kayyottadanne azzanada yootiyoobaakka siyees. Qassi i nena azzanttiyaabaynne sirissiyaabay ubbay xayiyo wode, neeni ufayttada deˈin beˈanau laamotees.