Mata Wode Hanana Maalaalissiyaabaa

ASAA shukkiya issi dottoree nena shukkanau keeri uttiis; shin he dottoree hegaa malabaa shukki erennaagaa erikko waatuutii? Hegee nena hirggissanaagee erettidaagaa. Hara baggaara, he dottoree hegaa malabaa oottiyoogan gooba gidiyoogaa, qassi neegaa mala sahuwaa sahettiya, xeetan qoodettiyaageeta loˈˈo hanotan shukkidoogaa erikko shin waatuutii? I nena maaddana danddayiyoogaa keehi ammanettikkii?

Xoossaa Yihooway gooba dottoriyaa mala; ha alamee qassi shuhettana bessiya hargganchaa mala. Yihooway ha saˈaa zaarettidi Gannate oottanaagaa ba Qaalaa, Geeshsha Maxaafan yootiis. (2 PHe. 3:13) SHin hegee hananau, iitatettay ubbay muleera xayana koshshees. (Maz. 37:9-11; Lee. 2:21, 22) Xoossay saˈaa zaarettidi gannate oottanaappe kase, ha wodiyan deˈiya azzanttiyaabay ubbay muleera xayana bessees. Hegaadan oottanau maalaalissiyaabay hanana koshshees!—Ajj. 21:4, 5.

Yihoowa Markkati hegaa mala gitabay mata wode hananaagaa ammanoosona. Aybissi? Xoossaa Yihooway hagaappe kase oottido maalaalissiyaabay ba gelido qaalaa polanau au wolqqay deˈiyoogaa bessiyo gishshataassa. Geeshsha Maxaafan xaafettida, usuppun maalaalissiyaabatanne sinttappe hanana geetettidabata geeddarssa.

 [Sinttaa 7n deʼiya misiliyaa qonccissuwaa]

Geeshsha Maxaafay hanana giidi yootiyoobaa neeni aggennan tamaaranaadan minttettoos. Ne ammanoy minniyo wode, ne hidootay, giishin Yihooway oottiyo maalaalissiyaaban neeni goˈettanau naagiyo hidootay minnana.

[Sinttaa 7n deʼiya misiliyaa qonccissuwaa]

MAALAALISSIYAABAA:

YESUUSI GUUTTA OYTTAANNE MOLIYAA SHAˈAN QOODETTIYA ASAA MIZIIS.

—MAA. 14:13-21; MAR. 8:1-9; YOH. 6:1-14.

QAALAA GELIDOBAA:

“Biittai kattaa mokkiis; Xoossai, nu Xoossai nuna anjjiis.”—MAZ. 67:6.

HEGAAPPE NUUNI AKEEKIYOOBAA:

HE WODE OONINNE NAMISETTENNA.

MAALAALISSIYAABAA:

YESUUSI QOOQETI XEELLANAADAN OOTTIIS.

—MAA. 9:27-31; MAR. 8:22-26.

QAALAA GELIDOBAA:

“He wode, qooqetu aifee dooyettana.”

—ISI. 35:5.

HEGAAPPE NUUNI AKEEKIYOOBAA:

QOOQETU AYFEE DOOYETTANA.

MAALAALISSIYAABAA:

YESUUSI BOLLAY SILIDOOGEETA PATTIIS.

—MAA. 11:5, 6; YOH. 5:3-9.

QAALAA GELIDOBAA:

“Wobbeti genessadan guppana.”

—ISI. 35:6.

HEGAAPPE NUUNI AKEEKIYOOBAA:

HARGGANCHA UBBAY PAXANA.

MAALAALISSIYAABAA:

YESUUSI DUMMA DUMMA HARGGIYAAPPE ASAA PATTIIS.

—MAR. 1:32-34; LUQ. 4:40.

QAALAA GELIDOBAA:

“Xiyoonen de7iya ooninne, ‘Taani harggais’ yaagenna.”—ISI. 33:24.

HEGAAPPE NUUNI AKEEKIYOOBAA:

HARGGE UBBAY XAYANA. NUUNI POLO PAYYATETTAA DEMMANA.

MAALAALISSIYAABAA:

YESUUSI MERETAA WOLQQATA AZAZIIS.

—MAA. 8:23-27; LUQ. 8:22-25.

QAALAA GELIDOBAA:

“He wodetun asati keettata keexxidi, etan de7ana; woiniyaa turatakka tokkidi, eta aifiyaa maana. Eti coo daafurokkona.”— ISI. 65:21, 23.

“Sugettainne huqqunnai neeppe haakkana. Neeni aibaassikka yayyakka; dagamaikka neekko shiiqenna.”—ISI. 54:14.

HEGAAPPE NUUNI AKEEKIYOOBAA:

MERETAY GATTIYO DAAFABAY ATTANA.

MAALAALISSIYAABAA:

YESUUSI HAYQQIDAAGEETA DENTTIIS.

—MAA. 9:18-26; LUQ. 7:11-17.

QAALAA GELIDOBAA:

“Duufuwan de7iyaageeti . . . duufuwaappe gaxi kiyana.”—YOH. 5:28, 29.

“Abbai ba giddon de7iya haiqqidaageeta immiis; haiqoinne Si7oolee bantta giddon de7iya haiqqidaageeta immidosona.”—AJJ. 20:13.

HEGAAPPE NUUNI AKEEKIYOOBAA:

NUUNI SIIQIYO HAYQQIDAAGEETI DENDDANA.