Woosaa Siyiyay Oonee?

WOOSAA Siyiyay deˈikko, i Medhidaagaa gidana bessees. Asaa naatu guuggiyaa Medhidaagaappe attin, hara uri neeni qoppiyoobaa erana danddayii? Woosaa siyananne asaa naata koshshiyaaban maaddana danddayiyay appe hari oonee? SHin neeni, ‘Medhidaagan ammaniyoogee bessiyaabee?’ gaada qoppana danddayaasa.

Daroti Medhidaagee deˈiyoogaa ammananau, ha wodiyaa saynisiyan erettida naqaashaa ammanana koshshennabadan qoppoosona. SHin Xoossan ammaniyoogee saynisiyaara moggenna giidi qoppiyoogee likke gidenna. Kaallidi deˈiyaagaa qoppa.

◼ Mata wode xinaatiyan, Amarkkaa biittan 21 erettida yuniveristtetun deˈiya 1,646 saynisiyaa profeeseretu giddon heezzaappe issi ura xallay ba qofaa qonccissanau “Taani Xoossan ammanikke” giyaagaa dooriis.

Daro saynttistteti Xoossay deˈiyoogaa ammanoosona.

Medhidaagee Deˈiyoogau Naqaashaa

Nuuni woosaa Siyiyaagee deˈiyoogaa naqaashi baynnan ammanana koshshii? Mule koshshenna. Ammano giyoobay issibaa naqaashi baynnan ammaniyoogaa giyoogee bala qofa. Geeshsha Maxaafay ammanoy “be7anau danddayennabaa erissiyaagaa” gidiyoogaa yootees. (Ibr. 11:1) Hara Geeshsha Maxaafaa birshshettay ammanoy “nuuni beˈennabay tuma gidiyoogaa nuna erissiyaaba” yaagees. (Addisu Medebenyaa) Leemisuwau, eraadooniyaa beetaa beˈana danddayakka, shin cenggurssaa sissiya, ayfiyan beettenna he beetay deˈiyoogaa ne moybaale silkkee erissees; yaatiyo gishshau hegaa mala beetay deˈiyoogaa ammanaasa. Hegaadankka, woosaa Siyiyaagaa nuuni beˈana danddayennaba gidikkokka, i deˈiyoogaa ammananaadan oottiya naqaashaa beˈana danddayoos.

Xoossay deˈiyoogaa qonccissiya naqaashaa awuppe demmana danddayiyoo? Nu yuushuwan  deˈiyaabaa xeelliyoogaa xallan akeekoos. Geeshsha Maxaafay, “Aissi giikko, keetta ubbaa keexxidaagee issi asa; shin ubbabaa keexxidaagee Xoossaa” yaagees. (Ibr. 3:4) Ha qofaa maayay? Geella neeni ubbabay giigido, deˈoy doommido woykko saˈan deˈiya ubbabaappe aadhidi muttumurettida asaa naatu guuggee giigido ogiyaa qoppiyo wode, asaa naatuppe aadhiya uri deˈees gaada qoppennan aggakka. *

SHin Xoossaabaa nuuni merettidabaappe tamaarana danddayennabay deˈees. Xoossaabaa merettidabaappe eriyoobay, gorddettida penggiyaakko issi uri hemettidi yiyoogaa siyiyoogaa mala. Neeni penggiyaa matan issi uri deˈiyoogaa eraasa, shin i oonakko erakka. I oonakko eranau penggiyaa dooyana koshshees. Ubbabaa Medhidaagee oonakko eranau nuuni hegaa malabaa oottana koshshees.

Geeshsha Maxaafay Xoossaabaa erau pengge. Neeni he penggiyaa dooyada a giddon deˈiya hiraagatuppe amaridaageetanne eti polettidoogaa akeekiyo wode, Xoossay deˈiyoogau naqaashaa demmaasa. * Hegaa bollikka, Xoossay asaayyo oottido, Geeshsha Maxaafan xaafettidabay woosaa Siyiyaagaa eeshshaa qonccissees.

Woosaa Siyiyaagee Ay Mala Xoossee?

Woosaa Siyiyaagee neeni erana danddayiyo  ura gidiyoogaa Geeshsha Maxaafay qonccissees. Siyidi akeekana danddayiyay qoppiya ura xalla gidiyoogee qoncce. Geeshsha Maxaafay, “Abeet woosaa siyiyaagoo, asai ubbai neekko yaana” giyoogee minttettiyaaba. (Maz. 65:2) I ammanuwan baakko woossiyaageetu woosaa siyees. Qassi ayyo sunttay deˈees. Geeshsha Maxaafay, “GODAI [“Yihooway”, NW] iitatuppe haakkees; shin xillotu woosaa siyees” yaagees.—Lee. 15:29.

Yihooway issiban ufayttana woy azzanana danddayees. I ‘siiqo Xoossaa,’ qassi ‘ufayttiyaa Xoossaa.’ (2 Qor. 13:11; 1 Xim. 1:11, NW) Iitatettay darido wode ayyo siyettidabaa xeelliyaagan Geeshsha Maxaafay, “Ba wozanan keehippe seelettiis” yaagees. (Doo. 6:5, 6) Xoossay asaa paaccanau tuggay gakkanaadan oottees giyoobay tuma gidenna. Geeshsha Maxaafay, “Ubbaa Danddayiya Xoossai iitabaa mulekka oottenna” yaagees. (Iyy. 34:10) Gidoppe attin, ‘Xoossay ubbabaa danddayiya Medhidaagaa gidikko, aybissi tuggaa coˈˈu giidi xeellii?’ gaada qoppana danddayaasa.

Yihooway asaa naatuyyo koyidobaa dooriyo maataa immiis, hegee Xoossay ay mala Xoossakko nuussi qonccissees. Nuuni koyidoogaadan deˈanau dooriyo maatay xoqqu oottidi xeelliyooba gidennee? SHin daroti he maataa bessenna ogiyan goˈettidi, banttau tuggatiyoogee, qassi harati tuggatanaadan oottiyoogee azzanttiyaaba. Haˈˈi keehippe qoppana bessiya oyshay, Xoossay koyidobaa dooriyo maataa asaa naata diggennan tuggaa xayssana danddayiyoy ayba ogiyaanee? giyaagaa. Ha oyshaa kaalliya huuphe yohuwan beˈana.

[Tohossa qofata]

[Sinttaa 5n deʼiya misiliyaa qonccissuwaa]

Haymaanootee Oottiyoobaa Gaasuwan Siray?

Daro asay woosaa Siyiya qarettiyaagee deˈiyoogaa siranaadan oottiday haymaanootiyaa gidiyoogee azzanttiyaaba. Haymaanootee olaaninne shabbirssan geliyoogee, qassi naatu bolli shori baynnabaa oottiyoogaa coˈˈu giidi xeelliyoogee, woossiya asaykka, “Taani Xoossan ammanikke” gaanaadan oottiis.

Haymaanootee darotoo iitabau gaaso gidiyoy aybissee? Iita asay haymaanootiyaa sunttan iitabaa oottiyo gishshataassa. Iita asati Kiristtaane haymaanootiyaa goˈettidi iitabaa oottanaagaa Geeshsha Maxaafay kasetidi yootiis. Kiitettida PHauloosi, “kaalliyaageetakka bantta geeduwaa kaalettanau wordduwaa haasayiya asati [eta] giddoppe denddanaagaa” Kiristtaane cimatuyyo yootiis.—Oos. 20:29, 30.

Xoossay worddo haymaanootiyaa shenetees. Xoossaa Qaalaa, Geeshsha Maxaafay, “sa7an worido ubbatu [suuttan]” worddo haymaanootee oyshettiyoogaa yootees. (Ajj. 18:24) Worddo haymaanootee siiqo gidida, tumu Xoossaabaa asaa tamaarissibeenna gishshau, Xoossaa xeelan suuttaa gussiis.—1 Yoh. 4:8.

Woosaa siyiyaagee haymaanootee huqqunniyoogeetuyyo qarettees. Xoossay asaa naata siiqiyo gishshau, loˈˈo milatiya iita haymaanootiyaa ubbaa bolli mata wode Yesuusa baggaara pirddana. Yesuusi hagaadan giis: “He gallassi daro asai tana, ‘Nu Godau, nu Godau, nuuni ne sunttan hananabaa yootibookkonii?’ . . . yaagana. Taani he wode eta, ‘Taani inttena mulekka erikke; iitabaa oottiyaageeti intte ta matappe haakkite’ yaagana.”—Maa. 7:22, 23.